Thãgbaa ʋlfɛ khɛɛsʋ har Fɩlɩsɩtɛ̃sɔɔ dʋɔ.
5
1 Dɩ Fɩlɩsɩtɛ̃sɔɔra gbaar Thãgbaa ʋlfɛ khɛɛsʋʋlera, le Ebɛn-Ejɛɛr a kɔna dana Asɩdɔdɩ dɩɩra, 2 a lona Dagɔ̃ɔkɛ dɔnɩ awɩ thɩl kɔ̃tɩ̃ bɩɛlɩ cɔ, a thɩɩn a khunǝǝ. 3 Dɩ mɔ̃ dɩɩ wɩlnɩ duuro phiphi, dɩ Asɩdɔdɩdara na ɩɩr, wɩ yɩrɛ Dagɔ̃ dɩ ji sumõ le Thãgba Kɔ̃tɩnɩ ʋlfɛ khɛɛsʋʋ ƴɛ thɩ̃thɩɩn. Dɩ wɩ ǝlu a thɩɩn ɔɔ thɩɩn para. 4 Dɩ mɔ̃ dɩɩ birni na wɩl ulẽe duuro phiphi dɩ wa ɩɩr, Dagɔ̃ɔkɛ je sumõ Thãgba Kɔ̃tɩnɩ ʋlfɛ khɛɛsʋʋ ƴɛ thɩ̃thɩɩn, yʋʋ na ɲɛ̃ɛ kpaar a hale lõfonɔ gberẽkhurrǝ, sɩɩ do jẽjẽ haar sɛ. 5 Gelela dɔ nɔɔ, a dana nĩ, Dagɔ̃ɔ bonɩ jidaarsɔ na wɩrɛ fɛʋʋkɛ n lonanɩ ɔɔ cɔ le Asɩdɔdɩ, a wa lõ wa n sa lõfonɔ gberẽkhurǝ'. \ref 1Sam 6.1-12; Jɔb 2.5; Khɩ 97.96 Thãgba Kɔ̃tɩn gar Asɩdɔdɩdarara ɔɔ ɲɔ̃, a gba puure a pɛr war. A gbaar kookoo a pɛr war, na dɩɩsɔraakɛ diǝni Asɩdɔdɩ dɩɩra. 7 Dɩ mɔ̃ Asɩdɔdɩdara yɩɛnɩ dɩɩ do thale thɩ̃ɛ n ka, wɩ sor: «Ɩjɩrayɛlɩ Thãgbaa ʋlfɛ khɛɛsʋʋkɛ na too asɩ pa ga, gɩdonɩ a pɛ sarɛ thɩlkɩɩr, sɛrɛ na asɩ thãgba Dagɔna». 8 Dɩ wɩ thʋɔn ƴaal Fɩlɩsɩtɛ̃ kɔ̃tɩnasɔ a bule wɩ: «Mɔ̃ sa do Ɩjɩrayɛlɩ Thãgbaa ʋlfɛ khɛɛsʋʋkɛra?» Dɩ wɩ so: «Nɩ gba jalana Gatɩ dɩɩra». Dɩ wɩ gbaar Ɩjɩrayɛlɩ Thãgbaa ʋlfɛ khɛɛsʋ a jalna Gatɩ dɩɩra. 9 Dɩ mɔ̃ gɩ danɩ le pɩ, Thãgba Kɔ̃tɩn gar ɔɔ ɲɔ̃ dɩɩraale, dɩ ma kɔ̃tɩ̃ɩ fʋlɛ wɩ. A gbaar kookoo a pɛ dɩdararaale fɛw, a fʋna bɩsã yɩra a jalna dana tɩɩ kpɛɛna. 10 Dɩ wɩ gbaar Thãgbaa ʋlfɛ khɛɛsʋʋle a thɔna Ekʋrɔ̃ dɩɩra. Dɩ ɔbɔɔkɛ Thãgbaa ʋlfɛ khɛɛsʋ na lonɩ Ekʋrɔ̃ dɩɩra, Ekʋrɔ̃dara n ber hulẽbe dɩ wa n sona: «Wɩ ɩna sarɛ Ɩjɩrayɛlɩ Thãgbaa ʋlfɛ khɛɛsʋ wɩ kʋʋrna sɩ, sɛrɛ na asɩ too fɛw». 11 Dɩ wɩ thʋɔn ƴaal Fɩlɩsɩtɛ̃ kɔ̃tɩnasɔ fɛw, dɩ wɩ so: «Nɩ birǝnǝ Ɩjɩrayɛlɩ Thãgbaa ʋlfɛ khɛɛsʋ ɔɔ dʋɔ, ka a thenɩ, gɩ do nɔɔ a na n kʋʋr sɩ sɛrɛ na asɩ tooa'». Le dɩɩra fɛw, Thãgba pɛ warɛ thɩlkɩɩr dɩɩ khɩɩr ka, dɩ maar hor ga lɩɛr wɛr. 12 Dɩ tibil wɩrɛ na kɔɔ khiirenǝ', kɔɔ hananɛ kookoo. Dɩ dɩɩle koo hulẽbi na n jʋʋn thãgbara ƴũu, wɩ taa wɩ.