Sayul caananɛ Samʋɛl. \ref 1Sam 10.1-16; 15.17; 2.7-8
9
1 Kuun bɩɛl gɩ a kɔɔ ha Bɛ̃jamɛ̃ɛ dʋɔ da n do Kɩsɩ. Abɩɛl kɔnaa, dɩ Abɩɛl do Serɔɔ bikuun dɩ Serɔɔ do Bekoratɩɩ bikuun, dɩ Bekoratɩ do Afɩaa bikuun, Bɛ̃jamɛ̃ɛ cara a the. Kuunna dor tibil kpɛ a ler ka. 2 Dɩ a kɔɔ hananɛ bikuun bɩɛl da n do Sayul. Daɓolbir gɩ sa bɔr tɔrra. Ɩjɩrayɛl dɩɩra, waa tibil na hala', dɩ a gbãa Ɩjɩrayɛldara ƴũu jɩɩlɔ fɛw.3 Dɩ wi bɩɛl Kɩsɩɩ kũkǝ̃ nɩsɔ buure. Dɩ so ɔɔ bikuun Sayula: «Ɩrɛ kpa thɔ̃ dodaar kuun bɩɛl nɩ jal nɩ ƴaal kũkǝnǝ». 4 Dɩ a jaal a kpãasɛ Efɩrayɩm gɔ̃gɔnana, a jal a kpãasɛ Salɩsa dɩɩ fɛw na Salɩm, na Bɛ̃jamɛ̃ɛ dʋɔ sɩ wa yɩ wa'. 5 Dɩ wɩ daan Sufii dʋɔ dɩ Sayul sor ɔɔ thɔ̃ dodaar kona: «Ɩna sɩ bir, a mɛ̃ ga ɩ̃ thɩ na faarɛ kũkǝ̃ kpɩɛrɛ sɩ a bir a na n dɛna sɩ». 6 Dɩ ɔɔ thɔ̃ dodaarɩle birsee: «Dɩɩrakɛ sɩ danɩ gɩrɛ, Thãgbaa mɩmɩɩ bɩɛl hakɛ; kuunna hananɛ i bʋɔ ka. A a so thɩ̃ɛ otirǝ gɩ n dã. Sɩ jala le ɔɔ pa, agakpaan a na nɩ sarɛ ka teananɩ sɩ jalana». 7 Dɩ Sayul birse ɔɔ thɔ̃ dodaar: «A sa jal, aɲe sa jalna na haa, gɩdonɩ loka khɩɩna sɛ sɩ. Buru na hale bã, dɩ sa hana khaarda dɩkha a sɩ jal sɩ haa ga. Aɲe sɩ hana? 8 Dɩ thɔ̃ dodaarɩle birse Sayul: «Mɩ hananɛ mũsumo gbe, ma haarɛ, sɩ a nɩ sar hʋɛɛkɛ sa gbanɩ». 9 Mamara Ɩjɩrayɛl dɩɩra a wa kɔɔ ƴaal wɩ bule Thãgba wɩ n sor: Nɩ dɔ sɩ jal «ʋrɛ n yɛnɩɩ pa»; gɩdonɩ ʋrɛ wɩ n wenɩ nĩ Thãgbaa mɩmɩɩ, ɔr wɩ n kɔɔ we yɩyɩ. 10 Dɩ Sayul sor ɔɔ thɔ̃ dodaara: «Gɩ bɔrrɛ, sɩ jala ɔɔ pa. Dɩ wɩ gbaar jal dɩɩraakɛra Thãgbaa mɩmɩɩra hanɩ».
11 Dɩ mɔ̃ wɩ n lonɩ dɩɩra wɩ caananɛ kheminǝ, kɛ thɛnɩ wɩ cɛ ɲʋɔn. Dɩ wɩ bule wɩ: «Kɩɛr yɩyɩ haa?» 12 Dɩ wɩ birse wɩ: «Ɔɔ, ƴɛkʋʋlɔ gɩ, sɩ nɩ jala nɛnɛ̃ na phʋnanɛ. A ɩnɛ kɛ nĩ asɩ dʋɔ, nɛnɛna a ɩ̃ da n dã gɩdonɩ nĩ dɔ wireekɛ dʋɔdara hananɩ bonɩ jir sãasɩ paar. 13 A nɩ lõ le dɩɩra na 'liire sɩ a jʋʋn sãasɩ paar dɩko kho paar, ado aa dã ga, tɩbɩla na kho dikora', gɩdonɩ ɔr teana a bɔna gɩ agɩpɩ wɩrɛ wɩ wenɩ n puno wɩ kho. Dɩ gɛr gɩ nɩ jala nɛnɛ̃ na 'liire.»
14 Dɩ mɔ̃ wɩ jalnɩ wa n lõ dɩ thɩ̃thɩɩn, dɩɩ do Samʋɛlɩkɛ thɛ da n jal sãasɩ paar, dɩ wɩ cãa.
15 Sɩɩ do dii thaa, gaa dɩ na wɩlnɩ gɩ do Sayul daan, Thãgba Kɔ̃tɩn kɔɔ sor Samʋɛla: 16 «Cʋɔ wɛ̃ɛbɔɔkɛra ma thɔna farɛ kuun bɩɛlɩkɛ thɛnɩ Bɛ̃jamɛ̃ɛ dʋɔ, dɩ fa pɩɛraa niin yʋɔ a do ɩ̃ too Ɩjɩrayɛldaraa thɔthɔɔ, a taa wɩ Fɩlɩsɩtɛ̃sɔɔ ɲɔ̃kɔɔ, gɩdonɩ mɩ yɩrɛ awɩ bɔ, dɩ awɩ hulẽbi jʋʋnɛ a dã mɩ». 17 Dɩ ɔbɔɔkɛ Samʋɛl na yɩnɩ Sayul, Thãgba Kɔ̃tɩn sʋʋraarɛ: «Ɔr dɔ kuunɩkɛra mɩ kɔɔ sonɩ, ɔr na n thɔa ɩ̃ too». 18 Dɩ Sayul tɔr dã Samʋɛl dɩ lõfonʋɔra a bulee: «Ka dɔ thɩ̃ yɩdaarɩ cɔ?» 19 Dɩ Samʋɛl birse Sayul ayɩ: «Mɛr dɔ thɩ̃ yɩdaarra. Sɩ jala kha sãasɩ paar, a khɔ kha dikor nĩ, sɩ cʋɔ duuro ɩ̃ nɩna fɩ gɩrɛ hanɩ afɩ hara, sɩ ɩ̃ ha fɩ hʋɛ fɩ kɔ̃. 20 Fa n ha na dɛna afɩ kũkǝ̃sɔɔkɛ bureni dɩɩ cʋʋ wire yẽther nĩika', gɩdonɩ wɩ yɩ wɛr. Amɛɛda thɩ̃ ɓɔna fɛʋʋkɛ hanɩ Ɩjɩrayɛl na do? Ga do fɛr gɩ na afɩ thɩɩ cɔdara fɛʋaa?» 21 Dɩ Sayul birse: «Ga do Bɛ̃jamɛ̃ɛ cara mɩ the, caarɩkɛra 'lunonɩ a jɔ Ɩjɩrayɛlɩ casɔ fɛʋaa? Dɩ ɩ̃ cɔka na do cɔkaarɩkɛ 'lunonɩ a jɔ Bɛ̃jamɛ̃ɛ caa cɔka fɛʋaa? Dɩ mɔ̃ gɩ dã sɩ fɩ so mar thɩ̃ɛ thakɛ?» 22 Dɩ Samʋɛl kpar Sayul na ɔɔ thɔ̃ dodaar a lona cʋɔrɔ, a cʋʋ wɩ dɩ wɩ too ƴɛkʋʋl too paar wɩrɛra fɛʋʋkɛ wɩ wenɩ, kɛ n thɔɔnɩ tɩbɩla kpelẽ yʋɔrsɔ. 23 Dɩ Samʋɛl sor dɩko cʋʋdaara: «Te dɩko gɩrɛ mɩ ha fɩnɩ a so far fɩ thɩnɛ gɩ kpɩɩ». 24 Dɩ dɩko cʋʋdaarɩle tire huure na gɩrɛ fɛʋʋkɛ diǝroni a thɩɩn Sayuli ƴɛra. Dɩ Samʋɛl sor Sayula: «Gɛr dɔ gɩrɛ wɩ thɩɩnɩ. Hala pɔna a khɔ, gɩdonɩ mɔ̃ mɩ sonɩ, afɩ thɩɩn wɩ thɩɩn ɔbɔɔkɛ mɩ wenɩ tɩbɩla.» Dɩ mɛ̃ Sayul na Samʋɛl kho kha dikor ga wiile. 25 A gele pɩ, wɩ kɛrɛ gbũ dɩɩra, dɩ Samʋɛl jʋʋnanɛ Sayul nãsʋrɔ dɩ wɩ khʋɛ. 26 Agɩpɩ, wɩ mãa ɩɩrɛ duuro phiphi. Dɩ ɔbɔɔkɛ kɩrʋ n gbanɩ, Samʋɛl wer Sayul le nãsʋrɔ a so: «Ɩrɛ ma ha fɛr hʋɛ fɩ kɔ̃». Dɩ Sayul ɩɩr dɩ wɩ the kha hʋɛra wɛr yeɲɔ. 27 Dɩ mɔ̃ wɩ gbunɩ wa n dã dɩ pɩɩr paar, Samʋɛl so Sayula: «Sɔ afɩ thɔ̃ dodaarra a na n jala». Dɩ gba da n jal. Dɩ Samʋɛl so Sayula: «Jɩlɛ nɛnɛ̃ ɩ̃ mɩɛ fɩ gɩrɛ Thãgba Kɔ̃tɩn sonɩ».