2
1 Agɩpɩ sɩ ɩɩrɛ a gba laɲɔ̃ sɛ hʋɛ a kɛr bir bǝ̃ kparaara mɔna Thãgba Kɔ̃tɩn kɔɔ so marnɩ. Sɩ gbaar wi jɔjʋɔ a parna Seyir gɔ̃gɔ̃ bǝǝn a fi.Ɩjɩrayɛl bɩsana golone Edɔ̃ɔ mǝlsɔ na Moabɩɩ mǝlsɔ na Amɔ̃ɔ mǝlsɔɔ dɩsɔra a ka. \ref Ther 20.14-22; 33.37-44; Rɔm 12.18
2 Wi bɩɛl Thãgba Kɔ̃tɩn so marɛ: 3 Gɩ maanɛ nɩ n fini gɔ̃gɔ̃ bǝǝnnǝǝkɛra. Nɛnɛ̃ nɩ jalana bil ʋrɛ wire n phanɩ dɩ pɛ ɲɔ̃bɔɔ. 4 Sɔ tɩbɩlala thakɛ ayɛ: Ejayuu mǝlsɔɔkɛ hanɩ Seyir, kɛ dɔnɩ anɩ omɩsɔ, awɩ pɛl na kana. Haar na fuu wer nɛrɛra, sɩ nɩ dɔ bʋrɛ. 5 Na n kena wa', ma ha nɩ thɩɩ awɩ dʋɔ, dɩ paar gɩrakɛ ka na sanɩ nɔa'. Gɩdonɩ Ejayu mɩ ha Seyir gɔ̃gɔ̃ bǝǝn dɩ hɩ̃. 6 Na n the warɛ dɩkɔ na ɲʋɔnɩkɛrakɛ na ɲɔnɩ, 7 gɩdonɩ Thãgba Kɔ̃tɩn anɩ Thãgba bɔna nɛr anɩ ɲɛ̃ thɔna fɛw, a bɛr nɛr anɩ kpaar para bǝ̃ kpara kokʋʋraakɛ. Yɛna kpalaɲɔ ha gɩrɛ Thãgba Kɔ̃tɩn anɩ Thãgba hanɩ kha na nɛrɛ, dɩ dɩkha na ɓɔr na'.
8 Dɩ sɩ kɔɔ faarɛ Seyir bǝǝn ƴɔɔ, ka asɩ omɩsɔɔkɛ dɔnɩ Ejayuu mǝlsɔ hanɩ, a faa hʋɛɛkɛ n jallanɩ Araba ɓɛlɛnɔ na Ela dɩɩra na Ɛsɩɔ̃-Gebɛɛr dɩɩra ƴɔɔ sa kɛr gba hʋɛɛkɛ n jalanɩ Moabɩ bǝ̃ kparaara. \ref Ther 21.10-20; Sog 11. 14-18
9 Thãgba Kɔ̃tɩn so marrɛ aa sa n ƴaal Moabɩdara sʋa', sa n kena wɩ kʋʋra' gɩdonɩ ɩna ha sɩ awɩ da'. Aa Lɔtɩɩ mǝlsɔ ɩnɩ ha Aar dɩɩ, dɩɩ do awɩda. 10 Kɛkɛra Emɩtɩsɔ kɔɔ hãa paarɩle. Tɩbɩla wɛɛkɛ jʋɔnɔnɩ a hana punone a dona tɩɩ gbana Anakɩɩ mǝlsɔ kha. 11 Tɩbɩla n kɔɔ kpɩɛrɛ dɩ Refayɩtɩsɔ wɩ do, mɔna Anakɩɩ mǝlsɔ hanɩ, sɩ Moabɩdara na n we wɩ Emɩtɩsɔ. 12 Kɛkɛra Hɔɔrɩsɔ kɔɔ hãa Seyir sɩ dɩ Ejayuu mǝlsɔ ti wɩ, a bũburõ wɩ, sa tee paar a tooro. Ɔmɛna Ɩjɩrayɛl bɩsana cʋʋ dakha dɩɩraakɛra Thãgba Kɔ̃tɩn ha wɩnɩ dɩɩ do awɩda. 13 Thãgba Kɔ̃tɩn so: «Nɛnɛ̃ nɩ ɩrɛ a iire Jerɛdɩ kɔlɔ̃.» Dɩ sɩ iir. 14 Bɔɔkɛ sɩ gbanɩ a ɩɩrna, sɩ thenɩ Kadɛsɩ-Baarnea a dana bɔɔkɛ sɩ iirni Jerɛdɩ kɔlɔ̃ har yɛna kpelẽ yʋɔr makõther. Ga bɔɔle kona fɛʋʋkɛ dananɩ ko kɩɩr bũburõ mɔna Thãgba Kɔ̃tɩn kɔɔ ʋlfɛnɩ. 15 Thãgba Kɔ̃tɩnɩ thɛthɛrakɛ bũburõ wer a ti 'lɛrfɛrɛɛ na ɔɔ ɲɔ̃.
16 Ɔbɔɔkɛ khir kʋʋrnɩ wɩrɛ dananɩ ko kɩɩr asɩ thɩ̃thɩɩn a ti, 17 Thãgba Kɔ̃tɩn so marrɛ aa: 18 Nĩkɛ, nɩ thɛ Moabɩ pɛlla a bɛ Aar dɩɩ, 19 sa jalla Amɔ̃ɔ mǝlsɔɔ dʋɔ. Na n ƴaal wɩ sʋa', na n kena wɩ kʋʋra', gɩdonɩ ma ha nɩ thɩɩ dɩɩraala'. Lɔtɩɩ mǝlsɔ mɩ ha dɩ wɩ hɩ̃.
20 Wɩ n kɔɔ gbaar bǝǝnnilera dɩɩ do Refayɩtɩsɔɔ bǝ̃; gɩdonɩ wɛr kɔɔ hãale cacara. Wɛr Amɔ̃ɔ mǝlsɔ n kɔɔ we Jãjumɛ̃sɔ. 21 Tɩbɩla wɛɛkɛ kɔɔ jʋɔnɔnɩ a hana punone, a dona tɩɩ gbana Anakɩɩ mǝlsɔ kha, sɩ Thãgba Kɔ̃tɩn bũburõ wɩ Amɔ̃ɔ mǝlsɔɔ ƴɛra sɩ dɩ wɩ gba dɩɩ a tooro. 22 Thalera Thãgba Kɔ̃tɩn kɔɔ tee pɛr Ejayuu mǝlsɔɔkɛ tɔɔnɩ Seyir. A bũburone Hɔɔrɩsɔ sɩ dɩ Ejayuu mǝlsɔ gba dɩɩ a tooro a dana nĩ. 23 Kafɩtɔɔdaraakɛ thɛnɩ Kafitɔɔ dɩɩra kɔɔ bũburone Avɩtɩsɔ kɛ tɔɔnɩ dɩ biisɔɔraakɛ jalanɩ dã Gaja dɩɩra sa gba awɩ pa a tooro.
24 Agɩpɩ Thãgba Kɔ̃tɩn sor: «Nɩ gba hʋɛ a jalla iire Arnɔ̃ kɔlɔ̃. Mɩ gbaar Sɩhɔ̃ɔkɛ dɔnɩ Hɛsɩbɔ̃ jamana, kɛ dɔnɩ Amɔɔrɩ mǝl na ɔɔ dɩ a dʋ nɩ ɲɔ̃kɔɔ. Nɛnɛ̃ nɩ gba dɩɩra a do anɩda, nɩ gbɛbɩrɛ a jalla kɛnaa kʋʋr. 25 A fʋna nĩikɛ ma cʋʋrɛ caar fɛʋʋkɛ hanɩ thɩɩra na n ma nɩ. A wɩ nɩ anɩda dɩ wɩ mɩɩna, maar n ho ga lɩɛr wɛr, wa n jẽ.»
Ɩjɩrayɛl bɩsana taarɛ Sɩhɔ̃ɔ dɩ. \ref Ther 21.21-32; Sog 11.19-22; Khɩ 60.14
26 Le Kedemɔtɩ bǝ̃ kparara mɩ thɔ̃ tɩbɩla na ha ie thɩmɩa Hɛsɩbɔ̃ jamana Sɩhɔna, mɩɩ wɩ sʋɔraa ayɛ, 27 sɩ n ƴaalɛ sɩ kana ɔɔ dɩ hʋ. Hʋɛ dɩbara sa kana. Sa lɛ̃ paara'. 28 Sa ther dɩkɔɔkɛ sa khonɩ na ɲʋɔnnɩɩkɛ sa ɲɔnɩ ɔɔ dʋɔ. Hʋɛ sa kana dɩbara. 29 Thalera Ejayuu mǝlsɔɔkɛ hanɩ Seyir na Moabɩdarakɛ hanɩ Aar dɩɩra ha sɩ hʋɛ dɩ sɩ ka na awɩ dɩ hʋ. Ha sɩ hʋɛ dakha sɩ ka sɩ iir Jʋrdɛ̃ sɩ lõ dɩɩraakɛ Thãgba Kɔ̃tɩn asɩ Thãgba n ha sɩnɩ. 30 Sɩ Sɩhɔ̃ɔkɛ dɔnɩ Hɛsɩbɔ̃ jamana bor aa sa kana ɩnɩɩ dɩ hʋa', gɩdonɩ Thãgba Kɔ̃tɩn anɩ Thãgba cʋʋrɛ ɔɔ ha dɩɩ khɩɩr gɩdo nɔɔ a gbaa a dʋ nɩ ɲɔ̃kɔɔ mɔna nɩ yɩɛnɩ dɩɩ ka ga bɔɔle.
31 Dɩ Thãgba Kɔ̃tɩn so marɛ ayɩ : Hɩnɛ, a fʋna nɛnɛ̃kɛ, mɩ gbaar Sɩhɔ̃ na ɔɔ dɩ a dʋ fɩ ɲɔ̃kɔɔ, nɛnɛ̃ fɔ dɩ teere, a tea dɩɩkɛ gɩ do afɩda. 32 Dɩ Sɩhɔ̃ ther na ɔɔ sɔrasɩsɔ fɛw a cãa sɩ Yahasɩ wɩ kena sɩ. 33 Dɩ Thãgba Kɔ̃tɩn asɩ Thãgba gbaarɛ na ɔɔ bikũusɔ na ɔɔ dʋɔdara fɛw a dʋ sɩ ɲɔ̃kɔɔ dɩ sɩ puno wɩ. 34 Sɩ taarɛ ga bɔɔlera ɔɔ dɩsɔ fɛw, a kʋʋr kona na khɛra na bɩsana, sa sɩ bɩɛllakɛ na yirǝ'. 35 Nʋma dɩbara sɩ kpa a khɩɩna thɩ̃ɛsɔ dɩ gɩrɛra sɩ taanɩ. 36 Fɔnɩ Aroyɛɛr dɩɩra kɛ hanɩ Arnɔ̃ kɔlɔ̃ nʋɔra, na dɩɩkɛ hanɩ le ɓɛlɛnɔ a jalna dana Galaadɩ bə̃ə, dɩɩ na hale a hana fãga a jɔ sa'. Thãgba Kɔ̃tɩn asɩ Thãgba gbaa wɛr fɛw a dʋ sɩ ɲɔ̃kɔɔ. 37 Sɩ sa tha Amɔ̃ɔ mǝlsɔɔ dɩra ga, sa tha dɩ gɩrɛra hanɩ Yabɔkɩ kɔlɔ̃ nʋɔra, na dɩ gɩrɛra hanɩ gɔ̃gɔ̃ bǝǝnnǝ, na dɩ gɩrɛra Thãgba Kɔ̃tɩn asɩ Thãgba pɩɛr sɩnɩ sa n tharɔa' ga.