Samʋɛl pɛr Sayul niin yʋɔ, a dɔ jamana. \ref 1Sam 9.15-27; 16.1-13
10
1 Dɩ Samʋɛl gbaar niin na butel a deer Sayul yʋʋra. Agɩpɩ dɩ palʋ sa so: «Thãgba Kɔ̃tɩn phiire fɩ, fɩ dɔ ɔɔ tookɛ a hɩnɩɩ thɔthɔɔdaar. 2 Nĩikɛ ɔbɔɔkɛ sa faanɩ kha kɩɛr, fa caananɛ kona yeɲɔ Rasɛlɩ ka nɔra Sɛlsa, Bɛ̃jamɛ̃ɛ caa dɩ nɔra dɩ wa so far nayɩ aa, wɩ yɩrɛ kũkǝ̃ nɛɛkɛra fɩ jalnɩ ƴaal paar. Dɩ nɛnɛ̃ afɩ thɩ faarɛ awɩ kpɩɛr sɩɩ do anɩda dʋɔraa dɛr dɩphã, da n so mɔ̃ ɩna do sɩ na yɩ nɩ ya fɛ? 3 Dɩ a fɩ tɔ na jal a dã sɛn thɩr kɩrɔ Tabɔɔ gɔ̃gʋɔna, fa caananɛ le kona yẽther, bɩɛl n fʋrɔ bʋminǝ yẽther, balaɲɔdaar n fʋrɔ buru yẽther sɩ balãtherdaar n hana dɩvɛ̃, lokaara wa n jal Thãgbaa cɔ Betɛl. 4 Wa bule fer bɔɔ, sɩ na 'laa far buru yeɲɔ fɩ tee. 5 A gele karɔ, fa daan Gɩbea-Elohɩm dɩɩra, ka Fɩlɩsɩtɛ̃sɔɔ sɔrasɩ kɔ̃tɩ̃sɔ hanɩ. Dɩ ɔbɔɔkɛ fa n lonɩ dɩɩra, fa caananɛ Thãgbaa mɩmɩɩ gbulõ bɩɛl, dɩ wa the sãasɩ paar wa n gbũ, tɩbɩla n kʋʋl wɩ ƴɩɛ, wa n bɩ̃ bɩ̃bɩ̃ thɩ̃ɛ, kɛ dɔnɩ pɛ̃ɛdaa, na bǝ̃bǝ̃ǝ, na bɔbɔfelẽ, wa n mɩɩna gɩrɛ thɛnɩ Thãgbaa pa. 6 Dɩ Thãgba Kɔ̃tɩnɩ Thu na lõ farɛ na n mɩɩ kha gɩrɛ thɛnɩ Thãgbaa pa. Dɩ fa debire na do tɩɩ kpɩɩ. 7 Dɩ ɔbɔɔkɛ fa yɩnɩ gaa thɩ̃sɔɔlera, cʋɛ gɩrɛ teananɩ cʋʋrɛ, gɩdonɩ Thãgba har kha na fɛrɛ. 8 Kʋlɛ mɩ ƴɩɛ a gbuno Gɩlgal dɩɩra. Pɩɛrɛ mɩ le gɩ dana wire makoɲɔ. Ma kpa farɛ le a na ji bonɩ thiinǝsɔ na 'likha bonɩɛsɔ; le ma so far gɩrɛ fɩ teenanɩ fɩ cʋɛ».9 Dɩ ɔbɔɔkɛ Sayul leenɩ kha na Samʋɛl, dɩ Sayul gba na jal, Thãgba haarɛ ha kpɩɩ. Dɩ jena fɛʋʋkɛ Samʋɛl kɔɔ sʋʋraanɩ daan ga wiilera. 10 Dɩ mɔ̃ Sayul na ɔɔ thɔ̃dodaar na danɩ Gɩbea dɩɩra, Thãgbaa mɩmɩɩ gbulona ther dɩ wa n caanʋ. Dɩ Thãgbaa Thu lʋʋnaanɛ dɩ ma da n mɩɩ awɩ thɩ̃thɩɩn gɩrɛ thɛnɩ Thãgbaa pa. 11 Dɩ ɔbɔɔkɛ wɩrɛ fɛʋʋkɛ kɔɔ jɩɛnɛɛnɩ kɛkɛra yɩɩnɩ da n mɩɩ gɩrɛ thɛnɩ Thãgbaa pa nakha Thãgbaa mɩmɩɩsɔ, wɩ n bulele kha bɩɛlbɩɛl aa: «Aɲe dana Kɩsɩɩ bikuun Sayul ya fɛ? Sayul dakha dor Thãgbaa mɩmɩɩ ya?» 12 Dɩ wa n bule: «Dɩ amɛ dɔ awɩ kɔ̃tɩ̃?» Dɩ liir dɔ sokpaakɛ wɩ n sonɩ aa: «Sayul dakha dor Thãgbaa mɩmɩɩ ya?»
13 Dɩ ɔbɔɔkɛ Sayul mɩɩnɩ gɩrɛ thɛnɩ Thãgbaa pa pɩ, a gbaar jal sãasɩ paar. 14 Dɩ Sayuli jẽ bule Sayul: «Ka nɩ jal, fɛrɛ na afɩ thɔ̃ dodaar?» Dɩ birse: «Kũkǝ̃ ƴaalʋ gɩ. Sɩ sa yɩ wa', a gba jal Samʋɛlɩ pa». 15 Dɩ Sayuli jẽele so: «Mɩɛnɛ mɩ gɩrɛ Samʋɛlla so narnɩ» 16 Dɩ Sayul so ɔɔ jena: «A so sarɛ casɩ ayɩ, wɩ yɩrɛ kũkǝ̃ nɛɛkɛ kɔɔ buureni». Sɩ aa mɩgʋʋ thɩ̃ɛ a kana jamana dodaakɛ Samʋɛl kɔɔ mɩɩnɩɩ biloǝ'.
17 Dɩ Samʋɛl wer Ɩjɩrayɛldara Thãgba Kɔ̃tɩnɩ ƴɛra Mɩsɩpa dɩɩra 18 a so war: «Thãgba Kɔ̃tɩnɩkɛ dɔnɩ Ɩjɩrayɛlɩ Thãgba sɔ wɔɔ: «Mɛr te nɩ Ejipiti dɩɩra a thena. Mɩ taa nɛr Ejipitidaraa ɲɔ̃kɔɔ na dɩɩsɔ fɛʋʋkɛ n hʋɔlɛ narnɩɩ ɲɔ̃kɔɔ». 19 Sɩ nĩikɛ, dɩ nɩ dʋna anɩ Thãgba gɩrɛ a faa; ɔrkɛra taa nɩnɩ anɩ thɩlkesɔɔra fɛw na anɩ ha wãgara fɛw; sa sʋʋraa a pɛ nar jamanaa? Dɩ gɛr gɩ, nɛnɛ̃ anɩ casɔ, na anɩ thɩkɔ̃sɔ n tɔ pɔ Thãgba Kɔ̃tɩnɩ ƴɛra».
20 Dɩ Samʋɛl cʋʋrɛ Ɩjɩrayɛl caarsɔ fɛw dɩ wɩ tɔ dã dɩɩ do Bɛ̃jamɛ̃ɛ ca lɩɩ fʋ. 21 Dɩ cʋʋ Bɛ̃jamɛ̃ɛ ca, dɩ wɩ tɔ dã, mɔ̃ wɩ hanɩ awɩ thɩ kɔna dɩɩdɩɩ, dɩɩ do Matɩrɩɩ thɩ kɔ̃ lɩɩ fʋ. Pɩpɩɩ paar dɩɩ do Kɩsɩɩ bikuun Sayul gɩ fʋ. Dɩ wɩ kɔɔ ƴaalʋlɛ thʋnɔ wa yɩɩa'. 22 Dɩ wɩ bir bule Thãgba Kɔ̃tɩn: «Dɩ ntɛra na ɩ̃ kɩɛra' ya?» Dɩ Thãgba Kɔ̃tɩn birse: «Nɩ hɩnɛ thɩ̃bi paarɩle a ha wɔ̃». 23 Dɩ wɩ car jal le a kpaa pɔna, dɩ lõ tɩbɩla fɛw thɩ̃thɩɩn a jɩɩl, a gbã wɩ fɛw. 24 Dɩ Samʋɛl so tɩbɩlala fɛw: «Nɩ yɩrɛ ʋrɛra Thãgba Kɔ̃tɩn phiirnǝǝ? Ɔɔ hoho na ha kɛ anɩ thɩ̃thɩɩna'». Dɩ tɩbɩla fɛw ber hulẽbe na daw aa: «Jamana n hanana yire!»
25 Dɩ Samʋɛl gbaar gɩrɛ dɔnɩ jamanaa cʋʋ pasɔ a mɩɛ tɩbɩla fɛw, sa kherẽ gɩ a pɛ sɛbɛra a thɩɩn Thãgba Kɔ̃tɩnɩ ƴɛra, agɩpɩ dɩ bɩlã tɩbɩla fɛw dɩ wɩ kɛr bir awɩ pasɔ.
26 Dɩ Sayul dakha gbaar kɔ̃ ɔɔ dʋɔ Gɩbea. Tibil wɩrɛsɔ dɔnɩ tɩɩ cʋnanɛsɔ, kɛ Thãgba Kɔ̃tɩn kɔɔ mɩɩnanɩ kɔɔ thɔaa dɩ kɔ̃. 27 Sɩrakɛ tibil ɩkhasɔɔkɛ na dɔnɩ bɔtaa tɩbɩla ga n bor dɩ wɩ so aa: «Kpei! Aɲee taa ca ole na taa sɩ? Wa n thernaa ga, dɩ awɩ khaarda gɩ, dɩ wɩ haa ga. Sɩ Sayul na kɔɔ deero nʋɔa'».