RUTII THƖMƖ
Elɩmɛlɛkɩ na ɔɔ cɔdara Moabɩ dɩɩra. \ref Fãg 8. 1-9; Neh. 13. 23-27; Khɩ. 33.18-19
1
1 Ɔbɔɔkɛ sogʋʋrdara n kɔɔ thɔɔnɩ Ɩjɩrayɛldara, kɔmɛr kɔɔ lʋʋn dɩɩra. Dɩ kuun bɩɛl gɩ, a the Bɛtɩlɛhɛm Juda bǝǝnnǝ, a ɩɩr na ɔɔ khɛr, na ɔɔ bikona yeɲɔ, a jal Moabɩ bǝǝnnǝ, ɩnɩ n too gbe.2 Kuunilera wɩ n we Elɩmɛlɛkɩ, ɔɔ khɛr na n do Nɔɔmɩ, sɩ ɔɔ bikona yeɲɔɔle, bɩɛl n dor Makɩlɔ̃, dɩ bɩɛl na n do Kɩlɩjɔ̃. Efɩratadara wɩ do, a the Juda bǝǝnnǝǝkɛ wɩ n wenɩ Bɛtɩlɛhɛm. Wɩ daan Moabɩ dɩɩra a too. 3 Dɩ Elɩmɛlɛkɩɩkɛ dɔnɩ Nɔɔmɩɩ ko khire, sɩ Nɔɔmɩ too na ɔɔ bikona yeɲɔ. 4 Dɩ ɔɔ bikona yeɲɔɔle her Moabɩ khɛra; khɛr bɩɛlɩɩ i na n do Ɔrpa, sɩ balaɲɔdaar na n do Ruti. Wɩ kɔɔ toore le a cʋʋ yɛna yʋɔrsɔ. 5 Dɩ Makɩlɔ̃ na Kɩlɩjɔ̃, wɛr yeɲɔ fɛw khiire dakha, sa sɩ Nɔɔmɩ dɩbara; dɩɩ do a 'leere ɔɔ ko na ɔɔ bikona yeɲɔ.
Nɔɔmɩɩ bir na Ruti Bɛtɩlɛhɛm. \ref Ur. 2. 11-12; Mat. 19. 27-30; Eja.56.6-7
6 Dɩ mɔ̃ Nɔɔmɩ nɩɛnɩ le Moabɩ dɩɩra dɩ Thãgba Kɔ̃tɩn bire bɔna ɔɔ too, a ha wɩ dɩkɔ, a ɩɩrɛ na ɔɔ bikonaa khɛrsɔ, da n gbɛbɩ a kɛr a kɔ̃. 7 Dɩ a ther le ka a toonɩ, ɔr na ɔɔ bikonaa khɛrsɔ yeɲɔɔlera, a gba hʋɛ dɩ wa n bir Juda dɩɩra.
8 Sɩ Nɔɔmɩ sor ɔɔ bikonaa khɛr yeɲɔraale ayɩ: «Nɩ kɛra birǝ anɩ nɩsɔɔ cɔ. Thãgba Kɔ̃tɩn n cʋɛ nɩ bɔɔ, mɔ̃kɛ nɩ kɔɔ cʋʋnɩ wɩrɛraakɛ khiireni, na mɛrɛra. 9 Thãgba Kɔ̃tɩn n cʋɛ nɛrɛ fɛw bɩɛlbɩɛl nɩ 'lɛ hɩɩrɛ konaakɛ na henɩɩ cɔ!» Agɩpɩ a pal wɛr, dɩ wɩ mar dɩ wa n khɩɩ, 10 Dɩ ɔɔ bikonaa khɛra yeɲɔɔle sʋʋraa: «Kpei! Sa kʋɔn kha na fɛrɛ, afɩ toora.» 11 Dɩ Nɔɔmɩ so: «Ɩ̃ bikhɛrsɔ, nɩ birǝ. Mɔ̃ dɔ kɩrʋ dɩ sa kɔ̃ kha? Ma punone nɛnɛ̃ 'lo na kɔ̃ kuuminǝ dɩ wa do anɩ kosɔ ya? 12 Ɩ̃ bikhɛrsɔ, nɩ birǝ kɔna! Mɩ thʋnɛ tɩ̃ ka kuun herra. Dɩ a mɩ sorakɛ mɩ hananɛ nũ pɛrɛ, ɩ̃ ha kha na kuun nĩ dɩtɩnɔɔkɛ ɩ̃ kɔ̃ kuuminǝ, 13 na toore na n pɩɛr dɩphã wɩ khɔ̃, gɩ do gele dɔ nɔɔ nɩ boro kuun her ya? Ɩ̃ bikhɛrsɔ waa, thale ga; ɩ̃ khar jɔr anɩda, gɩdonɩ mɛr Thãgba Kɔ̃tɩn ʋʋnɔ. 14 Dɩ wɩ bir ma wo dɩ wa n khɩɩ, agɩpɩ Ɔrpa kɔɔ palɛ ɔɔ koo nɩ sa kɛr bir, sɩ Ruti wer bor sa maa.
15 Dɩ Nɔɔmɩ so Rutira: «Fa yɩ gaa, afɩ ɩɩl kɛrɛ bir ɔɔ toora, na ɔɔ thãgbasɔɔra; fɛrɛ dakha kɛra birǝ ɔɔ kha.»
16 Dɩ Ruti tu: «Fa n yɩrna mɩ ɩ̃ faa fɩ, sa kɛra birǝ sɩ hʋnɔ kha ga!
Ka fɩ n jalnɩ lera ma jal,
dɩ ka fa toonɩ lera ma too;
afɩ too n do ɩ̃ too,
afɩ Thãgba n do ɩ̃ Thãgba.
17 Dɩ ka fa khini, lera ma khi,
wɩ dʋ mɩ dapa;
Thãgba Kɔ̃tɩn n pɛ mar sor gɩ khɩɩr gɩ ka,
ado khir ga, sɩɩ do thɩ̃ kpɩɩ ɩna a lee mɩ kha na fɛrɛ.»
18 Dɩ mɔ̃ Nɔɔmɩ yɩɛnɩ, dɩɩ do kpɩɛrɛ a ti ɩnɩ n kɔna kha phubi, a sɩraarɛ. 19 Dɩ wɩ kɔɔ jaal kha wɛr yeɲɔra mɛ̃ɛ a dã Bɛtɩlɛhɛm. Dɩ ɔbɔɔkɛ wɩ n lonɩ dɩɩra, nʋɔ kɔɔ kpaarɛ Bɛtɩlɛhɛmdara fɛw awɩdara. Dɩ khɛra na n so: «Sɩɩ do Nɔɔmɩ gɩ gel bɛ?» 20 Dɩ Nɔɔmɩ so war: «Na n we mɩ Nɔɔmɩ bã, sɩ na n wɛ mɩ Mara, gɩdonɩ Punone Fɛʋʋ hɩ̃daar cʋʋ mɛr dɩ̃ yɩ kharrɛ dɩɩ pho ka. 21 Ɲɔ̃kor hire mɩ kɔɔ jalna
sɩ ɲɛ̃ biire ha gɩrɛ Thãgba Kɔ̃tɩn kpana mɩnɩ da n ɩna.
Aɲera na we mɩ Nɔɔmɩ,
Punone fɛʋʋ Hɩ̃daar fi marnɩ khiru,
a cʋʋ mɩ puure?»
22 Dɩ mɛ̃ Nɔɔmɩ kɛr bir na ɔɔ bikuuni khɛr Rutiikɛ thɛnɩ Moabɩ bǝǝnnǝ. Wɩ dãa Bɛtɩlɛhɛm bɔɔkɛ wɩ n tɔ̃tʋɔnnɩ ɔɔjɩa khar.