Salomɔ̃ɔ tɩɩ kɔ̃tɩ̃sɔ
4
1 Salomɔ̃ kɔɔ dor jamana Ɩjɩrayɛl dɩɩra fɛw. 2 Yɛkɛ wɩrɛ dɔnɩ ɔɔ minisisɔ: Ajarɩyahuukɛ dʋɔnɩ Sadɔkɩɩ bikuun dʋɔn bonɩ jidaar. 3 Dɩ Elihorɛfɩ na Ahɩya, kɛ dɔnɩ Sɩsaa bikũusɔ do sɛbɛ kheredara. Dɩ Ahiludɩɩ bikuun Jojafatɩ do jamanaa mɩmɩɩ. 4 Dɩ Benayakɛ dɔnɩ Yehoyadaa bikuun do sɔrasɛɛ kɔ̃tɩ̃. Dɩ Sadɔkɩ na Abɩataar do bonɩ jidara. 5 Dɩ Ajarɩahuukɛ dɔnɩ Natãa bikuun do gobanɛrsɔɔ kɔ̃tɩ̃. Dɩ Jabudiikɛ dɔnɩ Natãa bikuun do jamanaa bonɩ jidaar na ɔɔ fɩl 'laada bɩnɔ. 6 Dɩ Ahɩsaar do jamanaa cɔ hɩ̃ɩda kɔ̃tɩn. Dɩ Adoniramɩɩkɛ dɔnɩ Abɩdaa bikuun do dɩ gbɛbɩ thɔ̃ hɩɩndaar kɔ̃tɩn.7 Salomɔ̃ kɔɔ pɛrɛ dakha gobanɛr yʋɔr yeɲɔ Ɩjɩrayɛl dɩɩra. Wɛr n 'laanɛ dɩkɔɔkɛ na n haanɛnɩ jamana na ɔɔ cɔdara fɛw. Yɩɛrɩ bɩnɔ gobanɛr bɩɛl n 'laarɛ dɩ cʋʋna sɩpor bɩɛl.
8 Yɛkɛ awɩ isɔ: Efɩrayɩmɩ gɔ̃gɔ̃ dɩsɔɔra, Huur bikuun gɩ. 9 Makatɩ bəənnə na Salbɩm bəənnə na Bɛtɩ-Semɛsɩ bəənnə na Elɔ̃ bəənnə na Bɛtɩ-Hanan bəənnə, Dekɛɛr bikuun gɩ.
10 Arubɔtɩ bəən na Soko bəən na Hefɛɛr dɩɩ fɛw, Hesɛdɩɩ bikuun gɩ.
11 Dɔɔr gɔ̃gɔ̃ dɩ bəən fɛw, Abɩnadabɩɩ bikuun gɩ. Ɔr hɛ Salomɔ̃ɔ bikhɛrɩkɛ wɩ n wenɩ Tafatɩ.
12 Taanakɩ dɩɩ na Megido bəən na Bɛtɩ-Sẽa bəən fɛw, kɛ wɔrɔnanɩ Saartã dɩɩkɛ hanɩ Jɩjɩreyɛl bə̃ faana, ɓɛlɛnɔ, a gbana Bɛtɩ-Sẽa dɩɩ a jalna foo a dana Abɛl-Mehola dɩɩra, foo a jal kpãasɛ Yɔkɩmeam dɩɩ, Baanaakɛ dʋɔnɩ Ahiludɩɩ bikuun gɩ.
13 Gebɛɛr bikuunɩkɛ tɔɔnɩ Ramɔtɩ dɩɩraakɛ hanɩ Galaadɩ bəənnə, ɔr n hɩnɛ Manasee bikuun Yayɩɩr dɩsɔɔkɛ hanɩle Galaadɩ bəənnə. Ɔrra n hɩnɛ dakha Argɔbɩ, kɛ hanɩ Basã bəənnə. Dɩ kɔ̃tɩna kpalãther gɩɩkɛ dɩ bɛr gʋʋ diironɩ, dɩ wɩ pɛr lõ kpaladaasɔɔkɛ dɔnɩ ther sɛna.
14 Mahanayɩm bəənnə, Ahɩnadabɩɩkɛ dɔnɩ Ɩdoo bikuun gɩ.
15 Nɛfɩtalɩɩ məlsɔɔ bənə, Ahɩmasɩ gɩ. Ɔr dakha her Salomɔ̃ɔ bikhɛr bɩɛlɩkɛ wɩ n wenɩ Basɩmatɩ.
16 Ajɛɛrɩ məlsɔɔ bənə na Bealɔtɩ bəənnə, Husayɩɩ bikuun Baana gɩ.
17 Ɩsakaarɩ məlsɔɔ bənə, Paruwaa bikuun Jojafatɩ gɩ.
18 Bɛ̃jamɛ̃ɛ məlsɔɔ bənə, Elaa bikuun Simeyi gɩ.
19 Galaadɩ bəənnə, Uurɩ bikuun Gebɛɛr gɩ. Ɔr n hɩnɛ bəənnɩkɛ Sɩhɔ̃ɔkɛ kɔɔ dɔnɩ Amɔɔr məlsɔɔ jamana kɔɔ hɩnɩ, na bəənnɩkɛ Ɔgɩɩkɛ kɔɔ dɔnɩ Basã jamana kɔɔ hɩnɩ. Gobanɛr bɩɛl 'lẽ'lẽ'lẽ n kɔɔ hɩnɛ dɩɩle fɛw.
20 Judadara na Ɩjɩrayɛldara jɔrɛ a və̃vĩə mɔ̃kɛ gbalãkothɩn n jɔrnɩ laɲɔ̃ nʋɔra. Sɩ dɩkɔ n dã wɛr dɩ wɩ kho a na ɲɔna a na kãkana.