Ɩjɩrayɛl bɩsana kʋɔrɛ Jeriko dɩɩ
6
1 Jeriko dɩ lõfonʋɔsɔ kɔɔ lerre kpɩkpɩkpɩ dɩɩ do Ɩjɩrayɛl bɩsanaada dɔ nɔɔ. Tibil na n tha', tibil na n lõa'. 2 Dɩ Thãgba Kɔ̃tɩn so Jojue: Hɩnɛ, mɩ gbaar Jeriko na ɔɔ jamana na ɔɔ koke kpɛsɔ ma n dʋ fɩ ɲɔ̃kɔɔ. 3 Nɛrɛ fɛʋʋkɛ dɔnɩ kokena, nɩ fe diǝ Jeriko dɩɩra, wi bɩɛl babɩɛl. Nɩ cʋɛ thalera a danana wire maadõ. 4 Bonɩ jidara makoɲɔ n fɔrɔ banake ʋma bɩɛlbɩɛl a kʋlɛna ʋlfɛ khɛɛsʋʋ ƴɩɛ. Wire makoɲɔ wirerǝ, nɩ fe a diə dɩɩrara ɲɛ̃be makoɲɔ, bonɩ jidara na n ʋna ʋmaale nɩ finǝ. 5 Ɔbɔɔkɛ wa ʋnɩ banake ʋma ƴɛɛr dɩ na nɩɛ, tɩbɩla fɛw n bɛ koke hulẽbi khɩɩ, dɩ bɛr gʋʋ na derre, sɩ nɩ lõ dɩɩra ntɛ dẽdẽ ɔɔ ƴɛbʋrɔ.6 Dɩ Nuni bikuun Jojue we bonɩ jidara a so war: «Nɩ gba Thãgba Kɔ̃tɩnɩ ʋlfɛ khɛɛsʋʋ a pɛ ɲɛ̃gbɛgbɛlala, bonɩ jidara makoɲɔ n gba banake ʋmasɔ wɩ kʋʋlʋʋ ƴɩɛ». 7 Agɩpɩ dɩ so tɩbɩlala: «Nɩ jalla fe diǝ dɩɩra. Sʋrasɩ wɩrɛ n kʋlɛnɩ ƴɩɛ n gba Thãgba Kɔ̃tɩnɩ ʋlfɛ khɛɛsʋ ƴɩɛ». 8 Dɩ thɩ̃ɛ fɛw cʋʋrɛ mɔna Jojue so warnɩ. Bonɩ jidara makoɲɔɔle fɔrɔnɩ banake ʋmasɔ, gbaar ƴɛkʋʋlɛ dɩ wa n ʋ̃ banake ʋmasɔ dɩ Thãgba Kɔ̃tɩnɩ ʋlfɛ khɛɛsʋʋ na n kpaan. 9 Dɩ sɔrasɩ wɩrɛ n kʋlɛnɩ ƴɩɛ, kʋʋlɛ bonɩ jidaraakɛ n ʋnanɩ banake ʋma ƴɩɛ, dɩ sɔrasɩ wɩrɛ n hanɩ khiro na n kpa Thãgbaa ʋlfɛ khɛɛsʋra, dɩ wɩ ʋ̃ banake ʋma dɩ wa n jalna. 10 Sɩ Jojue kɔɔ so tɩbɩlalaale wa n be hulẽbǝ', wa n dorakɛ wɩ nɩ awɩ wǝ', wɩ pɩra kɩrkɩrkɩr gɩ dana wireekɛ ɩna so warnɩ wɩ bɛ hulẽbe, liir mɛ̃ dɩphã wa be. 11 Dɩ wɩ fire a dii dɩɩra babɩɛl na Thãgba Kɔ̃tɩnɩ ʋlfɛ khɛɛsʋ agɩpɩ Ɩjɩrayɛl bɩsana kɛr bir awɩ jɛw a cɔ.
12 Ga dɩwɩllɔ Jojue mãa ɩɩrɛ duuro phiphi dɩ bonɩ jidara gba Thãgba Kɔ̃tɩnɩ ʋlfɛ khɛɛsʋʋ. 13 Dɩ bonɩ jidara makoɲɔɔkɛ fɔrɔnɩ banake ʋma makoɲɔ a kʋʋlna Thãgba Kɔ̃tɩnɩ ʋlfɛ khɛɛsʋ ƴɩɛ, gbaar dɩ wa n jal, dɩ wa n ʋ̃ tutuusɔ. Sʋrasɩ wɩrɛ n kʋlɛnɩ ƴɩɛ gbaan bonɩ jidaraale ƴɛ kʋʋlɛ dɩ sɔrasɩ wɩrɛ n hanɩ khiro na n kpa Thãgba Kɔ̃tɩnɩ ʋlfɛ khɛɛsʋʋra, dɩ wa n jal na tutuu ʋ̃ʋ. 14 Balaɲɔ wirera, wɩ fire dii dɩɩra wo babɩɛl agɩpɩ dɩ wɩ bir awɩ jɛw. Dɩ thalera wɩ cʋʋ a cʋʋna wire maadõ. 15 Wire makoɲɔ wirera wɩ mãa ɩɩrɛ jijiirǝ a fi dii dɩɩra ɔmɛna ɲẽbe makoɲɔ. Ɔɔ wiile dɩbara wi fi dii dɩɩra ɲẽbe makoɲɔ. 16 Dɩ ɲẽbe makoɲɔdaaraale, ɔbɔɔkɛ bonɩ jidaraale hanɩ banake ʋma ʋnɔ, Jojue sor tɩbɩlala: «Nɩ bɛ koke hulẽbe gɩdonɩ Thãgba Kɔ̃tɩn gbaar dɩɩra a hanɩ. 17 Sa kʋɛrɛ dɩɩra na gɩrɛ fɛʋkɛ harɔnɩ, a na ha Thãgba Kɔ̃tɩn bonɩ thiinə khaa. Rahabɩɩkɛ dɔnɩ thetoo na wɩrɛ fɛʋʋkɛ hanɩ ɔɔ cɔ dɩbara sa faa na yire, gɩdonɩ a kɔɔ kerre wɩrɛ sɩ kɔɔ thɔnɩ. 18 Sɩ nɩ dɔ bʋrɛ na n gba thɩ̃ bɩɛllakɛ gɩ do anɩda ga, a mɛ̃ ga, sɩ dɩ nɩ gba ga thɩ̃ɩle, na pɛr Ɩjɩrayɛlla sor, gɩ bũburõo. 19 Dɛ bulo fɛw na dɛ, na thɩ̃ɛsɔɔkɛ wɩ cʋʋnanɩ ther sɩɛ na ther, Thãgba Kɔ̃tɩnɩda gɩ, nɩ gba gɩ lõ Thãgba Kɔ̃tɩnɩ cɔ thɩ̃ ɓɔ̃sɔɔra.
20 Dɩ bonɩ jidara ʋnɛ banake ʋma. Ɔbɔɔkɛ Ɩjɩrayɛl bɩsana nɩɛnɩ banake ʋ̃ nʋɔ, wɩ ber koke hulẽbi khɩɩr, dɩ dɩ bɛr gʋʋ der, sɩ dɩ wɩ lõ dɩɩra ntɛ dẽdẽ ɔɔ ƴɛbʋrɔ, a kʋɛ dɩɩ. 21 Wɩ kʋʋrɛ thɩ̃ɛ fɛʋʋkɛ hanɩle dɩɩra: Kona na khɛra, na bɩsana na tɩɩ kpɛɛna, na na, na banaa na kũkǝnǝ a ha Thãgba Kɔ̃tɩn bonɩ thiinə khaa.
Jojue sɩrɛ Rahabɩ na ɔɔ toora na yire.
22 Sɩ Jojue kɔɔ sor kona yeɲɔraale kɔɔ jallanɩ gɩɩl dɩɩ, aa wɩ jalla Rahabɩɩ cɔ a tie na ɔɔ cɔdara fɛw a thɛna mɔna wɩ kɔɔ ʋlfɛnaanɩ. 23 Dɩ wɩ jaal a ti Rahabɩ na ɔɔ thɩ, na ɔɔ nɩ, na ɔɔ õkũusɔ, na ɔɔ too fɛw, na gɩrɛ fɛʋʋkɛ a hananɩ, a jalna wɩ, a kɛɛ war Ɩjɩrayɛl bɩsanaa jɛw khuirǝ. 24 Agɩpɩ wɩ thiire dɩɩ na thɩ̃ɛ fɛʋʋkɛ harɔnɩ. Dɛ bulo na dɛ dɩbara wɩ sɩ na thɩ̃ɛsɔɔkɛ wɩ cʋʋnanɩ ther sɩɛ, na ther a gba pɛ Thãgba Kɔ̃tɩnɩ cɔ thɩ̃bi ɓɔ̃sɔɔra. 25 Jojue sɩrɛ Rahabɩra na ɔɔ cɔdarara na yire, na ɔɔ thɩna fɛw. Dɩ a toore Ɩjɩrayɛl bɩsanaa thɩ̃thɩɩn, dɩ ɔɔ məlsɔ hale a dana nĩ, gɩdonɩ a kɔɔ kerre wɩrɛɛkɛ Jojue thɔnɩ dɩ wɩ gɩɩl Jeriko dɩɩ. 26 Ga bɔɔlera Jojue ʋlfɛ ayɩ: Tibil wo tibilikɛ na ɩrɛnɩ ɩnɩ n bir ɩnɩ n mɩ Jeriko dɩɩ, sʋɔn n lie Thãgba Kɔ̃tɩnɩ ƴɛra. Ɔɔ caca bikuun a na kpɛɛna go kʋʋr, sɩ a pɛrna ɔɔ bikuun bu, lõosɔa.
27 Thãgba Kɔ̃tɩn kɔɔ har kha na Jojue dɩ ɔɔ i gbaar dɩɩ fɛw.