Gabãɔdara fɩɩlɛ Jojue dɩ ʋlfɛna wɩ \ref Joj 11.16-20; Jǝn 27; Ther 27.18,21; 30.3; 2 Sam 21.1-14
9
1 Jamanasɔɔkɛ hanɩ Jʋrdɛ̃ iiro, wi lõ paar, gɔ̃gɔ̃ bəənnə, na wɩrɛ hanɩ sefelala, na wɩrɛ hanɩ Mediterane laɲɔ̃ nʋɔra, kɛ hanɩ Lɩbã bilo, kɛ dɔnɩ Hɛtɩɩ mǝlsɔ, na Amɔɔr məlsɔ, na Kanãadara na Perejɩdara na Hɩvɩtɩsɔ, na Jebusɩdara nɩɛrɛ kǝǝreesɔɔkɛ Ɩjɩrayɛl bɩsana 'lɛnɩ dɩ wɩ 2 kpa gbɛbɩ sɩ wɩ kena Jojue na Ɩjɩrayɛl bɩsana.3 Sɩ mɔ̃ɔkɛ gabãɔdaraakɛ dɔnɩ Hɩvɩtɩsɔ nɩɛrɛ dakha gɩrɛ Jojue cʋʋnɩ Jeriko na Ayɩ dɩɩ, 4 we wer ɩɩrɛ na fɩɩlɛ. Wɩ gbaar dɩkɔ, na loka sɛlɛɛsɔ na dɩvɛ̃ ɲɔ pɛ loka sɛlɛsɔɔraakɛ wɩ tɛbɩrɩnɩ a li kũkǝnǝnǝ, 5 a tona nɛfaa sɛlɛsɔɔkɛ wɩ tɛbɩrɩnɩ, a tona kẽkena sɛlɛ sɛlɛ a gbana buru khɩ cʋɔrʋsɔ. 6 Wɩ jaal dã Gɩlgal jɛw a so Jojue na Ɩjɩrayɛl bɩsanana: «Ƴɔɔ fĩi sɩ the ɩ̃. Nɛnɛ̃ nɩ ʋlfɛnɛna sɩ nɔ bɩɛl ʋlfɛrɛ.» 7 Sɩ Ɩjɩrayɛl bɩsana birse Gabãɔdaraale: «Agakpaana', kɩɛr nɩ harakɛ dɔdɔ gɩrɛ, dɩ mɔ̃ sa fʋ sɩ na ʋlfɛna nɩ nɔ bɩɛl ʋlfɛrɛ?» 8 Dɩ wɩ so Jojuera: «Sa dor afɩ thɔ̃dara». Dɩ Jojue bule wɩ: «Ana hanɩ, dɩ ka nɩ the?» 9 Dɩ wɩ birsee: «Sɛr afɩ thɔ̃dara, sɩ ther ƴɔɔ ka dɩ sa n ɩ̃, gɩdonɩ sɩ nɩɛrɛ Thãgba Kɔ̃tɩn afɩ Thãgbaada dɩ wɩ mɩɩna. Sɩ nɩrɛ gɩrɛ fɛʋʋkɛ a cʋʋnɩ Ejipiti, 10 na gɩrɛ fɛʋʋkɛ a cʋʋnɩ Amɔɔr məlsɔɔ jamana yeɲɔraakɛ hanɩ Jʋrdɛ̃ wi phã paar; Sɩhɔ̃naakɛ dɔnɩ Hɛsɩbɔ̃ jamana na Ɔgɩraakɛ dɔnɩ Basã bə̃ jamananaakɛ hanɩ Asɩtarɔtɩ dɩɩra.
11 Asɩ kɔ̃tɩ̃sɔ na asɩ dʋɔdara fɛw thɔ̃ sɛr ayɩ, sɩ gba dɩkɔɔkɛ sa gbananɩ hʋɛ a caanɛ nɩ a sɔ nar yɛ, anɩ thɔ̃dara sa do, nɩ ʋlfɛnɛ kha nɔ bɩɛl ʋlfɛrɛ na sɛrɛ. 12 Nɩ yɛkɛ asɩ burusɔ, dawiikɛ sɩ thenɩ cʋɔrɔ sɩ ɩ̃ nar, da phʋɛ gɩ kɔɔ do, sɩ nɛnɛ̃ gɩkɛ khɩ̃ɛ a cʋɔr koo. 13 Dɩvɛ̃ lokana ha gɩrɛ. Daphana gɩ, sɩ kɔɔ pɛrnɩ dɩvɛ̃ dɩɩ hi, gɛr ha gɩrɛ, gɩ sɛlɛlɛ fɛw. Nɩ yɛ asɩ kẽkẽsɔ na asɩ nɛfaasɔ gɩ sɛlɛlɛ fɛw, dɩɩ the mɔna hʋɛ gbaanɩ.» 14 Dɩ Ɩjɩrayɛl bɩsana teere Gabãɔdaraa dikora sɩ wa bule Thãgba Kɔ̃tɩn a hɩɩna'. 15 Dɩ Jojue ʋlfɛna wɛr ha ie nɔ bɩɛl ʋlfɛrɛ kɛ na cʋɛnɩ dɩ wa faa wɩ na yire. Dɩ Ɩjɩrayɛl bɩsanaa ƴɛkʋʋldasɔ ʋlfɛrɛ dɩ ɩna cʋ gɛr.
16 Ɔbɔɔkɛ Ɩjɩrayɛl bɩsana ʋlfɛna wɩnɩ pɩ dɩ ga cɔ balãther wɩ nɩɛrɛ dɩ wa the ƴɔa', sɩ awɩ dɩ khudarara wɛ, bǝ̃ bɩɛllala wɩ ha kha. 17 Dɩ Ɩjɩrayɛl bɩsana ɩɩrɛ a jal dɩɩ do wire yẽther wirera wɩ daan Gabãɔdaraa dɩsɔ. Awɩ dɩsɔɔra ha gɩrɛ: Gabãɔ, Kefɩra, Beerɔtɩ, Kɩrɩyatɩ-Yarɩmɩ. 18 Ɩjɩrayɛl bɩsana na kʋʋr wa', sɩ wɩ n hũhuune awɩ ƴɛkʋʋldasɔraale dɩɩ the ʋlfɛrɛraakɛ wɩ ʋlfɛnanɩ Gabãɔdara na Thãgba Kɔ̃tɩnɩkɛ dɔnɩ Ɩjɩrayɛlɩ Thãgbaa i. 19 Dɩ ƴɛkʋʋldaraale fɛw so Ɩjɩrayɛl bɩsanana fɛw: Sɛr kɔɔ ʋlfɛnɛ na wɩ na Thãgba Kɔ̃tɩnɩkɛ dɔnɩ Ɩjɩrayɛlɩ Thãgbaa i [ha ie ʋlfɛrɛ]. Nɛnɛ̃ sa puno a na kʋʋr wɩ 'lo bã. 20 Nɩ yɛ mɔ̃ sa cʋʋ wɩnɩ. Sa sɩ warɛ na yire gɩ the ʋlfɛrɛraakɛ sɩ ʋlfɛna wɩnɩ, sa n ka Thãgba Kɔ̃tɩnɩ nĩkhǝ'; 21 wɩ tɔɔ na yire. Sɩ sɩ pɛr war wa n kha dɛɛ wa n cɛna ɲʋɔn wa n ha sɛr Ɩjɩrayɛl bɩsana fɛw. Gɛr dɔ gɩrɛ Ɩjɩrayɛl bɩsanaa ƴɛkʋʋldara sonɩ.
22 Dɩ Jojue we Gabaɔ̃daraale a bule wɩ: «Mɔ̃ dɔ nɔɔ dɩ nɩ fɩɩl sɩ yɩ ƴɔɔ fĩi nɩ the sɩɩ dorakɛ kɩɛr dɔdɔ nɩ ha?» 23 Nɛnɛ̃, sʋɔn 'li ner. Dea na do bɔɔ khorr. Dɛɛ na n kha na n cɛna ɩ̃ Thãgbaa cɔ ɲɔ̃.» 24 Dɩ wɩ birse Jojue: Gɩrɛ dɔnɩ nɔɔ, sɛr afɩ thɔ̃dara kɔɔ nɩɛrɛ dɩ Thãgba Kɔ̃tɩn afɩ Thãgba kɔɔ sor ɔɔ thɔ̃daar Mʋɩjɩra, a hana nɩ dɩɩkɛ, a bũburone tɩbɩla fɛw anɩ ƴɛra. Dɩ mɔ̃ nɩ ɩnɩ a dã, maar fʋlɛ sɛr jɔɔ mɔ̃ sa khiirni. Gɛr gɩ dɩ sɩ cʋʋ thale. 25 Nɛnɛ̃ sɛr ha wɩrɛ afɩ ɲɛna. Cʋɛna sɩ mɔ̃ fɩ yɩɛnɩ dɩɩ bɔr a telena.» 26 Dɩ yɛ mɔ̃ Jojue cʋʋna wɩnɩ, a taa wɩ Ɩjɩrayɛl bɩsanaa ɲɔ̃kɔɔ wa kʋʋr wa'. 27 Sɩ a pɛ war wa n kha dɛɛ, a na cɛna Ɩjɩrayɛl bɩsana ɲɔ̃, na Thãgba Kɔ̃tɩnɩ bonɩ ji paarda paaraakɛra Thãgba Kɔ̃tɩn na phiirni, ka wa n fʋɔrʋʋnɩ. Dɩ ga thɔna wɩ n do a dana nĩ.