Pɩpɩɩ gbɛbɩkhaakɛ cʋɛnɩ Sɩsɛm. \ref Neh 9.7-15; Dǝt 4.32-40; 32.7-14
24
1 Jojue kpar Ɩjɩrayɛl caar fɛw a jɛ Sɩsɛm, a we Ɩjɩrayɛl bɩsanaa kɔ̃tɩ̃sɔ, na awɩ ƴɛkʋʋldasɔ, na awɩ so gʋʋrdasɔ na awɩ sɔrasɩ kɔ̃tɩ̃sɔ, dɩ wɩ jɩɩl Thãgbaa ƴɛra. 2 Dɩ a sor tɩbɩla fɛʋra aa Thãgba Kɔ̃tɩnɩɩkɛ dɔnɩ Ɩjɩrayɛl Thãgba sɔ thakɛ ayɩ: «Mamara Efɩratɩ mɩɩr iiro anɩ thɩ kɔ̃tɩ̃sɔ, Abɩrahamɩ na Nahɔɔr na awɩ thɩ Terakɩɩ thɛthɛ kɔɔ too da n fʋɔr gɩ̃ɩ thãgbasɔ. 3 Mɩ tire anɩ thɩ kɔ̃tɩ̃ Abɩraham le mɩɩr iiro a cʋʋgʋʋ dɩ kpaar Kanãa dɩɩ fɛw a finǝ. Mɩ cʋʋrɛ ɔɔ mǝlsɔ dɩ wɩ ler. Mɩ haarɛ Ɩjakɩ. 4 Dɩ mɩ har Ɩjakɩ Jakɔbɩ na Ejayu. Mɩ har Ejayu Seir gɔ̃gɔ̃ bə̃ dɩɩ do ɔɔda sɩ Jakɔbɩ na ɔɔ bikũusɔ gbũ Ejipiti. 5 Mɩ thʋɔn Mʋɩjɩ na Aarɔ̃ a be Ejipiti na gɩrɛ fɛʋʋkɛ mɩ cʋʋnɩ ɔɔ thɩ̃thɩɩn, agɩpɩ dɩ̃ ti nɩ thena. 6 Mɩ tire anɩ thɩ kɔ̃tɩ̃sɔ dɩ wɩ the Ejipiti, dɩ mɔ̃ wɩ jalnɩ dã laɲɔ̃ sɩɛ, Ejipitidara wee wer na awɩ koke hotorosɔ, na awɩ gãgosɔ a kpaan. 7 Dɩ anɩ thɩ kɔ̃tɩ̃sɔ hulene mɛr Thãgba Kɔ̃tɩnna. Dɩ mɩ pɛr dabirǝ nɛrɛ na awɩ thɩ̃thɩɩn, sa kha ɲʋɔn a thi war. Nɩ jɩrɛ gɩrɛ mɩ cʋʋnɩ Ejipitidarara. A gele karɔ, anɩ thɩsɔ toore bə̃ kparara a pʋɔr jɔɔ. 8 Agɩpɩ, mɩ thɔɔ nɛr dɩ nɩ lõ Amɔɔr məlsɔɔ dɩsɔɔraakɛ hanɩ Jʋrdɛ̃ wi phã paar. Dɩ wɩ ɩɩrɛ wɩ kena nɩ kʋʋr, dɩ mɩ gba wɩ a dʋ nɩ ɲɔ̃kɔɔ dɩ nɩ teere awɩ dɩ sɩ dɩ̃ bũburõ wɩ anɩ ƴɛra. 9 Sɩpɔɔrɩ bikuun Balakɩɩkɛ dɔnɩ Moabɩ jamana ɩɩrɛ a kena nɛr Ɩjɩrayɛl bɩsana. Dɩ a thʋɔn we Bɛwɔɔrɩ bikuun Balam kɛ dɔnɩ sõsor bobon a sɔna nɩ. 10 Sɩ mɩ bor Balamɩda nũ pɛrɛ, dɩɩ do bɔnanɛ a ka we dɛ̃ɛ nar. Dɩ mɩ taa nɛr Balakɩɩ ɲɔ̃kɔɔ. 11 Nɩ iire Jʋrdɛ̃ mɩɩr sa dã Jeriko. Dɩ Jerikodara: Amɔɔr məlsɔ na Perejɩdara, na Kanãadara, na Hɛtɩɩ mǝlsɔ, na Hɩvɩtɩsɔ, na Gɩrgasɩdara, na Jebusidara ɩɩrɛ wɩ kena nɩ, dɩ mɩ gba wɛr a dʋnɩ ɲɔ̃kɔɔ. 12 Mɩ thɔnanɛ vivirkpora anɩ ƴɛbʋrɔ dɩ wɩ weele Amɔɔr məlsɔɔ jamana yeɲɔɔle dɩ wɩ hʋnɔna nɩ. Anɩ bajɩna na anɩ thasɔ na cʋʋrɔ dɩkha ga. 13 Mɩ ha nɛr dɩɩ na thɩ̃ɛɛkɛ na dɔnɩ nɛr kʋla' na dɩɩsɔɔkɛ na dɔnɩ nɛr ma', sɩ dɩ na n cɔrɔ, na olɩvɩ thɩrasɔɔkɛ na dɔnɩ nɛr thella ga, sɩ dɩ na n kho agɩ bisɔ.14 Nɛnɛ̃, nɩ hanana maar Thãgba Kɔ̃tɩnna, a na dʋɔraa thɔma na haar kpẽgelẽe na fɩl sarʋ. Nɩ hɩɛlɛ thãgbasɔɔkɛ anɩ thɩ kɔ̃tɩ̃sɔ n kɔɔ fʋɔrnɩ Efɩratɩ mɩɩr iiro na Ejipiti a faa sɩ na dɔ thɔma Thãgba Kɔ̃tɩnna. 15 Ado na yɩɛ dɩɩ teena nɩ dɔ Thãgba Kɔ̃tɩnna thɔma ga, nɩ phiire nĩkɛ ntɛ nɩ n ƴaalnɩ nɩ doro thɔma: Ado anɩ thɩ kɔ̃tɩ̃sɔ thãgbasɔɔkɛ wɩ n kɔɔ fʋɔrnɩ Efɩratɩ mɩɩr iiro gɩ, agɩbo ado Amɔɔr məlsɔ dɩsɔɔkɛ nɩ toonɩɩ thãgbasɔ gɩ. Sɩ me wer na ɩ̃ cɔdara Thãgba Kɔ̃tɩnɩ thɔ̃ sa do.
16 Dɩ Ɩjɩrayɛl bɩsana birsee: «Kpa! Kpɩɛr caale n hʋnɔnɛ na sɩ. Thãgba Kɔ̃tɩn na teena dɩ sa faa sɩ na do thɔma thãgba kpɩɩsɔɔra ga, 17 gɩdonɩ Thãgba Kɔ̃tɩn dʋɔn asɩ Thãgba. Ɔr te sɩ na asɩ thɩ kɔ̃tɩ̃sɔ Ejipiti dɩɩra dee dʋʋra a thena, a cʋʋna nɔ kpaa thɩ̃ kɔ̃tɩna dɩ sɩ toro yire. Ɔr bɛra sɩ hʋɛraakɛ sɩ kananɩ, na caarsɔɔraakɛ sɩ lonɩɩ thɩ̃thɩɩn a the. 18 A weelele asɩ ƴɛra Amɔɔr məlsɔ na caarsɔɔkɛ hanɩ dɩɩraakɛ. Sɛrɛ dakha Thãgba Kɔ̃tɩnɩ thɔ̃ sa do gɩdonɩ ɔr dʋɔn asɩ Thãgba.»
19 Dɩ Jojue so war: «Na puno na do thɔma Thãgba Kɔ̃tɩnna ga, gɩdonɩ Thãgba phuu a do na Thãgbaakɛ hananɩ gbugi, a na tu na faa anɩ lã, na anɩ puuǝ'. 20 Ɔbɔɔkɛ na faanɩ Thãgba Kɔ̃tɩn sɩ na n fʋɔr gɩ̃ thãgbasɔ, a na kɛrna nɛr, na cʋʋ nɩ puure. Dɩ mɔnakɛ a cʋʋ nɩnɩ bɔɔ thaa sɩ a na bũburõ ner.»
21 Dɩ Ɩjɩrayɛl bɩsana so Jojuera: «Kpɩɩraka'; Thãgba Kɔ̃tɩnɩ thɔ̃ sa do». 22 Dɩ Jojue bir so war: «Nɛrɛɛ thɛthɛ dʋɔn anɩ thɛthɛɛ yi tordara dɩ nɛr phire Thãgba Kɔ̃tɩn ayɩ ɔrra na do thɔma». Dɩ wɩ tu: «Sɛrɛɛ thɛthɛ dʋɔn asɩ yi tordara». 23 Dɩ Jojue so war: «Dɩ nɩ hɩɛlɛ gɩ̃ thãgbasɔɔkɛ hanɩ anɩ thɩ̃thɩɩn, sa kɛra anɩ ha a pɛ Thãgba Kɔ̃tɩnnaakɛ dɔnɩ Ɩjɩrayɛl Thãgba.» 24 Dɩ wɩ so Jojuera: «Thãgba Kɔ̃tɩn asɩ Thãgbara sa do thɔma dɩ sa nɩrɛ ɔɔ thɩmɩɩra nũu.»
25 Jojue ʋlfɛnanɛ Ɩjɩrayɛl bɩsana nɔ bɩɛl ʋlfɛrɛ ga wiile Sɩsɛm sa ha wɩ jɔfʋsɔ. 26 A kherere gaa thɩ̃sɔɔlera Thãgbaa jɔfʋ sɛbɛra. Agɩpɩ a gbaar bokaar a gbuu sɛn thɩr kɩrʋraakɛ kɔɔ hanɩ Thãgba Kɔ̃tɩnɩ pa phurǝ, 27 sa so tɩbɩla fɛʋra: Bokaarɩkɛ dʋɔn yi tordaar asɩ thɩmɩɩra, gɩdonɩ a nɩrɛ thɩmɩa fɛʋkɛ sɩ mɩɩnɩ kha na Thãgba Kɔ̃tɩn. Ɔr na dʋɔn yi tordaar anɩ thɩmɩɩra, a cʋʋnɩ na bana anɩ Thãgba na yɩ na jɩa' ga. 28 A gele karrɔ, Jojue bɩlanɛ tɩbɩla, dɩ wɩ kɛr bir awɩ dʋɔsɔ.
Jojuee khi \ref So. 2. 6-9; Jǝn 50.24-26; Thɩ 13. 19; Eb 11. 22
29 A ga thɩ̃sɔɔle ka pɩ, Nuni bikuun Jojue kɛ dɔnɩ Thãgba Kɔ̃tɩnɩ thɔ̃daar khire, a hananɩ yɛna tamaa na yʋɔr. 30 Dɩ wɩ dʋʋrɛ ɔɔ dʋɔɔkɛ wɩ haanɩ Tɩmna-Sera Efɩrayɩmɩ məlsɔɔ gɔ̃gɔ̃ bənnə, kɛ hanɩ Gasɩ gɔ̃gɔ̃ wi phã paar ɲɔ̃bɔɔra. 31 Ɩjɩrayɛl bɩsana kɔɔ dor Thãgba Kɔ̃tɩnna thɔma Jojue yi hanana fɛw, na kɔ̃tɩnaakɛ kɔɔ hanɩ le Jojuee khini pɩ, awɩ yi hanana fɛw, kɛ dɔnɩ wɩrɛ tornɩ gɩrɛra Thãgba Kɔ̃tɩn cʋʋnɩ Ɩjɩrayɛlla yire.