Ɩjɩrayɛl bɩsana wɩɛlɛ Ayɩ dɩɩ \ref Joj 7; Sog 20.27-48; Dǝt 20.16-18
8
1 Thãgba Kɔ̃tɩn sor Jojuera: «Hanana 'lar, fa n do maar n fʋ fa'. Kpa afɩ sɔrasɩsɔ fɛw, a jʋnɛ kɛna Ayɩdara. Hɩnɛ, mɩ gbaar Ayɩ jamana, na ɔɔ too, na ɔɔ dɩ kɔ̃tɩ̃, na ɔɔ jamana dɩ fɛw a dʋ fɩ ɲɔ̃kɔɔ. 2 Cʋɛ dɩɩle na ɔɔ jamana mɔ̃kɛ fɩ kɔɔ cʋʋnɩ Jeriko na ɔɔ jamana. Sɩ gɩrɛ fɛʋʋkɛ na taanɩ kʋʋraale thɩ̃be na nʋma, nɩ gba gɩ do anɩda. Pɩɛn sɔrasɩ ɩkha wɩ nɔ dɩ khuirə.3 Dɩ Jojue gbɛbɩrɛ ɔr na ɔɔ sɔrasɩsɔ fɛw wɩ jal wɩ kena Ayɩdara. A phiire sɔrasɩ khena gbɩlanɩ kpelẽ yʋɔr (30.000) a thɔ̃ wɩ dɩtɩnɔ 4 ayɩ: «Nɩ jalla dɩ khuirǝ a nɔ. Na n hʋnɔ na dɩɩ jɔa'. Nɩ gbɛbɩrɛ a pɩɛrɛ. 5 Sɩ mɛrɛ na wɩrɛ fɛʋʋkɛ hana mɩnɩ kha sɩ tɔ sɩ thɔɔ le dɩɩra, dabɔɔle wa thenɩ wa n cãa sɩ, mɔna wɩ kɔɔ cʋʋnɩ cacara sa kɛrɛ sa n caalɛ. 6 Dɩ wa ther, wɩ kpɩɛr, sɩ n caalɛlɛ mɔna ɩnɩ kɔɔ ti sɩnɩ cacara. Wɩ wee sɩ wa n kpaan, sɩ jalna wɩ wɩ hʋnɔ na dɩɩ. 7 Gabɔɔle nɩ thɩrɛ anɩ nɔ pa pʋpʋr a lona gba dɩɩ. Thãgba Kɔ̃tɩn anɩ Thãgba na gbaar dɩɩra na dʋnɩ ɲɔ̃kɔɔ. 8 Ɔbɔɔkɛ na gbanɩ dɩɩra nɩ tɔrɔ dɔɔ. Nɩ cʋɛ gɩ mɔna Thãgba Kɔ̃tɩn sonɩ. Thale mɩ hanɩ hʋɛ.»
9 Dɩ Jojue cʋʋrɛ sɔrasɛɛle dɩ wɩ jal a nɔ Ayɩ wi lõ paar, Ayɩ na Betɛlɩ thɩ̃thɩɩn, sɩ dɩ cɔ na sɔrasɩ wɩrɛ sɛnɩ.
10 Ga dɩwɩllɔ, Jojue mãa ɩɩrɛ duuro a kpa ɔɔ sɔrasɩ wɩrɛ sɛnɩ a gbɛbɩ agɩpɩ ɔr na Ɩjɩrayɛl bɩsanaa kɔ̃tɩ̃sɔ gbananɛ sɔrasɛɛle ƴɩɛ dɩ wɩ jal wɩ kena Ayɩdara. 11 Dɩ wɩ jaal kha na sɔrasɛ fɛw a dã dɩ ƴɛbʋrɔ, a too Ayɩ wi phã paar ɲɔ̃bɔɔra. Ɓɛlɛ̃ kɔɔ vaarɛ wɩ kha na dɩɩ. 12 Dɩ Jojue phiire kona gbɩlanɩ yemɔɩsɔ (5000) a cʋʋ wɩ dɩ wɩ nɔ Ayɩ wi lõ paar, Betɛl na Ayɩɩ thɩ̃thɩɩn. 13 Ɩjɩrayɛl bɩsana sɔrasɩ gbulõ kɔ̃tɩ̃ jɛr Ayɩ wi phã paar ɲɔ̃bɔɔra, dɩ sɔrasɩ wɩrɛ n hanɩ khiro nɔ Ayɩ wi lõ paar. Ga dɩtɩnɔɔle Jojue gbaar gbũ ɓɛlɛnɔ.
14 Ɔbɔɔkɛ Ayɩ jamana yɩnɩ thɩ̃ɛna, a ɩɩrɛ na ɔɔ too fɛw na phananɛ a the dɩɩra a jal wɩ kena Ɩjɩrayɛl bɩsana pa bɩɛllaalera wɩ kɔɔ kenɩ Jʋrdɛ̃ mɩɩr bilo. Aa kɔɔ jɩ dɩ sɔrasɛ hale dɩ khuirǝ a nɔa'. 15 Dɩ Jojue na Ɩjɩrayɛl bɩsana fɛw jɩrɛ sa gba hʋɛɛkɛ n jalanɩ bǝ̃ kparara a gõ dɩ wa n caalɛ. 16 Dɩ wɩ phaan dɩdara fɛw a pɛr wɩ wea wɩ kpaan. Dɩ wɩ wee wer a jalna hʋnɔna dɩɩ. 17 Kuun bɩɛlakɛ na hale a sɩ Ayɩ dɩɩra dɩ Betɛl dɩɩra ga. Wɩ thɩɩrɛ fɛw a kpa Ɩjɩrayɛl bɩsana sɩkaar, sa khɛr dɩɩ faa.
18 Dɩ le Thãgba Kɔ̃tɩn so Jojuera: 'Laanɛ kpɩlaakɛ fɩ hananɩ ɲɔ̃kɔɔ a ga Ayɩ dɩɩra, mɩ gbaar dɩɩra dɩ ma n dʋ nɩ ɲɔ̃kɔɔ». Dɩ cʋʋ ɔmɛna. 19 Ɔbɔɔkɛ Jojue 'laanɩ ɲɔ̃ɔ a ga kpɩla Ayɩ dɩɩra, sɔrasɩ wɩrɛ nɔnɩ, thɩɩrɛ na phananɛ a lõ dɩɩra a toro dɔɔ. 20 Dɩ Ayɩdara kɩɩlɛ wɩ hɩɩn, a yɩ isiir awɩ dʋɔ dɩ ga n jʋʋn thãgbara ƴũu. Ca paar na hala'. Bilǝ fɛw kpalalɛ. Ɩjɩrayɛl bɩsã wɩrɛ caalɛnɛnɩ dɩ wa n jal bə̃ kparara kɛrɛ a tɛna wɩrɛ wea wɩnɩ wa n kpaan. 21 Mɔ̃ Jojue na ɔɔ too yɩɛnɩ dɩɩ do ɔɔ tookɛ nɔnɩ gbaar dɩɩ a thii, wɩ bire a tɛna Ayɩdara a kʋʋr wɩ. 22 Wɩrɛ lonanɩ dɩɩra thɩɩrɛ a cãa wɩ dɩ wɩ kpala war a kʋʋr wɩ fɛw bɩɛllakɛ na yɩ fuu paara'. 23 Sɩ Ayɩ jamana wer, yire wɩ fʋnaa a jalna Jojuera. 24 Ɔbɔɔkɛ Ɩjɩrayɛl bɩsana kʋʋrnɩ Ayɩdaraakɛ wea wɩnɩ kpaan le bǝǝnnǝ khuirǝ na bajɩna a pɩ fɛw wa sɩ bɩɛllaka', wɩ kɛrɛ bir le dɩɩra a kʋʋr wɩrɛ sɛnɩ a ti 'lɛfɛrɛ. 25 Wɩrɛ fɛʋʋkɛ kheni ga wiile kona na khɛra har tɩbɩla gbɩlanɩ yʋɔr yeɲɔ (12.000); Ayɩdara wɛ fɛw. 26 Jojue jɩɩlnanɛ kpɩlala a 'laanɩ Ayɩ dɩɩra dɩɩ dana bɔɔkɛ wɩ kʋʋrnɩ Ayɩdara cacaca. 27 Ɩjɩrayɛl bɩsana gbaar gɩrɛ fɛʋʋkɛ wɩ taanɩ kʋʋraale; nʋma na dɩɩ thɩ̃ fɛw, dɩɩ do awɩda mɔna Thãgba Kɔ̃tɩn kɔɔ sonɩ Jojuera. 28 Jojue thiire Ayɩ dɩɩ, a cʋgʋʋ dɩ do dɩ kpoloo, a hale mɛna nĩ 'lo. 29 Sɩ Ayɩ jamana wer, wɩ fʋʋrɛ a ju thɩrʋra dɩ dã dʋɔrɔ. Wi lõ bɔɔ, Jojue 'laarɛ hʋɛ wɩ te ɔɔ khi thɩrʋra. Dɩ wɩ tire khire a dʋna dɩ lõfonʋɔra, a banɔ bokana tǝ̃tǝ̃tǝ̃ dɩɩ hale nĩ gɩrɛ 'lo.
Jojue sor Thãgbaa jɔfʋ sɛbɛ Ebal gɔ̃gʋɔnna a ha Ɩjɩrayɛl bɩsana. \ref Dǝt 27-28
30 A gele karɔ, Jojue mɩrɛ bonɩ ji paar Thãgba Kɔ̃tɩnaakɛ dɔnɩ Ɩjɩrayɛlɩ Thãgba, Ebal gɔ̃gʋɔnnɔ. 31 A mɩɩrɛ dɩ ha mɔna Thãgba Kɔ̃tɩnɩ jɔfʋʋkɛ a hanɩ ɔɔ thɔ̃daar Mʋɩjɩ dɩ ha Ɩjɩrayɛl bɩsana hanɩ, mɔna gɩ khereni Mʋɩjɩɩ jɔfʋ sɛbɛra. Bonɩ jipaar gɩɩkɛ a mɩnanɩ bokanaakɛ wa thelnanɩ therra'. Dɩ wɩ jirore Thãgba Kɔ̃tɩnna bonɩ thiinǝsɔ na 'likha bonɩɛsɔ. 32 Dɩ Jojue kherene bokanana, Ɩjɩrayɛl bɩsanaa ƴɛra, Mʋɩjɩɩ jɔfʋʋkɛ a kɔɔ kherenɩ. 33 Dɩ Ɩjɩrayɛl bɩsana fɛw kɩrʋ dʋɔn: kpakpalaakɛ hanɩ awɩ thɩ̃thɩɩn na wɩrɛ dɔnɩ Ɩjɩrayɛl bɩsã bire, awɩ kɔ̃tɩ̃sɔ, na awɩ ƴɛkʋʋldasɔ, na awɩ sogʋʋrdara kɔɔ tɩnɛnɛ gbulonə yeɲɔ a pɛ kha ƴɩɛ sɩ ʋlfɛ khɛɛsʋʋ ha awɩ thɩ̃thɩɩn. Dɩ gbulonə yeɲɔɔle jɩɩlɛ a pɛ ƴɩɛ Levɩɩ məlsɔraakɛ dɔnɩ bonɩ jidaraakɛ kɔɔ gbaanɩ ʋlfɛ khəəsʋʋ. Dɩ gbulõ bɩɛl jɩɩlɛ a pɛ Garɩjɩm gɔ̃gʋɔnna khiru, dɩ gbulõ ole jɩɩl a pɛ Ebal gɔ̃gʋɔnna khiru. Thale Thãgba Kɔ̃tɩnɩ thɔ̃daar Mʋɩjɩ kɔɔ so aa wɩ bɩɛlnɛ Thãgba a bɔna Ɩjɩrayɛl bɩsana ɓo. 34 Agɩpɩ Jojue sor jɔfʋ fɛw na nɔ kheu a ha Ɩjɩrayɛl bɩsana; gɩrɛ dɔnɩ bɔnanɛ na sʋɔn mɔna gɩ kherenɩ fɛw le jɔfʋ sɛbɛra. 35 Thɩmɩɩ bɩɛllakɛ na hale gɩrɛraakɛ Mʋɩjɩ kɔɔ kherenɩ dɩ Jojue ɓɔr faga'. A so ger Ɩjɩrayɛl bɩsana fɛw ƴɛra, a gbana khɛra, na bɩsana, na kpakpalaakɛ hanɩ awɩ thɩ̃thɩɩn.