ƐSƖDƖRASƖ 8

Ɩjɩrayɛl bɩsã wɩrɛ kɛranɩ bir na Ɛsɩdɩrasɩ

1 Yɛkɛ Ɩjɩrayɛl bɩsanaa cɔdaar kuun wɩrɛ thɛnɩ Babɩlɔn Artajɛɛrsɛsɩɩ jamanaa bɔɔ, kɛ wɩ thernɩ mɔ̃ awɩ thɩ kɔ̃sɔ hanɩ dɩ wɩ kɛr bir Jerujalɛm na mɛr Ɛsɩdɩrasɩ: 2 Pɩnasɩɩ mǝlsɔra, Gɛrsɔm gɩ; Ɩtamaarɩ mǝlsɔra, Danɩɛl gɩ; Davɩdɩɩ mǝllǝ Hatusɩ gɩ; 3 Parɔsɩɩ mǝlsɔra, Jakarɩ gɩɩkɛ dɔnɩ Sekanɩaa bikuun. Ɔr na ɔɔ tookɛ wɩ thernɩ kona tamaa na kpalaɲɔ yʋɔr (150) wɩ ha. 4 Pahatɩ-Moabɩɩ mǝlsɔra, Eliohenayɩ gɩ, kɛ dɔnɩ Jerayaa bikuun. Ɔr na ɔɔ tookɛ hanɩ kha na ɔr, kona taaɲɔ (200) wɩ ha. 5 Jatuu mǝlsɔra, Sekanɩa gɩɩkɛ dɔnɩ Yajɩɛlɩ bikuun. Ɔr na ɔɔ tookɛ hanɩ kha na ɔr, kona tãather (300) wɩ ha. 6 Adɛ̃ɛ mǝlsɔra, Ebɛdɩ gɩɩkɛ dɔnɩ Yonatãa bikuun. Ɔr na ɔɔ tookɛ hanɩ kha na ɔr, kona kpalaɲɔ yʋɔr (50) wɩ ha. 7 Elamɩ mǝlsɔra, Yesaya gɩɩkɛ dɔnɩ Atalɩaa bikuun. Ɔr na ɔɔ tookɛ hanɩ kha na ɔr kona kpalãther yʋɔr (70) wɩ ha. 8 Sefatɩaa mǝlsɔra, Jabɩdɩa gɩɩkɛ dɔnɩ Mɩkayɛlɩ bikuun. Ɔr na ɔɔ tookɛ hanɩ kha na ɔr, kona kpalanã (80) wɩ ha. 9 Yoabɩɩ mǝlsɔra, Obadɩa gɩɩkɛ dɔnɩ Yehɩɛli bikuun. Ɔr na ɔɔ tookɛ hanɩ kha na ɔr, kona taaɲɔ na yʋɔr makõther (218) wɩ ha. 10 Banɩɩ mǝlsɔra, Selomɩtɩ gɩɩkɛ dɔnɩ Yosɩfɩaa bikuun gɩ. Ɔr na ɔɔ tookɛ hanɩ kha na ɔr, kona tamaa na kpalãther (160) wɩ ha. 11 Bebayɩɩ mǝlsɔra, Jakarɩ gɩɩkɛ dɔnɩ Bebayɩɩ bikuun. Ɔr na ɔɔ tookɛ hanɩ kha na ɔr, kona kpelẽ makõther (28) wɩ ha. 12 Ajɩgadɩɩ mǝlsɔra, Yohanã gɩɩkɛ dɔnɩ Hakatanɩ bikuun. Ɔɔ tookɛ hanɩ kha na ɔr, kona tamaa na yʋɔr (110) wɩ ha. 13 Adonɩkamɩɩ mǝlsɔra, diinǝ wɛ yẽther (3), awɩ isɔ ha gɩrɛ: Elɩfelɛtɩ, Yeyɩɛl na Semaya. Wɛr na awɩ tookɛ hanɩ kha na wɛr, kona kpalãther (60) wɩ ha. 14 Bɩgɩvayɩɩ mǝlsɔra, Utayɩ na Jabudi gɩ. Wɛr na awɩ tookɛ hanɩ kha na wɛr, kona kpalãther yʋɔr (70) wɩ ha.

Mɔ̃ Ɛsɩdɩrasɩ gbɛbɩnɩ a kɛr a bir Jerujalɛm

15 Mɩ kpar tɩbɩlaale a jɛ a khunǝ mɩɩrɩkɛ n celanɩ da n jal Ahava dɩ khʋra, dɩ sɩ cɔ le wire yẽther. Dɩ mɩ jʋʋrɛ tɩbɩla na bonɩ jidara a hɩɩn dɩ ma yɩ le Levɩɩ mǝlsɔ bɩɛllaka'. 16 Le mɩ thɔ̃ a we kɔ̃tɩna, kɛ dʋɔnɩ Eliejɛɛr na Arɩɛl na Semaya na Ɛlnatã na Yarɩbɩ na Ɛlnatã na Natã na Jakarɩ na Mesulam na jɔfʋ dɩɩrdara yeɲɔɔkɛ dɔnɩ Yoyarɩbɩ na Ɛlnatã. 17 Dɩ mɩ so warɛ wɩ jala Ɩdoo pa, kɛ dɔnɩ kɔ̃tɩ̃ le Kasɩfɩa dɩɩra. Dɩ mɩ mɩɛ wɛr gɩrɛ wa sʋʋraanɩ, ɔr, na ɔɔ omisɔɔkɛ dɔnɩ Thãgba fʋɔr cɔ thɔ̃ donaakɛ hanɩ Kasɩfɩa, gɩ do nɔɔ wɩ thɔna bubulə wɩ ha sɩ, asɩ Thãgba fʋɔr cɔ thɔmana. 18 Dɩ gɩdonɩ asɩ Thãgba har kha na sɛrɛ da n nɩna sɩ ɔɔ ha bulo; wɩ pɔnanɛ kuun bɩɛlɩkɛ jɛnɩ fɩlɛ a ha sɩ, da n do Serebɩa. Malɩɩ thɩ kɔna a the, a do Levɩɩkɛ dɔnɩ Ɩjɩrayɛlɩ bikuunɩ mǝl. Dɩ ɔr na ɔɔ bikũusɔ na ɔɔ omisɔ, wɩ har kona yʋɔr makõther (18). 19 Wɩ pɔnanɛ dakha Hasabɩa na Yesaya, kɛ thɛnɩ Merarɩɩ mǝlsɔra, wɛr na awɩ omɩsɔ na awɩ bikũusɔ, kona kpelẽ (20) wɩ ha. 20 Wɩ pɔnanɛ dakha Thãgba fʋɔr cɔ thɔ̃ dona taaɲɔ na kpelẽ (220). Wɩrɛ Davɩdɩ na ɔɔ minisisɔ kɔɔ pɛrnɩ dɩ wa n do thɔma Levɩɩ mǝlsɔra, awɩ mǝllǝ wɩ the. Wɛr fɛw bɩɛlbɩɛl, wɩ jɩ wɛr na awɩ isɔ. 21 Dɩ mɩ pɛrɛ nɔ lir le Ahava mɩɩr nʋɔrara, sɩ wur asɩbara asɩ Thãgbara, sɩ sɩ bɩɛlʋ, gɩ do nɔɔ a cʋʋ sɩ, sɛrɛ na asɩ cɔdara fɛw na asɩ thɩ̃bisɔ fɛw, sɩ puno sɩ gba hʋɛ na ha ɩɩ. 22 Yicuru fʋ mɛr mɔ̃ ma bɩɛlnɩ jamanana sɔrasɛ na sɔrasɩ gãgodara dɩ wa bɛr sɩ asɩ lãlaardarara hʋɛra, gɩdonɩ sɩ kɔɔ sʋʋraarɛ ayɩ: Asɩ Thãgba n bɛrɛ wɩrɛ fɛʋʋkɛ n ƴaalɛɛnɩ dɩɩ the ɔɔ ha bulola. Sɩ wɩrɛ bʋɔnɩ, ɔɔ nĩkhi n dã wɛr dɩɩ khɩɩr ka. 23 Gɛr dɔ nɔɔ sɩ lini nʋɔ a bɩɛl asɩ Thãgba, dɩɩ do a ture asɩ bɩɛl. 24 Dɩ mɩ tire kɔ̃tɩna yʋɔr yeɲɔ (12) kpɩɩ bonɩ jidarara: Serebɩa na Hasabɩa gɩ, na kha tɩbɩla yʋɔr (10) awɩ omɩsɔra. 25 Dɩ mɩ peesire dɛ bulo na dɛ na thɩ̃bi ɓɔnana awɩ ƴɛbʋrɔ, kɛ jamana na ɔɔ fɩl 'laadarasɔ, na ɔɔ minisisɔ na Ɩjɩrayɛl bɩsana fɛʋʋkɛ hanɩ le Babɩlɔn kɔɔ tini dɩɩ do asɩ Thãgbaa fʋɔr cɔda. 26 Dɩ mɩ gbaar a dʋ wɩ ɲɔ̃kɔɔ: dɛ bulo har kilə gbɩlanɩ kpelẽ (20000), dɩ thɩ̃bi ɓɔnaakɛ wɩ cʋʋnanɩ dɛ bulo ha kilə gbɩlanɩ yẽther(3000) dɩ dɛ ha tɔn yẽther, 27 na thɩ̃ ɲɔdaasɔ kpelẽ (20), kɛ wɩ cʋʋnanɩ dɛɛkɛ dananɩ dɛ be gbɩlanɩ (1000), na ther sɛ bʋlaa yeɲɔ (2) kɛ bʋɔnɔnɩ, a ɓɔ̃ a ho dɛ. 28 Agɩpɩ mɩ so warɛ mɩɩ: Nɩ leerore a do Thãgba Kɔ̃tɩnɩda. Dɩ thɩ̃beekɛ dakha leero a do Thãgba Kɔ̃tɩnɩda. Dɛɛkɛ na dɛ bulookɛ, bonɩ ji thɩ̃ɛ gɩɩkɛ wɩ 'laanɩ mɔ̃ ntɛɛ ƴaal hanɩ a ha Thãgba Kɔ̃tɩnɩkɛ dɔnɩ anɩ thɩ kɔ̃tɩ̃sɔɔ Thãgba. 29 Na n dɔ bʋrɛ, a na jɩɛ hɩɩn gɩ bɔɔbɔɔ phaphapha nɩ dana Jerujalɛm. Dɩ le na peesi gɩ bonɩ jidaar kɔ̃tɩna na Levɩɩ mǝlsɔ na Ɩjɩrayɛl bɩsanaa cɔdaar konaa ƴɛra, le cɔ ɓãasɔraakɛ hanɩ Thãgba Kɔ̃tɩnɩ fʋɔr cɔra. 30 Dɩ bonɩ jidara na Levɩɩ mǝlsɔ gbaar dɛ bulola na dɛ na thɩ̃bi ɓɔnana, kɛ wɩ kɔɔ peesini wɩ jalna Jerujalɛm, asɩ Thãgba fʋɔr cɔra.

Ɛsɩdɩrasɩ na ɔɔ too daan Jerujalɛm

31 Sɩ ther le Ahava mɩɩra caca sɩporɩ wire yʋɔr yeɲɔra dɩ sa n jal Jerujalɛm. Dɩ asɩ Thãgba kɔɔ har kha na sɛrɛ hʋɛra, a bɛr sɩ lãlaardarara na tɩɩ phʋ̃ʋdaraa ɲɛna. 32 Mɔ̃ sɩ danɩ Jerujalɛm, sɩ hɩɩrɛ wire yẽther (3). 33 Dɩ Balanã (4) wirera, sɩ peesire dɛ bulola na dɛ na thɩ̃bi ɓɔnana le asɩ Thãgbaa fʋɔr cɔra a dʋ Meremɔtɩɩkɛ dɔnɩ bonɩ jidaarɩ ɲɔ̃kɔɔ, Urɩaa bikuun gɩ. Eleajaarɩkɛ dɔnɩ Pɩnasɩɩ bikuun kɔɔ hale na ɔr na kha Levɩɩ mǝlsɔ: Yojabadɩ gɩ, kɛ dɔnɩ Yesuaa bikuun na Noadɩa, Bɩnʋɩɩ bikuun. 34 Wɩ therre thɩ̃ɛ fɛw, a peesi dɩɩ ha oti, dɩ wɩ khere kilǝ nʋɔ a pɛ sɛbɛra. 35 Dabɔɔlera wɩrɛ wɩ kɔɔ fʋlɛnɩ a jalna dɩ kpɩɩra sɩ dɩ wɩ kɛr bir, jire bonɩ thiinǝ Ɩjɩrayɛlɩ Thãgbara a pɛ Ɩjɩrayɛl bɩsanana fɛw, na nakena yʋɔr yeɲɔ (12) na banakena kpalanã yʋɔr maadõ (96), na bana ɓola kpalãther yʋɔr makoɲɔ (77), a ji so hɛl bonɩɛ na bʋ kena yʋɔr yeɲɔ (12). Gɛr fɛw, bonɩ thiinǝ wɩ jinǝ Thãgba Kɔ̃tɩnna. 36 Agɩpɩ, wɩ 'laarɛ jamanaa nɔ thɩmɩɩra a ha ɔɔ kʋmadasɔ, na gobanɛrsɔɔkɛ hanɩ le Efɩratɩ mɩɩr iiro, dɩ wɩ bule Ɩjɩrayɛl bɩsana Thãgba fʋɔr cɔ mɩdaara.