Ɩjɩrayɛl bɩsana 'lɛr kǝǝre Amorɩ̃ɛsɔɔra \ref Joj 11. 1-9; Eja 30.30; Khɩ 18.7-15
10
1 Adonɩ-Sedɛkɩɩkɛ dɔnɩ Jerujalɛm jamana nɩɛrɛ dɩ Jojue gbaar Ayɩ dɩɩ a bũburõ thɩ̃ɛ fɛʋʋkɛ hanɩ le, sa cʋʋ Ayɩ jamana mɔ̃kɛra a kɔɔ cʋʋnɩ Jeriko na ɔɔ jamana. A nɩɛrɛ dakha dɩ Gabãɔdara hananɛ kha ha ɩɩ na Ɩjɩrayɛl bɩsana, dɩrakɛ awɩ thɩ̃thɩɩn wɩ ha. 2 Dɩ maar hor ga hǝrǝǝre gɩdonɩ Gabãɔ dɩɩ kɔ̃tɩnɛ a ho dɩɩkɛ hananɩ jamana. A kɔ̃tɩnɛnakɛ a jɔ Ayɩ dɩɩ, dɩ ɔɔ sɔrasɩsɔ fɛw do da khena. 3 Dɩ Adonɩ-Sedɛkɩ thʋ̃ɔ so Ohamɩna, kɛ dɔnɩ Ebʋrɔ̃ jamana, na Pɩreamɩna, kɛ dɔnɩ Yaarmuti jamana, na Yafɩara, kɛ dɔnɩ Lakɩsɩ jamana, na Debiira, kɛ dɔnɩ Egʋlɔ̃ jamana, 4 wɩ jʋnɛ a bulonɩ ɩnɩ n kena Gabãɔdara gɩdonɩ ɔɔ too ture wɩ hana kha ha ɩɩ na Jojue na Ɩjɩrayɛl bɩsana. 5 Dɩ Amɔɔr məlsɔɔ jamana yemɔy kpa gbɛbɩ: Jerujalɛm jamana, na Ebʋrɔ̃ jamana, na Yaarmuti jamana, na Lakɩsɩ jamana, na Egʋlɔ̃ jamana, wɛr fɛw na awɩ sɔrasɩsɔ a jal sɔbɩ Gabãɔdara, wɩ kena wɩ.6 Dɩ Gabãɔdara thʋ̃ɔ a so Jojuera le Gɩlgal jɛw: «Fa n faa sɛr afɩ thɔ̃dara ga. Jʋnɛ na phananɛ a bulo sɩ, a taa sɩ, gɩdonɩ Amɔɔr məlsɔɔ jamanasɔɔkɛ hanɩ gɔ̃gɔ̃ bəənnə kpar kha a ɩ̃ sɔbɩ sɩ.» 7 Dɩ Jojue na ɔɔ sɔrasɩ khesɔ, na ɔɔ sɔrasɩsɔ fɛw ther Gɩlgal a jʋʋn na phananɛ.
8 Dɩ Thãgba Kɔ̃tɩn sor Jojuera: Fa n do maar n fʋ fɩ wɛra ga; gɩdonɩ ma gba wɛr na dʋ fɩ ɲɔ̃kɔɔ, tibil bɩɛllakɛ na hale awɩ thɩ̃thɩɩn a na jɩɩl na pɩɛr fa'. 9 Dɩ Jojue ɩɩrɛ ga dɩtɩnɔɔle a cɔna sa phuro wɩ. 10 Dɩ Thãgba Kɔ̃tɩn weele wer Ɩjɩrayɛl bɩsanaa ƴɛra. Dɩ Ɩjɩrayɛl bɩsana puno wɩ Gabãɔ dɩɩra dɩɩ ka. A weele wɩ jʋʋna na hʋɛɛkɛ n jalanɩ Bɛtɩ-Horɔ̃, a jalna dana Ajeka na Makeda. 11 Dɩ mɔ̃ wɩ fuunɩ Ɩjɩrayɛl bɩsanana a dã Bɛtɩ-Horɔ̃ paarɩkɛ dɔnɩ gbũ paar, Thãgba Kɔ̃tɩn khar thãgba bar cunǝ kɛ hɔnɩ bokana a bɩɩrna wɩ, a jalna thʋna Ajeka dɩ wɩ khiir. Wɩrɛ thãgba baraale kʋʋrnɩ, jɔr wɩrɛ Ɩjɩrayɛl bɩsana kʋʋrnɩ na bajɩna. \ref Ab 3.11; Eja 40.26-28; Jɔ 9.7,10
12 Ga wiilera Thãgba Kɔ̃tɩn gbanɩ Amɔɔr məlsɔ a dʋ Ɩjɩrayɛl bɩsana ɲɛna, Jojue kɔɔ bɩɛlɛ Thãgba Kɔ̃tɩn Ɩjɩrayɛl bɩsanaa ƴɛra a so wire na sɩpora ayɩ:
«Wire, jɩlɛ Gabaɔ̃ dɩɩra,
Fɛr sɩpor, jɩɩlɛ Ayalɔ̃ ɓɛlɛnɔ»
13 Dɩ wire jɩɩlɛ, dɩ sɩpor dakha jɩɩl
dɩɩ dana bɔɔkɛ Ɩjɩrayɛl bɩsana tiirni
helu awɩ lãlaardarara.
Dɩ gaa thɩ̃lera kɔɔ kanɩ hale a khere Jusitii sɛbɛra: aa wire jɩɩlɛ thãgbara ƴũu aa lõ kɔrɔa', dɩɩ thɔɔ wi bilǝni. 14 A fʋna bɔɔkɛ kɔɔ kanɩ a ɩna dana ga wiile, wire na hale kpɩɩ a hona ga wiila', kɛ Thãgba Kɔ̃tɩn pɛnɩ tibiliida nũu a cʋʋ gɩrɛ a sʋʋraana', gɩdonɩ Ɩjɩrayɛlla Thãgba Kɔ̃tɩn tee da n pɛ. 15 Agɩpɩ Jojue na Ɩjɩrayɛl bɩsana fɛʋʋkɛ a hananɩ kɛrɛ bir jɛw le Gɩlgal. \ref Mal 4.3; 1 Sam 15.32-33; Dǝt 21.22-23
16 Sɩ Amɔɔr məlsɔ jamana yemɔɩɩle kɔɔ caalɛlɛ a wʋɔn Makeda boka kaarra. 17 Dɩ wɩ mɩɩrɛ Jojue aa jamana yemɔɩɩle hale wʋɔn Makeda boka kaarra. 18 Dɩ Jojue so ɔɔ toora: Nɩ kpurone boka kɔ̃tɩna a sɔbana ka nʋɔ, sa pɩɛr tɩbɩla wa n bɛr. 19 Sɩ na n jɩɩla', nɩ wea anɩ lãlaardara a kpaan a tea wɩ ƴɩɛ; na n sɩ war wɩ lõ awɩ dɩsɔra ga, gɩdonɩ Thãgba Kɔ̃tɩn anɩ Thãgba gba wɛr a dʋ nɩ ɲɔ̃kɔɔ. 20 Dɩ Jojue na Ɩjɩrayɛl bɩsana punone Amɔɔr məlsɔ, a kʋʋr wɩ a ho wa pɩ wɛr. Sɩ tibil ɩkha sɩ gbe a fuu a lõ awɩ dɩsɔɔraakɛ wɩ mɩnɩ gʋʋ a kpalalɔ. 21 A gele karɔ Ɩjɩrayɛl bɩsana kɛrɛ bir jɛw pɔpɔl Jojuera Makeda. Dɩ le bǝǝnnǝǝle tibil na n 'la dɩ ǝl Ɩjɩrayɛl bɩsanana nʋɔ bã.
22 Dɩ Jojue so ɔɔ toora: «Nɩ khɛra boka ka nʋɔ sa tire jamana yemɔɩɩkɛ thena mar.» 23 Dɩ mɛ̃ wɩ tiir jamana yemɔɩɩle boka kaara a thena haa. Jerujalɛm jamana gɩ, na Ebʋrɔ̃ jamana, na Yaarmuti jamana, na Lakɩsɩ jamana na Egʋlɔ̃ jamana. 24 Dɩ ɔbɔɔkɛ wɩ tiirni jamanasɔɔle thena pɩ, Jojue wer Ɩjɩrayɛl kona sa so sɔrasɛɛ ƴɛkʋʋldasɔraakɛ kɔɔ hanɩ kha na ɔr kʋʋra : Nɩ tɔ dana a sa wɩ fʋɔrɔ. Dɩ wɩ tɔ dã a sa wɩ fʋɔrsɔ. 25 Dɩ Jojue sor war: «Na n do maar n fʋlɛ na', na n jẽ haara', nɩ hanana 'lar, gɩdonɩ thalera Thãgba Kɔ̃tɩn na cʋʋ anɩ lãlaardasɔ fɛʋʋkɛ na kɛ̃kɛrɛnanɩ. 26 Agɩpɩ Jojue pɛrɛ dɩ wɩ kʋʋr jamana yemɔɩle, a ju thɩra yemɔɩra dɩ wɩ toole a dana dʋɔrɔ. 27 Wi lõ bɔɔ Jojue 'laarɛ hʋɛ wɩ tiire wɩ thɩrara. Dɩ wɩ tiir wɩ dʋʋrna boka kaaraakɛra wɩ kɔɔ wʋɔnɩ, sa sɔbɩ ka nʋɔ na boka kɔ̃tɩna. Gɩ halerakɛ nĩ 'lo.
Jojue taarɛ Amorɩ̃ɛsɔɔ dɩ gɩrɛ hanɩ wi phã paar ɲɔ̃bɩlana \ref Dǝt 7. 1-6; 20.16-18; khɩ 72. 9-11
28 Jojue taarɛ Makeda dɩɩ ga wiilera a kʋ jamana na tɩbɩla fɛw. A kʋʋrɛ tɩbɩla fɛʋʋkɛ hanɩ le na thɩ̃ɛ fɛw a ha Thãgba Kɔ̃tɩn bonɩ thiinə khaa aa sɩ dɩkha bɩɛllakɛ na yirǝ'. Sa cʋʋ ɔɔ jamana mɔ̃ a kɔɔ cʋʋnɩ Jeriko jamana.
29 Mɔ̃ wɩ thenɩ Makeda, Jojue na Ɩjɩrayɛl bɩsanaakɛ a hananɩ kha jaal Lɩbɩna a kenaa. 30 Dɩ Thãgba Kɔ̃tɩn gbaar dɩɩle dakha na ɔɔ jamana a dʋ Ɩjɩrayɛl bɩsana ɲɔ̃kɔɔ dɩ wɩ kʋʋr tɩbɩla fɛw. Wa sɩ bɩɛllakɛ na yirǝ'; sa cʋʋ ɔɔ jamana mɔ̃ a kɔɔ cʋʋnɩ Jeriko jamana.
31 Dɩ Mɔ̃ wɩ thenɩ Lɩbɩna, Jojue na Ɩjɩrayɛl bɩsana jaal Lakɩsɩ a jɛ dɩ nʋɔra a kenaa. 32 Thãgba Kɔ̃tɩn gbaar Lakɩsɩ a dʋ Ɩjɩrayɛl bɩsana ɲɔ̃kɔɔ balaɲɔ wirera dɩ wɩ kʋʋr tɩbɩla fɛw, wa sɩ bɩɛllakɛ na yirǝ'. Mɔna wɩ cʋʋnɩ Lɩbɩna mɛna wɩ cʋgʋʋ. 33 Dɩ Horamɩɩkɛ dɔnɩ Gejɛɛr jamana ɩɩr a jal ɩnɩ n bul Lakɩsɩdara. Dɩ Jojue kʋʋ a kʋʋrna ɔɔ sɔrasɩsɔ fɛʋʋkɛ a hananɩ a ti, bɩɛllakɛ na sɩ na yirǝ'.
34 Dɩ mɔ̃ wɩ thenɩ Lakɩsɩ, Jojue na Ɩjɩrayɛl bɩsana gbaar jal Egʋlɔ̃, a jɛ dɩ nʋɔra sa kenaa. 35 Dɩ wɩ teere dɩɩ ga wirǝ a kʋʋr tɩbɩlaakɛ hanɩ le cacaca. Jojue cʋgʋʋrɛ mɔna a cʋʋnɩ Lakɩsɩ dɩɩ.
36 Dɩ mɔ̃ Jojue na Ɩjɩrayɛl bɩsana thenɩ Egʋlɔ̃, wɩ gbaar jʋʋn Ebʋrɔ̃ a kenaa. 37 Dɩ wɩ teere dɩɩ a kʋʋr tɩbɩla, a kʋna jamana na dɩ gɩrɛ a n kʋmãdɩnɩɩ tibilsɔ fɛw. Jojue cʋʋrɛ Ebʋrɔ̃ dɩɩ mɔ̃kɛ a kɔɔ cʋʋnɩ Egʋlɔ̃ dɩɩ. A wɩɛrɛ dɩɩ a kʋʋr tɩbɩla cacaca aa sɩ tɩɩ bɩɛllakɛ na yirǝ'.
38 Agɩpɩ Jojue na Ɩjɩrayɛl bɩsana kɛrɛ a kena Debiir dɩɩ. 39 Wɩ teere dɩɩ, a kʋ jamana, a teena dɩɩ fɛʋʋkɛ a n kʋmãdɩnɩ, a kʋʋr tɩbɩla fɛʋʋkɛ hanɩ le a ha Thãgba Kɔ̃tɩn bonɩ thiinə khaa, bɩɛllakɛ na sɩ na yirǝ'. Jojue cʋʋrɛ Debiir dɩɩ na ɔɔ jamana mɔna a kɔɔ cʋʋnɩ Ebʋrɔ̃ dɩɩ na Lɩbɩna dɩɩ na awɩ jamanasɔ.
40 Jojue teere dɩɩ fɛw. A kʋʋrɛ wɩrɛ hanɩ gɔ̃gɔ̃ bəənnə, na Negɛvɩ bǝǝnnǝ, na wɩrɛ hanɩ na dɩɩsɔraakɛ hanɩ ɓɛ̃tɛw, na gɔ̃gɔ̃ horosɔra. A kʋʋr wɛr na awɩ jamanasɔ. Mɔ̃kɛra Thãgba Kɔ̃tɩnɩkɛ dɔnɩ Ɩjɩrayɛlɩ Thãgba kɔɔ sʋʋraanɩ, a kʋʋrɛ gɩrɛ fɛʋʋkɛ hananɩ fesue cacaca bɩɛllakɛ na sɩ na yirǝ'. 41 Jojue teere dɩɩsɔ a fʋna Kadɛsɩ-Baarnea bǝǝn a dana Gaja dɩɩ, a teere Gosɛna bǝǝn fɛw a jalna dana Gabãɔ dɩɩ. 42 Jojue teere ga dɩsɔɔle a punona awɩ jamanasɔ babɩɛl therra, gɩdonɩ Thãgba Kɔ̃tɩnɩkɛ dɔnɩ Ɩjɩrayɛlɩ Thãgba kɛ̃kɛrɛnɛ da n pɛ ɔɔ too Ɩjɩrayɛlla. 43 A gele karɔ, Jojue na Ɩjɩrayɛl bɩsana fɛw kɛrɛ bir jɛw le Gɩlgal dɩɩra.