BALAƝƆ SAMƲƐL
Davɩdɩ nɩɛrɛ Sayul na Jonatãa khi.
1
1 Sayul kɔɔ khire ɓo ɔbɔɔkɛ Davɩdɩ punonɩ Amalɛkɩɩ məlsɔ sa kɛr bir Sɩkɩlagɩ a cʋʋ wire yeɲɔ. 2 Dɩ balãther wirera, kuun bɩɛl ther Sayuli koke jɛw na kẽkẽ ɓǝrǝ, na thɩn yʋɔ, kɛ dɔnɩ ƴɛ bise jɩɩn; dɩ mɔ̃ a wɔrɔnɩ Davɩdɩ, a gburõkhure thɩɩra. 3 Dɩ Davɩdɩ bulee: «Kana fɩ the?» Dɩ birsee: «Ɩjɩrayɛlɩ koke jɛw mɩ for a ca.» 4 Dɩ Davɩdɩ bulee: «Dɩ aɲe dana le? Mɩɛnɛ mɩ». Dɩ kuunile sʋʋraa: «Ɩjɩrayɛl sɔrasɛ faarɛ kʋʋr sa caalɛ. Wɩ kʋʋr wɛr jɔɔ ka. Sayullǝkɛ na ɔɔ bikuun Jonatã khiire dakha». 5 Dɩ Davɩdɩ bule daɓolbirilera n mɩɛnɛɛnɩ ayɩ: «Mɔ̃ fɩ jɩ dɩ Sayul, na ɔɔ bikuun Jonatã khiire?» 6 Dɩ daɓolbirile sʋʋraa: «Ɩ̃ kara mɩ n ka le Gilboa gɔ̃gʋɔna, a yɩ Sayul da n wurõwu ɔɔ kpɩlala. Dɩ koke hotorosɔ na sɔrasɩ gãgodara na n gbʋrʋ dɔdɔdɔ. 7 Dɩ mɔ̃ a na kɩɩlnɩ a yɩ mɩ, a we mer, dɩ̃ tu. Mɩɩ: «Mɛr kaa!» 8 Dɩ bule mɩ, amɛ ha mɩ ya? Dɩ̃ɩ sʋʋraa: «Amalɛkɩɩ mǝl ha mɩ.» 9 Dɩ so mar, ɩ̃ tɔ pɔ a pɩrɛ nɩ; gɩdonɩ ɩnɩ hananɛ yire wer sɩ gɩ n kho ner jɔɔ ka. 10 Gɛr gɩ dɩ̃ tɔ dã a pɩɩrʋ gɩdonɩ mɩ jɩrɛ a na kɔɔ lerakɛ ɔɔ khoraala'. Agɩpɩ mɩ fore jamana kpɩɛrɩkɛ ɔɔ yʋɔ, a forna kpɛ̃buukɛ kɔɔ hanɩ ɔɔ ɲɔna a ɩna ɩ̃ ha fɛr ɩ̃ kɔ̃tɩ̃.»11 Dɩ Davɩdɩ fʋ ɔɔ kẽkẽsɔ a ɓǝǝr. Dɩ wɩrɛ fɛʋkɛ hanaanɩ kha ɓǝǝr awɩ kẽkẽsɔ dakha. 12 Dɩ wɩ cʋʋrɛ bɩɩ, a bɩ, a linǝ nʋɔsɔ, a dana dʋɔrɔ dɩɩ do Sayul na ɔɔ bikuun Jonatã, na Thãgba Kɔ̃tɩnɩ tookɛ dɔnɩ Ɩjɩrayɛldara, kɛ wɩ kɔɔ kʋʋrnɩ na bajɩna kʋʋra dɔ nɔɔ.
13 Dɩ Davɩdɩ bir bule daɓolbirilera mɩɛnɛɛnɩ, ayɩ: «Kana fɩ therakɛ tɔr? Dɩ tu: «Amalɛkɩɩ mǝl bɩɛlɩkɛ hanɩ kɛ a do kpakpal, ɔɔ bikuun ha mɩ». 14 Dɩ Davɩdɩ sʋʋraa: «Sɩ maar na fʋ fɩrakɛ mɔ̃ fa tini ɲɔ̃ɔ a na kʋna ʋrɛ Thãgba Kɔ̃tɩn phiirnǝǝ?» 15 Agɩpɩ dɩ we tibil bɩɛl, ɔɔ sɔrasɩsɔɔra a sʋʋraa: «Tɔ dana a kʋɔ!» Dɩ kuunile tɔr dã a kʋʋ. 16 Dɩ Davɩdɩ so: «Fɛr kɔ afɩbara; gɩdonɩ afɩ nɔ pɛ far sor, mɔ̃ fɩ sonɩ aa, fɛr kɔ ʋrɛ Thãgba Kɔ̃tɩn phiirni.»
Davɩdɩɩ bɔ waal nɩɩkɛ a pɛnɩ Sayul na Jonatãa khirǝ.
17 Dɩ Davɩdɩ ti bɔ waal nɩɛɛkɛ a waalna Sayul na ɔɔ bikuun Jonatã. 18 Dɩ a sor wɩ dɩrɛ Juda kuuminǝ. Sẽ tha nɩɛ gɩ: nɩɛɛle kherere sɛbɛraakɛ wɩ n wenɩ Jusitii sɛbɛ ayɩ:
19 Ɩjɩrayɛl wei, afɩ dakpɛsɔ tǝǝre ji afɩ gɔ̃gɔ̃sɔɔra.
Mɔ̃ɔ jiir nakalãtusɔ thʋ̃ jiir thaa ɓoɓo?
20 Na n mɩɩ gɩ Gatɩ dɩɩra yuuraka'.
Na n be gɩ wɩɛl yuurakɛ Asɩkalɔ̃ dɩ hʋɛsɔɔra ga.
Na n ha Fɩlɩsɩtɛ̃ kheminǝ kãka nɔ caarɩla'.
A mɛ̃ ga, wɩrɛ na dɔnɩ juifisɔaa' khebisɔ na n kãkarɛ.
21 Gilboa gɔ̃gɔna wei!
Mɩ̃ɛ na n ji nar yuurakɛ, dɩ thãgba ɲʋɔn ga.
Lɛ niin na n ha anɩ ɓɛlɛnɔ wɩ tiro khaardaa ga.
Gɩdonɩ le wɩ kpɔ̃kpɔrɔ̃ nakalãtusɔɔ tomɩr phidasɔ,
na Sayuli tomɩr phidaakɛ wa bʋlnɩ niin yuurəkɛ bã.
22 Jonatãa tha na n birnǝ khiru sɩ ga do sodaraa tɔmɩn a deera';
dɩ ga do wo nakalãtusɔ a gɔ dɩ niin thaa ga.
Dɩ Sayuli bajɩna na n jã sa bir kɛr mɔlɔa'.
23 Sayul na Jonatã, wɩ nar kha waa awɩ yi hana bɔɔ dɩɩ ka,
dɩ wa lee kharakɛ sa khiirnǝ ga.
Wɩ kɔɔ har kɔrɔ kɔrɔ a jɔ sɩgbʋraasɔ,
Awɩ fãga kɔɔ jɔr sidũ'ũsɔɔda.
24 Ɩjɩrayɛl kheminǝ wei! Nɩ bɛ Sayul;
Ɔr n kɔɔ tʋ̃ɔ nɩ kẽkẽ ɓɔ̃ sɛ hɩla himǝ himǝ,
ɔr n kɔɔ tʋ̃ɔ nɩ biir cʋʋ kẽkẽ ɓɔna phɩrr, kɛ wɩ ɓolnanɩ dɛ.
25 Aɲe tʋɔrɛ nakalãtusɔ kpɛɛlɛ ko gbɩlã biro?
Jonatã khiri afɩ gɔ̃gɔ̃sɔɔra.
26 Haar dɩ mɛr afɩ sora yaa ɩ̃ omɩ Jonatã!
Fɩ lõ mer haar ga do kpãkpalã ga.
Afɩ naw thʋnɛ kɔ̃tɩ̃ mar,
A ɓɔ̃ a jɔ khɛraa naw ɓoɓo.
27 Mɔ̃ɔ jiir nakalãtusɔ jiir?
Dɩ koke thɩ̃ɛsɔ buur, a buur mɔ̃?