5
1 Ɔbɔɔkɛ Amɔɔr məlsɔɔ jamana fɛʋʋkɛ hanɩ Jʋrdɛ̃ iiro wi lõ paar na Kanãadaraa jamana fɛʋʋkɛ hanɩ mɩɩr nʋɔra nɩɛnɩ dɩ Thãgba Kɔ̃tɩn kuure Jʋrdɛ̃ mɩɩr ɲʋɔn sɩ Ɩjɩrayɛl bɩsana seer, haar fuu wer Ɩjɩrayɛl bɩsanana wa hana 'lar a na pɩɛr wa'.Ɩjɩrayɛl bɩsanaa khʋ̃ kur Gɩlgal dɩɩra. \ref Jǝn 17.9-14, 23-27; Kol 2.11-12; Fɩl 4.19
2 Ga bɔɔlera Thãgba Kɔ̃tɩn so Jojuera: Lea bokana gɩ do khalla fɩ kuurnǝ Ɩjɩrayɛl bɩsanaa mǝl wɩrɛ kpaanɛnɩ khʋ̃ʋ. 3 Dɩ Jojue cʋʋrɛ boka khalasɔ a kuurnǝ Ɩjɩrayɛl bɩsana khʋ̃ʋ gɔ̃gʋɔnnɔɔkɛ wɩ n wenɩ Arlɔtɩ: Kɩrʋ dʋɔn khʋ̃ lɔ. 4 Nɩ yɛ gɩrɛ dɔnɩ nɔɔ dɩ Jojue kur wɩ khʋ̃ʋ. Ɩjɩrayɛl bɩsanaakɛ thɛnɩ Ejipiti fɛw, kɛ dɔnɩ konaakɛ dananɩ ko kɩɩr kɔɔ khiire bə̃ kparara. 5 Sɩɩdo wɩrɛ fɛʋʋkɛ kɔɔ thɛnɩ Ejipiti kɔɔ kurre khʋ̃ʋ. Sɩ wɩrɛ wɩ kɔnɩ bə̃ kparara ɔbɔɔkɛ wɩ thenɩ wa n jal, bɩɛllakɛ na kɔɔ kur khʋ̃a'. 6 Ɩjɩrayɛl bɩsana kɔɔ ɩɩrɛ bǝǝnnǝ a cʋʋna yɛna kpalaɲɔ. Yɛna kpalaɲɔɔlee thɩ̃thɩɩn, kona fɛʋʋkɛ dananɩ ko kɩɩr kɛ thɛnɩ Ejipiti kɛ kɔɔ nʋrɛnɩ Thãgba Kɔ̃tɩnna nũu khiire fɛw. Thãgba Kɔ̃tɩn kɔɔ ʋlfɛrɛ dɩ ɩna faa wɩ dɩ wa yɩ dɩɩkɛra ka naƴɩlɛ̃ na thʋʋr n celnɩ na yirǝ', dɩɩkɛ ɩnɩ kɔɔ ʋlfɛnanɩ awɩ thɩsɔ ɩnɩ n ha wa'. 7 Awɩ bisɔ fien a lõ. Wɛr dɔ wɩrɛ Jojue kuurnɩ wɩ khʋ̃ʋ gɩdonɩ wa kɔɔ kur wɩ hʋɛra ga. 8 Ɔbɔɔkɛ wɩ kur wɩnɩ fɛw pɩ, wɩ toore le jɛw gɩ dana bɔɔkɛ ga banɩ.
9 Agɩpɩ Thãgba Kɔ̃tɩn sor Jojuera: «Nĩikɛ mɩ ti narrɛ yucuruukɛ nɩ thenanɩ Ejipiti.» Gɛr dɔ kɩrʋ wɩ dʋnɩ paarɩle ire Gɩlgal a dana nĩikɛ.
Ɩjɩrayɛl bɩsanaa caca Pakɩ Kanãa dɩɩra.
10 Ɩjɩrayɛl bɩsana jɛr Gɩlgal, a cʋʋ Pakɩ fɛtɩ sɩporɩ wire yʋɔr yenãa wirǝ dʋɔrɔ Jeriko bə̃ faana. 11 Ga cʋɔ wi, wɩ khor dɩɩ thɩ̃, kɛ dɔnɩ buruukɛ na hananɩ tabɩɩra' na thɩ̃ beekɛ wɩ cɩɩnɩ. 12 Ga wi wɩ khonɩ dɩɩle thɩ̃, ga dɩwɩlɔ maan kurre. Ɩjɩrayɛl bɩsana na li maan bã. Kanãa dɩ thɩ̃ɛ wɩ kho ga yɛɛle.
Thãgba Kɔ̃tɩnɩ kokenaa kɔ̃tɩ̃ nɩnanɛ ɔɔbara Jojuera. \ref Dǝt 7.16, 24-26; 20.16-18; Joj 2; Sof 1.16
13 Wi bɩɛl Jojue kɔɔ har Jeriko khɔra. Dɩ bɔɔkɛ a gbanɩ a hɩɩn, a yɩrɛ kuun bɩɛl ɔɔ ƴɛra dɩ phe bajɩna . Dɩ gba caanʋʋ a bulee: «Sɛr fɩ hana yaa agɩbo asɩ lãlaardara gɩ?» 14 Dɩ kuunile birse: «Kpei! Thãgba Kɔ̃tɩnɩ kokenaa kɔ̃tɩ̃ ha mɩ. Nɛnɛna mɩ dã. Dɩ Jojue gburõkhu ɔɔ ƴɛra a fʋɔr sa sʋʋraa: «Aɲe fɛr ɩ̃ kɔ̃tɩ̃ n so mɛr afɩ thɔ̃daara?» 15 Dɩ Thãgba Kɔ̃tɩnɩ kokenaa kɔ̃tɩ̃ɩle sʋʋraa: «Fʋrɛ nɛfaa nɛɛra gɩdonɩ paarɩkɛ fɩ jɩɩlnɩ pa phuu gɩ. Dɩ Jojue cʋʋ oti.