JAMANASƆƆ BALAƝƆ SƐBƐ
Akajɩaakɛ dɔnɩ Ɩjɩrayɛl jamanaa sopuu na ɔɔ khi
1
1 Ɔbɔɔkɛ Akabɩ jamana khini pɩ, Moabɩdara ɩɩrɛ a lã Ɩjɩrayɛldarara.2 Wi bɩɛl, Akajɩa kɔɔ ther jʋ̃ʋkaarakɛ hanɩ ɔɔ lɩ̃gã nãsʋrɔ ƴũu le Samarɩ dɩɩra, a ji, dɩ ga n khʋʋ a puuro ka. Dɩ a thʋɔn thɔ̃thɔna a so war aa: «Nɩ jala bulene Baal-Jebubi, kɛ dɔnɩ Ekʋrɔ̃daraa thãgba, a hɩnɛ a do ma kpɛɛrɛ khooraakɛra.» 3 Sɩ Thãgba Kɔ̃tɩnɩ thɔ̃thɔ̃ thu sor Elɩraakɛ thɛnɩ Tisebe dɩɩraa ayɩ: «Jalla caanɛ Samarɩ jamanaa thɔ̃thɔ̃sɔɔ a bulene wɩ wɔɔ: “Thãgba na hãale Ɩjɩrayɛl dɩɩra ga dɩ na n jal nɩ bule Baal-Jebubikɛ dʋɔnɩ Ekʋrɔ̃daraa thãgba yaa mɔ̃? 4 Dɩ gɛr gɩ mɛr Thãgba Kɔ̃tɩn sor thakɛ ayɩ: Fa ɩɩr phɩ̃ paaraakɛra fɩ phɩnɩ bã', fa khiri”». Dɩ Eli gbaar jal.
5 Dɩ thɔ̃thɔnaale kɛrɛ bir Akajɩaa pa, dɩ bule wɩ: «Aɲe dɔ kɩrʋ dɩ nɩ kɛr ɩ̃?» 6 Dɩ wɩ sʋʋraa aa: «Kuun bɩɛl caan sɛr a so sar: “Nɩ kɛra birə jamanaakɛra thɔna nɩnɩɩ pa a sʋɔraa: 'Thãgba Kɔ̃tɩn sor wɔɔ: «Thãgba na hãale Ɩjɩrayɛl dɩɩra ga dɩ fa n thɔ̃ fɩ bule Baal-Jebubikɛ dɔnɩ Ekʋrɔ̃daraa thãgba yaa mɔ̃? Aa gɛrra dɔ kɩrʋ, fa ɩɩr phɩ̃ paaraakɛra fɩ phɩnɩ bã, fa khiri ger.»”» 7 Dɩ Akajɩa jamana bule wɩ aa: «Kuunilera caanɛ nɩnɩ a mɩɩ nɩ thɩmɩaakɛra, mɔ̃ a ha?» 8 Dɩ wɩ sʋʋraa aa: «Kuun gɩ a to nʋ̃ suun kɩ̃kɩɩn, a khɩmɩna lophɛrɛ pelela.» Dɩ Akajɩa so aa: «Elɩɩkɛ thɛnɩ Tisebe dɩɩra gɩ.»
Akajɩa 'laarɛ hʋɛ wɩ fɔ Eli.
9 Akajɩa jamana thʋɔn sɔrasɛ kpalaɲɔ yʋɔrɩ (50) kɔ̃tɩ̃ bɩɛl na ɔɔ sɔrasɩsɔ kpalaɲɔ yʋɔr wɩ fɔ Eli. Dɩ sɔrasɛɛ kɔ̃tɩ̃ɩle jʋʋnɛ Elii pa gɔ̃gɔ̃ yʋɔ, kãkɛ a kɔɔ hanɩ a too a sʋʋraa: «Thãgbaa tibil wei, jamana sor fɩ gbuno.» 10 Dɩ Eli birse sɔrasɛ kpalaɲɔ yʋɔrɩ kɔ̃tɩ̃ɩle aa: «Ado Thãgbaa tibil mɩ do, dɔɔ n thɛ ƴũu a gbuno hɩna fɩ, fɛrɛ na afɩ sɔrasɩsɔ kpalaɲɔ yʋɔra(50)!» Dɩ dɔɔ ther ƴũu a gbũ a hɩ̃ɩ, ɔr na ɔɔ sɔrasɩsɔ kpalaɲɔ yʋɔra fɛw.
11 Dɩ Akajɩa bire thʋɔnaa sɔrasɛ kpalaɲɔ yʋɔrɩ kɔ̃tɩ̃ bɩɛl wo na ɔɔ sɔrasɩsɔ kpalaɲɔ yʋɔr. Dɩ sɔrasɩ kɔ̃tɩ̃ ole pɔr a so Elirə: «Thãgbaa tibil wei, jamana sor fɩ gbunə kɔrɔ!» 12 Dɩ Eli birse sɔrasɛ kpalaɲɔ yʋɔrɩ kɔ̃tɩ̃ɩle aa: «Ado Thãgbaa tibil mɩ do, dɔɔ n thɛ ƴũu a gbuno hɩna fɩ, fɛrɛ na afɩ sɔrasɩsɔ kpalaɲɔ yʋɔra!» Dɩ dɔɔ ther ƴũu a gbũ a hɩ̃ɩ, ɔr na ɔɔ sɔrasɩsɔ kpalaɲɔ yʋɔra fɛw.
13 Dɩ Akajɩa bire thɔ̃ balãtherdaar, kɛ dɔnɩ sɔrasɛ kpalaɲɔ yʋɔrɩ kɔ̃tɩ̃ kpɩɩ wo ɔɔ sɔrasɩsɔ kpalaɲɔ yʋɔr. Dɩ mɔ̃ balãtherdaarɩle jʋʋnɩ a na dã, a gburõkhure Elii ƴɛbʋrɔ da n phʋʋrʋ aa: «Thãgbaa tibil ya, mɩ n bɩɛl fɛr, dɔ ɩ̃ yi na sɔrasɛ kpalaɲɔ yʋɔrɩkɛ dɔnɩ afɩ thɔ̃daraa yi n do far thɩ̃ ɓʋ̃ɔ! 14 Hɩnɛ, dɔɔ kɔɔ ther ƴũu a gbũ a hɩ̃ caca sɔrasɛɛ kpalaɲɔ yʋɔrɩ kɔ̃tɩ̃sɔ yeɲɔ na awɩ sɔrasɩsɔ kpalaɲɔ yʋɔr fɛw, sɩ nɛnɛ̃ɛkɛ, dɔ ɩ̃ yi n do far thɩ̃ ɓʋ̃ɔ!» 15 Dɩ Thãgba Kɔ̃tɩnɩ thɔ̃thɔ̃ thu so Elɩra aa: «Gbuno kha na ɔr, fa n maa ga.» Dɩ Eli ɩɩrɛ a gbũ kha na ɔr jamanaa pa. 16 Dɩ a sʋʋraarɛ aa: «Thãgba Kɔ̃tɩn sɔ ayɩwɔɔ: “Gɩdonɩ fɩ thʋɔn thɔ̃thɔna wɩ bulene Baal-Jebubiikɛ dɔnɩ Ekʋrɔ̃daraa thãgba, Thãgba na hãakɛ Ɩjɩrayɛl dɩɩra dɩ wa bulə', yaa mɔ̃ ? Gɛr gɩ fa gbũ afɩ phɩ̃ paraakɛ fɩ phɩnɩ bã, fa khire gerra.”» 17 Dɩ Akajɩa khire mɔna Thãgba Kɔ̃tɩn kɔɔ sonɩ Elirə dɩ mɩɩ. Dɩ gɩdonɩ Akajɩa na hana bikuuna', ɔɔ õkuun Yoram gbaan ɔɔ too pa a do jamana. Dabɔɔle, Jojafatɩɩ bikuun Yoram kɔɔ cʋʋrɛ yɛna yeɲɔ jamana dʋʋra Judaa məlsɔɔra. 18 Akajɩaa thɩmɩɩ gɩrɛ sɛnɩ na thɩ̃ɛsɔɔkɛ a cʋʋnɩ, gɩ hale dɩ wɩ khere sɛbɛraakɛ n mɩanɩ Ɩjɩrayɛl jamanasɔɔda.