Fɩlɩsɩtɛ̃sɔ punone Ɩjɩrayɛldara, sa taa ʋlfɛ khɛɛsʋʋ. \ref Kh 78.56-64; 1 Sam 3.11-14
4
1 Wi bɩɛl, Ɩjɩrayɛldara ther wɩ kena Fɩlɩsɩtɛ̃sɔ. Wɩ jaal, a jɛ khunǝ bokaarɩkɛ wɩ n wenɩ Ebɛn-Ejɛɛr. Sɩ dɩ Fɩlɩsɩtɛ̃sɔ jɛ Afɛkɩ dɩɩra. 2 Dɩ Fɩlɩsɩtɛ̃sɔ ther, a thʋ kʋʋr na Ɩjɩrayɛldara dɩɩ jul, a puno wɩ. Dɩ wɩrɛ wɩ kʋʋrnɩ Ɩjɩrayɛldaraa thɩ̃thɩɩn koke paarɩle thɔɔrɛ kona gbɩlanɩ yenã (4000). 3 Dɩ yidara kɛrɛ bir Ɩjɩrayɛldaraa jɛ pa. Dɩ Ɩjɩrayɛl Kɔ̃tɩna so: «Aɲe dɔ nɔɔ dɩ Thãgba Kɔ̃tɩn faa sɩ nĩ dɩ Fɩlɩsɩtɛ̃sɔ puno sɩ ya fɛ? Nɩ dɔ sɩ jal Silo dɩɩra sɩ gba Thãgba Kɔ̃tɩnɩ ʋlfɛ khɛɛsʋ, sɩ jalna, Thãgba Kɔ̃tɩn n ha asɩ thɩ̃thɩɩn a taa sɩ asɩ lãlaardaraa ɲɔ̃kɔɔ». 4 Dɩ mɛ̃ wɩ thɔ̃ gbulõ bɩɛl dɩ wɩ jal Silo dɩɩra, a gba Thãgba Kɔ̃tɩnɩkɛ dɔnɩ kokenaa kɔ̃tɩ̃ɩ ʋlfɛ khɛɛsʋ, ka serubɛ̃sɔ n toonɩ. Elii bikona yeɲɔɔle, Ɔfɩnɩ na Fɩneyasɩ kɔɔ hale dɩ wa n thɔɔ Thãgba Kɔ̃tɩnɩ ʋlfɛ khɛɛsʋ.5 Ɔbɔɔkɛ Thãgba Kɔ̃tɩn ʋlfɛ khɛɛsʋ na lonɩ Ɩjɩrayɛldaraa koke jɛw, daw hor ga 'lɩɛr wɛr, dɩ wɩ be hulẽbe dɩ thɩɩ thʋ̃ tutugo ɓoɓo. 6 Dɩ Fɩlɩsɩtɛ̃sɔ nɩrɛ hulẽbeelera dɩ wa n so: «Aɲee hulẽbi ca thʋna the thaa Ebirǝsɔɔlee thɩ̃thɩɩn ya fɛ?» Dɩ ɔbɔɔkɛ wɩ nɩɛnɩ dɩ Thãgba Kɔ̃tɩnɩ ʋlfɛ khɛɛsʋ Ɩjɩrayɛldara lona le awɩ koke jɛw, 7 maar hor ga 'lɩɛr wɛr, dɩ wa n so: «Thãgba ɩnɛ Ɩjɩrayɛlɩ koke jɛw. Thɩlkɩɩr 'li ser, gɩdonɩ ga thɩ̃ɩkɛ na kɔɔ dã babɩɛla'. 8 Ga puu sarɛ! Amɛ na taa sɩ Thãgba punodaraalee ɲɔ̃kɔɔ? Waa thãgbasɔɔlera kɔɔ bɩɩrɛ Ejipitidara bǝǝnǝ, na thɩlke caar dɩɩdɩɩ. 9 Nɩ hana kuun haar Fɩlɩsɩtɛ̃sɔ! Nɩ pɩɛr 'lar, gɩ do nɔɔ sa n fi do Ebirǝsɔɔ dee mɔ̃ wɩ kɔɔ donɩ asɩ deesɔa'. Nɩ hana kuun haar a kɛ̃kɛrɛnɛna!» 10 Dɩ Fɩlɩsɩtɛ̃sɔ ker kʋʋr a puno Ɩjɩrayɛldara; dɩ wɛr fɛw bɩɛlbɩɛl caalɛ, ntɛ na n lõ ɔɔ kẽkẽ waw. Wɩ kʋʋrɛ Ɩjɩrayɛldara; a thʋ̃ kʋʋr wɩ kona gbɩlanɩ kpelẽ yʋɔr (30. 000), 11 a taana Thãgbaa ʋlfɛ khɛɛsʋ, sɩ Elii bikona yeɲɔ: Ɔfɩnɩ na Fɩneyasɩ khiir.
Elii khi
12 Kuun bɩɛlɩkɛ dɔnɩ Bɛ̃jamɛ̃ɛ ca fore le koke paar, a ca jal dã Silo. Ɔɔ kẽkẽsɔ ɓǝǝre, sɩ yʋʋ do thɩn haar. 13 Ɔbɔɔkɛ a na danɩ, Eli kɔɔ hale a too too paara hʋ nʋɔra, da n pɩɛr; gɩdonɩ haar na n togʋa' dɩɩ do Thãgbaa ʋlfɛ khɛɛsʋʋleeda dɔ nɔɔ. Dɩ kuun daan a lõ dɩɩra, a mɩɩ gɩrɛ kanɩ, dɩ hulẽbe gba dɩɩ fɛw. 14 Dɩ Eli nɩrɛ hulẽbeele da n bule: «Aɲee hulẽbi ca n thɛ thakɛ ya fɛ?» Sɩɩ do kuun daan na phananɛ a mɩɛ Eli. 15 Sɩ Eli kɔɔ hananɛ yɛna kpalanã yʋɔr makõther (98), dɩ ɔɔ yisɔ kɔɔ pɩrɛ, aa n yɩ bã. 16 Dɩ kuunile sʋʋraa: «Mɛr gɩ! Nĩkɛra mɩ the le koke paarɩle a for a ca ɩ̃ dã kɛ». Dɩ Eli bulee: «Dɩ aɲe ka le yaa ɩ̃ bii?» 17 Dɩ kuun tu : «Ɩjɩrayɛldara pɛrɛ khiru Fɩlɩsɩtɛ̃sɔɔra, dɩ wɩ puno sɩ dɩɩ kɔ̃tɩ̃ ka; dɩrakɛ afɩ bikũusɔ yeɲɔ, Ɔfɩnɩ na Fɩneyasɩ khiire, sɩ dɩ wɩ taa Thãgbaa ʋlfɛ khɛɛsʋ». 18 Ɔbɔɔkɛ kuun hanɩ a so Thãgbaa ʋlfɛ khɛɛsʋ, Eli ther ɔɔ too para, a tǝǝ ji lõfonɔ kɩrɔ, dɩ bãbire phã dɩ khi; gɩdonɩ a tɩnɛ ka, sa dʋbɩrɔ ga ha kpãkpalã ga. Yɛna kpalaɲɔ a kɔɔ do sogʋʋrdaar Ɩjɩrayɛl dɩɩra.
19 Fɩneyasɩɩ khɛr kɔɔ hananɛ pɛmɛr a dã kʋɔn. Dɩ ɔbɔɔkɛ a nɩɛnɩ Thãgbaa ʋlfɛ khɛɛsʋʋ teeda, na ɔɔ koo thɩɩ khi, na ɔɔ koo khida, walɛ phuroore 'liirrǝ dapaara dɩ gulẽga a kɔ̃ bi. 20 Sɩ mɔ̃ a n thɔɔnɩ khir, khɛraakɛ tɔɔnɩ khunǝǝ sʋʋraarɛ: «Fa n dɔ maar n fʋ fa', gɩdonɩ kũubir fɩ kɔ̃». Sɩ aa birsǝ', dɩ aa dʋ jʋʋrɛraka'. 21 Agɩpɩ dɩ dʋ birǝ ire Ikabɔdɩ, a so: «I dʋbɩrɛ ther Ɩjɩrayɛlɩ thɩ̃thɩɩn». A sor thale dɩɩ do Thãgbaa ʋlfɛ khɛɛsʋ teeda, na ɔɔ koo thɩɩda, na ɔɔ kooda dɔ nɔɔ. 22 A sor: «I dʋbɩrɛ ther Ɩjɩrayɛlɩ thɩ̃thɩɩn, gɩdonɩ wɩ taarɛ Thãgbaa ʋlfɛ khɛɛsʋ».