Ɩjɩrayɛl bɩsanaakɛ hɛnɩ ca kpal khɛraada
9
1 Mɔ̃ gele pɩnɩ, Ɩjɩrayɛl bɩsanaa kɔ̃tɩ̃sɔ pɔr a so mar aa: Ɩjɩrayɛl bɩsana na bonɩ jidara na Levɩɩ məlsɔ na lee kpɩɩ na ca wɩrɛ hanɩ kɛ dɩɩra ga. Wɩ n cʋʋrɛ kpɔ̃kpɔrɔ̃ thɩ̃ caarɩkɛra Kanãadara na Hɛtɩɩ mǝlsɔ na Perejɩdara na Jebusidara na Amɔ̃ɔ mǝlsɔ na Moabɩdara na Ejipitidara na Amɔɔr məlsɔ n cʋʋnɩ. 2 Wɛrɩ thɛthɛrakɛ gbaar khɛra ca kpalaalee thɩ̃thɩɩn a he; a gba dakha a ha awɩ bikũusɔ; a ɲaɲaan caarɩkɛ Thãgba phiirni na caarsɔɔkɛ hanɩ kɛ dɩɩra. Wɩrɛ dʋɔnɩ kɔ̃tɩna na thɔthɔɔdara, wɛra dʋɔn cacadara a cʋʋ puu caarɩle. 3 Ɔbɔɔkɛ mɩ nɩɛnɩ gele, mɩ ɓǝǝre ɩ̃ kẽkẽ tona na ɩ̃ gbɔɔlɔ̃, a belna yʋʋ na nɔkhuusia sa too na ha kʋɛrɛ. 4 Dɩ mɩ toore na ha kʋɛrɛra thale a dana dʋɔr bonɩ ji bɔɔ. Dɩ wɩrɛ fɛʋʋkɛ Ɩjɩrayɛlɩ Thãgbaa so kʋnɩ maar puureraakɛ wɩrɛ wɩ kɔɔ fʋlɛnɩ a jalna dɩ kpɩɩra sɩ dɩ wɩ kɛr bir cʋʋnɩ, wɩ kpar jɛ a dii mar.Ɛsɩdɩrasɩ bɩɛlɛ Thãgba da n pɛ dɩ padarara
5 Dɩ dʋɔr bonɩ ji bɔɔ, mɩ ɩɩrɛ ɩ̃ ha kʋɛ too para a the na ɩ̃ kẽkẽ tona na ɩ̃ gbɔɔlɔ̃ ɓǝǝrǝ. Dɩ mɩ gburõkhure a 'laa ɲɛ̃ɛ Thãgba Kɔ̃tɩna, kɛ dɔnɩ ɩ̃ Thãgba. 6 Dɩ mɩ sʋʋraarɛ ayɩ: Ɩ̃ Thãgba, yicuru fʋ mɛr, yicuru fʋ mɛr jɔɔ. Ma 'la na ɓa ƴɩɛ a na hɩɩn faa yaa ɩ̃ Thãgba gɩdonɩ asɩ sopuusɔ jɔrɛ, foo a thʋ̃ gbã sɩ, dɩ asɩ dɩpasɔ thʋ̃ cõcool foo, a jʋʋn dã ƴũu. 7 Asɩ thɩ kɔ̃tɩ̃sɔɔ bɔɔ, a dana nĩ, sɩ cʋʋrɛ puure dɩɩ kɔ̃tɩ̃ ka. Asɩ puu cʋʋra dɔ nɔɔ dɩ fɩ bo sɩ sɛrɛ na asɩ jamanasɔ na asɩ bonɩ jidarasɔ a ha ca kpɩɩsɔɔ jamanasɔ dɩ wɩ kʋʋr sɩ kʋʋrra na bajɩna. Wɩ khɩɩ sɛr jalna dee dʋʋra; wɩ tagɩrɛ asɩ thɩ̃sɔ; wɩ pɛ sarɛ yicuru, mɔ̃kɛra gɩ hanɩ gɩrɛ nĩ. 8 Sɩ nɛnɛ̃kɛ, Thãgba Kɔ̃tɩnɩkɛ dɔnɩ asɩ Thãgba, fɩ jɩ sɛr bʋɔra, a sɩrɔ asɩ too ɩkha gbe na yire. Fɩ ha sɛr paar, a thɩɩn sɩ dɩɩraakɛ fɩ hɩnɩ. Asɩ Thãgba fɩ carã sɛ afɩ dahɩrɛ, a ha sɩ yire gbe asɩ dee dora. 9 Sɩ kɔɔ dor dea, sɩ fɛr asɩ Thãgba, fa bo sɩ faa asɩ dee dora ga. Afɩ ha bulo sɛrɛra dɔ nɔɔ dɩ fɩ cʋʋ Pɛrsɩ jamanasɔ, dɩ wɩ ha sɩ yire, dɩ mɛ̃ sa bir na mɩ fɛr asɩ Thãgbaa fʋɔr cɔ; sɩ bir sɩ ɩɩr ɔɔ dakpolosɔ; gɩ do nɔɔ sɩ hana wɔ̃ pa bʋɔ Juda bəənnə na Jerujalɛm dɩɩra. 10 Dɩ nɛnɛ̃ aɲe sa so yaa asɩ Thãgba gɩrɛraakɛ dananɩ? Sɩ nʋʋrɛ nũu afɩ jɔfʋsɔraakɛ, 11 fɩ kɔɔ hanɩ thɔ̃daraakɛ dɔnɩ afɩ mɩmɩɩsɔ dɩ wɩ ha sɩ. Fɩ kɔɔ kpãkpãa sarɛ ayɩ: Dɩɩraakɛ na lonɩ a na gba, a na hɩ̃, dɩɩ gɩɩkɛ biseneni jɔfʋ hʋɛra dɩɩ do tɩbɩlaakɛ haaraanɩ awɩ kpɔ̃kpɔrɔ̃ thɩ̃ cʋʋsɔ dɔ nɔɔ; gɩdonɩ wɩ hire dɩɩ na awɩ thɩ̃ bise cʋʋ dɩɩ the ʋ̃ʋ khu para, a jal thʋ ʋ̃ʋ khu pa. 12 Gɛr gɩ na n ha awɩ bikũusɔ anɩ bikhɛrsɔ wɩ hea', na n gba dakha anɩ bikhɛrsɔ a ha awɩ bikũusɔ wɩ hea'. Na n dɛna awɩ ha ieda dɩ awɩ nɔbɔda gɩ fɩɩʋraka'. Dɩ thale na 'lɛ fãga nɩ kho dɩɩlee thɩ̃ bɔsɔ sɩ nɩ faarakɛ dɩɩra anɩ mǝlsɔraakɛ na kpaanɛnɩ bɔɔ wo bɔɔ fɛw. 13 Gɩrɛ fɛʋʋkɛ kɔɔ dana sɩnɩ, dɩɩ do asɩ cʋʋ pa puusɔ na asɩ dɩpa kɔ̃tɩ̃sɔ dɔ nɔɔ, sɩrakɛ, fɛr asɩ Thãgba, fa pɛ sar sor dɩɩ mãkhana mɔna asɩ sopuusɔ hana', sɩ fɩ ka sɩrɛ asɩ too ɩkha gbe na yire. 14 Aɲera sa bir sa n kʋɛ afɩ jɔfʋsɔ, sɩ bir sɩ gbɛbɩ kha na caarsɔɔkɛra n cʋɛnɩ kpɔ̃kpɔrɔ̃ thɩ̃ɛsɔ, sa n he kha? Fa gbana sɩ nĩkhi khɩɩ a na bũburõ sɩ ɓibi a na tǝǝ? 15 Thãgba Kɔ̃tɩn, kɛ dɔnɩ Ɩjɩrayɛlɩ Thãgba, fɩ sarɛ, gɩdonɩ fɩ sɩrɛ asɩ too ɩkha gbe na yire nĩ. Sɛr ha wɩrɛ afɩ ƴɛbʋrɔ na asɩ dɩpasɔ, sɩrakɛ mɔ̃ sɩ hanɩ gɩrɛ, tibil bɩɛl 'lẽ'lenakɛ na kɔɔ teena a jɩɩl afɩ ƴɛbʋrɔa'.