JOJUE 22

Pɩpɩɩ thɩ̃ɛsɔɔkɛ kanɩ Jojue yi hanana.

Jojue har Ribɛ̃ɛ məlsɔ, na Gadɩɩ məlsɔ, na Manasee ca kur hʋɛ wɩ kɛrra birǝ awɩ dʋɔ.

1 Dɩ Jojue we Ribɛ̃ɛ mǝlsɔ na Gadɩ mǝlsɔ na Manasee ca kur, 2 a so war: «Nɩ nɩrɛ nũu gɩrɛ fɛʋraakɛ Thãgba Kɔ̃tɩnɩ thɔ̃daar Mʋɩjɩ kɔɔ so narnɩ, a nɩ mɩ nũu dakha a cʋʋ gɩrɛ fɛʋʋkɛ mɩ so narnɩ. 3 A fʋna bɔ gbãgbãakɛ kanɩ a dana nɩ̃ na faa anɩ omɩsɔa'. Dɩ nɩ nɩrɛ Thãgba Kɔ̃tɩn anɩ Thãgba nũu gɩrɛ fɛʋʋra a so narnɩ. 4 Nɛnɛ̃ Thãgba Kɔ̃tɩn anɩ Thãgba har anɩ omɩsɔ hɩɩrɛ mɔna a kɔ so warnɩ. Nɩ gba hʋɛ a kɛra birǝ anɩ cɔsɔ dɩɩraakɛra Thãgba Kɔ̃tɩnɩ thɔ̃daar Mʋɩjɩ ha nɩnɩ Jʋrdɛ̃ wi phã paar.

5 Sɩ nɩ pǝrǝ a na ɔ jɔfʋra na thɩmɩɩraakɛ Thãgba Kɔ̃tɩnɩ thɔ̃daar Mʋɩjɩ ha nɩnɩ; a na Thãgba Kɔ̃tɩn anɩ Thãgba, a na gba ɔɔ hʋsɔ fɛw, a na nɛ nũu ɔɔ jɔfʋsɔɔra, a ɓana kha na ɔr, a na dʋɔraa thɔma na anɩ ha fɛw, na anɩ bɩ̃ fɛw. 6 Agɩpɩ Jojue bɔna wɛr sa faa wɩ wɩ kɛra kɔna awɩ cɔsɔ. 7 Mʋɩjɩ kɔɔ har Manasee ca kur bɩɛl thɩɩ Basã bəən Jʋrdɛ̃ iiro wi phã paar, sɩ Jojue ha wele sɛnɩ thɩɩ na awɩ omɩsɔ Jʋrdɛ̃ seero wi lõ paar. Ɔbɔɔkɛ Jojue n bɩlã wɩnɩ wɩ kɛra birǝ awɩ cɔsɔ, a bɔna wɛr 8 a so war: «Nɩ kɛra kɔna anɩ cɔsɔ na lẽlẽ thɩ̃ jɔjʋɔ na nʋma jɔɔ, na dɛ bulo tǝ̃tǝ̃tǝ̃ na dɛ, na ther sɛna, na thɛ, na kẽkena. Nɩ tɩnɛnɛ gelela nɩ taanɩ anɩ lãlaardarara na anɩ omɩsɔ. 9 Dɩ Ribɛ̃ɛ mǝlsɔ na Gadɩɩ mǝlsɔ na Manasee ca kur kɛrɛ dɩ wa n kɔ̃. Wɩ faarɛ awɩ omɩ Ɩjɩrayɛl bɩsã wele Silo, Kanãa dɩɩra sa kɛr dɩ wa n bir Galaadɩ bəənnə awɩ dʋɔɔkɛ wɩ 'lɛnɩ mɔna Thãgba Kɔ̃tɩn kɔɔ pɛrnɩ Mʋɩjɩ dɩ ha wɩ.

Ribɛ̃ɛ məlsɔ na Gadɩɩ məlsɔ na Manasee ca kurii bonɩ ji pa mɩ Jʋrdɛ̃ mɩɩr nʋɔra.

10 Ɔbɔɔkɛ wɩ danɩ Kanãa pɛlla, wi lõ paar Jʋrdɛ̃ mɩɩr nʋɔra, wɩ mɩrɛ bonɩ ji pa ɓʋ̃ɔ. 11 Dɩ Ɩjɩrayɛl bɩsana nɩɛrɛ dɩ wa n mɩɩ aa Ribɛ̃ɛ mǝlsɔ na Gadɩɩ mǝlsɔ na Manasee ca kur mɩrɛ bonɩ ji paar Kanãa dɩɩraakɛ hanɩ Jʋrdɛ̃ mɩɩr nʋɔra wi lõ paar. 12 Dɩ ɔbɔɔkɛ Ɩjɩrayɛl bɩsana nɩɛnɩ gelela, dʋɔdara fɛw kpa jɛ Silo, sɩ wɩ jal wɩ kena wɩ kʋʋr. 13 Wɩ thʋɔn bonɩ jidaar Eleajaar bikuun Fineasɩ Galaadɩ bəənnə Ribɛ̃ɛ mǝlsɔ na Gadɩɩ mǝlsɔ na Manasee ca kuri pa, 14 Ɩjɩrayɛl bɩsanaa kɔ̃tɩ̃sɔ yʋɔr, kɛ thɛnɩ caar dɩɩdɩɩra thɔgʋʋrɛ dɩ wɩ jal kha. Wɛr fɛw bɩɛlbɩɛl kɔ̃tɩna wɩ do Ɩjɩrayɛl bɩsanaa cɔ kasɔɔra. 15 Wɩ jaal Ribɛ̃ɛ mǝlsɔ, na Gadɩɩ mǝlsɔ na Manasee ca kuri pa Galaadɩ bəənnə a so war: 16 Ɩjɩrayɛl bɩsana fɛw thɔna sɩ sɩ bulene nɩ: Aɲee thɔ̃ puu ca ha gɩrɛ nɩ cʋʋnɩ Ɩjɩrayɛlɩ Thãgbara, a tɔ nɩ̃ dɩ na n khokhɩa Thãgba Kɔ̃tɩna, a mɩ anɩ thɛthɛɛ bonɩ ji pa, nɩ ɩɩrnanaa lãʋ? 17 Sɩ kɔɔ cʋʋrɛ puu kʋkʋʋ Peɔɔr jɛw, dɩ a dana nĩnakɛ sa phʋɔl asɩbara pɩ, narakɛ thɩlke ca ʋrɛ Thãgba Kɔ̃tɩn pɛnɩ sɛrɛ fɛʋra ga. Gelela na dã saa? 18 Dɩ nɛrɛ, nɩ bir nĩ na n faa Thãgba Kɔ̃tɩnɩ? A nɩ lã nĩ Thãgba Kɔ̃tɩnna, cʋɔ sɛr Ɩjɩrayɛl bɩsana fɛʋʋ yʋɔ ɔɔ nĩkhi na heen. 19 Ado nɩ yɩɛrɛ dɩɩ do dɩɩkɛ wɩ ha nɩnɩ bisere, nɩ seere kɛ Thãgba Kɔ̃tɩnɩ dʋɔ, ka ɔɔ cɔ hanɩ, a tɔɔ asɩ thɩ̃thɩɩn. Sɩ na n ɩɩrna lãʋ Thãgba Kɔ̃tɩnna dɩ sɛrɛra gɩ, a mɩ bonɩ ji pa kpɩɩa'. 20 Ɔbɔɔkɛ Jeraa bikuun Akã cʋʋnɩ dɩɩ thɩɛnaakɛ dɔnɩ sãasɩ thɩ̃ɛ, Ɩjɩrayɛl bɩsanana fɛw Thãgba Kɔ̃tɩnɩ nĩkhi lɩ dɔɔ; ga do ɔr dɩbara khe ɔɔ puurǝ ga.

21 Dɩ Ribɛ̃ɛ məlsɔ na Gadɩɩ məlsɔ na Manasee ca kur birse Ɩjɩrayɛl bɩsanaa cɔ kasɔɔ kɔ̃tɩ̃sɔ: 22 «Thãgba Kɔ̃tɩn kǝǝre thɩ̃ɛ fɛʋra; sobɔr, Thãgba Kɔ̃tɩn kǝǝre thɩ̃ɛ fɛʋra; ɔr jɩɛn kpɩɛrɛɛkɛ sɩ cʋʋnanɩ thɩ̃ɛɛkɛ. Dɩ Ɩjɩrayɛl dakha na jɩ gɛr. Ado lã kpɩɛrɛ sɩ cʋʋna na nũ nʋʋr kpɩɛrɛ Thãgba Kɔ̃tɩnna, a na n faa sɩ pɔpɔla'. 23 Ado Thãgba Kɔ̃tɩnɩ bo kpɩɛr sɩ mɩna asɩ thɛthɛɛ bonɩ ji pa, sɩ jiro bonɩ thiinǝsɔ na thɩ̃ bi bonɩɛsɔ, na 'likha bonɩɛsɔ, Thãgba Kɔ̃tɩn n pɛ sar sor. 24 Kpei! Thale dɔ asɩ kpɩɛra'. Sɩ gɩrɛ thɔɔ sɩnɩ dɩ sɩ cʋʋ, sɩ n dɛnanɛ mɔ̃ anɩ mǝlsɔ na ɩɩrnɩ khiro wɩ so asɩ mǝlsɔɔra wɩ yɩ: 'Aɲee thɩ̃ ca nɩ ha kha na Thãgba Kɔ̃tɩnɩɩkɛ dɔnɩ Ɩjɩrayɛl Thãgba? 25 Thãgba Kɔ̃tɩn pɩɛr Jʋrdɛ̃ dɩ do nar pɛl na sɛrɛ. Ribɛ̃ɛ məlsɔ na Gadɩɩ mǝlsɔ hanɩ; gɛr gɩ na hana dɩkha Thãgba Kɔ̃tɩnna ga''. Dɩ anɩ mǝlsɔ na dor nɔɔ asɩ mǝlsɔ na ma Thãgba Kɔ̃tɩna'. 26 Gɛr dɔ nɔɔ dɩ sɩ yɩ, sɩ mɩ bonɩ ji paar, sɩ ga do sɩ jiro bonɩ thiinǝ na bonɩɛsɔ ga. 27 Sɩ gɩ dɔ jɩjɩna thɩ̃ɛ sɛrɛ na nɛrɛɛ thɩ̃thɩɩn na asɩ bisɔɔraakɛ na kpaanɛnɩ, dɩ sɩ hananɛ hʋɛ a na fʋɔr Thãgba Kɔ̃tɩn na asɩ bonɩ thiinǝsɔ na bonɩ kpɩɩsɔ, na 'likha bonɩɛsɔ ɔɔ ƴɛra. Anɩ bisɔ na n yɩ dakha hʋɛ dɩkhõo a so asɩ bisɔɔra, wa hana dɩkha Thãgba Kɔ̃tɩna gaaga'. 28 Sɩ yɩ kɩɛr na dɩkhõo a anɩ məlsɔ mɩɩ gaa thɩmɩɩle sɛrɛra agɩbo asɩ mǝlsɔɔra, sɩ so war: «Nɩ hɩnɛ bonɩ ji paarɩle asɩ thisɔ mɩnɩ mɔ̃ a n honanɩ Thãgba Kɔ̃tɩnɩ bonɩ ji pa. Wɩ mɩɩrɛ ga do wɩ jiro bonɩ thiinǝ na bonɩɛsɔa', sɩ gɩ do jɩjɩna thɩ̃ɛ sɛrɛ na nɛrɛra 29 Sa hana kpɩɛrɛ nĩ sɩ mɩ bonɩ ji paar, sɩ lã Thãgba Kɔ̃tɩnna sɩ faanaa, sɩ sa n jiro bonɩ thiinǝ na thɩ̃ bi bonɩɛsɔ na bonɩ kpɩɩsɔ sɩ sɩ faa Thãgba Kɔ̃tɩnɩ bonɩ ji paakɛ wɩ mɩnɩ ɔɔ cɔ lõfonɔa'.

30 Ɔbɔɔkɛ gbõdaar Fineasɩ na Ɩjɩrayɛl bɩsanaakɛ a hananɩ kha, kɛ dɔnɩ kɔ̃tɩna Ɩjɩrayɛl bɩsanaa cɔ kasɔɔra nɩɛnɩ Ribɛ̃ məlsɔ na Gadɩɩ mǝlsɔ na Manasee mǝl kuri thɩmɩɩkɛ wɩ mɩɩnɩ, wɩ faarɛ haar. 31 Dɩ bonɩ jidaar Eleajaarɩ bikuun so Ribɛ̃ɛ məlsɔ na Gadɩɩ məlsɔ a na Manasee ca kurǝ: Sɩ jɩrɛ nĩ dɩ Thãgba Kɔ̃tɩn har asɩ thɩ̃thɩɩn gɩdonɩ na cʋʋraa puureekɛ sɩ n kɔɔ dɛnana; nɩ taarɛ Ɩjɩrayɛl bɩsana Thãgba Kɔ̃tɩn ɲɛna mɛ̃. 32 A gele pɩ, Fineasɩ kɛ dɔnɩ bonɩ jidaar Eleajaarɩ bikuun na Ɩjɩrayɛl bɩsanaa kɔ̃tɩ̃sɔ the le Galaadɩ bəənnə Ribɛ̃ɛ məlsɔ na Gadɩɩ məlsɔ na Manasee ca kuri pa a kɛr bir Kanaa dɩɩra Ɩjɩrayɛl bɩsanaa pa a mɩɛ wɩ gɩrɛ wɩ yɩnɩ. 33 Dɩ Ɩjɩrayɛl bɩsana faarɛ haar gɩrɛra wɩ mɩɛ wɩnɩ, agɩpɩ dɩ wɩ khɩɩ Thãgba sa sɩrɔ kpɩɛrɛɛkɛ wɩ kɔɔ tini wɩ kɔɔ jʋʋn wɩ kena wɩ kʋʋr. 34 Dɩ Ribɛ̃ məlsɔ na Gadɩɩ mǝlsɔ dʋrɛ bonɩ ji paarɩle ire aa ɔr dɔ jɩjɩna thɩ̃ɛ ɩnɛrɛ na wɛrɩ thɩ̃thɩɩn dɩ Thãgba Kɔ̃tɩn dʋɔn Thãgba.