Ɩjɩrayɛl bɩsana iire Jʋrdɛ̃ mɩɩr.
3
1 Dɩ gaa dɩwɩlɔ, Jojue na Ɩjɩrayɛl bɩsana fɛw ber Sɩtɩm dɩɩra duuro phiphi a jal dã Jʋrdɛ̃ mɩɩra. Dɩ wɩ jɛr le a bɔɔ dã wɩ seer. 2 Dɩ mɔ̃ ga cɔnɩ balãther, ƴɛkʋʋldara kpaarɛ jɛw, 3 a mɩɩ wɩ ayɩ: Ɔbɔɔkɛ na yɩnɩ Levɩɩ mǝlsɔɔkɛ dɔnɩ bonɩ jidara dɩ wa gba Thãgba Kɔ̃tɩnɩkɛ dɔnɩ anɩ Thãgbaa ʋlfɛ khɛɛsʋ, nɛrɛ fɛw n thɛ ka nɩ hanɩ a na kpa ʋlfɛ khɛɛsʋʋraale. 4 Dɩ mɛ̃ na jɩ hʋ ʋrɛ na jalnanɩ, gɩdonɩ na kɔɔ kana hʋɛɛkɛ babɩɛl kpɩɩrakɛ a yɩa'. Sɩ nɩ dɔ bǝǝn n hale gɩ vaarnɩ kha, gɩ thɔɔ kilomɛtɩrɩ bɩɛl. Na n tɔ wɔrɔ̃a'. 5 Agɩpɩ Jojue sor tɩbɩlala: «Nɩ phʋɔlɛ* anɩbara gɩdonɩ dɩɩkɛ n wɩlanɩ Thãgba Kɔ̃tɩn na cʋʋrɛ nɔ kpaa thɩ̃ɛsɔ anɩ thɩ̃thɩɩn. 6 Gaa dɩwɩlɔ dɩ so bonɩ jidarara: «Nɩ gba ʋlfɛ khɛɛsʋʋ a pɛ ɲɛ̃ gbɛgbɛlala a ka kʋlɛ tɩbɩla ƴɩɛ». Dɩ wɩ gbaar ʋlfɛ khɛɛsʋʋ a pɛ ɲɛ̃ gbɛgbɛlala a kʋʋl tɩbɩla ƴɩɛ dɩ wa n jal.7 Dɩ Thãgba Kɔ̃tɩn so Jojuera: «A fʋna nĩ, ma khǝi fer Ɩjɩrayɛl bɩsana fɛʋʋ ƴɛra gɩ cʋʋ wɩ, wɩ jɩ dɩ ma har kha na fɛrɛ mɔ̃kɛra mɩ kɔɔ hanɩ kha na Mʋɩjɩ. 8 Sɩ fɛrɛ, sɔ bonɩ jidararaakɛ n gbaanɩ ʋlfɛ khɛɛsʋʋ aa ɔbɔɔkɛ wa danɩ Jʋrdɛ̃ mɩɩr a na sa ɲʋɔn, wɩ jɩlɛ. 9 Dɩ Jojue so Ɩjɩrayɛl bɩsanana: Nɩ tɔ dana a pɛ gɩrɛ Thãgba Kɔ̃tɩn anɩ Thãgba n mɩɩnɩ nũu. 10 Sa bir so: «Gɛr na jɩrɔ dɩ Thãgba yidaar har anɩ thɩ̃thɩɩn dɩ a na weere Kanãadara, na Hɛtɩɩ mǝlsɔ na Perejɩdara na Gɩrgasɩdara na Amɔɔr məlsɔ na Jebusɩdara anɩ ƴɛra. 11 Nɩ hɩnɛ Kɔ̃tɩnɩkɛ dɔnɩ thɩɩkɛ fɛʋʋ Thãgbaa ʋlfɛ khɛɛsʋ na iire Jʋrdɛ̃ anɩ ƴɛra. 12 Nɛnɛ̃ nɩ phiire Ɩjɩrayɛl bɩsanaa casɔra kona yʋɔr yeɲɔ, kuun bɩɛl ca bɩɛlla. 13 Ɔbɔɔkɛ bonɩ jidaraakɛ n gbaanɩ Thãgba Kɔ̃tɩnɩkɛ dɔnɩ thɩɩkɛ fɛʋʋ kɔ̃tɩ̃ɩ ʋlfɛ khɛɛsʋʋ na sanɩ Jʋrdɛ̃ ɲʋɔn, ɲʋɔsɔɔkɛ n celanɩ na kurre a na kpa na der pa bɩɛl.
14 Ɔbɔɔkɛ Ɩjɩrayɛl bɩsana thenɩ jɛw wɩ iir Jʋrdɛ̃, bonɩ jidaraakɛ gbaanɩ ʋlfɛ khɛɛsʋʋ gbana wɛr ƴɩɛ. 15 Sɩ ɔɔjɩ kha bɔɔ kɔɔ gɩ. Ga bɔɔle Jʋrdɛ̃ n hiri na gẽgerẽ fɛw. Dɩ ɔbɔɔkɛ bonɩ jidara danɩ a ka nɔɔ wɩ gbũ ɲʋɔnnɔ, 16 ɲʋɔsɔɔkɛ n celanɩ dɩ ga n gbũ jɩɩlɛ a kpa der ho gʋʋ a fʋna Adã dɩɩkɛ khonǝni Saartã dɩɩ. Dɩ ɲɔ gɩrɛ n gbunǝni Araba laɲʋɔnaakɛ wɩ n wenɩ laɲɔ̃ khire, hal jal, sɩ Ɩjɩrayɛl bɩsana seer ka Jeriko dɩɩ pɛnɩ ƴɩɛ. 17 Bonɩ jidaraakɛ n gbaanɩ Thãgba Kɔ̃tɩnɩ ʋlfɛ khɛɛsʋ jɩɩlɛ Jʋrdɛ̃ mɩɩr kor khɩɩra dɩɩ dana bɔɔkɛ Ɩjɩrayɛl bɩsana ɩɩrnɩ thɩ khɩɩra a seer pɩ wɩbɩ.