Kʋʋr Merɔm ɲɔ nʋɔra \ref Joj 10.1-15, 25; So 4. 1-16; Khɩ 48.5
11
1 Ɔbɔɔkɛ Yabɛ̃ɛkɛ dʋɔnɩ Hasɔɔr jamana nɩɛnɩ gɩrɛ kanɩ, a thʋɔn so Yobabɩrakɛ dɔnɩ Madɔ̃ jamana, na Sɩmɩrɔ̃ jamanana, na Akesafɩ jamanana, 2 na jamanasɔɔraakɛ hanɩ gɔ̃gɔ̃ bəənnə wi phã paar ɲɔ̃bɔɔra na wɩrɛ hanɩ Jʋrdɛ̃ pobãʋ na wɩrɛ hanɩ Jenejarɛtɩ wi phã paar ɲɔ̃bɩlana na wɩrɛra hanɩ Dɔɔr bǝǝnnǝ wi lõ paar. 3 A sor dakha Kanãadararaakɛ hanɩ wi phã paar, na wɩrɛra hanɩ wi lõ paar, na Amɔɔr məlsɔɔra, na Hɛtɩɩ mǝlsɔra, na Perejɩdarara, na Jebusɩdararaakɛ hanɩ gɔ̃gɔ̃ bəənnə, na Hɩvɩtɩsɔraakɛ hanɩ Hɛrmɔ̃ gɔ̃gɔ̃ nɔɔra Mɩsɩpa bǝǝnnǝ. 4 Dɩ jamanasɔɔle ther fɛw na awɩ sɔrasɩsɔ a kpa gbɛbɩ tǝ̃tǝ̃tǝ̃ a ho gbalãkothɩnɩkɛ hanɩ laɲɔ̃ nʋɔra. Awɩ gãgosɔ na awɩ koke hotorosɔ na jɔr kpãkpalã ga. 5 Dɩ jamanasɔɔle gʋʋrɛ kha sa jal a jɛ Merɔm ɲɔ nʋɔra wɩ kena Ɩjɩrayɛl bɩsana. 6 Dɩ Thãgba Kɔ̃tɩn so Jojuera: «Fa n ma wa', gɩdonɩ cʋɔ wɛ̃ɛbɔɔkɛra ma kʋʋr wɛr a na dʋ Ɩjɩrayɛl bɩsanaa ɲɛna. Kuure awɩ gãgosɔ jɩlãjɩɩr, sa thiǝ awɩ koke hotorosɔ dɔɔra.7 Dɩ Jojue na ɔɔ sɔrasɩsɔ jaal a phuro wɩ Merɔm ɲɔ̃ nʋɔra. 8 Dɩ Thãgba Kɔ̃tɩn gba wɛr a dʋ Ɩjɩrayɛl bɩsana ɲɔ̃kɔɔ dɩ wɩ kʋʋr wɩ, a weele wɩ dana Sɩdɔ̃ɔkɛ wɩ n wenɩ dakɔ̃tɩ̃ɩ, a jalna wɩ dana Misirefɔtɩ-Mahɩm dɩɩra, sa jalna wɩ a dana wɩ Misipe kɔlɔna wi phã paar, a kʋʋr wɩ cacaca bɩɛllakɛ na sa'. 9 Jojue cʋʋ wɛr mɔ̃kɛra Thãgba Kɔ̃tɩn kɔɔ sʋʋraanɩ. A kuure awɩ gãgosɔɔ jɩlãjɩɩr, sa thii awɩ koke hotorosɔ dɔɔra.
10 Ga bɔɔlera Jojue kɛrnɩ da n bir, a teere Hasɔɔr dɩɩ, sa kʋ ɔɔ jamana na bajɩna. Ga bɔɔlera, Hasɔɔr dɩɩra kɔɔ dɔ dɩɩsɔɔle fɛʋʋ dɩ kɔ̃tɩ̃. 11 Wɩ kʋʋrɛ tɩbɩlaakɛ hanɩle cacaca, na thɩ̃ɛ fɛʋʋkɛ hananɩ fesue bɩɛllakɛ na sa'; sa thii Hasɔɔr dɩɩ na dɔɔ. 12 Jojue teere jamanasɔɔle dɩsɔ fɛw a kʋʋr awɩ jamanasɔ. A kʋʋrɛ dɩdara fɛw a ha Thãgba Kɔ̃tɩn bonɩ thiinə khaa mɔna Thãgba Kɔ̃tɩn kɔɔ sonɩ ɔɔ thɔ̃daar Mʋɩjɩra. 13 Sɩ dɩ gɩrɛ hanɩ gɔ̃gɔ̃ bəənnə Ɩjɩrayɛl bɩsana na thii ga. Hasɔɔra dɩbara Jojue thii na dɔɔ. 14 Ɩjɩrayɛl bɩsana gbaar thɩ̃ɛsɔɔkɛ wɩ taanɩ kʋʋrra na nʋma dɩɩsɔɔraale dɩɩ do awɩda, sa kʋʋr tɩbɩla fɛw wa sɩ bɩɛlla'. 15 Gɩrɛ fɛʋʋkɛ Thãgba Kɔ̃tɩn kɔɔ sonɩ ɔɔ thɔ̃daar Mʋɩjɩra, Mʋɩjɩ so ger Jojuera, dɩ cʋʋ oti, aa ɓɔr bɩɛl a faga'.
Jojue teere Kanãa dɩɩsɔ pɩ.
16 Thale Jojue tee bə̃əsɔɔle fɛw: gɔ̃gɔ̃ bəən, na Negɛvɩ bǝǝn fɛw na Gosɛn bǝǝn fɛw, na dɩɩsɔɔkɛ hanɩ ɓɛ̃tɛw, na bə̃ gɩrɛ hanɩ Jʋrdɛ̃ pobãʋ, na dakha gɔ̃gɔ̃ bənə, na bə̃ fãakɛ hanɩ wi phã paar ɲɔ̃bɔɔra. 17 Fɔnɩ Halakɩ gɔ̃gʋɔna, kɛ thɛnɩ Seyir a jal dã Baal-Gadɩ, Lɩbã ɓɛlɛnɔ Hɛrmɔ̃ gɔ̃gɔ̃ nɔɔra, a bɩɩrɛ gaa dɩdaraale na awɩ jamanasɔ a kʋʋr. 18 Jojue kenanɛ jamanasɔɔle kʋʋr ƴɛɛr. 19 Dɩ bɩɛllakɛ na hale a too kha na Ɩjɩrayɛl bɩsana na ha ɩɩ, saagado Gabaɔ̃ dɩɩ gɩ, ka Hɩvɩtɩsɔ hanaa ga. Dɩɩsɔɔle fɛw, kʋʋr a kena wɩ sa taa. 20 Thãgba Kɔ̃tɩn kɔɔ cʋɛ wɩ dɩ wɩ khɩɩr haar gɩdo nɔɔ Ɩjɩrayɛl bɩsana n kena wɩ kʋʋr, wɩ kʋʋr wɩ cacaca wɩ ha Thãgba Kɔ̃tɩn bonɩ thiinə khaa, wa jɩ wɩ bʋɔra ga, sɩ wɩ kʋʋr wɩ mɔna Thãgba Kɔ̃tɩn kɔɔ sonɩ Mʋɩjɩra.
21 Bɔ bɩɛllalera Jojue jal a kena Anakɩɩ mǝlsɔɔkɛ hanɩ gɔ̃gɔ̃ bǝnǝnəəkɛ hanɩ Ebʋrɔ̃ na Debiir na Anabɩ na Juda na Ɩjɩrayɛl gɔ̃gɔ̃ bǝnǝnǝ fɛw, a kʋʋr wɩ ti, sa wɩɛr awɩ dɩsɔ. 22 Anakɩɩ mǝlsɔ na sɩ Ɩjɩrayɛl bɩsanaa dʋɔa'. Gaja na Gatɩ na Asɩdɔdɩ dɩɩra wɩ ha. 23 Thale Jojue tee dɩɩra fɛw mɔna Thãgba Kɔ̃tɩn kɔɔ sonɩ Mʋɩjɩra, a tɩnɛ Ɩjɩrayɛl bɩsana mɔ̃ wɩ hanɩ awɩ cara. Mɔ̃ kʋʋr karɔnɩ pɩ, dɩɩ toore cɔcɔ na ha ɩɩ, kʋʋr na hale bã'.