Ɩjɩrayɛldara ƴaalɛ jamana \ref Khɩ 82; 1Sam 10.17-25; Oj 13.10-11
8
1 Dabɔɔkɛ Samʋɛl ɩnɩ a tɩ̃, a pɛrɛ ɔɔ bikũusɔ dɩ wɩ do sogʋʋrdara Ɩjɩrayɛl dɩɩra. 2 Ɔɔ caca bikuuni i wɩ n we Jowɛl dɩ balaɲɔdaar na n do Abɩya. Bɛɛrseba dɩɩra wɩ kɔɔ do sogʋʋrdara. 3 Sɩ Samʋɛlɩ bikũusɔ na n gba hʋɛkɛ awɩ thɩ kɔɔ gbana'. Wɩ lʋʋn kʋɛrɛra, dɩ wɩ tee mɔlɔ thɩ̃ɛsɔ sɩ na kɩɩl kɩɩl gõgolõ. 4 Dɩ Ɩjɩrayɛl kɔ̃tɩna fɛw kpar kha a gbɛbɩ, sa jal Samʋɛlɩ pa Rama dɩɩra, 5 a sʋʋraa: «Hɩnɛ, fɩ tɩnɛ sɩ afɩ bikũusɔ na gba hʋɛɛkɛ fɩ gbana', gɛr gɩ nɛnɛ̃, pɛ sar tibil a do jamana a na n thɔɔ sɩ mɔ̃ gɩ hanɩ ca kpɩɩsɔɔra fɛw». 6 Dɩ gɩ puure Samʋɛla ka mɔ̃ wɩ sonɩ a ha wɩ jamana a na n thɔɔ wɩ. Dɩ a bɩɛlɛ Thãgba Kɔ̃tɩn. 7 Dɩ Thãgba Kɔ̃tɩn so Samʋɛla: «Pɛ wɩ nũu gɩrɛ fɛʋraakɛ wa so farnɩ; gɩdonɩ ga do fɛr wɩ n boa', sɩ mɛr wɩ n bo, gɩ do nɔɔ ma n do awɩ jamana bã. 8 Gɩrɛ wɩ n cʋʋ farnɩ gɩrɛ, thalera wɩ kɔɔ cʋʋ mar; a fʋna wireekɛ mɩ ti wɩnɩ Ejipiti dɩɩra a thena a dana nĩ, wɩ bo mer faa sɩ wa n fʋɔr thãgba kpɩɩsɔ. 9 Dɩ gɛr gɩ nɛnɛ̃, pɛ awɩda nũu. Sɩ, kɔɔ kpãkpaanɛ war fɛw, a cʋɛna wɩ wɩ jɩ jamanaa cʋʋ pasɔ na ɔɔ hʋ hanasɔ».10 Dɩ Samʋɛl gbaar Thãgba Kɔ̃tɩnɩ nɔ thɩmɩɩ fɛw, a birnǝ mɩɛ ɔɔ tookɛra n bɩɛlaanɩ jamana. 11 Dɩ a so warɛ wɔɔ: «Nɩ yɛkɛ jamanaakɛra na thɔɔ nɩnɩɩ cʋʋ pasɔ na ɔɔ hʋ hanasɔ. A na gbaar anɩ bikũusɔ wa n cana ɔɔ koke hotoro, wɩ jʋʋn ɔɔ gãgosɔɔra wɩ gbana ɔɔ koke hotoro ƴɩɛ wa n ca. 12 A na pɛr ɩkha dɩ wa do sɔrasɛ gbɩlanɩɩ kɔ̃tɩ̃sɔ, ɩkha n do sɔrasɛ tamaa kɔ̃tɩ̃sɔ, ɩkharakɛ na n kʋʋlɛ ɔɔ lɛsɔ, ɩkha na n kha ɔɔ lɛ thɩ̃sɔ, ɩkha na n cʋʋ ɔɔ koke thɩ̃sɔ na ɔɔ koke hotoro thɩ̃bisɔ. 13 Dɩ a na gbaar dakha anɩ bikhɛrsɔ wɩ do ɔɔ parfɛ̃ cʋʋdara na dɩko cʋʋdara na buru hɩdara. 14 A na taarɛ anɩ lɛ bɔsɔ na anɩ dɩvɛ̃ thɩr lɛ bɔsɔ, na anɩ olɩvɩ lɛ bɔsɔ gɩ do ɔɔ thɔ̃ dodaraada. 15 A na tire bɩɛl yʋɔra anɩ lɛ thɩ̃bisɔɔra na anɩ dɩvɛ̃ bisɔɔra, gɩ do ɔɔ sɔrasɩ kɔ̃tɩ̃sɔ na ɔɔ thɔ̃dodaar kɔ̃tɩ̃sɔɔda. 16 A na teere anɩ thɔ̃ dodaar kuun bɔsɔ na anɩ thɔ̃ dodaar khɛr bɔsɔ na anɩ daɓol khesɔ na anɩ kũkǝ̃sɔ, a pɛ ɔɔ thɔna. 17 A na tire bɩɛl yʋɔra anɩ nʋ̃ yɩrasɔɔra. Dɩ nɛrɛ thɛthɛrakɛ na dɔ ɔɔ deesɔ. 18 Dɩ ga bɔɔle na n hulene anɩ jamanaakɛ nɩ phiirniidara, sɩ Thãgba Kɔ̃tɩn na dee nara'.»
19 Sɩ tɩbɩla bor Samʋɛl nũ pɛrɛ sa so : «Sɩ bor. Dɔ jamana n hale asɩ thɩ̃thɩɩn, 20 sɩ ha dakha mɔ̃kɛra ca kpɩɩsɔ hanɩ; asɩ jamana na n thɔɔ sɩ, a kʋʋr hale a the a gba ƴɛ kʋʋlɛ a na n thɔɔ thɩ̃ɛ. 21 Dɩ Samʋɛl pɛr Ɩjɩrayɛl bɩsanaada nũu a gba gɩ a so Thãgba Kɔ̃tɩnna. 22 Dɩ Thãgba Kɔ̃tɩn so Samʋɛla: «To awɩda. Pɛ war tibil a do jamana». Agɩpɩ Samʋɛl sor Ɩjɩrayɛl bɩsanana wɩ kɛra birǝ awɩ dʋɔsɔ.