ƐSƖDƖRASƖ 7

Ɛsɩdɩrasɩ daan Jerujalɛm

1 Mɔ̃ thĩɛsɔɔle kanɩ pɩ, kuun bɩɛl kɔɔ hale Artajɛɛrsɛsɩ Pɛrsɩ jamana bɔɔ, da n do Ɛsɩdɩrasɩ. Serayaa bikuun gɩ, dɩ Seraya do Ajarɩaa bikuun, dɩ Ajarɩa do Hɩlkɩaa bikuun, dɩ Hɩlkɩa do, 2 Salunɩ bikuun, dɩ Salun do Sadɔkɩɩ bikuun, dɩ Sadɔkɩ do Ahitubii bikuun, dɩ Ahitubi do, 3 Amarɩaa bikuun, dɩ Amarɩa do Ajarɩaa bikuun, dɩ Ajarɩa do Merayɔtɩɩ bikuun, dɩ Merayɔtɩ do, 4 Jerayaa bikuun, dɩ Jeraya do Ujii bikuun, dɩ Uji do Bukii bikuun, dɩ Buki do, 5 Abɩsʋaa bikuun, dɩ Abɩsʋa do Pɩnasɩɩ bikuun, dɩ Pɩnasɩ do Eleajaarɩ bikuun, dɩ Eleajaar do Aarɔ̃ gbõdaarɩ bikuun. 6 Babɩlɔn Ɛsɩdɩrasɩra the. Jɔfʋ dɩɩrdaar a do. A jɩrɛ Mʋɩjɩɩ jɔfʋ a phiero bɔɔbɔɔ, kɛ Thãgba Kɔ̃tɩn Ɩjɩrayɛlɩ Thãgba kɔɔ 'laanɩ. Dɩ gɩdonɩ Thãgba Kɔ̃tɩnɩkɛ dɔnɩ ɔɔ Thãgba har kha na ɔr, jamana haarɛ gɩrɛ fɛʋʋkɛ a bɩɛlnɩ. 7 Artajɛɛrsɛsɩ jamanaa bɔɔ, a cʋʋnɩ yɛna makoɲɔ jamana dʋʋra, tibil ɩkha Ɩjɩrayɛl bɩsanana, kɛ dɔnɩ bonɩ jidara na Levɩɩ mǝlsɔ na nɩ khɩ̃dara na lõ bɛrdara na Thãgba fʋɔr cɔ thɔ̃ dona kɛrɛ dakha a bir Jerujalɛm. 8 Dɩ Ɛsɩdɩrasɩ daan kha na wɛr Jerujalɛm jamanaa yɛna makoɲɔdaarɩ balamɔy^a sɩpora, a donɩ jamana. 9 Ɛsɩdɩrasɩ dʋrɛ wire a the le Babɩlɔn, caca sɩporɩ caca wirǝ. Dɩ a daan Jerujalɛm balamɔy sɩporɩ caca wirǝ, gɩdonɩ ɔɔ Thãgba har kha na ɔr da n bɛrʋ; 10 gɩdonɩ Ɛsɩdɩrasɩ kɔɔ gbuure yʋʋ Thãgba Kɔ̃tɩnɩ jɔfʋ dɩɩrɛra, da n cʋʋ gɩ. A n dɩɩrɛ dakha Ɩjɩrayɛl bɩsana jɔfʋsɔ na Thãgbaa nɔ thɩmɩɩ.

Artajɛɛrsɛsɩ jamana ha Ɛsɩdɩrasɩ sɛbɛ

11 Yɛkɛ gɩrɛ kherenenɩ sɛbɛraakɛra Artajɛɛrsɛsɩ jamana hanɩ Ɛsɩdɩrasɩɩkɛra dɔnɩ bonɩ jidaar na jɔfʋ dɩɩrdaar, kɛ n kɔɔ dɩrɛnɩ tɩbɩla Thãgba Kɔ̃tɩnɩ nɔ thɩmɩɩsɔɔkɛ a kɔɔ hanɩ Ɩjɩrayɛl bɩsana na ɔɔ jɔfʋsɔɔkɛ a kɔɔ 'laanɩ awɩdara. 12 Mɛr Artajɛɛrsɛsɩɩkɛ dɔnɩ jamanasɔɔ jamana, mɛr kherene sɛbɛɛkɛ dɩ ma n fʋɔr fɛr Ɛsɩdɩrasɩɩkɛra dɔnɩ bonɩ jidaar na jɔfʋ dɩɩrdaarɩkɛ jɩɛnɩ Thãgbaakɛ hanɩ le ƴũu, ɔɔ jɔfʋsɔ a phiero bɔɔbɔɔ; mɩ sor wɔɔ... 13 Mɩ so wɩ faa wɩrɛ fɛʋʋkɛ hananɩ ƴaalɛ Ɩjɩrayɛl bɩsananaakɛ hanɩ ɩ̃ jamana dɩra: tɩɩ khɩna na bonɩ jidara na Levɩɩ mǝlsɔ wɩ kɛr wɩ bir na fɛrɛ Jerujalɛm. 14 Mɛr jamana na ɩ̃ fɩl 'laadara makoɲɔɔkɛ thɔna fɩ, fɩ jala Juda bəənnə na Jerujalɛm dɩɩra a jʋrɛ hɩnɛ ado wɩ n hɩɩnɛ afɩ Thãgbaa jɔfʋʋkɛra fɩ fʋrɔnɩ gɩrɛ ɲɔ̃kɔɔ. 15 Fɩ jalana dakha khaardaakɛ dɔnɩ dɛ bulo na dɛɛkɛ mɛr jamana na ɩ̃ fɩl 'laadara tini, asɩ ƴaala a ha Ɩjɩrayɛlɩ Thãgbaakɛ ɔɔ cɔ hanɩ Jerujalɛm. 16 Mɛna fa jalna dakha dɛ bulo fɛw na dɛɛkɛ fa 'lɛnɩ Babɩlɔn bəənnə fɛw, na khaarda gɩrɛ afɩ too na bonɩ jidara tini awɩ ƴaala a 'laa gɩ dɔ awɩ Thãgba fʋɔr cɔ mɩda, kɛ hanɩ Jerujalɛm. 17 Dɩ gɛr gɩ, jɩɛ hɩɩn, a gba ga mũsũulera a thɛna nakena na banakena na bana ɓola na thɩ̃ bi bonɩ thɩ̃ɛsɔ na dɩvɛ̃ bonɩ thɩ̃ɛsɔ a jenǝ bonɩɛ bonɩ ji paara ƴũu, le anɩ Thãgbaa fʋɔr cɔraakɛ hanɩ Jerujalɛm. 18 Gɩrɛ nɩ jɩnɩ gɩ bɔrɛ cʋʋrɛra, fɛrɛ na afɩ omɩsɔ, nɩ punone cʋʋna dɛ bulo na dɛ gɩrɛ na sɛnɩ gɩrɛɛkɛ dʋɔnɩ anɩ Thãgbaa ƴaal. 19 Thɩ̃beekɛ wɩ ha fɩnɩ, thɩnɛ gɩ le Jerujalɛm, Thãgbaa ƴɛbʋrɔ, gɩ do afɩ Thãgbaa fʋɔr cɔ thɔ̃ doda. 20 Ado thɩ̃ɛ hale afɩ Thãgbaa cɔra kɛ fɩ yɩnɩ dɩɩ teena cʋʋrɛ, cʋɛ wɩ ti mũsumo mɛr jamanaa lẽle thɩ̃ thɩɩn cɔra fɩ lɩmɩ. 21 Mɛr Artajɛɛrsɛsɩ jamana, mɛr sɔ wɩrɛ fɛʋraakɛ n hɩnɛnɩ mɛr jamanaa lẽle thɩ̃sɔ, le Efɩratɩ mɩɩr iiro ayɩ, wɩ hana fɛr Ɛsɩdɩrasɩɩkɛ dʋɔnɩ bonɩ jidaar na jɔfʋ dɩɩrdaarɩkɛ jɩɛnɩ Thãgbaakɛ hanɩ le ƴũu ɔɔ jɔfʋ a phiero bɔɔbɔɔ gɩrɛ fɛʋʋkɛ fa ƴaal warnɩ. 22 Wɩ hana fɩ dɛ bulo gɩ dã kilǝ gbɩlanɩ yẽther (3000) bile n dã kilǝ gbɩlanɩ kpelẽ yʋɔr (30 000); dɩvɛ̃ n dã litiri gbɩlanɩ yenã (4000); niin n dã litiri gbɩlanɩ yenã (4000) na laan mɔ̃ wɩ n ƴaalnɩ. 23 Gɩrɛ fɛʋʋkɛ Thãgbaakɛ hanɩ le ƴũu sonɩ ɔɔ cɔdara, dɔ gɩ cʋʋ otirǝ gɩ do nɔɔ Thãgbaalera hanɩ ƴũu na n gbana ɩ̃ jamana dɩ nĩkhii, dɩ mɛrɛ thɛthɛ gɩ dɩ ɩ̃ bikũusɔ ga. 24 Gɛr dɔ kɩrʋ dɩ sa n so nar nɩ jɩ, dɩ hʋɛ na hale dɩ na tee patãtɩ mũsumo na lãpho na hʋ ka mũsumo bonɩ jidarara na Levɩɩ mǝlsɔra na nɩ khɩ̃darara na lõ bɛrdarara na Thãgba fʋɔr cɔ thɔ̃ donana na tibili wo tibillǝǝkɛ n dʋɔnɩ thɔma Thãgba fʋɔr cʋɔrɔɔla'. 25 Sɩ fɛr Ɛsɩdɩrasɩ, cʋɛ na kpɛsɛrɛɛkɛ afɩ Thãgba ha fɩnɩ, a pɩɛr sogʋʋrdara na dʋɔ kɔ̃tɩnasɔ wɩ gʋʋr sɔ wa n pɛ wɩrɛ fɛʋraakɛ jɩɛnɩ afɩ Thãgbaa jɔfʋ, le Efɩratɩ mɩɩr iiro. Sɩ wɩrɛ na jɩ̃ɛ gɩna' dɩrɛ wɩ, wɩ jɩ gɩ. 26 Tibil wo tibilikɛ bɔnɩ a n hɩɩn afɩ Thãgbaa jɔfʋra bɔɔbɔɔ, na mɛr jamanaa jɔfʋa', ntɛ na 'lɛr sor. Wɩ kɔ ntɛ, agɩbo wɩ weaa ɔɔ dʋɔ a faa, agɩbo wɩ taaraa ɔɔ thɩ̃, agɩbo wɩ tʋɔnɛɛ khaɩra.

Ɛsɩdɩrasɩɩ Thãgba khɩɩ

27 Dɩ Ɛsɩdɩrasɩ so aa: Thãgba Kɔ̃tɩnɩkɛ dɔnɩ asɩ thɩ kɔ̃tɩ̃sɔɔ Thãgba hɩna fʋɔrɛ, gɩdonɩ ɔr gbɛbɩrɛ jamanaa ha dɩ hana cʋ caarɩkɛ Thãgba Kɔ̃tɩnɩ fʋɔr cɔra, kɛ hanɩ Jerujalɛm. 28 A nɩna mɛr ɔɔ ha bulo, jamanaa ƴɛbʋrɔ na ɔɔ fɩl 'laardara, na ɔɔ mɩmɩsɩ kɔ̃tɩ̃sɔ fɛʋʋ ƴɛbʋrɔ. Dɩ mɔ̃ Thãgba Kɔ̃tɩn, ɩ̃ Thãgba hanɩ kha na mɛrɛ, mɩ 'lɛr fãga a kpa Ɩjɩrayɛl bɩsanaa kɔ̃tɩ̃sɔ a jɛ wɩ kɛr wɩ bir kha na mɛrɛ.