ƐSƖDƖRASƖ 4

Thãgba fʋɔr cɔ mɩ thɔma jɩɩlɛ

1 Judaa mǝlsɔ na Bɛ̃jamɛ̃ɛ mǝlsɔ lãlaardara nɩɛrɛ aa, wɩrɛ wɩ kɔɔ fʋlɛnɩ jalna dɩ kpɩɩra sɩ dɩ wɩ kɛr bir, hale dɩ wa n mɩ Thãgba fʋɔr cʋɔr wɩ ha Thãgba Kɔ̃tɩnɩkɛ dɔnɩ Ɩjɩrayɛlɩ Thãgba. 2 Dɩ wɩ pɔr a yɩ Jorobabɛl na wɩrɛ dɔnɩ cɔdaar konasɔ a so war aa: Sɩ gbɛba kha a mɛ, gɩdonɩ sɛrɛ dakha anɩ Thãgbara sɩ n fʋɔr. Sɩ n jiirǝǝre bonɩɛsɔ kɛkɛkɛ dɩɩ fʋna Asaradɔ̃ɔkɛ dɔnɩ Asiiri jamanaa bɔɔ, kɛ ɛna sɩnɩ kɩɛr. 3 Sɩ Jorobabɛl na Yesua na ɩkhasɔɔkɛ dɔnɩ cɔdaar kona Ɩjɩrayɛl bɩsanana birse wer ayɩ: Ga ha anɩ pa dɩ na gbɛbɩ kha na sɛrɛ a na mɩ asɩ Thãgbaa fʋɔr cɔa'. Sa mɩrɛ, sɛr dɩbara a na ha Thãgba Kɔ̃tɩn, kɛ dɔnɩ Ɩjɩrayɛlɩ Thãgba, mɔ̃ Sirusikɛ dɔnɩ Pɛrsɩ jamana kɔɔ so sarnɩ. 4 Le dʋɔdaraale ma dɩ wa n khiir Judaa mǝlsɔ ɲɛ̃ɛ, dɩ wa n phǝrǝ wɩ gɩ do nɔɔ wɩ faa Thãgba fʋɔr cɔ mɩr. 5 Dɩ wɩ har jamanaa fɩl 'laadarasɔ mũsumo, a tɔ wɩ pɛ war wɩ cʋɛ awɩ thɔ̃ gɩ jɩɩl. Thalera wɩ cʋʋ, dɩɩ fʋna Sirusikɛ dɔnɩ jamana, ɔɔ jamana do bɔɔ a jalna waa a dana Dariusɩɩkɛ dɔnɩ dakha Pɛrsɩ jamana, ɔɔ jamana do bɔɔ.

Juifisɔɔ lãlaardara n pɛ warɛ sor

6 Jɛɛrsɛsɩ jamana na fʋnɩ jamana dʋʋr, Juifisɔɔ lãlaardara khereraarɛ sɛbɛ dɩ wa n pɛ Juda dʋɔdarara na Jerujalɛmdarara sor. 7 Dɩ Artajɛɛrsɛsɩɩ bɔɔ, Biselam na Mitiredatɩ na Tabeɛl na tibil ɩkhasɔɔkɛ wɩ hananɩ kha kherere sɛbɛ Artajɛɛrsɛsɩraakɛ dʋɔnɩ Pɛrsɩ jamana. Wɩ kherere sɛbɛra na Aramdaraa sɛbɛ bi na Aramdaraa ca thɩmɩɩr. 8 Dɩ Rehumɩɩkɛ dɔnɩ gobanɛr na Simesayɩɩkɛ dʋɔnɩ ɔɔ sɛbɛ kheredaar kherere sɛbɛ dakha Artajɛɛrsɛsɩ jamanana Jerujalɛm thɩmɩɩrara. Sɛbɛra sor aa: 9 Mɛr Rehumɩɩkɛ dɔnɩ gobanɛr kherene sɛbɛɛkɛ na Simesayɩɩkɛ dʋɔnɩ sɛbɛ kheredaar na wɩrɛɛkɛ sɩ hananɩ kha, kɛ hanɩ Dɛn dɩɩra na Afarsatakɩ na Tarpɛl na Afarasɩ na Erɛkɩ na Babɩlɔn na Suuji na Deha na Elam, 10 na ca wɩrɛ sɛnɩɩ irǝ, kɛ dɔnɩ wɩrɛ Asɩnapaar dakpɩɛ, kɛ thɛnɩ ire kɔɔ khɩɩnɩ a ɩna pɛ Samarɩ dɩɩra na dɩ gɩrɛsɔra hanɩ Efɩratɩ mɩɩr iiro. 11 Yɛkɛ gɩrɛ sɛbɛra sonɩ, kɛ wɩ thɔnanɩ a ha Artajɛɛrsɛsɩ jamana: Artajɛɛrsɛsɩ jamana, sɛr afɩ thɔ̃dara gɩ, kɛ hanɩ Efɩratɩ mɩɩr iiro. 12 Sɩ n ƴaalɛ fɛr jamana n jɛ, dɩ Juifisɔɔkɛ thɛnɩ le afɩ pa, wɩ daan kɛ asɩ pa Jerujalɛm. Dɩ wɩ fʋrɛ dɩ wa n mɩ dɩɩkɛra n ɩrɛnanɩ lãʋ a dona dɩ puu. Wɩ n gbɛbɩrɛ go kʋʋsɔ, dɩ wa n mɩna gʋʋsɔ. 13 Sɩ n ƴaalɛ fɛr jamana n jɛ dɩ ado dɩɩle mɩ pɩ, dɩ ɔɔ gosɔ gbɛbɩ a pɩ, dɩdaraale na lɩmɩ patãtɩ bã, wa lɩmɩ lãpho bã, wa lɩmɩ dakha hʋ ka mũsumo bã. Dɩ pɩpɩɩ paar ga dor jamana lẽle thɩ̃ 'lɛ hʋ na jire. 14 Gɛr dɔ nɔɔ sɛrɛɛkɛ 'lɛnɩ nɔbɔɔ a ha afɩ thɔna sɩ yɩɛrɛ dɩ ga tee kha sɩ yɩ fɛr jamana wa n beesɩna sɩ sɩ pɩra', gɛr gɩ dɩ sɩ thɔ̃ sa n mɩɛ fɛr jamana. 15 Gɛr gɩ wɩ ƴaalɛ dɩ sɛbɛ kɔ̃tɩnasɔraakɛ afɩ ƴɛkʋʋldara kɔɔ kherenɩ. Fa yɩɛrɛ sɛbɛsɔraale. Dɩ fa jɩrɛ dɩ dɩɩ gɩɩkɛ n hananɩ lãʋ bɔɔ fɛw, da n pɛr nɩwɛ jamanasɔra na gobanɛrsɔraakɛ hanɩ bənəsɔra. Mama bɔɔrarakɛ, mɛna dɩdara n ɩɩrna lãʋ bɔɔ fɛw. Gɛrra dɔrakɛ kɩrʋ dɩ wɩ kɔɔ wɩɛl dɩɩra. 16 Gɛr gɩ dɩ sa n khere fɛr jamanana fɩ jɩ, dɩ ado dɩɩkɛ mɩ a pɩ, dɩ ɔɔ gosɔ gbɛbɩrɩ a pɩ, gelera na dɔ nɔɔ fa do jamana kɛ Efɩratɩ mɩɩr iirookɛ bã.

Tuurɩkɛ Artajɛɛrsɛsɩ jamana 'laanɩ

17 Dɩ jamana 'laarɛ tuurɩkɛ aa: Rehumɩkɛ dɔnɩ gobanɛr na Simesayɩɩkɛ dʋɔnɩ sɛbɛ kheredaar na wɩrɛ wɩ hananɩ kha, kɛ hanɩ Samarɩ na dɩ gɩrɛsɔraakɛ hanɩ Efɩratɩ mɩɩr iiro, mɩ fʋɔr nɛr. 18 Sɛbɛɛkɛra nɩ thɔna marnɩ, wɩ sor sɛbɛra ɩ̃ ƴɛbʋrɔ oti bɔɔbɔɔ a ha mɩ. 19 Dɩ mɩ pɛrɛ dɩ wɩ ƴaal a yɩɛ sobɔra dɩ mama bɔɔrarakɛ dɩɩle kɔɔ ɩɩrnanɛ sʋʋ jamanasɔra; dɩ dɩdara ɩɩrna ɲaɲaanɛ na lãʋ. 20 Jamanasɔ kɔɔ halerakɛ Jerujalɛm a 'li fãga jɔɔ ka, kɛ n kʋmãdɩnɛnɩ Efɩratɩ mɩɩr iir bǝǝn fɛw, dɩ wa n lɩmɩ wɩ patãtɩ na lãpho na hʋ ka mũsumo. 21 Nɛnɛ̃kɛ, nɩ pɩɛrɛ tɩbɩlaale, wɩ jɩɩl awɩ thɔna. Wa n mɩ dɩɩle sɩ a ga do mɛr 'laanɛ hʋɛaa ga. 22 Nɩ jɩɛ hɩɩn. Na n pɛr mǝ̃mǝlǝne ga thɩmɩɩra, gɩ do nɔɔ puure na n dɛbɩrɔ, gɩ ɩna nɩwɛ jamanasɔra gaa dɛ! 23 Dapaara, mɔ̃ wɩ sonɩ Artajɛɛrsɛsɩ jamanaa sɛbɛɛle Rehumɩ ƴɛra na Simesayɩɩ ƴɛra, kɛ dɔnɩ ɔɔ sɛbɛ kheredaar na wɩrɛ wɩ hananɩ kha; wɩ jaal na phananɛ Jerujalɛm Juifisɔɔ pa, a pɛr ɲɛ̃ kheu a cʋʋ wɩ na fãga dɩ wɩ jɩɩl thɔma. 24 Thale Thãgbaa fʋɔr cɔ mɩ thɔma jɩɩl Jerujalɛm. Thɔmaale jɩɩlɛ a pʋɔr foo a dana Dariusi Pɛrsɩ jamanaa balaɲɔ yɛra a gbanɩ jamana dʋʋr.