Tuurɩkɛ Dariusɩ jamana 'laanɩ
6
1 Dɩ Dariusɩ jamana so wɩ ƴaalɛ gɩ, ka wɩ n thɩɩnɩ Babɩlɔn jamanasɔɔ dɩ sɛbɛsɔ. 2 Dɩɩ do Ɛkɩbatan, dɩ kɔ̃tɩ̃ɩkɛ hanɩ Medi bəənnə, le wɩ yɩ lo sɛbɛ bɩɛl dɩ wɩ kherero jɩ̃jɩna thɩmɩɩrɩkɛ sɔnɩ aa: 3 Caca yɩɛraakɛ Sɩɩrusi donɩ jamana Babɩlɔn dɩɩra, ɔr sɔ Thãgbaa fʋɔr cɔ thɩmɩɩra, kɛ hanɩ Jerujalɛm ayɩ: Dɔ cʋɔrra n bir gɩ mɩ, gɩ do paarɩkɛ wa n jini bɔnɩɛsɔ. Ɔɔ go kpɛɛ tɩ̃sɔɔrara wa thɩɩnʋ. Ɔɔ ƴũu gbã n mãkhanɛna mɛtɛrɛ kpelẽ yʋɔr, ɔɔ pɛw n mãkhana mɛtɛrɛ kpelẽ yʋɔr. 4 Wɩ mɩɛ na boka thelnanɛsɔ jɔrɔna yẽther, a pɩɛr thɩra, kparɛsɔ jɔrɔ̃ bɩɛl. Jamanaa lẽle thɩ̃ thɩɩn cɔ mũsũ na lɩma ga hel. 5 Dɩ wo, Thãgba fʋɔr cɔ thɩ̃beekɛ wɩ cʋʋnanɩ dɛ na dɛ bulo, kɛ Nebukadinejaar kɔɔ khɩɩnɩ Jerujalɛm Thãgba fʋɔr cʋɔrɔ a jalna Babɩlɔn wɩ 'laanɛ. Dɔ wɩ kɛrna gɩ Jerujalɛm Thãgba fʋɔr cʋɔrɔ wɩ thɩɩn thɩ̃bi dɔɔ ɔɔ too pa tɩna le Thãgba fʋɔr cʋɔrɔ.6 Nɛnɛ̃, fɛr Tatenayɩɩkɛ dɔnɩ gobanɛr le Efɩratɩ mɩɩr iiro na Seta-Bɔjɩnayɩ na nɛrkɛ hanɩ kha na wɛr, kɛ hanɩ Afarsakɩ le Efɩratɩ mɩɩr iiro, nɩ hɛlalɔ. 7 Nɩ faa Thãgba fʋɔr cɔ mɩ thɔmaale gɩ puno ga n do. Dɔ Juifisɔɔ gobanɛr na awɩ ƴɛkʋʋldara n bir wɩ mɩɩ ɔɔ pa tɩnaakɛra a kɔɔ hanɩ. 8 Nɩ yɛkɛ jɔfʋʋkɛ mɩ n 'laanɩ, kɛ n nɛnanɩ gɩrɛ nɩ teenanɩ nɩ cʋɛ Juifisɔɔ ƴɛkʋʋldarasɔɔraale, gɩ do nɔɔ Thãgba fʋɔr cʋɔrɩlera n puno gɩ mɩ: Nɩ gba mũsumo jamanaa lẽle thɩnaakɛ thɛnɩ lãphoraakɛ wɩ n tini le, Efɩratɩ mɩɩr iiro, a lɩma tɩbɩlaale. Na n kal mũsũ 'laarɛra ga. 9 Wire fɛw, na n hana bonɩ jidaraakɛ hanɩ Jerujalɛm gɩrɛ fɛʋʋkɛ teananɩ wa n jena bonɩ thiinǝ Thãgbaraakɛ hanɩ le ƴũu nake ɓola na banakena na bana ɓola na dakha bile na laan na dɩvɛ̃ na niin. Na n hana wɩ mɔna wɩ n ƴaalnɩ, na n ɓɔr thɩ̃a', 10 gɩ do nɔɔ wɩ puno wa n ji bonɩɛɛkɛ n hʋnanɩ daw Thãgbaraakɛ hanɩle ƴũu, wɩ bɩɛlna Thãgba wa n pɛ mɛr jamanana na ɩ̃ bikũusɔra, sɩ puno sɩ hana yire. 11 Nɩ yɛkɛ jɔfʋʋkɛ mɩ n 'laanɩ wo tibil wo tibilǝǝkɛ na nʋrɛnɩ nũu thɩmɩɩraakɛ: Wɩ hala kparɛ ɔɔ cɔ a te a thela nʋɔ sɩba sɩba a puo sa sarãgboneno ntɛɛle sa fe ɔɔ cɔ gɩ do cɔ kpoloo. 12 Dɩ jamana wo jamana na caar wo caarɩkɛ na ɩrɛnɩ a na bo ɩ̃ nɔ ka thɩmɩɩrɩkɛ, a ƴaal ɩnɩ n kʋɛa Thãgba cʋɔrɩlera Jerujalɛm, Thãgbaakɛra hanɩ le, a bũburonee! Mɛr Dariusɩ, mɛr 'laanɛ jɔfʋʋkɛ. Dɔ gɩ cʋʋ oti bɔɔbɔɔ.
13 Le dɩphã Tatenayɩɩkɛ dɔnɩ gobanɛr le Efɩratɩ mɩɩr iiro, na Seta-Bɔjɩnayɩ, na wɩrɛ wɩ hananɩ kha kpaan bɔɔbɔɔ Dariusɩ jamanaa nɔ ka thɩmɩɩraakɛ a thɔna warnɩ.
Thãgba fʋɔr cɔ pha phʋɔl fɛtɩ
14 Dɩ mɛ̃ Juifisɔɔ ƴɛkʋʋldara mɩ cʋɔra a pɩ na bɔɔ mɔ̃kɛra Thãgbaa mɩmɩɩsɔ Aje na Jakarɩkɛ dʋɔnɩ Ɩdoo bikuun kɔɔ mɩɩ wɩnɩ gɩrɛ thɛnɩ Thãgbara; wɩ mɩɩrɛ a kpoor mɔ̃kɛra Ɩjɩrayɛlɩ Thãgba kɔɔ sonɩ, mɔ̃kɛra Sɩɩrusi na Dariusɩ na Artajɛɛrsɛsɩɩkɛ dʋɔnɩ Pɛrsɩ jamanasɔ kɔɔ sonɩ. 15 Cʋɔr kpoore Adaara sɩporɩ wire yẽthera, yɛna maadõ yɩɛraakɛ Dariusɩ jamana cʋʋnɩ jamana dʋʋra. 16 Dɩ Ɩjɩrayɛl bɩsana na bonɩ jidara, na Levɩɩ mǝlsɔ na wɩrɛ fɛʋʋkɛ wɩ kɔɔ fʋlɛnɩ a jalna dɩ kpɩɩra sɩ dɩ wɩ kɛr bir, cʋʋrɛ Thãgbaa cɔ phʋɔl fɛtɩ na daw. 17 Dɩ wɩ jinǝne bonɩɛ Thãgbaa cɔ phʋɔlɛlaalera na kena tamaa (100) na banakena taaɲɔ (200) na bana ɓola taanã (400) a ji Ɩjɩrayɛl bɩsana fɛʋʋ so hɛl bonɩ na bʋ kena yʋɔr yeɲɔ mɔna Ɩjɩrayɛl bɩsanaa casɔɔ nɔ hanɩ. 18 Dɩ wɩ vaarɛ bonɩ jidara mɔ̃ awɩ gbulõsɔ hanɩ, a vaar Levɩɩ mǝlsɔ mɔ̃ awɩ thɔma hanɩ wɩ puno wa n do Thãgbaa thɔ̃ le Jerujalɛm mɔ̃kɛra gɩ kherenɩ Mʋɩjɩɩ sɛbɛra.
Juifisɔ cʋʋrɛ Pakɩ fɛtɩ
19 Wɩrɛ wɩ kɔɔ fʋlɛnɩ a jalna dɩ kpɩɩra sɩ dɩ wɩ kɛr bir, cʋʋrɛ Pakɩ fɛtɩ balaɲɔ yɩɛrɩ caca sɩporɩb wire yʋɔr yenana. 20 Bonɩ jidara, a gbana Levɩɩ mǝlsɔ ɓibi kɔɔ phʋɔlɛ awɩbara; dɩɩ do wɩ phure fɛw jɔfʋ hʋɛra. Dɩ wɩ kʋʋrɛ Pakɩ bana ɓola a pɛ wɩrɛ fɛʋraakɛ wɩ kɔɔ fʋlɛnɩ a jalna dɩ kpɩɩra sɩ dɩ wɩ kɛr bir ɩ̃, na awɩ omɩsɔraakɛ dɔnɩ bonɩ jidara na awɩ thɛthɛrara. 21 Dɩ Ɩjɩrayɛl bɩsanaakɛ thɛnɩ dee dʋʋra a kɛr bir dɩrɛ Pakɩ fɛtɩ na wɩrɛ fɛʋʋkɛ kɛranɩ a ɓã war dɩ wa n ƴaal Thãgba Kɔ̃tɩn, Ɩjɩrayɛlɩ Thãgba, kɛ dɔnɩ wɩrɛ leanɩ kpɩɩ sa faa caarsɔɔkɛ hanɩ le dɩɩra, kɛ bisenenɩ jɔfʋ hʋɛra. 22 Agɩpɩ Ɩjɩrayɛl bɩsana cʋʋrɛ buruukɛ wa pɛrnɩ tabɩɩraa fɛtɩ na daw, a dana wire makoɲɔ gɩdonɩ Thãgba Kɔ̃tɩn kɔɔ ha wɛr daw mɔ̃ a kɛrnɩ Asiri jamanaacha a pɛ war dɩ bul wɩ cɔ thɔmanaakɛ dɔnɩ Ɩjɩrayɛlɩ Thãgbaa fʋɔr cɔ thɔma.