Bokana yʋɔr yenyɔɔkɛ dɔnɩ jɩjɩna thɩ̃ɛ. \ref Joj 3.10-17; Mɩs 6.5; khɩ 78.2-8
4
1 Ɔbɔɔkɛ Ɩjɩrayɛl bɩsana fɛw seerni Jʋrdɛ̃ mɩɩr a pɩ, Thãgba Kɔ̃tɩn sor Jojuera: 2 Nɩ phire kona yʋɔr yeɲɔ Ɩjɩrayɛl bɩsanaa thɩ̃thɩɩn, tɩɩ bɩɛl ca bɩɛlla, 3 a sɔ war wɩ gba bokana yʋɔr yeɲɔ le Jʋrdɛ̃ mɩɩra paarɩkɛra bonɩ jidara jɩɩlnɩ, nɩ jalna nɩ der jɛw ka na cɔnɩ nĩ dɩtɩnɔɔkɛ.4 Dɩ Jojue wer kona yʋɔr yeɲɔɔkɛ a kɔɔ phiirni Ɩjɩrayɛl ca yʋɔr yeɲɔɔ thɩ̃thɩɩn, tɩɩ bɩɛl ca bɩɛlla, 5 a so war: «Nɩ ka Thãgba Kɔ̃tɩnɩkɛ dɔnɩ anɩ Thãgbaa ʋlfɛ khɛɛsʋʋ ƴɛra, le Jʋrdɛ̃ thɩ̃thɩɩn, a gba nɛrɛ fɛw bokana bɩɛlbɩɛl mɔna nɛr Ɩjɩrayɛl bɩsanaa ca nɔ hanɩ a pɛ ɲɔ̃gbɛgbɛlala; 6 bokanalera n do nar jɩ̃jɩna thɩ̃ɛ gɩrɛraakɛ Thãgba Kɔ̃tɩn cʋʋnɩ. Dɩkhõo a anɩ bɩsãsɔ bule nɩ aa aɲe dɔ gaa kɩr ya? 7 Nɩ so war: «Jʋrdɛ̃ ɲʋɔn kɔɔ kuure Thãgba Kɔ̃tɩnɩ ʋlfɛ khɛɛsʋʋ ƴɛra, ɔbɔɔkɛ ʋlfɛ khɛɛsʋʋ n kɔɔ iirni Jʋrdɛ̃ mɩɩr, ɲʋ̃ɔsɔ kɔɔ kuure yeɲɔ. Bokanaale na cʋɛ Ɩjɩrayɛl bɩsana wa n jɩna nɔkpaa thɩ̃ɛlera bɔɔ khorr. 8 Dɩ Ɩjɩrayɛl bɩsana cʋʋ mɔ̃kɛra Jojue so warnɩ. Wɩ gbaar bokana yʋɔr yeɲɔ Jʋrdɛ̃ mɩɩra mɔna wɛr Ɩjɩrayɛl bɩsana ca nɔ hanɩ, mɔ̃kɛra Thãgba Kɔ̃tɩn kɔɔ sonɩ Jojuera, a jalna kpebi le awɩ jɛ pa kãkɛra wɩ cɔnɩ. 9 Agɩpɩ Jojue pɛrɛ dakha dɩ wɩ kpebi Jʋrdɛ̃ mɩɩra boka kpɩɩ wo yʋɔr yeɲɔ paarɩkɛra bonɩ jidaraakɛ gbaanɩ ʋlfɛ khɛɛsʋʋ kɔɔ jɩɩlnɩ. Dɩ bokanaalera hale a dana nĩ. 10 Dɩ bonɩ jidaraakɛ gbaanɩ ʋlfɛ khɛɛsʋʋ jɩɩlɛ le ƴũu jɩɩlɔ Jʋrdɛ̃ mɩɩr koro dɩɩ dana bɔɔkɛ wɩ cʋʋnɩ thɩ̃ɛ fɛʋʋkɛ Thãgba Kɔ̃tɩn kɔɔ sonɩ Jojuera a sɔ Ɩjɩrayɛl bɩsana mɔ̃kɛra Mʋɩjɩ dakha kɔɔ sʋʋraanɩ. Agɩpɩ tɩbɩla fɛw phananɛ a seer. 11 Ɔbɔɔkɛ tɩbɩla fɛw seernɩ, bonɩ jidara gbaar ƴɩɛ na ʋlfɛ khɛɛsʋʋ. 12 Dɩ Ribɛ̃ɛ mǝlsɔ na Gadɩɩ mǝlsɔ, na Manasee ca kur ther koke ther a kʋʋl Ɩjɩrayɛl bɩsana ƴɩɛ mɔna Mʋɩjɩ kɔɔ so warnɩ. 13 Wɩ thɔɔrɛ sɔrasɛ gbɩlanɩ kpalaɲɔ (40.000) kɛ gbɛbanɩ koke gbɛbɩrʋ a the Thãgba Kɔ̃tɩnɩ ƴɛra, a seer Jʋrdɛ̃ dɩ wa n jalna Jeriko bə̃ fãa khʋʋ.
14 Dawiilera Thãgba Kɔ̃tɩn khǝi Jojue Ɩjɩrayɛl bɩsana fɛw tʋʋra yire, dɩ wa n cʋʋ mɔna wɩ kɔɔ cʋnɩ Mʋɩjɩ ɔɔ yi hanana fɛw.
15 Agɩpɩ Thãgba Kɔ̃tɩn bir so Jojuera: 16 «Sɔ bonɩ jidararaakɛ gbaanɩ khɛɛsʋʋkɛ hananɩ ʋlfɛ thɩmɩa, wɩ thɛ Jʋrdɛna. 17 Dɩ Jojue sor bonɩ jidararaale wɩ thɛ Jʋrdɛna. 18 Dɩ ɔbɔɔkɛ bonɩ jidaraale gbaanɩ Thãgba Kɔ̃tɩnɩ ʋlfɛ khɛɛsʋʋ kanɩ nɔɔ wɩ sa mɩɩr gẽgerẽ nʋɔra, Jʋrdɛ̃ ɲʋɔn bire bɩlã na gẽgerẽsɔ fɛw dɩ ga n cel mɔ̃kɛra gɩ kɔɔ hanɩ.
19 Ɩjɩrayɛl bɩsana seere Jʋrdɛ̃ caca sɩporɩɩ wire yʋɔrɩ wirǝ a jal too Gɩlgal dɩɩra Jeriko pɛlla wi phã paar.
20 Jojue pɛrɛ dɩ wɩ gba bokana yʋɔr yeɲɔɔkɛra wɩ uulni Jʋrdɛ̃ mɩɩra a gbuu le Gɩlgal.» 21 Agɩpɩ dɩ so Ɩjɩrayɛl bɩsanana: «Dɩkhõo ado anɩ mǝlsɔ na bule awɩ thɩsɔ aa; aɲee dɔ bokanaakɛɛ kɩr ya? 22 Nɩ mɩɛnɛ wɩ yɛ Ɩjɩrayɛl bɩsana kɔɔ ɩɩrɛ thɩ khɩɩra a seer Jʋrdɛ̃ mɩɩr; 23 aa Thãgba Kɔ̃tɩn anɩ Thãgba kuure Jʋrdɛ̃ mɩɩr sɩ dɩ nɩ sa thɩ khɩɩ a seer mɔ̃kɛra Thãgba Kɔ̃tɩn kɔɔ kuurni laɲɔ̃ sɩɛ sɩ dɩ sɩ sa thɩ khɩɩ a seer. 24 Thãgba Kɔ̃tɩn cʋʋrɛ thale gɩ do nɔɔ caar fɛw thɩɩraakɛ n jɩ mɔ̃ ɔɔ puno hanɩ, gɩ do nɔɔ dakha nɩ hana ɔr Thãgba Kɔ̃tɩnna cʋʋr bɔɔ fɛw.