JOJUE
MƆ̃ ƖJƖRAYƐL BƖSANA PUNONƖ KANÃADARA SA TAA DƖƖ.
'Larɩkɛ Thãgba Kɔ̃tɩn hanɩ Jojue. \ref Dǝt 31.1-8; 14-23; Joj 22.1-9
1
1 Ɔbɔɔkɛ Mʋɩjɩɩkɛ dɔnɩ Thãgba Kɔ̃tɩnɩ thɔ̃daar khini, Thãgba Kɔ̃tɩn sor Nuni bikuun Jojuerakɛ dɔnɩ Mʋɩjɩɩ khukhu ayɩ: 2 Gɩdonɩ ɩ̃ thɔ̃daar Mʋɩjɩ khire, nɛnɛ̃ fɛr na iire Jʋrdɛ̃ mɩɩr na tɩbɩlaakɛ fɛw nɩ lõ dɩɩraakɛ mɩ yɩnɩ ɩ̃ ha nɛr Ɩjɩrayɛl bɩsana. 3 Mɔ̃kɛra mɩ kɔɔ sonɩ Mʋɩjɩra, paar wo paarɩkɛ na sanɩ na anɩ nɛ, ma ha nɛr. 4 Anɩ dɩ pɛl na fʋrɛ bǝ̃ kparara wi phã paar ɲɔ̃bɩlana, gɩ jal gɩ dã Lɩbã gɔ̃gɔna wi phã paar ɲɔ̃bɔɔra. Dɩ wi phã paar ga fʋrɛ Efɩratɩ mɩɩr kɔ̃tɩɩna, gɩ gbana Hɛtɩɩ mǝlsɔɔ dɩ fɛw, gɩ jal gɩ thʋ Mediterane laɲʋɔn, kɛ hanɩ wi lõ paar. 5 Afɩ yi hanana fɛw tibil bɩɛllakɛ na 'la na jɩɩl na pɩɛr fa'. Ma har kha na fɛrɛ mɔna mɩ kɔɔ hanɩ kha na Mʋɩjɩ. Ma faa fɩ dɩbara kpɩɩraka', ma dʋna fɩ na faga. 6 Hanana 'lar, fa n do ɲɛ̃ɛ n khiir fa', gɩdonɩ fɛr na cʋɛ tɩbɩlaakɛ dɩ wa lõ dɩɩraakɛ mɩ kɔɔ ʋlfɛnanɩ awɩ thɩ kɔ̃tɩ̃sɔ dɩ ma ha wɛr. 7 Thɩ̃ kɔ̃tɩ̃ɩ dʋɔn fɩ hanana 'lar, fa n do ɲɛ̃ɛ n khiir fa'. Na jɩɛ ɔ ɩ̃ jɔfʋraakɛ ɩ̃ thɔ̃daar Mʋɩjɩ ha fɩnɩ a na cʋɛna gɩ. Fa n khokhɩa gara dɩ mɛ̃ thɩ̃ɛ wo thɩ̃ɛɛkɛ fa cʋʋnɩ na n bɔ far. 8 Na sɔ jɔfʋ sɛbɛɛkɛ bɔɔ fɛw a na kpɩɛrna gɩ dɩwɩlʋ na dɩtɩnɛ, a gbuoro yʋʋ a na cʋɛ gɩrɛ fɛʋʋkɛ kherarɔnɩ. Dɩ mɛ̃ fa puno na cʋʋ gɩrɛ fɩ n kpɩɛrnɩ fɩ cʋʋ ga n bɔr. Dɩ thɩ̃ɛ na bɔ farɛ. 9 Ma so far fɩ hanana 'lar fa n do ɲɛ̃ɛ n khiir faa gaa? Fa n jẽa', fa n do haar n fuu fa', mɛr Thãgba Kɔ̃tɩn afɩ Thãgba har kha na fɛrɛ paar wo paarɩkɛ fa n jalnɩ.Jojue gbɛbɩrɛ mɔ̃ wa iirni Jʋrdɛ̃ mɩɩr
10 Jojue sor Ɩjɩrayɛl bɩsanaa ƴɛkʋʋldarara, 11 wɩ kpaarɛ jɛw a sɔ tɩbɩlala wɩ gbɛbɩrɛ hʋ gba dɩkɔ, gɩdonɩ kɩɛr na wire yẽther wa iire Jʋrdɛ̃ mɩɩr sɩ na lõ dɩɩraakɛ Thãgba Kɔ̃tɩn awɩ Thãgba n ha wɩnɩ.
12 Agɩpɩ dɩ so Ribɛ̃ɛ mǝlsɔ na Gadɩɩ mǝlsɔ na Manasee ca kurrǝ: 13 Nɩ jɛna gɩrɛɛkɛ Thãgba Kɔ̃tɩnɩ thɔ̃daar Mʋɩjɩ kɔɔ so narnɩ, ɔbɔɔkɛ a sonɩ aa Thãgba Kɔ̃tɩn ha nɛr hɩɩrɛ, dɩɩrakɛ hanɩ kɛ jʋrdɛ̃ wi phã paar. 14 Anɩ khɛrsɔ na anɩ bɩsãsɔ na anɩ nʋ̃sɔ na toore kɛ Jʋrdɛ̃ wi phã paar, dɩɩraakɛra Mʋɩjɩ ha nɩnɩ. Sɩ ne wer na iire mɩɩrɩkɛ nɩ jal kʋʋrra, nɛrɛ fɛʋkɛ dɔnɩ sɔrasɩ khena, nɩ bul wɩ, 15 gɩ dana bɔɔkɛ Thãgba Kɔ̃tɩn na ha wɩnɩ hɩɩrɛ mɔna a ha nɩnɩ, wɛr dakha n tee dɩɩkɛra Thãgba Kɔ̃tɩn anɩ Thãgba ha wɩnɩ. Agɩpɩ nɩ kɛr nɩ bir nɩ too dɩɩraakɛra Thãgba Kɔ̃tɩnɩ thɔ̃daar Mʋɩjɩ ha nɩnɩ Jʋrdɛ̃ wi phã paar.
16 Dɩ wɩ birse Jojue: Sa cʋʋrɛ gɩrɛ fɛʋʋkɛ fɩ so sarnɩ. Sa jal paar wo paarɩkɛ fa thɔ̃ sɩnɩ. 17 Sa nɩ fɛr nũu mɔ̃kɛra sɩ nɩnɩ Mʋɩjɩ nũu thɩ̃ɛ fɛʋra. Thɩ̃ kɔ̃tɩ̃ɩ dʋɔn Thãgba Kɔ̃tɩn afɩ Thãgba n hana kha na fɛrɛ mɔ̃ɔkɛ a kɔɔ hanɩ kha na Mʋɩjɩ. 18 Tibil wo tibilikɛ na ɩrɛnanɩ lãʋ afɩ thɩmɩɩra a na nʋʋr nũu gɩrɛ fɛʋrakɛ fa sʋʋraanɩ wa kʋʋrɛ. Sɩ fɛrɛ, thɩ̃ kɔ̃tɩ̃ɩ dʋɔn, fɩ hanana 'lar fa n do ɲɛ̃ɛ n khiir fa'.