ƖJƖRAYƐL BƖSANAA SOGƲƲRDARA
FƲ PAAR
Ɩjɩrayɛl bɩsana teere Kanãa dɩ ɩkha
1
1 Ɔbɔɔkɛ Jojue khini pɩ, Ɩjɩrayɛl bɩsana bulele Thãgba Kɔ̃tɩn ayɩ: «Asɩ ca ʋmɔ̃ teana a kɔɔ jala caca a kɛna Kanãadara»? 2 Dɩ Thãgba Kɔ̃tɩn so: «Judaa ca n kɔɔ jala caca ɓo, gɩdonɩ mɩ to wer dɩɩra ɲɔ̃kɔɔ». 3 Dɩ Judaa mǝlsɔ sor awɩ thɩɩ õkuun Simeyɔ̃ɔ mǝlsɔra ayɩ: «Sɩ jala kha asɩ dɩraakɛ wɩ ha sɩnɩ a kɛna Kanãadara a tea dɩɩ, agɩpɩ sɩ jal kha anɩ dɩra dakha sɩ bul nɩ». Dɩ Simeyɔ̃ɔ mǝlsɔ ɓã warɛ dɩ wɩ jal. 4 Dɩ wɩ jaal, dɩ Thãgba Kɔ̃tɩn to Kanãadara na Perejɩdara awɩ ɲɔ̃kɔɔ; dɩ wɩ kʋʋr tɩbɩla gbɩlanɩ yʋɔr (10 000) awɩ thɩ̃thɩɩn Bejɛkɩ dɩɩra. 5 Le wɩ 'li jamanaakɛ n dɔnɩ Adonɩ-Bejɛkɩ, Bejɛkɩ dɩɩra a kenaa, a puno Kanãadara na Perejɩdara. 6 Sɩ Adonɩ-Bejɛkɩ car, dɩ wɩ wegʋʋ a fʋ, a kuuruu ɲɛ̃bi kpʋʋrsɔ, na nɛbi kpʋʋrsɔ. 7 Dɩ le Adonɩ-Bejɛkɩ so ayɩ: «Jamana kpalãther yʋɔr kɔɔ hale kuurenɩ ɲɛ̃bi kpʋʋrsɔ, na nɛbi kpʋʋrsɔ dɩ wa n uul dɩko hʋɛnaakɛ n jɛnɩ ɩ̃ dɩko kho tabal ballɔ. Gɩrɛra mɩ kɔɔ cʋʋnɩ, gɛrra Thãgba lɩmɩ mɩ.» Dɩ wɩ jalnaanɛ Jerujalɛm dɩ khi le.8 Dɩ Judaa mǝlsɔ kenanɛ Jerujalɛmdara, a tee dɩɩ; a kʋʋr dɩdara na bajɩna, sa thii dɩɩ. 9 Agɩpɩ Judaa mǝlsɔ bire jal a kena Kanãadaraakɛ tɔɔnɩ gɔ̃gɔ̃ paar na Negɛvɩ* billo na wɩrɛ hanɩ ɓɛ̃tɛ bəənnə.
10 Agɩpɩ Judaa mǝlsɔ jaal wo a kena Kanãada wɩrɛ hanɩ Ebʋrɔ̃ dɩɩraakɛ wɩ n wenɩ mamara Kɩrɩyatɩ-Arba, a puno Sesaɩ mǝlsɔ na Ahɩmãa mǝlsɔ na Talmaɩɩ mǝlsɔa. 11 Agɩpɩ wɩ ther le a jal wɩ kena Debiirdara. Debiira wɩ n kɔɔ we mamara Kɩrɩyatɩ-Sefɛɛr. 12 Dɩ Kalɛbɩ so ayɩ: «Ntɛɛkɛ na punonenɩ Kɩrɩyatɩ-Sefɛɛr dɩɩ a na tee, ma haarɛ ɩ̃ bikhɛr Akɩsa a he.» 13 Dɩ Otɩnɩɛlɩkɛ dɔnɩ Kenaajɩɩkɛ dʋɔnɩ Kalɛbɩɩ õkuun buu bikuun tee dɩɩra, dɩ Kalɛbɩ haa ɔɔ bikhɛr Akɩsara dɩ he. 14 Mɔ̃ a danɩ ɔɔ ko Otɩnɩɛlɩ pa, a tʋɔrɛ pɛr aa, a bɩɛlnɛ bǝǝn ɩnɩɩ thɩra. Agɩpɩ dɩ bɩ̃ kũkǝǝnǝ a ji, dɩ ɔɔ thɩ Kalɛbɩ bulee: Aɲe fɩ n ƴaal? 15 Dɩ sʋʋraa: «Bɔna mɩ. Bǝ̃ǝkɛ fɩ ha mɩnɩ Negɛvɩ billo na hana ɲʋɔnna'. Gɛr gɩ ha mɩ paarɩkɛ hananɩ ɲɔ bu kana dakha.» Dɩ ɔɔ thɩ haarɛ ɲɔ bu ka gɩrɛ hanɩ ƴũu na ɲɔ bu ka gɩrɛ hanɩ ɓɛ̃tɛw.
16 Dɩ Mʋɩjɩɩ thɛɛ kõo mǝlsɔ, kɛ dɔnɩ Kenɩ̃ɛsɔ, ther Kalã dɩɩra na Judaa mǝlsɔ a jal too Judasɔɔ bǝ̃ kparara, Ara ɲɔ̃bɩlã wi phã pa billo, a gbɛbɩna dʋɔdara. 17 Dɩ Judaa mǝlsɔ jaal kha na awɩ thɩɩ õkuun Simeyɔ̃ɔ mǝlsɔ a kena Kanãadaraakɛ hanɩ Sefatɩ dɩɩra a puno wɩ a kʋʋr ti sa kʋɛ dɩɩ dɩ wa n we gɩ Hɔrma; kɩrʋ dʋɔn: 'Kʋɛrɛ'. 18 Dɩ Judaa mǝlsɔ teere dakha Gaja dɩɩ wo na Asɩkalɔ̃ dɩɩ, na Ekʋrɔ̃ dɩɩ, a teena agɩ dɩ bǝ̃sɔ. 19 Thãgba Kɔ̃tɩn har kha na Judaa mǝlsɔ. Dɩ wɩ punone gɔ̃gɔ̃ dɩɩsɔ a teele, sɩ wa puno a weele ɓɛlɛ̃ dɩdara ga, gɩdonɩ wɩ hananɛ koke hotorosɔɔkɛ dʋɔnɩ therdaa.
20 Dɩ wɩ har Kalɛbɩ Ebʋrɔ̃ dɩɩ mɔ̃kɛ Mʋɩjɩ kɔɔ sonɩ, dɩ weele Anakɩɩ bikũusɔ yẽtherɩ mǝlsɔɔkɛ kɔɔ hanɩ le.
Kanãada wɩrɛ sɛnɩ dɩɩra
21 Bɛ̃jamɛ̃ɛ mǝlsɔ na puno Jebusɩdaraakɛ kɔɔ tɔɔnɩ Jerujalɛmb a weela', gɛr gɩ dɩ wɩ hale a too Bɛ̃jamɛ̃ɛ mǝlsɔɔ thɩ̃thɩɩn Jerujalɛm a dana nĩkɛ. 22 Dɩ Jojɛfɩɩ məlsɔ dakha jal a kena Betɛldara dɩ Thãgba Kɔ̃tɩn har kha na wɛr. 23 Wɩ thʋɔn tɩbɩla wɩ kɔɔ jala ɓo a gɩlɛ Betɛl dɩɩra wɩ n kɔɔ wenɩ mamara Luuji a jɩɛnɛɛ. 24 Dɩ thɔ̃thɔna yɩrɛ kuun bɩɛl da n the dɩɩra, dɩ wɩ sʋʋraa ayɩ: Nɛ sar ka wɩ n lonanɩ dɩɩra sɩ sɩ cʋʋ fɩ bɔɔ. 25 Dɩ a nɩ warɛ ka wɩ n lonanɩ dɩɩra. Dɩ Jojɛfɩɩ məlsɔ kʋʋr wɩ na bajɩna sa sɩ kuunaale, ɔr na ɔɔ cɔdara fɛw dɩ wɩ jal. 26 Dɩ kuunɩle gbaar jal Hɛtɩɩ mǝlsɔɔ dʋɔ, dɩ le a kur dɩɩ a dʋʋ ire da n do Luuji a dana nĩkɛ.
27 Manasee mǝlsɔ na puno a weele Bɛtɩ-Sẽadara, na Taanakɩdara, na Dɔɔrdara, na Yɩbɩlamɩdara na Megidodara, na awɩ dɩ bidarasɔa'. Gɛr gɩ dɩ Kanãadara hale 'lo a bo sa too ga dɩ bǝ̃sɔraale. 28 Ɩjɩrayɛl ɩnɩnakɛ a 'li fãga, sɩ wa puno Kanãadara a weela', sɩ thɔ̃ khena wɩ pɛ war.
29 Efɩrayɩmɩ mǝlsɔ na puno a weele Kanãada wɩrɛ kɔɔ tɔɔnɩ Gejɛɛr dɩɩra ga. Gɛr gɩ dɩ wɩ hale 'lo a too Efɩrayɩmɩ mǝlsɔɔ thɩ̃thɩɩn le Gejɛɛr dɩɩra. 30 Jabʋlɔ̃ɔ mǝlsɔ na puno a weele Kɩtʋrɔ̃dara, na Nahalaldara ga, dɩ Kanãadara hale a toona Jabʋlɔ̃ɔ mǝlsɔ, sɩ dɩ Jabʋlɔ̃ɔ mǝlsɔ pɛ war thɔ̃ khena.
31 Ajɛɛrɩ mǝlsɔ na puno a weele Akodara, na Sɩdɔ̃dara, na Alabɩdara, na Akijidara, na Hɛlbadara, na Afɩkɩdara, na Rehɔbɩdara ga. 32 Gɛr gɩ dɩ Ajɛɛrɩ mǝlsɔ gbɛbɩna Kanãadaraakɛ dɔnɩ dɩdara a too; gɩdonɩ wa puno a weele wa'.
33 Nɛfɩtalɩɩ mǝlsɔ na puno a weele Bɛtɩ-Semɛsɩdara, na Bɛtɩ-Anatɩdaraakɛ ga, dɩ wɩ gbɛbɩ na Kanãadaraakɛ kɔɔ dɔnɩ dɩdara a too, sɩ dɩ Nɛfɩtalɩɩ mǝlsɔ pɛ war thɔ̃ khena. 34 Sɩ Amɔɔr məlsɔ tʋɔrɛ Dãa mǝlsɔ a pɛ gɔ̃gɔnana, a pɩɛr wɩ, wa faa wɩ dɩ wɩ gbũ bǝ̃ faana ga.