Anɩɩ Thãgba khɩɩ
2
1 Dɩ Anɩ bɩɛl Thãgba ayɩ:«Thãgba Kɔ̃tɩn dɔ nɔɔ dɩ daw hi mɩ haar,
Thãgba Kɔ̃tɩn jaga ɩ̃ fãga;
Dɩ ɩ̃ nɔ khɛrɛ dɩ ma puno na maan ɩ̃ lãlaardara,
Gɩdonɩ fɩ taa mɛr dɩ ma n kãka.
2 Fɛr Thãgba Kɔ̃tɩn dɩbara dʋɔn daphuu;
Dakpɩɩ na hale a hona fa';
Dɩ nãabõ kpɩɩ gɩ a hona asɩ Thãgba ga.
3 Na n ther anɩ i ka thɩmɩɩsɔ a na dɛba',
Dɩ na n do dǝ̃bǝǝl thɩmɩasɔ na n the nɩ nɔa',
Gɩdonɩ Thãgba Kɔ̃tɩn dor Thãgbaakɛ jɛnɩ thɩ̃ɛ fɛw,
Dɩ ɔr n mɩɛnɛ cʋʋ paar fɛw dɩ hɩɩn.
4 Koke kpɛnaa tha khaarɛ,
Fãga bɔdara bire 'lɛ fãga
dɩɩ do war lophɛrɛ pelela.
5 Dɩ wɩrɛ kɔɔ hananɩ bʋ̃ nɔɔ
bire wa n ƴaal thɔma wɩ 'lɛ gɩrɛ na haanɛ wɩnɩ,
sɩ wɩrɛ kɔɔ hananɩ kɔmɛr har hɩɩrɛra.
Khɛ kɔ̃bʋʋrakɛ kʋɔn bikona makoɲɔ
sɩ ʋrɛɛkɛ kɔɔ hananɩ bɩsana jɔɔ jɩɩl bi kʋɔn.
6 Thãgba Kɔ̃tɩn n 'laanɛ khir,
dɩ ɔrra n 'laanɛ yire.
Dɩ cʋʋ dɩ fɩ gbũ khĩdi dʋɔ, dɩ bir dɩ cʋʋ dɩ fɩ the.
7 Thãgba Kɔ̃tɩn n 'laanɛ bʋɔ, dɩ ɔrra n 'laanɛ ler,
dɩ wur fɩ dɩ thʋna thɩɩ, dɩ bir dɩ khǝi fɩ dɩ fɩ ɩɩr.
8 Ɔr n khǝyǝ bɔ kʋdaarɩkɛ hanɩ ɓuɓulola,
Dɩ ǝlnǝ ʋrɛ hanɩ puu yʋɔ,
Dɩ cʋʋ wɩ dɩ wɩ too na tɩɩ cʋnanɛsɔ;
Dɩ a n ha wɛr i dʋbɩ too paar;
Gɩdonɩ Thãgba Kɔ̃tɩn hɩna
thɩɩrkaraakɛ thɩɩ dɛɛnɔnɩ,
Dɩ thɩrkararaale ƴũu a mɩ thɩɩkɛ a dɛ̃ɛ.
9 A na bɛrɛ tɩɩ sarra awɩ nɛ ti para,
Sɩ tɩɩ puunǝ n bũburõ dabirǝrǝ,
Gɩdonɩ tibil na puno na kǝǝ gɩ the ɔɔ fãgara ga.
10 Wɩrɛ n bananɛnɩ Thãgba Kɔ̃tɩnɩda
na bũburone;
Le thãgbara ƴũu wɛr a na phaanɔ nɔ khena;
Thãgba Kɔ̃tɩn na kɩlɛna thɩɩ na ɔɔ khu pa fɛw.
A na har ɔɔ jamana punone,
sɩ a khǝi ʋrɛ a phiirnii fãga gɩ ɩɩr».
11 Ɛlkana kɛrɛ a kɔ̃ ɔɔ cɔ Rama dɩɩra, sɩ Samʋɛl too le Eli bonɩ jidaarɩ kalƴɔɔ, Thãgba Kɔ̃tɩnɩ thɔna.
Elii bikũusɔɔda \ref Oje 4. 6-10; Mal 2. 1-9; Jer 7. 3-7
12 Elii bikũusɔ kɔɔ dor tɩɩ puunǝ na sobɔr, wa n therna Thãgba Kɔ̃tɩnna'. 13 Mɔnakɛ wɩ donɩ bonɩ jidara, sɩ nɩ yɛkɛ mɔ̃ awɩ cʋʋ pa hanɩ awɩ toora: bɔɔ wo bɔɔkɛ tibil n jini bonɩɛ pɩ, dɩ wɩ ha nʋ̃ thɩɩrɔ, bonɩ jidaarɩ thɔ̃dodaar n pɔr na fʋsɛtɩkɛ hananɩ yɩma yẽther ɲɔ̃kɔɔ, 14 dɩ 'lɔɔ thɩ̃ cɩɩda ca dɔɔraakɛ gɩ hanɩ dɩ gɔ, nʋ̃ gɩrɛ fʋsɛtɩ thenanɩ dɩ jalna dɩ ha bonɩ jidaar. Thale Elii bikũusɔɔle n cʋʋ Ɩjɩrayɛldarara fɛʋʋkɛ n pʋɔnɩ le Thãgba Kɔ̃tɩnɩ cɔ Silo. 15 Dɩrakɛ wo, ɔbɔɔkɛ wa thiini bonɩ ji nʋ̃ niinnakɛ pa', bonɩ jidaarɩ thɔ̃dodaarra n car dɩ dã, dɩ so ʋrɛraakɛ hɩnanɩ bonɩɛ dɩ yɩ wɔɔ: «Bonɩ jidaar na n ƴaal nʋ̃ bɩnana', ha mɩ nʋ̃ bɩɩ ɩ̃ a ɩ̃ haa». 16 Dɩ a bonɩdaarɩle sʋʋraa : «Jɩlɛ ɓo, a mɩ thii niin pɩ, fɩ ti gɩrɛ fɩ pɛrnɩ haar». Dɩ so: «Kpei! Ha mɩ nɛnɛ̃; a fɩ bo, fãga bɩɩ mɩ n tinǝ». 17 Tɩbɩlaalee sopuu kɔɔ kɔ̃tɩnɛ Thãgba Kɔ̃tɩnɩ ƴɛra, gɩdonɩ wa n bu bonɩɛkɛ n jenɩ Thãgba Kɔ̃tɩnna fɩɩʋraka'.
18 Samʋɛl kɔɔ tor bonɩ ji kẽkɩɩnɩkɛ wɩ lenanɩ lɛ̃ da n dona Thãgba Kɔ̃tɩnɩ thɔ̃. 19 Dɩ yɩɛr wo yɩɛr, ɔɔ nɩ n bɛbɩrɛ kẽkɩɩn dɩ mɩɛnaa, a wɩ jal bonɩ ji paar na ɔɔ ko, dɩ haa. 20 Dɩ Eli n kɔɔ bɔnanɛ Ɛlkana na ɔɔ khɛr dɩ yɩ: «Thãgba Kɔ̃tɩn n hana fɩ mǝle khɛraakɛ, a lõ bɩsaanɩkɛ a haanɩɩ bara». A gele pɩ, wɩ n kɛrɛ bir awɩ dʋɔ. 21 Dɩ Thãgba Kɔ̃tɩn jɩɩlɛ Anɩna, dɩ bir kɔ̃ kuuminǝ yẽther na khɛrminǝ yeɲɔ. Sɩ Samʋɛl, bɩsã diineele wer n khʋɔn da n dɛɛnɔ Thãgba Kɔ̃tɩnɩ ƴɛra.
22 Eli bonɩ jidaar kɔɔ tɩnɛ waa gel. Cʋʋ pa kpalʋʋkɛ ɔɔ bikũusɔ n cʋʋnɩ Ɩjɩrayɛldarara daanɛ dɩ nɩɛ. A nɩɛrɛ dakha dɩ wɩ n phɩɩnanɛ khɛrasɔɔkɛ n kɔɔ gbɛbanɩ kha le Thãgba cãa wa lõfonʋɔra. 23 Dɩ Eli so war: «Aɲee thɔ̃ kpal ca ha gɩrɛ nɩ n donɩ dɩ̃ nɩɛ dɩ ɩ̃ too fɛw na n mɩɩ? 24 Mɩ bor. Gɩrɛ mɩ nɩɛnɩ dɩ wa n mɩɩ, thɔ̃ puu puu gɩ; nɩ dɔ gɩ khu dɛ! Nɩ tɔr Thãgba Kɔ̃tɩnɩ too na n to jɔfʋ kʋɛrɛra. 25 Ado tibil cʋʋ sopuu ɔɔ alãkha tibilǝ, Thãgba na kuure wɩ, sɩ ado tibil cʋʋ sopuu Thãgba Kɔ̃tɩnna, amɛ na ƴɛa na pɩɛraa?» Na gelerakɛ fɛw, sɩ wɩ bor awɩ thɩ nũ pɛrɛ; gɩdonɩ Thãgba Kɔ̃tɩn ƴaalɛ a kʋʋr wɩ. 26 Sɩ Samʋɛl, bɩsã diineele khʋɔnakɛ da n dɛɛnɔ. Dɩ a kɔɔ dar Thãgba Kɔ̃tɩn haar na tɩbɩla dakha.
Thãgbaa mɩmɩɩ bɩɛl sor Elira gɩrɛ na danaanɩ na ɔɔ cɔdara. \ref 1Sam 3.11-14; 4.11-18; 22.16-21; 1Fg 2.26-27,35; Oj 8.7
27 Thãgbaa mɩmɩɩ bɩɛl jaal Elii pa a sʋʋraa: «Thãgba Kɔ̃tɩn sɔ thakɛ ayɩwɔɔ: «Ma kɔɔ nɩna ɩ̃ɩbara afɩ thɩɩ cɔdara Ejipiti dɩɩra dabɔɔkɛ wɩ donɩ dea Faarɔ̃ɔ ɲɔ̃kɔaa'? 28 Mɩ phiire afɩ thɩ kɔ̃tɩ̃ Aarɔ̃, Ɩjɩrayɛl caar fɛw thɩ̃thɩɩn, a dɔ bonɩ jidaar, a na tɔ gaa kẽkẽ a na jɩlɛ ɩ̃ ƴɛra bonɩ ji paar, a gba bonɩ ji thɩ̃ɛsɔ a jenǝ mar bonɩɛ, a na thiǝ parfɛ̃. Dɩ mɩ har afɩ thɩɩ cɔdara Ɩjɩrayɛldaraa bonɩɩkɛ dɔnɩ dathiinǝ gɩ dɔ awɩda. 29 Mɔ̃ dɔ nɔɔ dɩ na n bu ɩ̃ bona', na khaardaasɔɔkɛ mɩ pɛrnɩ ga n cʋɛ ɩ̃ cɔa'? Mɔ̃ dɔ nɔɔ dɩ fɩ hana cʋʋr afɩ bikũusɔɔra a jɔ mɩ, dɩ nɩ phiir pa bɔy gɩrɛraakɛ ɩ̃ too Ɩjɩrayɛldara n ɩna marnɩ a kho, a nɩ? 30 Sobɔr gɩ: mɛr Thãgba Kɔ̃tɩnɩkɛ dɔnɩ Ɩjɩrayɛl Thãgba kɔɔ sɔ ayɩ: fɛrɛ na afɩ cɔdara na afɩ ca fɛw na kɔɔ hãa ɩ̃ thɔna bɔɔ khor, sɩ nĩ dɔ ʋlfɛrɛɛlee khu pa; mɛr Thãgba Kɔ̃tɩn sɔ! Wɩrɛ hana marnɩ cʋrɛ, wɛr mɩ n cʋ, sɩ wɩrɛ na n therana mɩna', yicuru mɩ n pɛ war. 31 Fa yɩ gaa, wiresɔɔkɛ n ɩnanɩ gɩrɛ, ma gbune afɩ cɔdara na afɩ caa fãga, gɩ do nɔɔ tibil na hale awɩ thɩ̃thɩɩn na tɩ̃ kpɩɩ bã. 32 Bɔɔ fɛw haar na n kʋɛ fɩ, sɩ thɩ̃ɛ fɛw na bɔrɛ Ɩjɩrayɛldarara, sɩ anɩ cara, wa yɩ le tɩɩ kpɛɛna'. 33 Ma sɩrɛ afɩ tibil ʋkha ɩ̃ bonɩ ji para, gɩ do nɔɔ kpɩɛrɛ n pɩ fa n bɩ, sɩ wɩrɛ fɛʋʋkɛ na leranɩ afɩ cɔ na ɓɔrɛ wa n khi. 34 Gɩrɛ na dananɩ afɩ bikona yeɲɔɔkɛ: Ɔfɩnɩ na Fineasɩ na dɔ far jɩɩn. Wɛr yeɲɔra fɛw, wi bɩɛlla wa kperẽ na khiir. 35 Agɩpɩ ma phiire bonɩ jidaar telẽe, kɛ na n cʋɛnɩ mɔ̃ ɩ̃ ha n ƴaalnɩ dɩ ma haarɛ mǝleekɛ na dʋɔnɩ bonɩ jidara khor. Dɩ ɔr na n gbaana ʋrɛ mɩ phiirni ƴɩɛ bɔɔ khor. 36 Dɩ ʋrɛ na sɛnɩ afɩ cɔ, ɔra a na jal na gburõkhu a bɩɛlaa war bire na dikor a sonanaa: «Mɩ n bɩɛl fɛr, pɛ mar bonɩ ji thɔ̃ ʋkha ɩ̃ do, gɩ do nɔɔ ɩ̃ 'lɛrɔ dikor ɩ̃ kho».