ƐSƖDƖRASƖ 5

Thãgba fʋɔr cɔ mɩ thɔma bire a fʋ wo le Jerujalɛm

1 Sɩ Thãgbaa mɩmɩɩsɔ Aje na Jakarɩɩkɛ dɔnɩ Ɩdoo bikuun ɩɩrɛ a mɩɩ gɩrɛ thɛnɩ Thãgbaraakɛ dɔnɩ Ɩjɩrayɛlɩ Thãgba Juifɩsɔraakɛ hanɩ Juda dʋɔ na Jerujalɛmdarara. 2 Le Jorobabɛllɩkɛ dɔnɩ Seasɩɛlɩ bikuun ɩɩr na Yesuaakɛ dɔnɩ Yosadakɩɩ bikuun a bir fʋ Thãgbaa fʋɔr cʋɔr dɩ wa n mɩ Jerujalɛm, na Thãgbaa mɩmɩɩsɔɔkɛ n bulo wɩnɩ. 3 Ɔbɔɔlera Tatenayɩɩkɛ dɔnɩ gobanɛr, kɛ Efɩratɩ mɩɩr iiro na Seta-Bɔjɩnayɩ na wɩrɛ wɩ hananɩ kha pɔr a bule wɩ aa: Amɛ hana nɩ hʋɛ nɩ birǝ mɛ Thãgba fʋɔr cʋɔrɩkɛra, a birǝ gbɛbɩrɛ ɔɔ gosɔ? 4 Nɩ mɩɛnɛ sɩ wɩrɛ n dʋɔnɩ thɔma kɩɛr Thãgba fʋɔr cɔ mɩ paarɩkɛɛ isɔ. 5 Sɩ Juifisɔɔ Thãgba kɔɔ jɩɩlɛ awɩ ƴɛkʋʋldararaale. A fʋna bɔɔkɛ wa thɔnanɩ sɛbɛ Dariuusɩra gɩ dana bɔɔkɛ wa 'lɛnɩ ɔɔ sɛbɛ, wa pɩɛr wɩ dɩ wɩ jɩɩl thɔma ga.

Juifisɔɔ lãlaardara thɔnanɛ so pɛ sɛbɛ a ha Dariusɩ jamana

6 Yɛkɛ sɛbɛɛkɛra Tatenayɩɩkɛ dɔnɩ gobanɛr, kɛ Efɩratɩ mɩɩr iiro na Seta-Bɔjɩnayɩ na wɩrɛ wɩ hananɩ kha na wɩrɛ hanɩ Afarsakɩ dɩɩra thɔnanɩ a ha Dariusɩ jamana. 7 Dɩ sɛbɛra wɩ thɔnanɩ a haa sor ayɩ: Dariusɩ jamana, ha ie bʋɔ n hana kha na fɛrɛ! 8 Sɩ n ƴaalɛ fɛr jamana n jɛ dɩ sɩ jaal le Juda bəənnə Thãgba Kɔ̃tɩ̃ɩlee cɔra. Dɩ wɩ har dɩ wa n mɩ Thãgba fʋɔr cʋɔra na boka thelnanɛsɔ. Wɩ dɛɛnɛ kparɛsɔ gʋʋra. Thɔma n cʋʋrɛ oti bɔɔbɔɔ, dɩ ga n phana awɩ ɲɛna. 9 Dɩ sɩ bulele ƴɛkʋla ntɛ hana wɩnɩ hʋɛ wɩ birǝ mɛ cʋɔrɩkɛra, a birǝ gbɛbɩrɛna ɔɔ gosɔ. 10 Sɩ kɔɔ bule wer dakha awɩ isɔ na tɩbɩlaakɛ dɔnɩ awɩ ƴɛkʋʋldarasɔɔ isɔ, sɩ khere sɩ pɛ sɛbɛra sɩ ha fɩ, fɩ jɩ gɩ. 11 Dɩ wɩ ha sɛr tuurɩkɛ aa Thãgbaakɛ tenɩ ƴũu na thɩɩ, ɔɔ thɔ̃dara ha nɩ, dɩ ɩnɩ bir ɩna n mɩ Thãgba fʋɔr cʋɔrɩkɛ Ɩjɩrayɛl jamana kɔ̃tɩ̃ bɩɛl kɔɔ mɩnɩ a pɩ mamara kɛkɛkɛ. 12 Aa, sɩ ɩnɩɩ thɩ kɔ̃tɩ̃sɔ cʋʋrɛ dɩ nĩkhii fʋ Thãgbaalera hanɩ le ƴũu. Gɛr gɩ dɩ bo wɩ a to Nebukadinejaarɩ ɲɔ̃kɔɔ, Kaldedaar gɩ, kɛ dɔnɩ Babɩlɔn jamana, dɩ wɩɛl Thãgba fʋɔr cʋɔra, sa fʋlɛ tɩbɩla a jalna Babɩlɔn dɩɩra dɩ wɩ do dea. 13 Aa sɩ caca yɩɛraakɛ Sirusi jamana gbanɩ jamana dʋʋr Babɩlɔn dɩɩra, a so wɩ birǝ a mɛ Thãgba fʋɔr cʋɔrɩkɛra. 14 Aa dɩrakɛ thɩ̃beekɛ wɩ cʋʋnanɩ dɛ na dɛ bulo, kɛ kɔɔ hanɩ Jerujalɛm Thãgba fʋɔr cʋɔrɔ, kɛ Nebukadinejaar kɔɔ khɩɩnɩ a jalna pɛ Babɩlɔn thãgba fʋɔr cʋɔrɔ, Sirusi jamana tiire a ha tibil bɩɛlɩkɛ wɩ n wenɩ Sɛsɩbasaar, kɛ a pɛrnɩ dɩ do gobanɛr Juda bəənnə. 15 Aa, a sʋʋraarɛ ayɩ, a khɩa thɩ̃beekɛra, a jalana pɩɛr Jerujalɛm Thãgba fʋɔr cʋɔrɔ; aa dɔ Thãgbaa cɔɔlera n bir gɩ mɩ ɔɔ pa tɩnaakɛra a kɔɔ hanɩ. 16 Ɔ Sɛsɩbasaara ɩna kɛ a kpɛɛ Thãgba fʋɔr cɔ go kʋʋsɔ Jerujalɛm. Dɩ dabɔɔlera, a ɩna dana nĩkɛ, wɩ har dɩ wa n mɩ cʋɔrra, sɩ ga kpoor pa'. 17 Nɛnɛ̃ jamana, ado fɩ yɩɛrɛ dɩɩ bɔr, dɔ wɩ ƴaal Babɩlɔn jamanasɔɔ dɩ sɛbɛsɔra le Babɩlɔn wɩ hɩɩn, ado sobɔr gɩ Sirusi jamana kɔɔ sɔ ger ayɩ wɩ birǝ mɛ Thãgba fʋɔr cʋɔrɩkɛra Jerujalɛlɛm. Agɩpɩ jamana, fɩ 'laa afɩ tuur ga thɩmɩɩra fɩ ha sɩ.