Jojue thʋɔn gɩgɩla yeɲɔ Jeriko dɩɩra \ref So 1.23-25; Joj 6.17, 22-25
2
1 Dɩ le jɛw Sɩtɩm dɩɩra, Nuni bikuun Jojue thʋɔn gɩgɩla yeɲɔ, wɩ jalla gɩɩlɛ, Kanãa na Jeriko dɩɩ wolonena. Dɩ gɩgɩlaale daan Jeriko a gbũ thetoo bɩɛllɩkɛ wɩ n wenɩ Rahabɩɩ cɔ a cɔ le. 2 Dɩ wɩ sor Jeriko jamanana aa Ɩjɩrayɛl bɩsana daan kɛ dɩtɩnɔ dɩ gɩɩlʋ. 3 Dɩ jamana thʋɔn so Rahabɩra: Te tɩbɩlaakɛ gbunoni afɩ cɔ a ha sɩ; dɩ gɩɩlʋ wɩ ɩ̃. 4 Sɩ khɛrɩle kɔɔ kpar kona yeɲɔɔle a ker sa so: Sobɔr gɩ, kona ɩnɛ kɛ ɩ̃ pa sɩ ma kɔɔ jɩ ka wɩ thena. 5 Sɩ ɔbɔɔkɛ dɩɩ hanɩ wilǝwilǝ, wɩ n khaanɩ dɩ loo, tɩbɩlaale thɩɩrɛ ma jɩ ka wɩ jalna'. Nɩ phana khǝ̃khǝ̃ kpaan na 'li wer. 6 Sɩɩ dorakɛ a kɔɔ kpar konaale a jʋʋna nãsʋrɔ a ker balãsɩ ɓalalaakɛ a kɔɔ dernɩ. 7 Dɩ jamanaa thɔ̃thɔ̃sɔɔle gbaar hʋɛɛkɛ n jalanɩ Jʋrdɛ̃ thɛlɛ̃ paar a wee wa n kpaan. Sɩ ɔbɔɔkɛ wɩ thenɩ dɩɩra pɩ, wɩ khaanɛ loo.8 Dɩ Rahabɩ gbaar jʋʋn gɩgɩlaalee pa ɔbɔɔkɛ wa phɩɩnɩ pa', 9 a so war: Mɩ jɩrɛ tue dɩ Thãgba Kɔ̃tɩn ha nɛr dɩɩkɛ. Maar thʋnɛ ka sar dɩ haar fuu dʋɔdara fɛw dɩɩ do nɛr dɔ nɔɔ. 10 Sɩ kɔɔ nɩɛrɛ ɔbɔɔkɛ nɩ kɔɔ thenɩ Ejipiti dɩ Thãgba Kɔ̃tɩn vaarɛ laɲɔ̃ sɩɛ sɩ dɩ nɩ seer na thɩ khɩɩr. Sɩ nɩɛrɛ dakha mɔ̃ nɩ kʋʋrnɩ Amɔɔr məlsɔɔ jamana yeɲɔɔkɛ wɩ n wenɩ Sɩhɔ̃ na Ɔgɩ kɛ hanɩ le Jʋrdɛ̃ iiro a kʋɛna wɩ thɩ̃ɛ fɛw. 11 Sɩ kɔɔ nɩ gɛr dɩ haar fuu sɩ. Tibil bɩɛllakɛ na hana 'lar a na pɩɛr na', gɩdonɩ sɩ jɩrɛ dɩ Thãgba Kɔ̃tɩn anɩ Thãgba dʋɔn Thãgbaakɛ hanɩ ƴũu, na thɩɩraakɛ. 12 Nɛnɛ̃ nɩ ʋlfɛnɛna mɩ na Thãgba Kɔ̃tɩnɩ i, mɔna mɩ cʋʋ nɩnɩ bɔɔ na ha bʋɔ, dɩ nɛrɛ dakha na cʋʋrɛ ɩ̃ cɔdara bɔɔ na ha bʋɔ. Dɩ nɩ ha mɩ jɩɩnɩɩkɛ ma jɩnanɩ, 13 dɩ na sɩrɛ ɩ̃ thɩra na yire, na ɩ̃ nɩ, na ɩ̃ õkũusɔ na ɩ̃ õkhɛrsɔ na awɩ cɔdara fɛw, nɩ taa sɩ khirrǝ. 14 Dɩ konaale sʋʋraa: Sɩ gbɛbɩrɛ pɩ a na khi anɩ sora ado na be kpɩɛrɛɛkɛ sɩ tini kha a wɩɛla'. Ɔbɔɔkɛ Thãgba Kɔ̃tɩn na ha sɩnɩ dɩɩkɛ, sa cʋʋ fɛr bɔɔ na ha bʋɔ mɔna sɩ ʋlfɛnɩ. 15 Dɩ a cʋʋrɛ konaale dɩ wɩ thɩɩr na fɛnɛtɩrɩ, a gbunǝ pɔ̃ɔ gɩdonɩ dɩ bɛr go bɩnɔ ɔɔ cɔ ha. Le a n cɔ. 16 Sɩ ɔbɔɔkɛ wa kɔɔ gbuni pa a so warɛ wɩ jalla gɔ̃gʋɔnna a wɔna, a mɛ̃ ga wɩrɛ n ƴaalɛ wɩnɩ na yɩ wɛr. Wɩ tɔɔ le wire yẽther gɩ dana bɔɔkɛ wa kɛrnɩ na bir. Agɩpɩ wɩ gba awɩ hʋ wɩ jal. 17 Dɩ konaale sʋʋraa: Yɛkɛ mɔ̃ sor na hɛl sarnɩ nʋɔraakɛ fɩ cʋʋ sɩnɩ dɩ sɩ so: 18 Ɔbɔɔkɛ sa n lonɩ dɩɩraakɛ, gbo kẽkẽ wi sɩɛɛkɛ fɛnɛtɩrɩraakɛra fɩ cʋʋ sɩnɩ dɩ sɩ gbunǝ, sa kpa afɩ thɩ, na afɩ nɩ, na afɩ õkũusɔ, na afɩ õkhɛrsɔ na afɩ cɔdara fɛw nɩ ha kha kɛ afɩ cɔ. 19 Tibil wo tibilikɛ na thɛnɩ jɩɛra, a thɩ̃ɛ daan, ɔɔ thɩmɩɩ gɩ; sor na heen sa'. Sɩ a wɩ tha tibilǝǝkɛ hanɩ kha na fɛrɛ le cɔ bɩnɔ, ɲɔ̃ɔ, sor na heen ser. 20 Sɩ a fɩ be kpɩɛrɛɛkɛ sɩ tini kha a wɩɛl, sor na 'li sɩ ʋlfɛrɛraakɛ fɩ cʋʋ sɩnɩ dɩ sɩ ʋlfa'. 21 Dɩ so war: «Gɩ hana mɔna anɩ kpɩɛr tirǝ hanɩ». Agɩpɩ dɩ sɩ war dɩ wɩ jal. Ɔbɔɔkɛ wɩ jalnɩ pɩ, a gbaar kẽkẽ wi sɩɛra a gbu fɛnɛtɩrɩrara.
22 Gɩgɩlaale jaal dã gɔ̃gʋɔna a wʋɔn le wire yẽther dɩɩ dana bɔɔkɛ wɩrɛ n ƴaalɛ wɩnɩ kɛrnɩ bir. Wɩrɛ n ƴaalɛ wɩnɩ kpaarɛ hʋɛraale fɛw sɩ wa yɩ wa'. 23 Dɩ kona yeɲɔɔle gbune gɔ̃gʋɔnna a iir Jʋrdɛ̃ mɩɩr a jal Nunii bikuun Jojuera a mɩgʋʋ gɩrɛ fɛʋkɛ kɔɔ dana wɩnɩ. 24 Dɩ wɩ sor Jojuera aa: Baalɛ na hala', Thãgba Kɔ̃tɩn gbaar dɩɩle a dʋ sɩ ɲɔ̃kɔɔ. Haar fuure dʋɔdararakɛ asɩ ƴɛra.