Jojue mɩɩrɛ Ɩjɩrayɛl bɩsana ɔɔ pɩpɩɩ thɩmɩɩr \ref Dǝt 11.1-28; 7.1-16; 30.15-20; 1 Kur 28.1, 8; So. 2; 1Kor 15. 1-2, 58
23
1 Ɔbɔɔkɛ Thãgba Kɔ̃tɩn kɔɔ taanɩ Ɩjɩrayɛl bɩsana awɩ sodarasɔɔraakɛ diǝ warnɩɩ ɲɔ̃kɔɔ dɩ ga pʋɔr jɔɔ, Jojue tɩnɛ waa gel. 2 Dɩ Jojue wer Ɩjɩrayɛl bɩsana fɛw na awɩ kɔ̃tɩ̃sɔ, na awɩ ƴɛkʋʋldasɔ, na awɩ so gʋʋrdasɔ na awɩ sɔrasɩ kɔ̃tɩ̃sɔ a so war: «Mɛrɛ, mɩ tɩnɛ waa gel. 3 Dɩ nɛrɛ, nɩ tore yire gɩrɛ fɛʋra Thãgba Kɔ̃tɩn anɩ Thãgba cʋʋnɩ ca kpalasɔɔraakɛ dɩɩ do nɛr dɔ nɔɔ. Thãgba Kɔ̃tɩn thɛthɛ kɛ̃kɛrɛnɛ a pɛ nar. 4 Nɩ yɩ gɛr, mɩ lɩrɛ lɩɩ sa tɩnɛ dɩɩ nɩ mɔna anɩ casɔ hanɩ dɩɩsɔɔkɛ sɛnɩ teerera na dɩ gɩrɛ mɩ kʋʋrɔnɩ tɩbɩla kɛ hanɩ thɩ̃thɩɩn Jʋrdɛ̃ wi phã paar na Mediterane laɲɔ̃ wi lõ paar. 5 Thãgba Kɔ̃tɩn anɩ Thãgbaa thɛthɛ na weelene wɩ anɩ ƴɛra, dɩ na ti wɩ dɩɩra sɩ na tee awɩ dɩ a na hɩ̃ mɔna a so narnɩ. 6 Nɩ gbuo yʋʋ gɩrɛra kherarɩ Mʋɩjɩɩ jɔfʋ sɛbɛra; a na hɩnɛ gɩ, a na cʋɛna gɩ, na n khokhɩa gar sa kana ɲɔ̃bɔ dɩ ɲɔ̃bɩlã ga. 7 Na n he kha na wa casɔɔkɛ sɛnɩ anɩ thɩ̃thɩɩna'. Na n fʋɔr awɩ thãgbasɔa', na n we awɩ i a ʋlfɛna ga, na n gburõkhu war a fʋɔr wa'. 8 Sɩ nɩ ma Thãgba Kɔ̃tɩn anɩ Thãgbara mɔna nɩ fʋnɩ a dana nĩ. 9 Thãgba Kɔ̃tɩn weelele ca kɔ̃tɩna na ca khena anɩ ƴɛra dɩ a dana nĩ, tɩɩ bɩɛllakɛ na mar na pɩɛr na'. 10 Tɩɩ bɩɛllakɛ anɩ thɩ̃thɩɩn n kɔɔ pɛr tɩbɩla gbɩlanɩ ƴɔɔ, gɩdonɩ Thãgba Kɔ̃tɩn anɩ Thãgba kɛ̃kɛrɛnɛ pɛ nar mɔna a sonɩ. 11 Dɩ gɛr gɩ, nɩ hanana bʋdʋr anɩ thɛthɛra, a na Thãgba Kɔ̃tɩn anɩ Thãgba. 12 Sɩ a nɩ birnǝ khiru a ɓã kha na waa casɔɔkɛ sɛnɩ anɩ thɩ̃thɩɩn, dɩ a na he khasɔ, a na lʋʋn kha, 13 nɩ jɛna bɔɔbɔɔ dɩ Thãgba Kɔ̃tɩn anɩ Thãgba na n wee wɩ anɩ ƴɛra bã, sɩ wɛr na deba na do nar kẽkẽ wi pheru na pheru, wɩ do cilǝ̃mʋ̃ʋkɛ na n cilǝnɩ nɩ gɛlɔ na uusɔɔkɛ na n gʋʋrɛnɩ nɩ yinǝ, gɩ cʋʋ nɩ nɩ thii fɛw thɩ bɔ caaraakɛra Thãgba Kɔ̃tɩn anɩ Thãgba ha nɩnɩ.14 Me wer kɩɛr na dɩkhõo ma jaal kãakɛ tɩbɩla fɛw n jalnɩ. Nɩ jɩrɛ fɛw anɩ hara, na anɩ kpɩɛra dɩ Thãgba Kɔ̃tɩn anɩ Thãgbaa ʋlfɛsɔ nɛrɛra daan fɛw mɔna a ʋlfɛnɩ, thɩ̃ bɩɛllakɛ na sɩ aa cʋʋnaa ga. 15 Dɩ mɛ̃ gɩ, mɔna Thãgba Kɔ̃tɩn cʋʋnɩ ɔɔ ʋlfɛra a ʋlfɛna nɩnɩ dɩɩ dã, ɔmɛna a na cʋʋ naarɛ fɛw n dã nɩ, gɩ thii nɩ fɛw thɩ bɔ caaraakɛra Thãgba Kɔ̃tɩn anɩ Thãgba ha nɩnɩ. 16 A nɩ kʋɛ ʋlfɛrɛɛkɛ Thãgba Kɔ̃tɩn anɩ Thãgba ʋlfɛna nɩnɩ, dɩ a nɩ lõ thãgba kpɩɩsɔɔra a na fʋɔr, a na gburõkhu war, Thãgba Kɔ̃tɩn na deer narɛ ɔɔ nĩkhi dɩ na bũburõ dapaara dɩ bɔ caaraakɛra a ha nɩnɩ.