Thãgba wer Samʋɛl. \ref Jer 1. 4-9; 1Sam 2.27-36; 4.1, etc.
3
1 Samʋɛl bɩsã diineele kɔɔ hale Thãgba Kɔ̃tɩnɩ thɔna Elii kalƴɔɔ. Ga bɔɔsɔraale Thãgba Kɔ̃tɩn na n kɔɔ mɩɩna tɩbɩla tɔ̃tɔ̃a', dɩ thɩ̃ yɩrsɔ dakha na n kɔɔ hale gbala gbala ga. 2 Ga bɔɔraalera wi bɩɛl Eli phɩ̃ dɩtɩnɔ ɔɔ phɩ̃ pa, sɩ ɔɔ yisɔ pɩrɛ, aa n puno dɩ yɩ thaa bɔɔbɔɔa'. 3 Dɩ Samʋɛl dakha kɔɔ hale phɩ̃, Thãgba Kɔ̃tɩnɩ fʋɔr cɔra, a khunǝ Thãgbaa ʋlfɛ khɛɛsʋ. Thãgba dɔ carã na kɔɔ khiir pa'. 4 Dɩ Thãgba Kɔ̃tɩn wer Samʋɛl dɩ tu: «Mɛr kaa!» 5 Sa ca jal Elira ayɩ: «Fɩ we mɩnɩ, mɛr kɛ ɩna». Dɩ Eli birsee: «Ma we fa', kɛra birǝ phɩna». Dɩ kɛr bir phɩ̃. 6 Dɩ Thãgba Kɔ̃tɩn bir we Samʋɛl wo. Dɩ Samʋɛl ɩɩr a ca jal Elira ayɩ: «Fɩ we mɩnɩ, mɛr kɛ ɩna». Dɩ Eli birsee: «Ma we fa', ɩ̃ bikuun, kɛra birǝ phɩna». 7 Sɩ Samʋɛl na kɔɔ jɩ Thãgba Kɔ̃tɩnɩ thɛtha', dɩ Thãgba Kɔ̃tɩn na kɔɔ mɩɩnaa dakha babɩɛl pa.8 Dɩ Thãgba Kɔ̃tɩn bir we Samʋɛl balãtherdaa wo. Dɩ ɩɩr a jal Elira ayɩ: «Fɩ we mɩnɩ, mɛr kɛ». Liir Eli jɩ dɩphã, dɩ Thãgba Kɔ̃tɩn n wɛ bɩsaanna. 9 Dɩ so Samʋɛla: «Jala phɩna; ado wɩ bir we fɩ, sɔ yɛwɔɔ: «Thãgba Kɔ̃tɩn, afɩ thɔ̃dodaar n pɛr nũu, mɩa»». Dɩ Samʋɛl kɛr jal phɩ̃ ɔɔ phɩ̃ pa.
10 Dɩ Thãgba Kɔ̃tɩn gbũ, a jɩɩl le, sa we Samʋɛl mɔna a n kɔɔ cʋʋnɩ: «Samʋɛl, Samʋɛl!» Dɩ Samʋɛl so: «Mɩa, mɛr afɩ thɔ̃daar n pɛr nũu». 11 Dɩ Thãgba Kɔ̃tɩn so Samʋɛla: «Hɩnɛ, ma cʋʋrɛ thɩ̃ bɩɛl Ɩjɩrayɛl dɩɩra, dɩ mɛ̃ nʋɔ na kpaa tibil wo tibilikɛ na nɩɛnɛnɩ. 12 Ga wiile ma cʋʋrɛ gɩrɛ mɩ sonɩ ga daan Eli na ɔɔ cɔdara dɩ ga dã. Dɩ a mɩ fʋ, ma sɩ dɩkha ga. 13 Mɩ kɔɔ sʋʋraarɛ ayɩ, mɛrɛ thɛthɛ ƴaalɛ ɩ̃ pɛr ɔɔ cɔdarara sor bɔɔ khorr, gɩ do puureekɛ a jɩrɔnɩ kɩrʋ dɔ nɔɔ; gɩdonɩ ɔɔ bikũusɔ na n therna ɩ̃da ga, sɩ aa kɔɔ cʋʋrɔ thɩ̃ɛa'. 14 Gɛr dɔ nɔɔ dɩ mɩ ʋlfɛ ayɩ: Bonɩ jir na khaardaa na puno na hɛl Elii cɔdaraa sopuu yuu bã».
15 Dɩ Samʋɛl phɩnɛ le phɩ̃ paar a dana duuro. Dɩ mɔ̃ dɩɩ wɩlnɩ a khɛrɛ Thãgba Kɔ̃tɩnɩ fʋɔr cɔ lõsɔ, sɩ maar fʋʋrɛ aa 'la na mɩɩ Eli gɩrɛ a yɩna'. 16 Sɩ Eli wɩɩrɛ a sʋʋraa: «Ɩ̃ bikuun Samʋɛl!» Dɩ Samʋɛl tu: «Mɛr kaa!» 17 Dɩ Eli so: «Aɲe Thãgba Kɔ̃tɩn so far? Fa n ker mar dɩkha ga. Thãgba Kɔ̃tɩn n pɛ far so gɩ khɩɩr gɩ ka ado fɩ ker mar gɩrɛ a sonɩ». 18 Dɩ Samʋɛl gba fɛw a mɩgʋʋ, aa kerra dɩkha ga. Dɩ Eli so: «Thãgba Kɔ̃tɩn a do, a cʋɛ gɩrɛ a yɩnɩ dɩɩ bɔr».
19 Samʋɛl n khʋɔn dɩ Thãgba Kɔ̃tɩn harkha na ɔr; dɩ cʋʋ dɩ ɔɔ thɩmɩɩsɔɔkɛ a n mɩɩnɩ n dã mɔna gɩ sonɩ. 20 Dɩ Ɩjɩrayɛl fɛw, kɛ fɔnɩ Dã a dana Bɛɛrseba dɩɩ, jɩrɛ dɩ Thãgba Kɔ̃tɩn kɔɔ pɩɛr Samʋɛl dɩ do ɔɔ mɩmɩɩ. 21 Thãgba Kɔ̃tɩn n nɩnanɛ ɔɔbara mɛna le Silo; gɩdonɩ le a gba ɔɔ thɩmɩɩ a nɩnana Samʋɛl ɔɔbara. Dɩ Samʋɛl n thɔnanɛ thɩmɩara Ɩjɩrayɛl dɩɩra paar fɛw.