Davɩdɩ har ɔɔ bikuun Salomɔ̃ pɩpɩɩ fɩlɛ sa khi
2
1 Mɔ̃ Davɩdɩ jɩnɩ ɔɔ khi bɔ n wɔrɔnɛ, a har ɔɔ bikuun Salomɔ̃ fɩlɛ ayɩ: 2 «Mɛrɛ, mɩ n jaal mɛ̃ kãkɛra tɩbɩla fɛw thɩɩraakɛ n jalnɩ. Hanana 'lar, a dɔ kuunɩkɛ bɩnanɩ. 3 Na hɩnɛ Thãgba Kɔ̃tɩn afɩ Thãgbaa nɔka, a na ɩrɛ ɔɔ hʋsɔɔra, a jɩɛ fʋ ɔɔ jɔfʋsɔɔkɛ kherenenɩ na ɔɔ jɔfʋsɔ na ɔɔ so na ɔɔ fɩlsɔ, mɔna gɩ kherenɩ Mʋɩjɩɩ jɔfʋra, gɩ do nɔɔ thɩ̃ɛ na n jal far bɔɔ afɩ thɔ̃sɔɔra fɛw na paar wo paarɩkɛ fa n kanɩ. 4 Dɩ Thãgba Kɔ̃tɩn na cʋʋrɛ gɩrɛɛkɛra a kɔɔ so marnɩ aa, ado ɩ̃ bɩsãsɔ na dʋ bʋrɛ awɩ ɩɩr para, ado wa cʋʋ sobɔr ɩnɩ ƴɛbʋrɔ na awɩ ha fɛw na awɩ kpɩɛr fɛw, ma 'lee dedee ɩ̃ jamana too para Ɩjɩrayɛlla yuurəka'. 5 Dɩ dakha, fɩ jɩrɛ bɔɔbɔɔ gɩrɛɛkɛ Joabɩɩkɛ dɔnɩ Seruyaa bikuun cʋʋ mɩnɩ. Ɔr kʋʋrɛ Ɩjɩrayɛl sɔrasɩ kɔ̃tɩna yeɲɔ: Abɩnɛɛrkɛ dɔnɩ Nɛɛr bikuun, na Amasaakɛ dɔnɩ Yetɛɛrɩ bikuun. Ha ie bɔɔ a kʋʋr wɩ, a deer awɩ tɔmɩ̃ dɩɩ ho koke bɔɔ gɩ. Dɩ awɩ tɔmɩn hale ɔɔ lophɛrɛra na ɔɔ nɛfaara a heen ɔɔ thɛthɛɛ yʋɔ. 6 Jɛ mɔ̃ fa cʋʋnɩ na kpɛsɛrɛɛkɛ fɩ hananɩ, sɩ fa n fagʋʋ a tɩ̃ a bulolo yʋʋ a khi a gbũ khĩdi dʋɔ na ha ɩa'. 7 Sɩ Barjɩlayɩɩkɛ thɛnɩ Galaadɩ dɩɩra, ɔɔ bikũusɔ wer, hanana war ha bulole. Dɔ wɩ do wɩrɛ na n khɔnɩ dikor na wɩrɛ n khɔnɩ le afɩ dɩko kho para. Gɩdonɩ ɔmɛ̃ wɩ kɔɔ caan mɩ na ha bulole ɔbɔɔkɛ mɩ n kɔɔ canɩ afɩ õkuun Abɩsalɔna. 8 Yɛ dakha Simeyɩɩkɛ dɔnɩ Geraa bikuun, kɛ thɛnɩ Bɛ̃jamɛ̃ɛ məllə, kɛ thɛnɩ Bahurim dɩɩra a hakɛ dɔdɔdɔ. A kɔɔ sɔ̃ mɛr dɩɩ puuro ka dawiikɛ mɩ kɔɔ canɩ dɩ ma n jal Mahanayɩm. Sɩ mɔ̃ mɩ kɛrnɩ dɩ ma n bir, a kɔɔ caan mɛr Jʋrdɛ̃ mɩɩra, dɩ mɩ kɔɔ ʋlfɛnaanɛ na Thãgba Kɔ̃tɩnɩ i ayɩ ma kʋʋ na bajɩna ga. 9 Sɩ nɛnɛ̃ wer, fa n fagʋʋ a ho dɩpa 'leedaara'. Gɩdonɩ tɩɩ kpɛsɛ fɩ do, fɩ jɩrɛ mɔ̃ fa cʋgʋʋnɩ. Dɔ bʋrɛ a kʋɔ na ɔɔ yʋsũ bulola, a gbunə tɔmɩn khĩdi dʋɔ.Davɩdɩ jamanaa khi
10 Davɩdɩ jamana khire a gbũ ɔɔ thɩ kɔ̃tɩ̃sɔɔra. Dɩ wɩ dʋʋrɛ ɔɔ dʋɔɔkɛ wɩ n wenɩ "Davɩdɩɩ dɩ" le Jerujalɛm. 11 Yɛ nʋɔɔkɛ Davɩdɩ cʋʋnɩ jamana dʋʋra Ɩjɩrayɛlla har yɛna kpalaɲɔ. A dor jamana a cʋʋna yɛna makoɲɔ Ebʋrɔ̃ dɩɩra, a do jamana a cʋʋna yɛna kpelẽ yʋɔr yẽther Jerujalɛm.
SALOMƆ̃Ɔ JAMANA DO
12 Salomɔ̃ gbaar ɔɔ thɩ Davɩdɩɩ jamana too pa, dɩ ɔɔ jamana do 'lire fãga na sobɔr.
Salomɔ̃ kʋrɛ ɔɔ õkuun Adonɩya
13 Wi bɩɛl, Hagɩtɩɩ bikuunɩkɛ wɩ n wenɩ Adonɩya pɔr Salomɔ̃ɔ nɩ Batɩsebaa pa. Dɩ Batɩseba bulee: «Daw fɩ n ɩna bɛ?» Dɩ yɩ: «Ɔɔ, daw gɩ!» 14 Agɩpɩ dɩ so: «Mɩ n ƴaalɛ ɩ̃ mɩɩna fɩ.» Dɩ Batɩseba so a mɩa. 15 Dɩ Adonɩya so aa: «Fɩ jɩrɛ mɛr jamana dʋʋr kɔɔ telẽ, dɩ Ɩjɩrayɛl fɛw na n pɩɛr wɩ pɛ mar ɩ̃ do jamana. Sɩ jamana dʋʋra bir fi dɩɩdo ɩ̃ õkuun gbaan, gɩdonɩ Thãgba Kɔ̃tɩn hanaa. 16 Nɛnɛ̃, mɩ n bɩɛl farɛ thɩ̃ bɩɛl dɩbara, fa n boa'!» Dɩ Batɩseba so a mɩa. 17 Dɩ Adonɩya so aa: «Gɩdonɩ ado fɩ so thɩ̃ɛ Salomɔna a na boa', mɩ n bɩɛl fɛr, sʋɔraa a hana mɩ Abɩsaagɩɩkɛ thɛnɩ Sunɛm dɩɩra a do ɩ̃ khɛr.» 18 Dɩ Batɩseba so aa: «Gɩ bɔrɛ. Mɛrɛ thɛthɛ na mɩɩnanɛ jamana a na pɛ fɩ».
19 Dɩ Batɩseba jaal ɔɔ bikuun Salomɔ̃ jamanaa pa ɩnɩ n mɩɩnaa ɩnɩ n pɛ Adonɩyara. Dɩ jamana ɩɩrɛ caanʋ a gburõkhu ɔɔ ƴɛbʋrɔ, sa bir too ɔɔ jamana too para. Dɩ a pɛrɛ dɩ wɩ thɩɩn jamana too pa bɩɛl ɔɔ ɲɔ̃bɔra, dɩ ɔɔ nɩ tooro. 20 Agɩpɩ, ɔɔ nɩ sor aa: «Mɩ n ƴaalɛ ɩ̃ bɩɛl far thɩ̃ bu bɩɛl dɩbara, fa n boa'!» Dɩ jamana sʋʋraa: «Bɩɛlnɛ ya ɩ̃ nɩ, ma boa'.» 21 Dɩ Batɩseba so aa: «Fa tu wɩ ha Adonɩya Abɩsaagɩɩkɛ thɛnɩ Sunɛm dɩɩra a do ɔɔ khɛraa?» 22 Dɩ Salomɔ̃ birse ɔɔ nɩ: «Aɲe gɩ dɩ fa n bɩɛl Abɩsaagɩɩkɛ thɛnɩ Sunɛm fɩ ha Adonɩya? Dɩ gɩdonɩ ɩ̃ õkuun kɔ̃tɩ̃ gɩ, dɩ bɩɛlnɛ jamana dʋʋr khorr a hanaa bɛɛ! Bɩɛlnɛ jamana dʋʋr a hanaa, ɔr na Abɩataar bonɩ jidaar na Joabɩɩkɛ dɔnɩ Seruyaa bikuun!»
23 Dɩ Salomɔ̃ jamana ʋlfɛ a wena Thãgba Kɔ̃tɩn aa: «Thãgba Kɔ̃tɩn n pɛ mar sor gɩ khɩɩr ka, ado Adonɩya na khi dɩɩ do thɩmɩɩrɩle a mɩɩnɩ dɔ kɩrʋa'!
24 Nɛnɛ̃ dɩphã, na Thãgba Kɔ̃tɩnɩkɛ dɔnɩ yidaar, ɔrkɛ cʋɛ mɩnɩ dɩ̃ 'li fãga, dɩ ha mɩ ɩ̃ thɩ Davɩdɩɩ jamana too pa na ɩ̃ məlsɔ mɔna a kɔɔ sonɩ. Nĩikɛ, foo wɩ kʋ Adonɩya.» 25 Dɩ Salomɔ̃ jamana thʋɔn Benayakɛ dɔnɩ Yehoyadaa bikuun dɩ jal kʋ Adonɩya. Thale Adonɩya khi.
Salomɔ̃ weere Abɩataar Jerujalɛm dɩɩra
26 Agɩpɩ, jamana sor Abɩataar bonɩ jidaara: «Deere kɔna Anatɔtɩ afɩ dʋɔ, gɩdonɩ fɩ teenanɛ khir. Sɩ ma kʋ fɩ nĩika', gɩdonɩ fɩ n kɔɔ gbaar Thãgba Kɔ̃tɩnɩ nɔ bɩɛl ʋlfɛ khɛɛsʋ ɩ̃ thɩ Davɩdɩ ƴɛbʋrɔ. Dɩ wo, fɩ kɔɔ gaarɛ kha na ɔr, ɔɔ bɔgaara fɛw.» 27 Thale Salomɔ̃ wee Abɩataar bonɩ jidaar Thãgba Kɔ̃tɩnɩ bonɩ ji thɔna a faa, gɩ cʋʋ thɩmɩɩrɩkɛ Thãgba Kɔ̃tɩn kɔɔ sonɩ Eli gbõdaarɩ məlsɔɔdara Silo n dã gɩ ha oti.
Salomɔ̃ kʋrɛ Joabɩ
28 Joabɩɩkɛ na kɔɔ kpaanɛnɩ Abɩsalɔna ga, sɩɩdo a kɔɔ kpaanɛ Adonɩyara nɩɛrɛ gɩrɛɛkɛ dananɩ. Dɩ a car jal Thãgba Kɔ̃tɩnɩ kẽkẽ waw a fʋ bonɩ ji pa ʋma. 29 Dɩ wɩ mɩɛrɛ Salomɔ̃ aa: «Joabɩ car jal Thãgba Kɔ̃tɩnɩ kẽkẽ waw aa, a hale bonɩ ji pa kɩrɔ. Dɩ Salomɔ̃ thʋɔn Yehoyadaa bikuun Benaya a jala kʋɔ. 30 Dɩ Benaya jaal Thãgba Kɔ̃tɩnɩ waw a so Joabɩra aa: «Jamana sor fɩ thɛ!» Dɩ Joabɩ so aa: «Kpei! Kɩɛra ma khi!» Dɩ Benaya kɛrɛ bir a mɩɛ jamana gɩrɛ Joabɩ sonɩ na tuurɩkɛ a 'laanɩ. 31 Dɩ jamana sor: «Cʋɛ mɔna a sonɩ. Jala kʋɔ lera a dɔ. Dɩ mɛ̃ fa hɛl mɛrɛra na ɩ̃ thɩɩ məlsɔɔra dɩpa 'leedaraa tɔmɩ̃ɩkɛ Joabɩ deernɩ mɔlɔ sɩ kɩrʋ na hala'. 32 Thãgba Kɔ̃tɩn na cʋʋrɛ dɩ ɔɔ tɔmɩna na bir na heenʋ. Gɩdonɩ a kʋʋrɛ tɩɩ sara yeɲɔɔkɛ baanɛɛnɩ fĩi na bajɩna, sɩ ɩ̃ thɩ Davɩdɩ na jɩrɔ thɩ̃ɛa': Nɛɛrɩ bikuun Abɩnɛɛr gɩ, kɛ dɔnɩ Ɩjɩrayɛl sɔrasɛɛ kɔ̃tɩ̃ na Yetɛɛr bikuun Amasaakɛ dɔnɩ Juda sɔrasɛɛ kɔ̃tɩ̃. 33 Awɩ tɔmɩ̃ n heene Joabɩ khorr vʋ̃ʋ na ɔɔ məlsɔ, sɩ Thãgba Kɔ̃tɩn n hana Davɩdɩ ha ɩɩ na ɔɔ məlsɔ na ɔɔ too, na wɩrɛ na n deaanɩ ɔɔ jamana too para khorr vʋ̃ʋ.» 34 Dɩ Benayakɛ dɔnɩ Yehoyadaa bikuun jaal a kʋ Joabɩ. Dɩ wɩ dʋʋrɛ ɔɔ cɔ, le bə̃ kpararaa. 35 Agɩpɩ jamana pɛrɛ Yehoyadaa bikuun Benaya dɩ do sɔrasɛɛ kɔ̃tɩ̃ Joabɩɩ kara, a pɛr Sadɔkɩ dɩ do bonɩ jidaar Abɩataarɩ kara.
Salomɔ̃ kʋrɛ Simeyi
36 Salomɔ̃ thʋɔn we Simeyi dɩ pɔ dɩ sʋʋraa: «Mɛ afɩ cɔ kɛ Jerujalɛm a tɔɔrɔ. Fa n ka nɔɔ a the Jerujalɛm dɩɩra ga. 37 Dɔ fɩ jɩ bɔɔbɔɔ, wireekɛ fa thenɩ dɩɩra a na seer Sedʋrɔ̃ ɲɔ kɔlɔ̃ fa khire. Dɩ afɩ yʋɔra afɩ tɔmɩ̃ na hẽe.» 38 Dɩ Simeyi tu: «Mɩ nɩɛrɛ! Ma cʋʋrɛ mɔna fɩ sonɩ ya ɩ̃ kɔ̃tɩ̃ jamana.» Dɩ Simeyi toore le Jerujalɛm a pʋɔr ƴɛrr.
39 Sɩ mɔ̃ yɛna yẽther kanɩ pɩ, Simeyii dee kona yeɲɔ caalɛlɛ a jal Maakaa bikuun Akɩsɩɩ pa, kɛ dɔnɩ jamanaakɛ hanɩ Gatɩ dɩɩra. Dɩ wɩ mɩɛrɛ Simeyi aa, ɔɔ deesɔɔra hale Gatɩ. 40 Dɩ Simeyi gbɛbɩ too paar a dɛ̃ɛ ɔɔ kũkənə a kpaan Gatɩ, Akɩsɩɩ pa ɩnɩ n ƴaal ɩnɩ dee kõsɔ. Dɩ a kpa wɛr a kɛrna Jerujalɛm.
41 Dɩ wɩ mɩɛrɛ Salomɔ̃ aa: «Simeyi kɔɔ ther Jerujalɛm a jal Gatɩ sa kɛr bir». 42 Dɩ jamana thʋɔn we Simeyi a bulee: «Ma kɔɔ cʋʋ fɩ dɩ fɩ ʋlfɛ na Thãgba Kɔ̃tɩn ayɩ : "Fa the dɩɩra gaa gaa?" Ma kɔɔ kpãkpaan far fɩ jɛ bɔɔbɔɔ dɩ wireekɛ fa thenɩ dɩɩra a na jal paar wo paar, fa khiri, dɩ fɩ birse mɩ aa fɩ nɩɛraa? 43 Sɩ mɔ̃ dɔ kɩrʋ dɩ fa cʋ ʋlfɛrɛɛkɛ fɩ kɔɔ ʋlfɛnanɩ Thãgba Kɔ̃tɩnna', fa cʋ dakha nɔkaarɩkɛ mɩ kɔɔ ha fɩna'?» 44 Agɩpɩ, jamana bire sʋʋraa: «Fɩ jɩrɛ na afɩ ha puure fɛʋʋkɛ fɩ kɔɔ cʋʋnɩ ɩ̃ thɩ Davɩdɩ. Thãgba Kɔ̃tɩn na kɛrnanɛ afɩ puurə a na heen afɩ yʋɔ. 45 Sɩ mɛr Salomɔ̃ jamana wer, mɩ 'lɛr bɔnanɛ. Thãgba Kɔ̃tɩn na cʋʋrɛ jamana dʋʋr dɩ ga tɩ Davɩdɩɩ cɔdarara bɔɔ khorr ɔɔ ƴɛra.» 46 Dɩ jamana 'laarɛ hʋɛ Benayaraakɛ dɔnɩ Yehoyadaa bikuun, dɩ thena Simeyi a kʋ. Thale Salomɔ̃ɔ jamana do jɩɩ 'lɛ fãga a pɛr.