Fɩlɩsɩtɛ̃sɔ thɔnanɛ ʋlfɛ khɛɛsʋʋ Ɩjɩrayɛldaraa pa. \ref 1Sam 5; Mis 6.9; Jɔ 34.31-32
6
1 Sɩpora makoɲɔ Thãgba Kɔ̃tɩnɩ ʋlfɛ khɛɛsʋ kɔɔ cʋʋ Fɩlɩsɩtɛ̃sɔɔ dʋɔ. 2 Dɩ Fɩlɩsɩtɛ̃sɔ wer awɩ gbõdara, na bʋradara a bule wɩ: «Mɔ̃ sa do Thãgba Kɔ̃tɩnɩ ʋlfɛ khɛɛsʋʋkɛra? Nɩ mɩɛnɛ sɩ mɔ̃ sa fʋnɩ sɩ sɩ thɔnaa a bir ɔɔ dʋɔ». 3 Dɩ wɩ birse wɩ: «Ado na thɔna Ɩjɩrayɛlɩ Thãgbaa ʋlfɛ khɛɛsʋ, na n faa a bir dakhɩa', sɩ nɩ te thɩ̃ɛ gɩ nɩna dɩ dɩpa gbɛbɩ bonɩɛ nɩ ji, dɩ na kpɛɛrɛ. Dɩ a nɩ kpɛɛ na jɩrɛ gɩrɛ dɔnɩ nɔɔ, dɩ Thãgba na kɔɔ ti nar ɔɔ ɲɔ̃a'». 4 Dɩ Fɩlɩsɩtɛ̃sɔ so: «Aɲee bonɩ ca sa ji na gbɛbɩna dɩpaara?» Dɩ gbõdara na lokadaraale birse wɩ: «Nɩ bɛ thɩ̃ɛ yemɔy na dɛ, gɩ ho kha na kookoo khoolera wɩ pɛ narnɩ na tɔtɔ yemɔy. Nɩ bɛ gɩ mɩɛna yemɔ̃ Fɩlɩsɩtɛ̃sɔ kɔ̃tɩ̃sɔ hanɩ, gɩdonɩ thɩlke bɩɛlla 'lenɩ kha na anɩ kɔ̃tɩ̃sɔ. 5 Nɩ bɛ thɩ̃ɛ na dɛ gɩ ho kha na kookoo khoole a bɛ tɔtɔsɔ na dɛ, gɩ hona tɔtɔsɔɔkɛra n kʋɛanɩ anɩ dɩ, agɩpɩ nɩ dʋba Ɩjɩrayɛldaraa Thãgbaa i. Agakpaan a na wurre thɩlkenaakɛ a n pɛ narnɩ na anɩ thãgbasɔɔra, na anɩ dɩra. 6 Na n do anɩ ha n khɩɩr mɔ̃kɛ Ejipitidara na Farãɔ kɔɔ khɩɩrnɩ awɩ hasɔa'. Dɩ ɔbɔɔkɛ Thãgbaa thɛthɛra tutugo wɩnɩ, wa faa Ɩjɩrayɛldarara dɩ wɩ jalaa? 7 Nɛnɛ̃ɛkɛ, nɩ gbɛba na hotoro phaa, a fɔ na nɛ yeɲɔɔkɛ hananɩ dabii, kɛ kpelele na kɔɔ lonɩ fʋɔrɔ pɩ dɩ wɩ yɩ ga; nɩ gba na hotorora a pɛ war, sa hɛla dabiikɛ wɩ hananɩ a birǝnǝ cʋɔrɔ. 8 Nɩ gba Thãgba Kɔ̃tɩnɩ ʋlfɛ khɛɛsʋra a dɛɛnɛ na hotororaale, a gba dɛ thɩ̃ɛsɔɔkɛ nɩ gbɛbɩnɩ gɩ do dɩpa gbɛbɩ bonɩ jir, a pɛ khɛɛsʋ ʋkhara a thɩnɛ ɔɔ kɩrɔ; agɩpɩ nɩ fagʋʋ a jal, 9 sɩ na n hɩɩn. A nɩ yɩɛ dɩ gba Bɛtɩsɛmɛsɩ dɩ pɛl hʋɛ a na jʋʋn, ga dor Thãgba Kɔ̃tɩn kɔɔ pɛ sar thɩlke kɔ̃tɩ̃ caakɛ; a ga ha mɛ̃ woa', sa jɩrɛ dɩ ɔɔ ɲɔ̃ kɔɔ pɛ sar thɩlkɩɩrɩka' sɩ thɩ̃ɛ gɩɩkɛ dananɩ thale ba.10 Dɩ tɩbɩlaale cʋʋ ɔmɛna. Wɩ fʋlɛlɛ na nɛ yeɲɔɔkɛ n mamanɩ, a gba na hotoro a pɛ war sa hɛl awɩ bisɔɔ a khãanɔ cʋɔrɔ. 11 Wɩ gbaar Thãgbaa ʋlfɛ khɛɛsʋ na khɛɛsʋ ʋrɛ hananɩ dɛ thɩ̃ɛsɔɔkɛ wɩ gbɛbɩnɩ dɩ ga n hona awɩ kookoo khosɔɔra, na tɔtɔsɔɔle wɩ gbɛbɩnɩ na dɛ, a pɛr. 12 Dɩ naale gbaar Bɛtɩsɛmɛsɩ dɩ hʋɛ, a telẽ dẽdẽ dɩ wa n jal. Hʋɛɛlera wɩ gba a bɩ dɩ wa n jalna wa n birnǝ ɲɔ̃bɔɔ dɩ ɲɔ̃bɩlã ga. Dɩ Fɩlɩsɩtɛ̃sɔɔ kɔ̃tɩ̃sɔ thʋ wɛr sɩkaar a jalna dana Bɛtɩsɛmɛsɩ pɛla. \ref 1Kur 13.5-13; Thɩ 19.21; Ebi 12. 28-29
13 Bɛtɩsɛmɛsɩdara kɔɔ hale ɓɛlɛnɔ dɩ wa n kha bile, a na hɩɩn a 'laa yɩ ʋlfɛ khɛɛsʋʋ da n pɔ, dɩ daw fʋlɛ wɩ dɩ wa n kãka. 14 Dɩ na hotoroole daan Bɛtɩsɛmɛsɩ Jojuee lɔɔ a jɩɩl le. Sɩ boka kɔ̃tɩ̃ɩ kɔɔ hale paarɩlera, dɩ wɩ gbaar na hotoroole a cɩɩr ɓɩɛl dɩɩ do dɛɛ, a fʋlɛna na nɛɛle a jinǝ bonɩ thiinǝ Thãgba Kɔ̃tɩnna. 15 Levɩɩ məlsɔ kɔɔ tire Thãgba Kɔ̃tɩnɩ ʋlfɛ khɛɛsʋ na khɛɛsʋ kpɩɩle kɔɔ hanɩ le na dɛ thɩ̃ɛsɔɔle a dɛ̃ɛ boka kɔ̃tɩɩnaale. Dɩ Bɛtɩsɛmɛsɩdara kɔɔ jire bonɩ thiinǝsɔ na bonɩɛsɔ Thãgba Kɔ̃tɩnna ga wiile. 16 Ɔbɔɔkɛ Fɩlɩsɩtɛ̃sɔɔ kɔ̃tɩ̃sɔ yemɔɩle tornɩ yire gɩrɛra kanɩ, wɩ kɛrɛ ga wirǝ a bir Ekʋrɔ̃ dɩɩra. 17 Dɛ thɩ̃ɛsɔɔlera n hɔnɩ kookoo khoo, kɛ Fɩlɩsɩtɛ̃sɔ tini wɩ gbɛbɩna awɩ dɩpa, gaa nɔ ha gɩrɛ: wɩ tire bɩɛl Asɩdɔdɩ dɩɩ irǝ, a ti bɩɛl Gaja dɩɩ irǝ, a ti bɩɛl Asɩkalɔ̃ dɩɩ irǝ, a ti bɩɛl Gatɩ dɩɩ irǝ, a ti bɩɛl Ekʋrɔ̃ dɩɩ irǝ. 18 Tɔtɔɔle wɩ cʋʋnɩ na dɛ kɔɔ harɛ dakha. Wɩ ti ger na Fɩlɩsɩtɛ̃sɔɔ kɔ̃tɩ̃sɔ yemɔɩlee dɩ isɔ dɩɩdɩɩ; dɩɩ fʋna dɩ kɔ̃tɩnaakɛ gʋʋ kpalalɔnɩ, a gbana dɩ biisɔɔ, foo a jalna dana boka kɔ̃tɩnaakɛ wɩ dɛɛnɩ Thãgba Kɔ̃tɩnɩ ʋlfɛ khɛɛsʋ, kɛ hanɩ le nĩ gɩrɛ 'lo Bɛtɩsemɛsɩ Jojuee lɔɔ.
19 Dɩ Thãgba Kɔ̃tɩn ber Bɛtɩsemɛsɩdara a kʋ tɩbɩla kpalãther yʋɔr tɩbɩla gbɩlanɩ kpalaɲɔ yʋɔrɩ thɩ̃thɩɩn, gɩdonɩ wɩ hɩɩnɛ ɔɔ ʋlfɛ khɛɛsʋ. Dɩ wɩ kɔɔ har ƴɛ bierera gɩdonɩ Thãgba Kɔ̃tɩn pɛ warɛ thɩlkɩɩr dɩɩ khɩɩr. 20 Dɩ wɩ sor wɔɔ: «Amɛ na punone na mar na jɩɩl Thãgba Kɔ̃tɩnɩ ƴɛra, Thãgbaakɛra phonɩ? Dɩ kana sa jalna ɔɔ ʋlfɛ khɛɛsʋ a hʋnɔna sɩ kha?» 21 Dɩ wɩ thʋɔn tɩbɩla Kɩrɩyat-Yearɩm dʋɔdaraa pa wɩ sɔ war: «Fɩlɩsɩtɛ̃sɔ birnǝne Thãgba Kɔ̃tɩnɩ ʋlfɛ khɛɛsʋ a ɩna; nɩ ɩna gba jalana le anɩ pa».