Salomɔ̃ her Ejipiti jamanaa bikhɛr
3
1 Salomɔ̃ kure kha kuune na Faarɔ̃kɛ dɔnɩ Ejipiti jamana, dɩɩ do ɔɔ bikhɛr bɩɛlɩkɛ a henɩ dɔ nɔɔ. Dɩ a kpar ɔɔ khɛr a kɔna ka wɩ n wenɩ “Davɩdɩɩ dʋɔ” le Jerujalɛm. Dɩ a toore le phaphapha dɩɩ dana bɔɔkɛ a mɩnɩ ɔɔ jamana cɔ na Thãgba Kɔ̃tɩnɩ cɔ na Jerujalɛm dɩ bɛr gʋʋ.2 Dabɔɔle, sãasɩ paarsɔɔra tɩbɩla n kɔɔ ji bonɩɛ, gɩdonɩ wa kɔɔ mɩ Thãgba Kɔ̃tɩnɩ fʋɔr cɔ pa'.
Salomɔ̃ bɩɛlɛ kpɛsɛrɛ Thãgbara
3 Salomɔ̃ nar Thãgba Kɔ̃tɩn, da n kpaan ɔɔ thɩ Davɩdɩɩ nɔ thɩmɩsɔraakɛ a kɔɔ haanɩ. Sɩrakɛ, ɔr dakha, sãasɩ paarsɔɔrara a n kɔɔ ji latɩkolo bonɩɛ 'lo. 4 Wi bɩɛl Salomɔ̃ jamana jaal Gabãɔ dɩɩra ɩnɩ n ji bonɩɛ, gɩdonɩ le kɔɔ dʋɔn sãasɩ pa kɔ̃tɩ̃ɩ. Dɩ a jire bonɩ thiinə na nʋma gbɩlanɩ (1.000) bonɩ ji paara. 5 Dɩ Thãgba Kɔ̃tɩn nɩnaanɛ ɔɔbara dɩtɩnɔ dəəlela le Gabãɔ dɩɩra a sʋʋraa: «Bɩɛlɛ gɩrɛ fɩ n ƴaalnɩ, ma ha fɛr.» 6 Dɩ Salomɔ̃ so aa: «Fɩ hananɛ ha bulole ɩ̃ thɩ Davɩdɩ afɩ thɔ̃daara, gɩdonɩ a n kɔɔ ɩɩrɛ sobɔra afɩ ƴɛbʋrɔ na fɩl sarʋ na haarɩkɛ telenenɩ. Fɩ hananɛ ha bulo kɔ̃tɩ̃ɩlera ɔrra, a haa bikuun dɩ gba ɔɔ jamana too pa, mɔ̃ gɩ hanɩ gɩrɛ nĩ. 7 Dɩ nɛnɛ̃ Thãgba Kɔ̃tɩn ɩ̃ Thãgba, fɛr pɩɛr mɛr afɩ thɔ̃daara ɩ̃ dɔ jamana ɩ̃ thɩ Davɩdɩɩ kara. Sɩ mɛrɛ, daɓolbir mɩ do, ma jɩ thɩ̃ thɔɔra'. 8 Dɩ mɛr afɩ thɔ̃daar ha ʋrɛ afɩ tookɛra fɩ phiirnɩɩ thɩ̃thɩɩn, tibil jɔjʋɔ tə̃tə̃tə̃, kɛ tibil na marnɩ a na ther na jɩ nʋɔa'. 9 Hana mɩ bʋ dʋ haar ma n thɔɔna afɩ too, ma n leena bɔɔ na puure dɩɩdɩɩ! A mɛ̃ ga, amɛ na punone na thɔɔ afɩ tookɛ, wa jɔrnɩ kpãkpalã ga ?»
10 Dɩ bɩɛl caarlera Salomɔ̃ bɩɛlnɩ da Kɔ̃tɩnna na sobɔr. 11 Dɩ Thãgba sʋʋraa aa: «Gɩdonɩ gele fɩ bɩɛl, sɩ fa bɩɛl ɩ̃ hana fɩ yi gbãʋa', fa bɩɛl ɩ̃ hana fɩ lẽle thɩ̃ɛa', fa bɩɛl wo ɩ̃ cʋɛ afɩ lãlaardara wɩ khiirə', sa bɩɛl kpɛsɛrɛ, gɩ do nɔɔ fa n jɩ gɩrɛ saranɩ, 12 ma cʋʋrɛ gɩrɛra fɩ sonɩ. Ma ha fɛr haarɩkɛ henəni kpɛsɛrɛ na fɩl jɩɩr, kɛrakɛ wɩrɛ kɔɔ kʋlɛ fɩnɩ ƴɩɛ mamara na wɩrɛ na pɩrɔnɩ na kpaan, tibil bɩɛllakɛ na hale a na hana afɩ kpɛsɛ ca ga. 13 Ma ha fɛrakɛ gɩrɛ fa bɩɛlna', kɛ dɔnɩ lẽle thɩ̃ɛ na i dʋbɩrɛ a na dɛbɩrɔ. Dɩ mɛ̃ afɩ yi hana bɔɔ fɛw, jamana kpɩɩ na hale a na hona fa'. 14 Dɩ ado fa ɩɩr ɩ̃ hʋsɔɔra, a na hɩɩn ɩ̃ nɔ thɩmɩsɔ na ɩ̃ dɩɩrsɔ mɔ̃ afɩ thɩ Davɩdɩ kɔɔ cʋʋnɩ, ma ha fɛr yi gbãa.»
15 Dɩ Salomɔ̃ jaarɛ a yɩɛ dɩɩ do a dəəle. Dɩ mɔ̃ a kɛrnɩ bir Jerujalɛm a jaal a gburõkhu Thãgba Kɔ̃tɩnɩ ʋlfɛ khɛɛsʋ ƴɛbʋrɔ. Dɩ a jire bonɩ thiinəsɔ, na 'likha bonɩɛsɔ. Agɩpɩ dɩ we ɔɔ thɔ̃dara fɛw a cʋʋ wɩ ɓol kɔ̃tɩ̃ɩ.
Salomɔ̃ɔ kpɛsɛ so gʋʋrɛra
16 Wi bɩɛl, thetoo khɛra yeɲɔ pɔr Salomɔ̃ jamanaa pa, a jɩɩl ɔɔ ƴɛbʋrɔ. 17 Dɩ khɛr bɩɛl sor jamanana aa: «Pɛ mɩ nũu bɔɔbɔɔ yaa ɩ̃ kɔ̃tɩ̃. Mɛrɛ na khɛrɩkɛ, cɔ bɩɛla sɩ n cɔ. Dɩ̃ kɔ̃ kũubir cʋɔrɔɔkɛra sɩ hanɩ. 18 Dɩ mɔ̃ mɩ kɔnɩ ɩ̃ bi a cɔ balãther, ɔr dakha kʋɔn kũubir. Sɛrra haan kha le cʋɔrɔra dɩbara, tibil kpɩɩ na hala'. Sɛr yeɲɔra 'lẽ'lẽ'lẽ kɔɔ gɩ dɩbara le cʋɔrɔ. 19 Dɩ dɩtɩnɔ, khɛrɩkɛɛ bi khire, gɩdonɩ a phɩnɛ a ɩɩraa. 20 Dɩ a ɩɩrɛ dɩnɩrɔ a gba ɩ̃ bi ɩ̃ phɩ̃ para, bɔɔraakɛ mɛr afɩ thɔ̃daar khɛr n daarnɩ a jalna pɛ ɔɔ phɩ̃ para, sa gba ɔɔ biikɛ kheni a pɔna pɛ ɩ̃ phɩ̃ para. 21 Dɩ mɩ ɩɩrɛ duuro ɩ̃ mamɩ ɩ̃ bi, dɩɩ do a khire. Dɩ mɩ hɩɩnʋnɛ bɔɔbɔɔbɔɔ dahɩrɛra, dɩ ga do ɩ̃ biikɛ mɩ kɔnɩ ga.» 22 Dɩ khɛr bɩɛlɩle so aa: «Sõsor gɩ! Yidaar dʋɔn ɩ̃ bi, afɩ bi khe.» Dɩ cacadaarɩle so: «Yuurəka'! Afɩ bi khe, yidaar dʋɔn ɩ̃ bi.» Dɩ wa n bana kha mɛ̃ jamanaa ƴɛra.
23 Dɩ Jamana so aa: «Gɩdonɩ ʋ n yɩ: “Yidaarɩkɛ dʋɔn ɩ̃ bi, afɩ bi khe.” Dɩ ʋ n yɩ dakha: “Yuurəka'! Afɩ bi khe, yidaarɩkɛ dʋɔn ɩ̃ bi.” 24 Dɩ nɩ ƴaalɛ khalgbãa ɛna ha mɩ.» Dɩ wɩ gbaar khalgbãa a pɔna haa. 25 Dɩ jamana so aa: «Nɩ vaarɛ bi yirera yeɲɔ a tɩnɛnɛ wɩ dakuru dakuru.» 26 Dɩ haar na n hel khɛr ʋrɛ hɩnanɩ bi yireele ɔɔ birə, dɩ so jamanana: «Hu! Ɩ̃ kɔ̃tɩ̃ yaa mɩ bɩɛlɛ, nɩ hanaa bi yirera, na n kʋʋa'.» Sɩ bɩɛlɩle wer yɩ aa: «Ɔhɔ̃! Ma 'la'; fa 'la'! Nɩ vaarɛɛ!» 27 Dɩ jamana so aa: «Nɩ hana caca khɛrɩle bi yire, na n kʋʋa'. Ɔr dʋɔn bii nɩ.» 28 Dɩ Ɩjɩrayɛl caar fɛw nɩɛrɛ sor caarɩlera Salomɔ̃ jamana gʋʋrnɩ, dɩ wa n cʋʋ, gɩdonɩ wɩ yɩɛrɛ a jɩ dɩ Thãgbaa kpɛsɛ haaraarɛ a na n gʋʋrna sor na fɩl sarʋ.