JAMANASƆƆ CACA SƐBƐ
DAVƖDƖ JAMANAA PƖPƖƖR THƖMƖ
Davɩdɩɩ tɩ̃ bɔda
1 Davɩdɩ jamana kɔɔ tɩnɛ jɔɔ ka, dɩ wɩ n thiire kẽkena a dɛbɩ sɩ ga n kporaa ga. 2 Dɩ ɔɔ thɔ̃dara sʋʋraa aa: «Gɩ bɔrɛ yaa jamana, sɩ ƴaal khebir khɔ̃ phaakɛ na jɛnɩ kuun pa' sɩ ha fɩ a na n hɩɩn fɩ, a phɩ̃ a na n khunə fɩ gɩ do nɔɔ ga n kpor far.» 3 Dɩ wɩ ƴaalɛ khebir bʋɔra a pɩna Ɩjɩrayɛl dɩɩ fɛw, a yɩ khebirikɛ wɩ n wenɩ Abɩsaagɩ Sunɛm dɩɩra a kpaa jalna jamanana. 4 Khebirile kɔɔ bɔrɛ na sobɔr. Dɩ a n hɩɩnɛ jamana da n dʋʋ thɔma. Sɩ jamana na gbaa dɩ dʋʋraa khɛr yuurəka'.
Adonɩya ƴaalɛ a tee jamana dʋʋr
5 Ga bɔɔlera, Davɩdɩɩ bikuun, Adonɩyaakɛ Hagɩtɩ kɔnɩ, ɩɩrɛ da n ka ire aa, ɩnɛr na dʋɔn jamana. Dɩ a kɔɔ ƴaalɛ hotoro bɩɛl na koke gãgona na kona kpalaɲɔ yʋɔrɩkɛ n kʋʋlɛɛnɩ ƴɩɛ dɩ wa n ca. 6 Adonɩya donɩ ɔr, ɔɔ thɩ na phaanʋʋ babɩɛlakɛ dɩkhara ayɩ: «Aɲe fɩ cʋʋ thaa !» ga. A kɔɔ bɔrɛ na sobɔr. Abɩsalɔ̃ wɩ kɔɔ kɔ̃ ɓo sɩ dɩ pɩɩrɔ. 7 Dɩ Adonɩya gʋʋrɛ kha na Joabɩɩkɛa dɔnɩ Seruyaa bikuun na Abɩataar bonɩ jidaar, dɩ wɩ tu a kpa ɔɔ kpɩɛra. 8 Sɩ Sadɔkɩ wer, kɛ dɔnɩ dakha bonɩ jidaar na Benayakɛ dɔnɩ Yehoyadaa bikuun na Natãakɛ dɔnɩ Thãgbaa mɩmɩɩ na Simeyɩ na Reyɩ na Davɩdɩɩ sɔrasɩ khena na kpa Adonɩyara ga.
9 Dɩ wi bɩɛl Adonɩya jaal bokaaraakɛ n phɔnɩ kɛ wɩ n wenɩ Johelɛtɩ, kɛ khonəni ɲɔ bu kaakɛ dɔnɩ kẽkẽ khidaraa pa, kɛ wɩ n wenɩ Eyin-Rogɛl, a gbɛbɩ ɓol kɔ̃tɩ̃ɩ. Dɩ a jire bonɩɛ na nʋ̃ yɩra na nʋ̃ kɔ̃tɩna na na ɓol khɔna a we ɔɔ õkũusɔ fɛʋʋkɛ dɔnɩ jamanaa bikũusɔ na kona fɛʋʋkɛ hanɩ jamanaa thɔna Juda bəənnə. 10 Sɩ aa we Thãgbaa mɩmɩɩ Natã na Benaya na jamanaa sɔrasɩ khesɔ na ɔɔ õkuun Salomɔ̃a'.
11 Dɩ Natã jaal a bule Salomɔ̃ɔ nɩ Batɩseba aa: «Fɩ nɩɛrɛ wɩ yɩnɩ Adonɩyaakɛ dɔnɩ Hagɩtɩɩ bikuun dʋɔn jamana nɛnɛ̃ sɩ asɩ kɔ̃tɩ̃ Davɩdɩ na nɩɛra' bɛ? 12 Nɛnɛ̃ ma ha fɛr fɩlɛ gɩ do nɔɔ fɩ taa afɩbara, fɩ taana afɩ bikuun Salomɔ̃. 13 Lona Davɩdɩ jamanaa pa a bulenee wɔɔ: “Ɩ̃ kɔ̃tɩ̃ jamana ya, fa kɔɔ ʋlfɛna mɛr afɩ thɔ̃daar khɛr ayɩ, ɩ̃ bikuun Salomɔ̃ na dʋɔn jamana, aa ɔr na gbaan afɩ jamana too pa gaa? Sɩ mɔ̃ dɔ nɔɔ dɩ Adonɩya fi a do jamana?” 14 Dɩ ɔbɔɔkɛ fa hanɩ mɩɩrɔ na jamana, mɛrɛ thɛthɛ na lʋʋn a na pɩɩr gɩrɛra fɩ n mɩɩnɩ.»
15 Dɩ Batɩseba lʋʋn jamanana le duu. Gɩdonɩ a tɩnɛ jɔɔ ka, Abɩsaagɩɩkɛ thɛnɩ Sunɛm dɩɩra kɔɔ hale da n hɩɩnʋ. 16 Batɩseba gʋɛrɛ yɩɛ, a gulẽga jamanaa ƴɛbʋrɔ, dɩ bulee: «Aɲe fɩ n ƴaal?» 17 Dɩ Batɩseba so aa: «Ɩ̃ kɔ̃tɩ̃, fɩ kɔɔ ʋlfɛnanɛ mɛr afɩ thɔ̃daar khɛr na Thãgba Kɔ̃tɩn afɩ Thãgbaa i ayɩ, ado fa hale bã, ɩ̃ bikuun Solomɔ̃ na dʋɔn jamana, aa ɔr na gbaan afɩ jamana too pa. 18 Sɩ hɩnɛ nɛnɛ̃, Adonɩya fire do jamana sɩrakɛ fɛr ɩ̃ kɔ̃tɩ̃ jamana, fa jɩrɔ thɩ̃ɛa'. 19 A gbɛbɩrɛ ɓol kɔ̃tɩ̃ɩ a ji bonɩɛ na nasɔ na na ɓol khɔna na nʋ̃ yɩra tə̃tə̃tə̃, a we fɛr jamanaa bikũusɔ fɛw na Abɩataar bonɩ jidaar na Joabɩɩkɛ dɔnɩ sɔrasɛɛ kɔ̃tɩ̃, sɩ aa we afɩ bikuun Salomɔ̃a'. 20 Sɩ nɛnɛ̃ ɩ̃ kɔ̃tɩ̃ jamana, fɛra Ɩjɩrayɛl fɛw ga yire fɩ puno fɩ so war casɩ ado fa hale bã, ntɛɛkɛ na dea fɩnɩ a na gba afɩ jamana too pa. 21 A mɛ̃ ga, ɔbɔɔkɛ fɛr ɩ̃ kɔ̃tɩ̃ jamana na hanɩ le bã, wa cʋʋrɛ mɛrɛ na ɩ̃ bikuun Salomɔ̃ sɩ ho dɩ padara.»
22 Mɔ̃ Batɩseba hanɩ mɩɩrɔ na jamana, Thãgbaa mɩmɩɩ Natã daan. 23 Dɩ wɩ sor jamanana aa: «Thãgbaa mɩmɩɩ Natã hakɛ da n ɩ̃!» Dɩ a lʋʋn jamanaa pa a gburõkhu a gʋɛ ƴɩɛ thɩɩra. 24 Agɩpɩ dɩ bule jamana aa: «Ɩ̃ kɔ̃tɩ̃ jamana, fɛr sɔ ayɩ ado fa hale bã, Adonɩya na dea fɩ jamana dʋʋra, aa ɔr na gbaan afɩ jamana too pa ya? 25 Gɩdonɩ a jaal nĩ a ji bonɩɛ na nasɔ na na ɓol khɔnasɔ na nʋ̃ yɩra tə̃tə̃tə̃. A wer fɛr jamanaa bikuun ɩkhasɔ na sɔrasɩ kɔ̃tɩnasɔ na Abɩataar bonɩ jidaar. Wɩ hale gɩrɛ a kho dɩ wa n ɲɔna nakha Adonɩya, dɩ wa n hulena aa: “Adonɩya jamana, hanana yire a pʋɔrɛ ƴɛrr!”. 26 Sɩ aa we mɛrkɛ dɔnɩ afɩ thɔ̃daar, dɩ Sadɔkɩɩkɛ dɔnɩ dakha bonɩ jidaar gɩ, dɩ Yehoyadaa bikuun Benaya gɩ, dɩ Salomɔ̃ɔkɛ dɔnɩ afɩ thɔ̃daar ga. 27 Sɩɩdo fɛr ɩ̃ kɔ̃tɩ̃ jamana 'laanɛ hʋɛ wɩ cʋɛ thale, sɩ fa mɩɛ mɛr afɩ thɔ̃daar ɩ̃ jɩ ado fa hale bã, ntɛɛkɛ na gbaanɩ afɩ jamana too pa gaa?»
28 Dɩ Davɩdɩ jamana so wɩ wɛ Batɩseba a hana nɩ, dɩ wɩ wɩɩrɛ dɩ lõ jɩɩl jamanaa ƴɛbʋrɔ. 29 Dɩ jamana ʋlfɛ ayɩ: «Thãgba Kɔ̃tɩnɩkɛ kɔɔ taa mɩnɩ nɩwɛra fɛw, yidaar a do! 30 Mɔna mɩ kɔɔ ʋlfɛna fɩnɩ na Thãgba Kɔ̃tɩnɩkɛ dɔnɩ Ɩjɩrayɛl Thãgbaa i ayɩ: “Ado ma hale bã, afɩ bikuun Salomɔ̃ na dʋɔn jamana, ɔr na gbaan ɩ̃ jamana too pa, mɛna ma cʋʋ nĩ.” » 31 Dɩ Batɩseba gʋɛ ƴɩɛ thɩɩra a gburõkhu jamanaa ƴɛbʋrɔ sa so: «Ɩ̃ kɔ̃tɩ̃ Davɩdɩ jamana, hanana yire a pʋɔrɛ khorr vʋ̃ʋ!»
Davɩdɩ phiire Salomɔ̃ a deaa jamana dʋʋra \ref 1 Kur. 29.21-25
32 Dɩ Davɩdɩ jamana so aa: «Nɩ wɛ Sadɔkɩ bonɩ jidaar a ha mɩ na Thãgbaa mɩmɩɩ Natã na Yehoyadaa bikuun Benaya.» Dɩ wɩ we wer dɩ wɩ lõ jamanaa pa. 33 Dɩ jamana so war: «Nɩ kpa ɩ̃ sɔrasɩ wɩrɛ khonə mɩnɩ, a cʋɛ ɩ̃ bikuun Salomɔ̃ a jʋʋn ɩ̃ kũukə̃-gãgora, nɩ kpaa nɩ gbunə Gɩhɔ̃ ɲɔ bu kaara. 34 Liir, Sadɔkɩ bonɩ jidaar na Thãgbaa mɩmɩɩ Natã na pɩɛraa niin yʋɔ a do Ɩjɩrayɛlɩ jamana. Agɩpɩ, na n ʋna tutuu, a na hulene ayɛ: «Salomɔ̃ jamana, hanana yire a pʋɔrɛ yɛrr!» 35 Agɩpɩ, na n kpaanɛɛ ɔɔ khiro a ɩ̃ a too ɩ̃ jamana too para, a dee mɩ a do jamana ɩ̃ kara. Gɩdonɩ ɔr mɩ pɛr dɩ do Ɩjɩrayɛl na Juda bə̃daraa thɔthɔɔ.» 36 Dɩ Yehoyadaa bikuun Benaya so jamanana aa: «Thale gɩ! Fɩ mɩɩrɛ bɔɔ ka. Thãgba Kɔ̃tɩnɩkɛ dɔnɩ fɛr ɩ̃ kɔ̃tɩ̃ jamanaa Thãgba n cʋɛ gɩrɛra fɩ sonɩ gɩ ha oti!
37 Dɩ mɔ̃kɛra Thãgba Kɔ̃tɩn kɔɔ hanɩ kha na fɛr ɩ̃ kɔ̃tɩ̃ jamana, a hana kha na Salomɔ̃ ɔmɛ̃. A khəyə ɔɔ jamana do gɩ jɔrakɛ fɛr ɩ̃ kɔ̃tɩ̃ Davɩdɩɩda.» 38 Dɩ Sadɔkɩ bonɩ jidaar na Thãgbaa mɩmɩɩ Natã na Yehoyadaa bikuun Benaya na Kerɛtɩ sɔrasɛ na Pelɛtɩ sɔrasɛ kɛ hanɩ jamanaa thɔna cʋʋrɛ Salomɔ̃ dɩ jʋʋn Davɩdɩ jamanaa kũkə̃-gãgora dɩ wɩ jalnaa Gɩhɔ̃ ɲɔ bu kaara. 39 Dɩ Sadɔkɩ bonɩ jidaar gbaar niin na ʋnɛ kẽkẽ waw a jalna, a pɛr Salomɔ̃ɔ yʋɔ dɩ do jamana. Dɩ wɩ ʋnɛ tutuu, dɩ tɩbɩla fɛw na n be hulẽbe aa: «Salomɔ̃ jamana n hanana yire a pʋɔrɛ yɛrr!» 40 Dɩ tɩbɩla fɛw n kpaaraarɛ khiro, dɩ wa n ʋ̃ bɩɩl, dɩ wa n kãka na da kɔ̃tɩ̃ɩ, dɩ awɩ hulẽbi na n tutuo thɩɩ.
41 Ɔbɔɔkɛ wɩ khonɩ dikor na pɩ Adonɩya nakha wɩrɛ fɛw kɛ a kɔɔ wenɩ nɩɛrɛ nɔ khenaale. Dɩ mɔ̃ Joabɩ nɩɛnɩ tutuu wire a bulele aa: «Aɲee nɔ khe ca n thɛ dɩɩra thale ya fɛ?» 42 Mɔ̃ a hanɩ mɩɩrɔ, Jonatãakɛ dɔnɩ Abɩataar bonɩ jidaarɩ bikuun daan. Dɩ Adonɩya wɩɩ aa: «Ɩna, gɩdonɩ tɩɩ bʋɔ ha fɩ, thɩmɩɩr pha bʋɔ fɩ hana dɩ fa n ɩna cɔ.» 43 Dɩ Jonatã sʋʋraa: «Kpei, mɛ̃ gaa dɛ ! Asɩ kɔ̃tɩ̃ Davɩdɩ jamana pɛrɛ Salomɔ̃ dɩ do jamana. 44 A thʋɔn Sadɔkɩ bonɩ jidaar na Thãgbaa mɩmɩɩ Natã na Yehoyadaa bikuun Benaya na Kerɛtɩ sɔrasɛ na Pelɛtɩ sɔrasɛ kɛ hanɩ Jamanaa thɔna dɩ wɩ cʋʋ Salomɔ̃ dɩ jʋʋn jamanaa kũkə̃-gãgora. 45 Dɩ Sadɔkɩ bonɩ jidaar na Thãgbaa mɩmɩɩ Natã pɩɛraarɛ jamana dʋʋr Gɩhɔ̃ ɲɔ bu kaara. Agɩpɩ dɩ wɩ the le na da kɔ̃tɩ̃ɩ a kɛr bir, dɩ daw hire dɩdara fɛw. Gɛr dʋɔn nɔ khenaakɛ nɩ nɩɛnɩ. 46 Dɩrakɛ Salomɔ̃ 'lire toore jamana too paara pɩ. 47 Dɩ Davɩdɩ jamanaa khukhusɔ pɔr a fʋɔr Davɩdɩ aa: “Afɩ Thãgba n cʋɛ Salomɔ̃ɔ i n the gɩ jɔ afɩ i. A khəyə ɔɔ jamana do gɩ jɔrakɛ afɩda.” Dɩ jamana gʋɛrɛ ƴɩɛ ɔɔ phɩ̃ para a fʋɔr. 48 Agɩpɩ dɩ bir so thaa: “Thãgba Kɔ̃tɩnɩkɛ dɔnɩ Ɩjɩrayɛlɩ Thãgba hɩna khɩɩrɛ, gɩrɛraakɛ a pɛrnɩ tibil ɩ̃ jamana too para nĩ, dɩ ɩ̃ puno yɩɩ na ɩ̃ yi!” » 49 Dɩ Maar fʋlɛ wɩrɛ fɛw kɛ Adonɩya kɔɔ wenɩ dɩ wa n jẽ. Dɩ wɛr fɛw ɩɩrɛ a bɩlã dɩɩdɩɩdɩɩ, dɩ ntɛ na n jalna ɔɔ bil. 50 Dɩ maar fʋrɛ Adonɩya Salomɔna na sobɔr, dɩ jal a fʋ bonɩ ji pa ʋma a fʋrɔ.
51 Dɩ wɩ mɩɛrɛ Salomɔ̃ aa: «Adonɩya hale a fʋ bonɩ ji pa ʋma a fʋrɔ, sɩ da n bɩɛl fɩ ʋlfɛnɛna nɩ nĩ ayɛ fa kʋ nɩ na bajɩna ga!» 52 Dɩ Salomɔ̃ so aa: «Ado a na cʋʋ gɩrɛ bʋɔnɔnɩ, ɔɔ yʋsũu bɩɛllakɛ na ji thɩɩra ga. Sɩ ado a cʋʋ dɩkha fɩɩʋ, foo a khi!» 53 Dɩ Salomɔ̃ jamana thʋɔn tɩbɩla dɩ wɩ jal a fʋʋ dɩ gbũ bonɩ ji paara. Dɩ Adonɩya jaal a gburõkhu Salomɔ̃ jamanaa ƴɛbʋrɔ, dɩ Salomɔ̃ sʋʋraa a kɔna ɔɔ cɔ.