JƆFƲ 'LORORE
JƖNANƐ THƖ̃ƐSƆRAAKƐ KƆƆ KANƖ
Mʋɩjɩɩ caca thɩmɩsɔ
1
1 Yɛkɛ thɩmɩaakɛ Mʋɩjɩ mɩɩnɩ Ɩjɩrayɛl bɩsana fɛw Jʋrdɛ̃ mɩɩr wi phã paar, bǝ̃ kparaara, bə̃ faanaakɛ Sufi dɩɩ pɛnɩ yɩɛ, kɛ hanɩ Parã na Tofɛl na Labã na Haserɔtɩ na Dɩ-Jahabɩ thɩ̃thɩɩn. 2 A the Orɛbɩ gɔ̃gʋɔnnɔ a jal Kadɛsɩ-Baarnea dɩɩra na Seyir gɔ̃gɔ̃ hʋɛ wire yʋɔr bɩɛl ɩɩrɛ gɩ. 3 Yɛna kpalaɲɔ yɩɛrɩ sɩpora yʋɔr bɩɛldaarɩ caca wi, ɔbɔɔkɛ Ɩjɩrayɛl bɩsana thenɩ Ejipiti dɩɩra, gɛra Mʋɩjɩ mɩɩ Ɩjɩrayɛl bɩsana gɩrɛ fɛʋʋkɛ Thãgba Kɔ̃tɩn kɔɔ sʋʋraanɩ a sɔ war. 4 A punonɩ Sɩhɔ̃ɔkɛ dɔnɩ Amɔɔr məlsɔɔ jamana kɛ kɔɔ hanɩ Hɛsɩbɔ̃ dɩɩra a punona Ɔgɩɩkɛ dɔnɩ Basã jamana, kɛ kɔɔ hanɩ Asɩtarɔtɩ dɩɩra le Edireyi dɩɩ karɔ, gɛr a mɩɩ war. 5 Le Jʋrdɛ̃ iiro wi phã paar, Moabɩ dɩɩra, Mʋɩjɩ ma da n dɩɩr tɩbɩla jɔfʋʋkɛ ayɩ:6 Thãgba Kɔ̃tɩn asɩ Thãgba mɩɩna sɛr Orɛbɩ gɔ̃gʋɔnnɔ ayɩ : «Nɩ toore gɔ̃gʋɔnnaakɛra a pʋɔr ka. 7 Nɩ ɩrɛ gba hʋɛ a jalla gɔ̃gɔ̃ bǝnǝsɔɔraakɛ dɔnɩ Amɔɔr məlsɔɔ dʋɔ, na dɩ gɩrɛsɔɔraakɛ khonǝ gɩnɩ fɛw, Jʋrdɛ̃ bə̃ faanaa, na gɔ̃gɔnana, na dɩɩsɔraakɛ hanɩ ɓɛ̃tɛw, na Negɛvɩ bǝ̃ kparara na Mediterane laɲɔ̃ khɔra, kɛ dɔnɩ Kanãadara bə̃, a phɔ jala Lɩbã gɔ̃gɔnanɔ a jallakɛ a dana mɩɩr kɔ̃tɩ̃ɩ kɛ dɔnɩ Efɩratɩ mɩɩr.
8 Nɩ hɩnɛ, mɩ ha nɛr dɩɩsɔɔkɛ nɩ pɛnɩ ƴɩɛ. Nɩ jalla a gba dɩɩsɔɔlera mɛr Thãgba Kɔ̃tɩn ʋlfɛnɩ ɩ̃ ha anɩ thɩ kɔ̃tɩ̃sɔ kɛ dɔnɩ Abɩraham na Ɩjakɩ na Jakɔbɩ na awɩ mǝlsɔɔkɛ na kpaanɛnɩ.
Mʋɩjɩ pɛrɛ tɩbɩla dɩ wɩ do sogʋʋrdara Ɩjɩrayɛl bɩsanana \ref Thɩɩ 18.13-26; 2 Kur 19.5-11.
9 Ga bɔɔle sɩ kɔɔ hanɩ Horɛb gɔ̃gʋɔna mɩ mɩɩ nɛr thakɛ ayɩ: Mɛr bɩɛl dɩbara na mar ma n gʋʋr anɩ soa'. 10 Thãgba Kɔ̃tɩn anɩ Thãgba cʋʋ nɛr dɩ nɩ thʋ̃ ler a jɔr nĩkɛ a ho ƴepǝlǝ̃be thãgbara ƴũu. 11 Thãgba Kɔ̃tɩnɩkɛ dɔnɩ anɩ thɩ kɔ̃tɩ̃sɔɔ Thãgba n cʋɛ nɩ, nɩ bir nɩ ler thaara wo ɲẽbe gbɩlanɩ nɩ dɛɛnɔ, dɩ a bɔna nɩ mɔna a kɔɔ ʋlfɛ na nɩnɩ. 12 Mɔ̃ ma fʋ sɩ na mar mɛr bɩɛl dɩbara anɩ nɩwɛsɔ, na anɩ thɩ̃ ƴaalsɔ na anɩ thʋ̃ khasɔ ? 13 Nɩ phire anɩ casɔɔra bɩɛlbɩɛl konaakɛ hananɩ kpɛsɛrɛ na jɩɩr, kɛ hananɩ i bʋɔ, ɩ̃ pɛ war wɩ do nar kɔ̃tɩna. 14 Dɩ nɩ kɔɔ birse mer aa gɩrɛ mɩ yɩnɩ nɩ cʋɛ, gɩ bɔrɛ ka. 15 Dɩ mɩ gbaar wɩrɛ kɔɔ dɔnɩ kɔ̃tɩna anɩ casɔɔra, kɛ dɔnɩ konaakɛ hananɩ kpɛsɛrɛ na i bʋɔ a pɛ ɩkha dɩ wɩ do kɔ̃tɩna tɩbɩla gbɩlã gbulonesɔra, dɩ ɩkha do kɔ̃tɩna tɩbɩla tama gbulonesɔɔra, dɩ ɩkha do kɔ̃tɩna tɩbɩla kpalaɲɔ yʋɔr gbulonesɔɔra, dɩ ɩkha do kɔ̃tɩna tɩbɩla yʋɔr gbulonesɔɔra. A pɛr ɩkha dɩ wɩ do sɛbɛ kheredara anɩ casɔɔra. 16 Mɩ sor ga bɔɔraalera anɩ sogʋʋrdasɔɔra wɩ jɩɛ pɛ awɩ omɩsɔ nũu, sa gʋrɛ tɩbɩla fɛw bɩɛlbɩɛl sɔɔkɛ wɩ n hanɩ kha ga n telẽ; ado omine gɩ na ʋ̃ omɩ agɩbo na kpakpalɩɩkɛ hanɩ anɩ thɩ̃thɩɩn. 17 Mɩ so warɛ wa n hɩɩn tɩbɩla dɩɩdɩɩ awɩ sogʋʋr para ga. Wa n pɛ tɩɩ pɔɩsɔ nũu mɔna wɩ n pɛnɩ tɩɩ kɔ̃tɩna nũu. Wa n ma tɩɩ bɩɛllaka'; gɩdonɩ Thãgba hɩna kɩɩlʋʋ. Sɩ ado sor dɔɔ hale a jɔ awɩ punona, wɩ ɛna mar. 18 Thale mɩ nɩ nar ga bɔɔraale gɩrɛ nɩ teenanɩ nɩ cʋɛ. \ref Ther 13; 14; Kh 106. 24-26
19 Sɩ ther Orɛbɩ gɔ̃gʋɔnnɔ a seer bǝ̃ kpara kokʋʋkɛ kɔnɩ maar, kɛ nɩ yɩnɩ a pɩ wɩbɩ. Amɔɔr məlsɔɔ gɔ̃gɔ̃ hʋ sɩ kana mɔna Thãgba Kɔ̃tɩn asɩ Thãgba kɔɔ kpãkpaan sarnɩ, a jal dã Kadɛsɩ-Baarnea. 20 Dɩ mɩ so nar: Nɩ daan Amɔɔr məlsɔɔ gɔ̃gɔ̃ bə̃əkɛ Thãgba Kɔ̃tɩn asɩ Thãgba n ha sɩnɩ. 21 Nɩ yɛ gɩ, Thãgba Kɔ̃tɩn anɩ Thãgba ha nɛr dɩɩra. Nɩ jʋnɛ a teaa a do anɩda mɔna Thãgba Kɔ̃tɩnɩkɛ dɔnɩ anɩ thɩ kɔ̃tɩ̃sɔɔ Thãgba sonɩ. Na n do haar n fuu na', na n hana maara'.
Ɩjɩrayɛl bɩsana ɩrnanɛ lãʋ Kadɛsɩ-Baarnea bǝǝnnǝ
22 Dɩ nɩ pɔr nɛrɛ fɛw a so mar ayɩ: Sɩ thɔna kona wɩ kʋʋl sɩ ƴɩɛ wɩ jal wɩ gɩɩl dɩɩra, sɩ wɩ ɩ̃ wɩ mɩɛ sɩ hʋ ʋrɛ sa jʋʋnanɩ na dɩɩsɔɔraakɛ sa danɩ. 23 Dɩ thɩmɩɩra da marɛ ka, dɩ mɩ phiire kona yʋɔr yeɲɔ anɩ thɩ̃thɩɩn, kuun bɩɛl ca bɩɛlla, 24 dɩ wɩ jaal na gɔ̃gɔ̃ khʋʋ a jal dã Ɛsɩkɔl ɓɛlɛ̃ a gɩɩl bǝǝnnǝ. 25 Dɩ wɩ khʋnɛ dɩɩle thɩr bisɔ a ɩna nɩna sɩ, sa mɩɛ sɩ aa dɩ ɓʋ̃ɔ gɩɩkɛ Thãgba Kɔ̃tɩn asɩ Thãgba n ha sɩnɩ. 26 Sɩ na kɔɔ hana tuur nɩ lõ la', nɩ lãa Thãgba Kɔ̃tɩn anɩ Thãgbaa nɔ ka thɩmɩɩra. 27 Nɩ kɔɔ hũhuune anɩ kẽkẽ waw, aa Thãgba Kɔ̃tɩn n laar nɛr gɛr gɩ dɩ ti nɩ Ejipiti dɩɩra a pɛ Amɔɔr məlsɔɔ ɲɛna, wɩ bũburone nɩ. 28 Aa aɲeraakɛ na jal le anɩ omɩsɔ khiir nɩnɩ ɲɛ̃ɛ aa tɩbɩla wɛɛkɛ hananɩ punone ka, tɩɩ gbã khena wɛ a jɔ sɩ; aa dɩ kɔ̃tɩna gɩɩkɛ wɩ mɩnɩ gʋʋ a kpalalɔ dɩɩ jʋʋn thʋ thãgbara ƴũu, aa wɩ yɩrɛ lerakɛ Anakɩɩ mǝlsɔ. 29 Dɩ mɩ so narɛ: Na n do haar n phaa na', na n ma wa'. 30 Thãgba Kɔ̃tɩn anɩ Thãgbaakɛ n kʋlɛ nɩnɩ ƴɩɛ, ɔɔ thɛthɛ na kɛ̃kɛrɛnɛ na pɛ nar mɔna a cʋʋ narnɩ Ejipiti dɩɩra dɩ nɩ toro yire, 31 na dakha bǝ̃ kparara, nɩ torore yire mɔ̃ Thãgba Kɔ̃tɩn anɩ Thãgba gba nɩnɩ mɔ̃kɛ thɩrɛ n gbanɩ ɔɔ bi, hʋɛraakɛ nɩ gbanɩ a ɩna dana paarɩɩkɛ. 32 Sɩ na gelelakɛ, na pɛ Thãgba Kɔ̃tɩn anɩ Thãgba haara'. 33 Sɩrakɛ ɔr dɔ ʋrɛ n gbaana nɩnɩ ƴɩɛ hʋɛra dɩ ƴaal paarɩkɛ na jɛnɩ dɩ ha nɩ. Dɩtɩnɔ a n kʋʋl nɛr ƴɩɛ ndɔlɔ̃paaraakɛ dɔnɩ dɔɔ da n nɩ nar hʋɛ, sɩ dɩwɩlɔ dɩ ha ndɔlɔ̃paara.
34 Dɩ Thãgba Kɔ̃tɩn nɩɛrɛ anɩ thɩmɩsɔɔra, dɩ nĩkhii fʋʋ dɩ ʋlfɛ thakɛ aa: 35 Tɩɩ bɩɛllakɛ wa bɔ tibilsɔɔkɛɛ thɩ̃thɩɩn, kɛ puuroni ka na lõ dɩ ɓʋ̃ɔnaakɛ mɩ ʋlfɛnɩ ɩ̃ ha anɩ thɩ kɔ̃tɩ̃sɔ 36 saagado Yefunee bikuun Kalɛbɩ gaaga. Ɔr na yɛ dɩɩra, ɔr na ɔɔ bisɔ ma ha dɩɩkɛ ɔɔ nɛ kpaarnɩ gɩdonɩ a ɩɩrɛ mɛr Thãgba Kɔ̃tɩnɩ hʋra waa gel. 37 Anɩda dor nɔɔ dakha dɩ Thãgba Kɔ̃tɩn gbana mɩ nĩkhii sa so aa, mɛrɛ dakha na lõ la'. 38 Sɩ Nuni bikuun Jojueekɛ n kho mɩnɩ na lona, aa ɩ̃ cʋɛɛ a tɩ gɩdonɩ ɔr na cʋɛ Ɩjɩrayɛl bɩsana dɩ wa hɩ̃ dɩɩra. 39 Agɩpɩ dɩ Kɔ̃tɩn so: «Anɩ bisɔɔkɛra nɩ kɔɔ sonɩ nʋ̃ʋ wa do anɩ lãlaardarara, kɛrakɛ na jɛnɩ nĩ dabʋɔ na dapuu dɩ wɩ lea', wɛr na ka na lõ. Wɛr ma ha dɩɩra dɩ wa hɩ̃. 40 Sɩ ne wer, nɩ kɛra birǝ le bə̃ kparaara a jalla laɲɔ̃ sɛ khʋʋra.»
41 Dɩ nɩ birse mer ga wiile aa nɩ dɩrɛ Thãgba Kɔ̃tɩnna, aa na jaal na ke kʋʋr mɔna Thãgba Kɔ̃tɩn anɩ Thãgba sonɩ. Dɩ nɛrɛ fɛw bɩɛlbɩɛl gbaar anɩ koke thɩ̃sɔ a saa a ka jɩna gɔ̃gɔ̃ bǝǝnnile na yɔɔ narɛ taarɛra. 42 Dɩ Thãgba Kɔ̃tɩn so marɛ ɩ̃ sɔ nar na n jʋʋn ko kɩa' aa ɩna ha kha na nɛrɛa', a mɛ̃ ga anɩ lãlaardara na punone ner. 43 Dɩ mɩ mɩɩ nɛr dɩ nɩ bo na pɛ nũu gɩrɛra Thãgba Kɔ̃tɩn sona', sa ka kʋʋr a jʋʋn gɔ̃gʋɔnnɔ. 44 Dɩ Amɔɔr məlsɔɔkɛ hanɩ gɔ̃gɔ̃ bǝǝnnǝǝle thɩɩrɛ thʋbi khaa a cãa nɩ, a weele nɩ, a kʋʋr nɩ a fʋna Seyir bǝǝnnǝ a dana Hɔɔrma dɩɩra. 45 Mɔ̃ nɩ thenɩ le ɩ̃, nɩ ther yilẽbe Thãgba Kɔ̃tɩnɩ ƴɛra sɩ Thãgba Kɔ̃tɩn pɩr pɔbɩ aa pɛ nɩ nũǝ'. 46 Dɩ mɛ̃ nɩ too Kadɛsɩ-Baarnea a pʋɔr jɔɔ mɔna nɩ jɩ gɩnɩ.