1 SAMƲƐL
ELI NA SAMƲƐLƖ THƖMƖƖ
Samʋɛlɩ kɔ̃da na mɔ̃ wɩ gbaanɩ a ha Thãgba Kɔ̃tɩn
1
1 Kuun bɩɛl gɩ, a kɔɔ hale Ramatayɩm-Sofɩm dɩɩra, Efɩrayɩmɩ gɔ̃gɔ̃ bǝǝnnǝ da n do Ɛlkana, a do Efɩratadaar. Yeroham kɔnaa, dɩ Yeroham do Elihuu bikuun, dɩ Elihu do Tohuu bikuun, dɩ Tohu do Sufii bikuun. 2 Ɛlkana kɔɔ hananɛ khɛra yeɲɔ. Bɩɛl n dor Anɩ, dɩ bɩɛl na n do Penina. Penina kɔɔ hananɛ bɩsana sɩ Anɩ wer na hana bɩsaana'. 3 Dɩ yɩɛr wo yɩɛr, a n ther ɔɔ dʋɔ, dɩ jal Silo dɩɩra dɩ fʋɔr Thãgba Kɔ̃tɩnɩkɛ dɔnɩ kokenaa kɔ̃tɩ̃, dɩ jinǝnǝǝ bonɩɛsɔ. Dɩ le Silora, Eli bonɩ jidaarɩ bikona yeɲɔ, Ɔfɩnɩ na Fineasɩɩkɛ dɔnɩ Thãgba Kɔ̃tɩnɩ bonɩ jidara, kɔɔ ha. 4 A Ɛlkana ji bonɩɛ ga wi, a n har ɔɔ khɛr Penina bonɩ ji thɩ̃ɛ, dɩ hana ɔɔ bikona na ɔɔ bikhɛrsɔ oti, 5 sɩ Anɩ wer, narakɛ Thãgba Kɔ̃tɩn cʋgʋʋnɩ aa n kɔ̃ bǝ', a n haarɛ dɩ dɛbɩ, gɩdonɩ a naarɛ. 6 Dɩ Anɩ ɩɩl n cɩgʋʋrɛ haar bɔɔ fɛw na ɔɔ thɩmɩɩsɔ, gɩ do nɔɔ a na n cɩ̃cɩma gɩrɛraakɛ Thãgba Kɔ̃tɩn na haanɩ bɩsaana'. 7 Dɩ yɩɛr wo yɩɛr, thalera Penina n cʋʋ. Bɔɔ fɛʋʋkɛ Anɩ n jalnɩ Thãgba Kɔ̃tɩnɩ cɔ, thalera Penina n cɩgʋʋ haar. Dɩ gɩ n dor nɔɔ Anɩ na n bɩ, aa n kho dikora'. 8 Dɩ Ɛlkana n buleele: «Anɩ, aɲe gɩ dɩ fɩ bɩ a na bona dɩkɔ? Aɲe gɩ dɩ fɩ gbobi? Mɛrɛ, ma ba far bikona yʋɔra?»Anɩɩ Thãgba bɩɛl.
9 Dɩ dabɔɔkɛ wɩ khonɩ dɩkɔ le Silo pɩ, Anɩ ɩɩrɛ. Eli bonɩ jidaar hale too too paara Thãgba Kɔ̃tɩnɩ fʋɔr cɔ lõfonɔ jʋʋn paara. 10 Dɩ mɔna kharɛ wɔɔnɩ ɔɔ hara, a bɩɛlɛ Thãgba Kɔ̃tɩn da n khɩɩna jɔɔ. 11 Dɩ a sor nʋɔ Thãgbara ayɩ: «Thãgba Kɔ̃tɩnɩkɛ dɔnɩ kokenaa kɔ̃tɩ̃, hɩnɛ mɔ̃ mɛr afɩ thɔ̃daar khɛr n kʋnɩ bʋɔ. Kpɩɛrna mɩ, a jɛ mɩ bʋɔra. Ado fɩ ha mɩ bɩsã kũubir, ma gbaarɛ na ha fɩ bɔɔ khor a do afɩda, dɩ baka na lʋʋn yʋʋra ga». 12 Dɩ mɔna a jɩɩlnɩ Thãgba Kɔ̃tɩnɩ ƴɛra na Thãgba bɩɛl nɔ bɩɛlɩlera da n dɛbɩ, Eli n dʋrɛ bʋrɛ ɔɔ nɔra. 13 Haara Anɩ n mɩɩ, nɔfaa dɩbara na n tutuo, sɩ wire naa n the ƴũǝ'. Dɩ Eli kɔɔ kpɩɛrɛ taan n kʋɔ, 14 a sʋʋraa: «Kana taanna na kʋ fɩ na dana? Thɛ jala pal cʋɛ taan gɩ cɩ far!» 15 Dɩ Anɩ birsee: «Ɩ̃ kɔ̃tɩ̃ yaa, thale ga, mɩ dor khɛrɩkɛ haar n helnɩ. Ma ɲɔ dɩvɛ̃ dɩ taan ga, sɩ gɩrɛ n hella mɩnɩ haar mɩ n so Thãgba Kɔ̃tɩnna. 16 Fa n gba mɛr afɩ thɔ̃ dodaar khɛr ɩ̃ do far khaar khaar khɛra'; gɩdonɩ ɩ̃ ha hel na ɩ̃ gbobi thʋnɛ kar, dɩ gɛr cʋɛ mɩ dɩ mɩ mɩɩ mɛ̃ɛ a dana nɛnɛ̃ɛkɛ». 17 Dɩ Eli bir sʋʋraa: «Woo! Ɩjɩrayɛl Thãgba n hana fɩ gɩrɛɛkɛ fɩ bɩɛlaanɩ. Kɔna na ha ɩɩ». 18 Dɩ Anɩ so: «Dɔ mɛr afɩ thɔ̃dodaar khɛr n 'lɛ afɩ bɔna». Agɩpɩ a gbaa hʋɛ a jal a kho dikor, dɩ ƴɛ bire bir bɔr. 19 A gele pɩ, Ɛlkana na ɔɔ cɔdara ɩɩrɛ duuro a gburõkhu Thãgba Kɔ̃tɩnɩ ƴɛra, sa kɛr bir awɩ cɔ Rama dɩɩra. Dɩ Ɛlkana jɩ ɔɔ khɛr Anɩ. Dɩ Thãgba Kɔ̃tɩn jɩnanɛ Anɩ.
20 Dɩ Anɩ hana pɛmɛr yɩɛrɩle bɩnɔ a kɔ̃ kũubir a so: «Gɩdonɩ Thãgba Kɔ̃tɩnna mɩ bɩɛl, Samʋɛl ma n wɩɩ».
21 A gele karɔ, Ɛlkana na ɔɔ cɔdara bire jal Silo a ji ɔɔ yɛɛle bonɩ Thãgba Kɔ̃tɩnna, a tinǝ nʋɔkɛ a kɔɔ sonɩ. 22 Sɩ Anɩ wer na jala'. A sor ɔɔ kora aa, ɩna pɩɛrɛ a bɩsaanna bo ɩlɛ̃, gɛr ɩna jalnanaa ɩnɩ n ha Thãgba Kɔ̃tɩn, sɩ a too le khor. 23 Dɩ ɔɔ ko Ɛlkana sʋʋraa: «Cʋɛ gɩrɛ na bɔ farnɩ. Tɔɔ kɛ gɩ dana bɔɔkɛ fa tiini ɩlɛna. Thãgba Kɔ̃tɩn n cʋɛ gɩrɛ a sonɩ gɩ dã oti!» Dɩ a toore a haan ɔɔ birǝ a dana bɔɔkɛ a tiini ɩlɛna.
24 Dɩ dabɔɔkɛ a na tini bɩsaanna ɩlɛna, aa kpɛɛ jɔɔa', sɩ dɩ Anɩ na ɔɔ ko kpaa, a fʋna nakena yẽthera a gbana mɩɩn na ɲɔ̃kpõ ka nɔ bɩɛl, na dɩvɛ̃ lokaara, dɩ wɩ jal Thãgba Kɔ̃tɩnɩ cɔ Silo. 25 Wɩ kʋrɛ nakɩɩrra a jinǝ bonɩɛ agɩpɩ dɩ wɩ kpa bɩsaanna jalna Elirǝ. 26 Dɩ Anɩ so Elirǝ: «Gafara lee ɩ̃ kɔ̃tɩ̃! Sobɔr gɩ, mɛr dɔ khɛrɩkɛ kɔɔ ɩnanɩ a jɩɩl kɩɛr afɩ kɩrrɔ a bɩɛl Thãgba Kɔ̃tɩn. 27 Bɩsã kũubiri 'lidaraakɛ mɩ n kɔɔ bɩɛlɔ Thãgba Kɔ̃tɩn. Dɩ a 'laarɛ gɩrɛra mɩ bɩɛlaanɩ a ha mɩ. 28 Dɩ mɛrɛ dakha, mɩ ƴaalɛ ɩ̃ birnǝǝ ɩ̃ ha Thãgba Kɔ̃tɩn a do ɔɔda bɔɔ khorr ɔɔ yi hanana.» Agɩpɩ dɩ Ɛlkana na ɔɔ cɔdara gburõkhu Thãgba Kɔ̃tɩnɩ ƴɛra.