Juifisɔ tire kpɩɛrɛ wɩ faa awɩ ca kpal khɛrsɔ
10
1 Dabɔɔkɛ Ɛsɩdɩrasɩ hanɩ le a gburõkhu Thãgba fʋɔr cɔ ƴɛbʋrɔ da n bɩɛl Thãgba da n khɩɩna, da n bɩɛlna sopuu faarɛ thale, tibil jɔjʋɔ, kona na khɛra na bɩsana, kɛ dɔnɩ Ɩjɩrayɛl bɩsana kpar jɛ a diirǝ; dɩ tɩbɩla ɓibi na n khɩɩ jɔɔ ka. 2 Dɩ Sekania, Yehɩɛlɩ bikuun, kɛ thɛnɩ Elamɩ mǝllǝ gba thɩmɩɩr a so Ɛsɩdɩrasɩra aa: Sɩ cʋʋrɛ puu kɔ̃tɩ̃ɩ asɩ Thãgbara mɔ̃ sɩ henɩ ca kpɩɩ khɛraakɛ thɛnɩ caarsɔraakɛ hanɩ kɛ dɩɩra. Sɩ na gele fɛw, nũ pɛrɛ hale 'lo Ɩjɩrayɛl bɩsanana ga thɩmɩɩraale. 3 Nɛnɛ̃kɛ sɩ ʋlfɛnɛ nakha nɔ bɩɛl ʋlfɛrɛ na asɩ Thãgba, a faa khɛrasɔɔle fɛw, na awɩ bɩsãsɔ mɔ̃kɛ fɛr Ɛsɩdɩrasɩ, asɩ kɔ̃tɩ̃ na wɩrɛ fɛʋʋkɛ n maanɩ asɩ Thãgbaa jɔfʋsɔ sonɩ. Sɩ cʋɛ mɔna jɔfʋ hanɩ! 4 Ɩrɛ, gɩdonɩ fɛr thɩmɩɩra telẽ dɩ fa naar. Dɩ sɛrɛ, sɩ hale sa khu fer. Hanana 'lar a cʋɛ thɩ̃ɛ. 5 Dɩ Ɛsɩdɩrasɩ ɩɩrɛ a cʋʋ bonɩ jidaar kɔ̃tɩna na Levɩɩ məlsɔ na Ɩjɩrayɛl bɩsana fɛw, wɩ ʋlfɛnɛ ɩna cʋʋrɛ mɔ̃kɛra gɩrɛ mɩanɩɩkɛ sonɩ. Dɩ wɩ ʋlfɛrɛ. 6 Mɔ̃ gɩ pɩnɩ Ɛdɩrasɩ ɩɩrɛ le Thãgba fʋɔr cɔ ƴɛbʋrɔ a jal Elɩasɩbɩɩ bikuun Yohanaa cɔ. Sɩ mɔ̃ a danɩ le, aa kho dikora', aa ɲɔ ɲʋɔna', gɩdonɩ haar kʋɛsʋʋrɛ dɩɩ do puureekɛ wɩrɛ wɩ kɔɔ fʋlɛnɩ a jalna dɩ kpɩɩra sɩ dɩ wɩ kɛr bir ɩ̃ cʋʋnɩ dɔ nɔɔ. 7 Dɩ wɩ thɔnanɛ thɩmɩɩ Jerujalɛm dɩɩra na Juda bǝənnǝ, kɛ sɔnɩ aa wɩrɛ fɛʋʋkɛ wɩ kɔɔ fʋlɛnɩ a jalna dɩ kpɩɩra sɩ dɩ wɩ kɛr bir n gbɛba kha Jerujalɛm. 8 Dɩ tibil wo tibilikɛ na pʋɔnɩ le wire yẽtherɩ bɩnɔ mɔ̃kɛ kɔ̃tɩna na ƴɛkʋla sona', wa taaraarɛ ɔɔ thɩ̃sɔ fɛw sɩ wɩ weguu wɩrɛraakɛ wɩ kɔɔ fʋlɛnɩ jalna dɩ kpɩɩra sɩ dɩ wɩ kɛr biri thɩ̃thɩɩn wɩ faa. 9 Dɩ kona fɛw Juda na Bɛ̃jamɛ̃ɛ mǝlsɔra kpar a jɛ Jerujalɛm wire yẽtherɩ bɩnɔna. Ɲɛ̃be yʋɔr phe bire sɩporɩa wire kpelena gɩ. Dɩ tɩbɩla fɛw jɩɩlɛ le Thãgba fʋɔr cɔ gbasara, dɩ wa n jẽ dɩɩ do thɩmɩɩrɩle dɔ nɔɔ, na dakha thãgba ɲʋɔnaakɛ n dananɩ. 10 Dɩ Ɛsɩdɩrasɩ, bonɩ jidaar ɩɩr jɩɩl a so war aa: Ca kpal khɛraakɛ nɩ henɩ, puu kɔ̃tɩ̃ɩ gɩ dɩ nɩ cʋʋ a bir dɛbɩrɔ Ɩjɩrayɛl bɩsanaa sopuu. 11 Nɛnɛ̃kɛ, nɩ cana anɩ dɩpa Thãgba Kɔ̃tɩn, anɩ thɩsɔɔ Thãgbaa ƴɛra; a cʋɛ ɔɔ tuur. Nɩ lea kpɩɩ sa faa caarsɔɔkɛ hanɩkɛ dɩɩra na khɛraakɛ dɔnɩ ca kpal khɛra. 12 Dɩ tɩbɩla fɛw tu na nɔ kheu aa: Ɔɔ, sobɔr gɩ. Sɛr hɩna a na cʋʋ mɔ̃kɛra fɩ sonɩ. 13 Sɩ sɩ jɔrɛ ka; dɩ wo thãgba ɩ̃ bɔɔ gɩ, dɩ sa puno na jɩɩl jɩɛra ga. Dɩrakɛ, ga do wi bɩɛl agɩbo wire yeɲɔ thɔma ga, gɩdonɩ tibil jɔjʋɔ hakɛ asɩ thɩ̃thɩɩn, kɛ cʋɛnɩ sopuu caarɩlera. 14 Gɛr gɩ, asɩ kɔ̃tɩ̃sɔ n tɔɔ kɛ tɩbɩla fɛʋʋ irǝ; sɩ wɩrɛ fɛʋʋkɛ hɛnɩ ca kpɩɩ khɛrasɔ a hana asɩ dʋɔsɔ na n ɩ̃ kpa kha kpa kha wiresɔraakɛ wa dʋnɩ a na ha wɩ. Wɩ ɩna kha na awɩ dʋɔ kɔ̃tɩ̃sɔ, na awɩ sogʋʋrdarasɔ phaphapha, thɩɛna n puno gɩ gʋʋr; gɩ do nɔɔ asɩ Thãgbaa nĩkhi kheekɛ a gbana sɩnɩ n ie. 15 Yonatã, Asayɛlɩ bikuun, na Yajɩa, Tɩkɩvaa bikuun, wɛr dɩbara bɔ kpɩɛrɛɛle. Dɩ Mesulam na Sebetayɩ, kɛ dɔnɩ Levɩɩ mǝl kpaan awɩ kpɩɛra. 16 Sɩ Ɩjɩrayɛl bɩsã wɩrɛ sɛnɩ, kɛ wɩ kɔɔ fʋlɛnɩ a jalna dɩ kpɩɩra sɩ dɩ wɩ kɛr bir, ture kpɩɛrɛɛkɛ wɩ tini. Dɩ Ɛsɩdɩrasɩ bonɩ jidaar, wer wɩrɛ dɔnɩ cɔdaar kona, awɩ isɔ mɔ̃ wɩ hanɩ thɩ kʋ̃ɔsɔra, a phiir wɩ. Dɩ tɩbɩlaale toore ɲɛ̃be yʋɔr sɩporɩb caca wire a fʋ wɩ gʋʋr thɩɛna. 17 Dɩ caca sɩporɩc caca wirǝ, wɩ gʋʋrɛ wɩrɛ fɛʋʋkɛ kɔɔ hɛnɩ ca kpɩɩ khɛra, awɩ thɩmɩɩ a pɩ.Juifisɔɔkɛ hɛnɩ ca kpɩɩ khɛra, awɩ isɔ ha gɩrɛ
18 Bonɩ jidaraa thɩ̃thɩɩn, ɩkha hale Yosadakɩɩ bikuun Yesuaa mǝlsɔra, na ɔɔ omɩsɔɔ mǝlsɔra, a he ca kpɩɩ khɛrara. Wɛr dʋɔn: Maaseya na Eliejɛɛr na Yaarɩbɩ na Gedalɩa. 19 Dɩ wɩ khaan ɲẽbire, sɩ wɩ faa awɩ khɛrsɔ, sɩ wɩ ti banakɩɩr wɩ jinǝ so hɛl bonɩɛ wɩ pɛr war awɩ dɩ para. 20 Ɩmɛɛrɩ mǝlsɔra, Hananɩ gɩ, na Jebadɩa. 21 Harɩmɩ mǝlsɔra, Maaseya gɩ, na Elɩa, na Semaya na Yehɩɛl, na Ujɩa. 22 Pasesuurɩ mǝlsɔra, Elɩohenayɩ gɩ na Maaseya, na Ɩsɩmayɛl, na Netaneyɛl, na Yojabadɩ, na Elasa. 23 Levɩɩ mǝlsɔɔ thɩ̃thɩɩn, Yojabadɩ gɩ, na Sɩmeɩ, na Kelayaakɛ wɩ n wenɩ dakha Kelɩta, na Petahɩa, na Yehuda, na Eliejɛɛr. 24 Nɩ khɩ̃daraa thɩ̃thɩɩn, Elɩasɩbɩ gɩ. Lõ bɛrdaraa thɩ̃thɩɩn, Salum gɩ na Telɛm, na Urɩ
25 Ɩjɩrayɛl bɩsã khɩnaa thɩ̃thɩɩn; Parɔsɩɩ mǝlsɔra; Ramɩa gɩ na Ɩjɩa na Malkɩa na Mɩamɛ̃ na Eleajaar na Malkɩa na Benaya. 26 Elamɩ mǝlsɔra, Matanɩa gɩ na Jakarɩ na Yehɩɛl na Abɩdɩ na Yeremɔtɩ na Elɩa. 27 Jatuu mǝlsɔra, Elɩohenayɩ gɩ, na Elɩasɩbɩ, na Matanɩa, na Yeremɔtɩ na Jabadɩ na Ajɩja. 28 Bebayɩɩ mǝlsɔra, Yohana gɩ na Hananɩa na Jabayɩ na Atɩlayɩ. 29 Banɩɩ mǝlsɔra, Mesulam gɩ, na Malukɩ na Adaya na Yasubɩ na Seal na Yeremɔtɩ. 30 Pahatɩ-Moabɩɩ mǝlsɔra, Adɩna gɩ na Kelal na Benaya na Maaseya na Matanɩa na Besalɛl na Bɩnʋɩ, na Manase. 31 Harɩmɩɩ mǝlsɔra, Eliejɛɛr gɩ na Ɩsɩa na Malkɩa na Semaya na Sɩmɔ̃ 32 na Bɛ̃jamɛ̃ na Malukɩ na Semarɩa. 33 Hasumɩ mǝlsɔra, Matenayɩ gɩ, na Matata, na Jabadɩ, na Elifelɛtɩ na Yeremayɩ na Manase na Sɩmeyɩ. 34 Banɩɩ mǝlsɔra, Madayɩ gɩ, na Amɩram, na Uyɛl; 35 na Benaya, na Bedɩa, na Keluhu 36 na Vanɩa, na Meremɔtɩ na Elɩasɩbɩ 37 na Matanɩa na Matenayɩ na Yasayɩ 38 na Banɩ na Bɩnʋɩ na Sɩmeyɩ 39 na Selemɩa na Natã na Adaya 40 na Makɩnadebayɩ na Sasayɩ na Sarayɩ 41 na Ajarɛl na Selemɩa na Semarɩa 42 na Salum na Amarɩa na Jojɛfɩ 43 Neboo mǝlsɔra, Yeyiyɛl gɩ, na Matɩtɩa na Jabadɩ na Jebɩna na Yadayɩ na Jowɛl na Benaya. 44 Wele fɛw dɔ wɩrɛ kɔɔ hɛnɩ ca kpal khɛra. Dɩ ɩkhaa khɛrsɔ wɛra kɔɔ hananɛ bɩsana.