7
1 Dɩ Kɩrɩyatɩ-Yearɩmɩdara jaal a gba Thãgba Kɔ̃tɩnɩ ʋlfɛ khɛɛsʋ a kɔna, a jalna Abɩnadabɩɩ cɔ gɔ̃gʋɔna a thɩɩn. Wɩ phiire ɔɔ bikuun Eleajaar a pɩɛraa niin sa pɩɛraa da n bɛr Thãgba Kɔ̃tɩnɩ ʋlfɛ khɛɛsʋ.Mɔ̃ Samʋɛl donɩ Ɩjɩrayɛldaraa sogʋʋrdaar na awɩ kǝǝ 'lɛ Fɩlɩsɩtɛ̃sɔɔra. \ref Jow 2. 12-18; Sog. 10.15-16; Ej. 37.1-14
2 Dɩ Thãgba Kɔ̃tɩnɩ ʋlfɛ khɛɛsʋ toore le Kɩrɩyatɩ-Yearɩm dɩɩra a pʋɔr foo, a dana yɛna kpelẽ. Dɩ Ɩjɩrayɛldara n kɔɔ dor bʋɔ sɩ wɩ kɛr wɩ bir Thãgba Kɔ̃tɩnna. 3 Dɩ Samʋɛl so war: «Ado na haar kpẽgelẽe nɩ kɛr dɩ na n bir Thãgba Kɔ̃tɩnna, na n fʋɔr Asɩtaartesɔ na thãgba kpɩɩsɔ bã. Nɩ kɛra anɩ ha koo a birǝnǝ Thãgba Kɔ̃tɩnna, a na dɔna ɔr dɩbarara thɔma; dɩ a na taa nɛr Fɩlɩsɩtɛ̃sɔɔra». 4 Dɩ Ɩjɩrayɛldara tiir thãgbasɔɔkɛ wɩ n wenɩ Baalsɔ, na Asɩtaartesɔ awɩ thɩ̃thɩɩn, sɩ dɩ wa n fʋɔr Thãgba Kɔ̃tɩn dɩbara.
5 Dɩ Samʋɛl so war: «Nɩ kpa Ɩjɩrayɛldara fɛw a dera Mɩsɩpa dɩɩra dɩ ma bɩɛlɛ Thãgba Kɔ̃tɩn na pɛ nar». 6 Dɩ Ɩjɩrayɛl bɩsana ther a der Mɩsɩpa, a cɩɛr ɲʋɔn a deer Thãgba Kɔ̃tɩnɩ ƴɛra. Dɩ wɩ lire nʋɔ ga wiile a so: «Sɩ cʋʋrɛ dɩɩ Thãgba Kɔ̃tɩnna!» Dɩ le Mɩsɩpa dɩɩra Samʋɛl gʋʋr Ɩjɩrayɛl bɩsanaa so. \ref Sog 2.16,18; Ebi 11.32-34; 1Sam 12.1-5
7 Ɔbɔɔkɛ Fɩlɩsɩtɛ̃sɔ nɩɛnɩ dɩ Ɩjɩrayɛldara kpar kha a jɛ Mɩsɩpa, awɩ kɔ̃tɩ̃sɔ ɩɩrɛ jʋʋn wɩ kena wɩ. Dɩ Ɩjɩrayɛl bɩsana nɩɛrɛ dɩ maar fʋlɛ wɩ, 8 dɩ wɩ sor Samʋɛla: «Fa n pɩr Thãgba bɩɛla', sɩ na hulene Thãgba Kɔ̃tɩnaakɛ dɔnɩ asɩ Thãgba asɩ sora, a taa sɩ Fɩlɩsɩtɛ̃sɔɔ ɲɔ̃kɔɔ. 9 Dɩ Samʋɛl fʋrɛ bana bireekɛ n mamanɩ a jinǝ bonɩ thiinǝ Thãgba Kɔ̃tɩnna. Dɩ a hulene Thãgba Kɔ̃tɩnna Ɩjɩrayɛldaraa sora dɩ pɩɛ nũu. 10 Ɔbɔɔkɛ Samʋɛl hanɩ bonɩ jiro, Fɩlɩsɩtɛ̃sɔ tɔr wa n dã Ɩjɩrayɛldara wɩ kena wɩ. Ga wiile Thãgba Kɔ̃tɩn cʋʋrɛ dɩ thãgba phɛɛ nɔ khɩɩ Fɩlɩsɩtɛ̃sɔɔra dɩɩ cʋʋ wɩ dɩ wɩ pɛr khiru dɩ Ɩjɩrayɛldara puno wɩ. 11 Dɩ Ɩjɩrayɛl sɔrasɛ ther le Mɩsɩpa, a weele wɩ, a kʋʋr wɩ foo a bena Bɛtɩ-Kaar dɩ gbũ paar. 12 Dɩ Samʋɛl gbaar bokaar a gbuu Mɩsɩpa na Hasɛn thɩ̃thɩɩn, a dʋʋ ire Ebɛn-Ejɛɛr sa so: «Kɩɛr Thãgba Kɔ̃tɩn bul sɩ a dana». 13 Dɩ thale gɩ dã dɩ Fɩlɩsɩtɛ̃sɔ jo, wa bir kɛr Ɩjɩrayɛldaraa dʋɔ bã. Dɩ Thãgba Kɔ̃tɩn gar ɔɔ ɲɔ̃ Fɩlɩsɩtɛ̃sɔɔra Samʋɛlɩ yi hanana fɛw. 14 Dɩ Ɩjɩrayɛl bɩsana bire taa Fɩlɩsɩtɛ̃sɔɔra dɩɩsɔɔkɛ hanɩ Ekʋrɔ̃ na Gatɩɩ thɩ̃thɩɩn, kɛ Fɩlɩsɩtɛ̃sɔ kɔɔ taa warnɩ; Wɩ bire tee dɩɩsɔɔle koo Fɩlɩsɩtɛ̃sɔɔ ɲɔ̃kɔɔ. Dɩ ha ɩɩ kɔɔ har Ɩjɩrayɛldarara na Amɔɔr məlsɔɔ thɩ̃thɩɩn.
15 Samʋɛl kɔɔ dor sogʋʋrdaar Ɩjɩrayɛl dɩɩra a dana ɔɔ yi pɩ bɔɔ. 16 Yɩɛr wo yɩɛr a n jaal na Betɛl dɩɩ, dɩ fi Gɩlgal na Mɩsɩpa dɩɩra dɩ gʋʋr Ɩjɩrayɛldaraa so gaa bǝnǝǝle. 17 A gele pɩ dɩ kɛr dɩ bir Rama dɩɩra ka ɔɔ cɔ hanɩ; liir a n gʋʋr Ɩjɩrayɛl bɩsanaa so, dɩ le dɔ ka a mɩnɩ bonɩ ji paar Thãgba Kɔ̃tɩnna.