Akãa nũ nʋʋr na ɔɔ so 'lɛ \ref Joj 22.20; 1 Kur 21.1,7; 2 Sam 21.1
7
1 Ɩjɩrayɛl bɩsana cʋʋrɛ dɩpa kɔ̃tɩ̃ɩ thɩ̃ɛnaakɛ Thãgba pɩɛr wɩnɩ wa n gba ga. Kuun bɩɛl gɩ da n do Akã, a the Judaa cara, ɔɔ thɩ n dʋɔn Karamɩ dɩ ɔɔ thɩ kɔ̃tɩ̃ na n do Jabɩdɩ, dɩ ɔɔ thɩ kɔ̃tɩ̃ɩ thɩ na n do Jera. Akã gbaa thɩ̃ɛɛkɛ Thãgba pɩɛr wɩnɩ wa n gba ga. Dɩ gɩ cʋʋrɛ, dɩ nĩkhii fʋ Thãgba Kɔ̃tɩn Ɩjɩrayɛl bɩsanana.2 Le Jeriko, Jojue tire kona Ayɩ dɩɩra, kɛ khonǝni Bɛtɩ-Avã dɩɩ, kɛ hanɩ Betɛl wi phã paar, wɩ jalla gɩɩlɛ dɩɩ. Dɩ konaale gbaar jal gɩɩl dɩɩra. 3 Ɔbɔɔkɛ wɩ kɛrnɩ bir Jojuera wɩ sʋʋraarɛ: «Ayɩdara na jɔra', gɛr gɩ tɩbɩla fɛw na n vɔɔ jalla'; fa n pɛ tɩbɩlala vɔɔrɛ khaara'. A tɩbɩla gbɩlanɩ yeɲɔ (2000) agɩbo gbɩlanɩ yẽthersɔ (3.000) jal, wa puno wer. 4 Sɩ Jojue thʋ̃ɔ tɩbɩla gbɩlanɩ yẽthersɔ (3000) Ayɩ dɩɩra dɩ Ayɩdara weele wɩ. 5 Dɩ Ayɩdara kʋʋrɛ tɩbɩla kpelẽ yʋɔr maadõ awɩ thɩ̃thɩɩn, sa wee wɩ dɩ lõfonʋɔra a jalna dana Sebarɩm bəənnə, a kʋʋr wɩ paarɩkɛ dɔnɩ gbũ paar. Dɩ haar fuu Ɩjɩrayɛl bɩsana dɩ ɲɛ̃ɛ khiir wɩ koo. \ref Thɩ 5.22-23; 1 Sam 14.38-43; Jak 5.3-4; Eb 12.15; Th t t 5.1-11
6 Dɩ Jojue na Ɩjɩrayɛl bɩsanaa kɔ̃tɩ̃sɔ ɓǝǝre awɩ kẽkẽsɔ, a pɛna thɩn yʋɔ [gɩ nɩna mɔ̃ wɩ hanɩ ha kʋɛrɛra], sa gburõkhu Thãgba Kɔ̃tɩnɩ ʋlfɛ khɛɛsʋʋ ƴɛra a dana dʋɔrɔ. 7 Dɩ Jojue so: «Hu! Kɔ̃tɩn, Thãgba Kɔ̃tɩn yaa, aɲe dɔ nɔɔ dɩ fɩ cʋʋ tɩbɩlaakɛ dɩ wɩ seer Jʋrdɛ̃ mɩɩr? Fɩ ƴaalɛ fɩ faa sɩ Amɔɔr məlsɔ n kʋʋr sɩ ya? Ado Jʋrdɛ̃ iiro sɩ kɔɔ too ga baaraa? 8 Kɔ̃tɩn, ma jɩ mɔ̃ dɔnɩ nɔɔ dɩ Ɩjɩrayɛl bɩsana fuu awɩ lãlaaraa ƴɛra ga? 9 Kanãadara na wɩrɛ fɛʋʋkɛ hanɩ dɩɩra na nɩɛrɛ, a na kpa na dii sar a na bũburõ sɩ, a na hɛl asɩ i dɩɩra. Sɩ mɔ̃ fa nɩna afɩ wabɩɩkɛra?
10 Dɩ Thãgba Kɔ̃tɩn so Jojuera: «Ɩrɛ, aɲe dɔ nɔɔ dɩ fɩ gburõkhu thɩɩra thakɛ? 11 Ɩjɩrayɛl bɩsana cʋʋrɛ sopuu. Wɩ kʋɛrɛ nɔ bɩɛl ʋlfɛrɛɛkɛ mɩ kɔɔ ʋlfɛ na wɩnɩ. Wɩ gbaar thɩ̃ɛ, sãasɩ thɩ̃ɛnaakɛ mɩ pɩɛr wɩnɩ wa n gba ga. Wɩ yu ger a ker awɩ thɩ̃bi ballɔ. 12 Ɩjɩrayɛl bɩsana na puno na jɩɩl na pɩɛr awɩ lãlaardara ga. Wa fuure awɩ lãlaardaraa ƴɛra gɩdonɩ wɛr thɛthɛrakɛ teenanɛ bũburone. Ma bir na ha kha na nɛrɛ ado na ti anɩ thɩ̃thɩɩn thɩ̃ɛɛkɛ mɩ yɩnɩ na n gba gaa ga. 13 Ɩrɛ phʋɔlɛ tɩbɩla. Sɔ war yɛ wɩ phʋɔlɛ awɩbara cʋɔdaa aa mɛr Thãgba Kɔ̃tɩnɩkɛ dɔnɩ Ɩjɩrayɛlɩ Thãgbaa sãasɩr thɩ̃ɛ hale nɛr Ɩjɩrayɛl bɩsanaa thɩ̃thɩɩn. Na puno na pɩɛr anɩ lãlaardaar ado na hɛl thɩ̃ɛɛle anɩ thɩ̃thɩɩnaa ga. 14 Cʋɔ duuro caarsɔ n tɔ dana mɩ bɩɛlbɩɛl. Ca dɔɔkɛ mɛr Thãgba Kɔ̃tɩn na fʋnɩ n tɔ dana thɩ kʋɔn thɩ kʋɔn. Thɩ kɔ̃ dɔɔkɛ ma fʋnɩ n tɔ dana cɔkana cɔkana. Cɔ ka dɔɔkɛ ma fʋnɩɩ tibilsɔ n tɔ dana yʋʋ yʋʋ. 15 Tibilikɛ ma fʋnɩ kɛ hananɩ sãasɩ thɩ̃ɛɛle, dɔɔra wa pɩɛ ɔr na ɔɔ thɩ̃sɔ fɛw. A cʋʋrɛ dɩɩ mɛr Thãgba Kɔ̃tɩnɩ ʋlfɛra, a cʋʋ thɩ̃ɛɛkɛ kpalanɩ ka Ɩjɩrayɛl dɩɩra.
16 Dɩ Jojue mãa ɩɩrɛ duuro phiphi a cʋʋ Ɩjɩrayɛl caarsɔ dɩ wɩ tɔ dã bɩɛlbɩɛl, dɩɩ do Judaa ca a fʋ. 17 Dɩ cʋʋ Judaa cara, thɩ kɔnasɔ dɩ wɩ tɔ dã thɩ kʋɔn thɩ kʋɔn, dɩ fʋ Jeraa thɩ kɔ̃. Dɩ wɩ cʋʋ Jeraa thɩ kɔna, cɔdaar kona tɔ dã bɩɛlbɩɛl, dɩ fʋ Jabɩdɩ. 18 Dɩ wɩ cʋʋ Jabɩdɩɩ cɔdara dɩ wɩ tɔ dã bɩɛlbɩɛl dɩ fʋ Akãakɛ dɔnɩ Kaarmɩɩ bikuun. Akãa thɩ n dʋɔn Kaarmɩ, dɩ ɔɔ thɩ kɔ̃tɩ̃ na n do Jabɩdɩ, dɩ ɔɔ thɩ kɔ̃tɩ̃ɩ thɩ na n do Jeraa. 19 Dɩ Jojue so Akana: «Ɩ̃ kuun, dʋba Thãgba Kɔ̃tɩnɩkɛ dɔnɩ Ɩjɩrayɛl Thãgba, a cʋɔnɛɛ. Sɔ mar gɩrɛ fɩ cʋʋnɩ fa n ker mar thɩ̃a'.» 20 Dɩ Akã birse Jojue: «Sobɔr gɩ, mɛr cʋɛ sopuu Thãgba Kɔ̃tɩnnakɛ dɔnɩ Ɩjɩrayɛlɩ Thãgba. Yɛkɛ gɩrɛ mɩ cʋʋnɩ: 21 Mɩ yɩrɛ le asɩ lãlaardaraa thɩna Sɩnear dɩ gbɔɔlɔ̃ aa bɔr kpãkpalã ga, na sikile mũsũ be taaɲɔ, na dɛ kur gbãakɛ ɔɔ dʋbɩ danɩ kilə kuru. Dɩ gɩ kho marɛ dɩ̃ gba. Gɩ hale ɩ̃ kẽkẽ waw dɩ̃ puu; dɛ bulo ha tɩɛr. 22 Dɩ Jojue thʋɔn tɩbɩla dɩ wɩ ca jal ɔɔ kẽkẽ waw, dɩɩ hale ger dɩ puu, dɩ dɛ bulo ha tɩɛr. 23 Dɩ wɩ khɩɛl fɛw le ɔɔ kẽkẽ waw a jalna Jojue na Ɩjɩrayɛl bɩsanana, a der Thãgba Kɔ̃tɩnɩ ƴɛra. 24 Dɩ Jojue na Ɩjɩrayɛl bɩsana kpa Akã Jeraa bikuun a gbana dɛ buloole na gbɔɔlɔ̃ na dɛɛle, a kpana ɔɔ bikũusɔ, na ɔɔ bikhɛrsɔ na ɔɔ nasɔ, na ɔɔ kũkǝ̃sɔ na ɔɔ nʋ̃ yɩra na ɔɔ kẽkẽ wa, na ɔɔ thɩ̃sɔ fɛw a gbunǝ Akɔɔr ɓɛlɛnɔ.
25 Dɩ Jojue so Akana: Mɔna fɩ pɛ sarnɩ thɩlkɩɩr, Thãgba Kɔ̃tɩn n pɛ farɛ nĩ thɩlkɩɩr». Dɩ Ɩjɩrayɛl bɩsana fɛw dʋʋrʋʋ na bokana a kʋ. A kʋʋr ɔmɛna ɔɔ toosɔ a thiinǝ ɔɔ thɩ̃sɔ fɛw. 26 Agɩpɩ wɩ khɩɩrɛ bokana tǝ̃tǝ̃tǝ̃ a bã Akãa khirə. Bokanana hale a dana nĩ. A gele karɔ Thãgba Kɔ̃tɩnɩ nĩkhi ier. Gɛr dɔ nɔɔ dɩ wɩ dʋ paarɩlera ire Akɔɔr ɓɛlɛ̃a a dana nĩ.