Ɩjɩrayɛl bɩsana taarɛ Basã jamana Ɔgɩɩ dɩ. \ref Ther 21.33-35; Joj 12. 1-6; Kh 136.20-22
3
1 Agɩpɩ sɩ kɛrɛ a jʋʋnna Basã hʋɛ. Dɩ Ɔgɩɩkɛ dɔnɩ Basã jamana ther na ɔɔ too fɛw ɩnɩ n kena sɩ Edireyi dɩɩra. 2 Dɩ Thãgba Kɔ̃tɩn so mar: «Fa n maa ga, mɩ gbaarɛ a dʋ fɩ ɲɔ̃kɔɔ, ɔr na ɔɔ too fɛw, na ɔɔ dɩ, fɩ cʋgʋʋ mɔ̃ fɩ cʋʋnɩ Sɩhɔ̃ɔkɛ dɔnɩ Amɔɔr məlsɔɔ jamana kɛ kɔɔ hanɩ Hɛsɩbɔ̃ dɩɩra. 3 Dɩ Thãgba Kɔ̃tɩn asɩ Thãgba gbaar wo Ɔgɩɩkɛ dɔnɩ Basã jamana na ɔɔ too fɛw a pɛ sɩ ɲɛɛna dɩ sɩ kʋʋr wɩ, sa sɩ bɩɛllakɛ na yirǝ'. 4 Sɩ gbaar ga bɔɔle ɔɔ dɩsɔ fɛw. Dɩ bɩɛl na hale kɛ sa teenaa ga. Dɩɩ kpalãther gɩ, kɛ gbaanɩ Argɔbɩ bǝǝn fɛw ka dɔnɩ Basã jamana Ɔgɩɩ kumadɩ khu pa. 5 Dɩɩsɔɔle fɛw dor dɩɩsɔɔkɛ wɩ mɩnɩ go gbana a kpalalɔ na lo kpalanasɔ. Sɩ dɩ ɩkhasɔ hale dakha jɔɔ kɛ wa mɩnɩ gʋʋ a diiroǝ'. 6 Sɩ wɩɛlɛ ga dɩsɔɔle fɛw mɔ̃ sɩ cʋʋnɩ Sɩhɔ̃ɔkɛ dɔnɩ Hɛsɩbɔ̃ jamanaa dɩ. Sɩ kʋʋrɛ dɩɩsɔɔraale fɛw kona na khɛra na bɩsana, 7 sa kpa nʋma a khɩɩna thɩ̃ɛ fɛw dɩɩ do asɩda.8 Thale sɩ taa ga bɔɔraale Amɔɔr məlsɔɔ jamana yeɲɔraale dɩɩkɛ hanɩ Jʋrdɛ̃ mɩɩr seero, fɔnɩ Arnɔ̃ kɔlɔna a jal dã Hɛrmɔ̃ gɔ̃gʋ̃ɔna. 9 Sɩdɔ̃dara n wer Hɛrmɔ̃ gɔ̃gʋ̃ɔ Sɩrɩɔ̃, dɩ Amɔɔr məlsɔ na n wɩɩ Senɩɩr. 10 Sɩ taarɛ dɩɩsɔɔkɛ hanɩ gɔ̃gɔ̃ ɓɛlɛnɔ na Galaadɩ bǝǝnnǝ fɛw na Basã fɛw a jalna dana Salka na Edireyi, dɩɩsɔɔkɛ Ɔgɩ n kumadɩnɩ Basã bǝǝnnǝ. 11 Ɔgɩɩkɛ dɔnɩ Basã jamana dɔ pɩpɩɩdaarɩkɛ sɛnɩ Refayɩtɩsɔra. Ɔɔ phɩ̃ pa ther gɩ. Gɩ hale Raba, Amɔ̃ɔ mǝlsɔɔ dɩ kɔ̃tɩnɔ. Ɔɔ gbã thɔɔrɛ mɛtɛrɛ yenã sɩ ɔɔ pɛr thɔɔ mɛtɛrɛ yeɲɔ.
Mʋɩjɩ tɩnɛnɛ Galaadɩ bǝǝn a ha Ribɛ̃ na Gad na Manasee ca kur.
12 Agɩpɩ Mʋɩjɩ so: Ga bɔɔle sɩ taarɛ dɩɩle dɩɩ do asɩda. Dɩ mɩ har Ribɛ̃ɛ mǝlsɔ na Gadɩɩ mǝlsɔ bǝǝnikɛ fɔnɩ Aroyɛɛr dɩɩra, kɛ hanɩ Arnɔ̃ kɔlɔ̃ nʋɔra na Galaadɩ gɔ̃gɔ̃ bǝ̃ phɛ̃ bɩɛl na dɩɩsɔɔkɛ harɔnɩ; 13 sa ha Manasee ca kur, Galaadɩ bǝǝnikɛ sɛnɩ, na Ɔgɩɩ jamana dɩ fɛw Basã bǝǝnnǝ. Argɔbɩ bǝǝn fɛw na Basã fɛw dɔ ka wɩ n kɔɔ wenɩ Refayɩtɩsɔ dɩ. 14 Yayɩɩrɩkɛ dɔnɩ Manasee bikuun gbaar Argɔbɩ bǝǝn a jal thʋ Gesuurdara na Maakaa mǝlsɔɔ pɛlla. A dʋrɛ Basã ɔɔ i dɩ wa n we gɩ Yayɩɩrɩ dɩsɔ a dana nĩ. 15 Mɩ har Makɩɩr, Galaadɩ bǝǝn. 16 Ribɛ̃ɛ mǝlsɔ na Gadɩɩ mǝlsɔ mɩ ha Galaadɩ phɛ̃ bɩɛl, a jala dana Arnɔ̃ kɔlɔna. Arnɔ̃ kɔlɔ̃ dɔ khɩɛrʋ a jal thʋ Yabɔkɩ kɔlɔna kɛ dɔnɩ Amɔ̃ɔ mǝlsɔɔ pɛl. 17 Mɩ ha wɛr dakha Araba ɓɛlɛ̃ kɛ khonɩ Jʋrdɛ̃ mɩɩra na bəənɩkɛ fɔnɩ Kinerɛtɩ a jala thʋ laɲɔ̃ khire, Pɩsɩga gɔ̃gɔ̃ nɔɔra wi phã paar.
18 Ga bɔɔlera mɩ so war: Thãgba Kɔ̃tɩn anɩ Thãgba ha nɛr dɩɩkɛ nɩ hɩna. Nɛnɛ̃ nɛrkɛ dɔnɩ kuun khena nɩ ka na anɩ koke thɩ̃sɔ a gbana anɩ omɩ Ɩjɩrayɛldara ƴɩɛ a serre Jʋrdɛ̃ mɩɩr. 19 Anɩ khɛrsɔ, na anɩ bɩsãsɔ na anɩ nʋ̃sɔ na tɔɔ dɩɩraakɛra mɩ ha nɩnɩ. Gɩdonɩ mɩ jɩrɛ dɩ nɩ hananɛ nʋma jɔɔ, 20 gɩ dana bɔɔkɛ Thãgba Kɔ̃tɩn na hanɩ anɩ omɩsɔ hɩɩrɛ mɔna a ha nɩnɩ, wɛr dakha n too dɩɩraakɛ Thãgba Kɔ̃tɩn anɩ Thãgba n ha wɩnɩ Jʋrdɛ̃ iiro, wi lo paar, sɩ nɩ kɛr nɩ bir ntɛ ɔɔ paakɛ mɩ haanɩ.» 21 Ga bɔɔlera mɩ so Jojuera: «Fɩ yɩrɛ gɩrɛ fɛʋʋkɛ Thãgba Kɔ̃tɩn anɩ Thãgba cʋʋnɩ jamana yeɲɔraakaa? Ɔmɛna Thãgba Kɔ̃tɩn na cʋʋ jamana dɩɩ fɛʋraakɛ fa kanɩ. 22 Na n ma wa', gɩdonɩ Thãgba Kɔ̃tɩn anɩ Thãgbaa thɛthɛ na kɛ̃kɛrɛnɛ na pɛ nar.
Mʋɩjɩɩ Thãgba bɩɛl \ref Dǝt 32.48-52; 34.1-9; Kh 99.8
23 Ga bɔɔlera mɩ ƴɛɛrɛ Thãgba Kɔ̃tɩn thakɛ ayɩ: 24 «Kɔ̃tɩn, Thãgba Kɔ̃tɩn, fɩ fʋrɛ fa n nɩna mɛr afɩ thɔ̃daar afɩ wabɩ, na afɩ puno. Thãgba bɩɛllakɛ na hale dɩ thɩɩraakɛ gɩ dɩ thãgbara ƴũu gɩ, a na mar na phɛl afɩ thɔ̃, na thɔ̃ kɔ̃tɩ̃ ca gɩrɛ fɩ n cʋʋna'. 25 Mɩ n bɩɛl fɛr, sɛ mar ɩ̃ iir Jʋrdɛ̃ mɩɩr, ɩ̃ yɩrakɛ dɩ ɓɔ̃ caarɩlera hanɩ le iiro na ɔɔ gɔ̃gɔ̃ ɓɔ̃sɔɔle na Lɩbã gɔ̃gɔna.» 26 Sɩ Thãgba Kɔ̃tɩn gbana mɛr nĩkhii dɩɩ do nɛr dɔ nɔɔ. Aa pɛ mɩ nũǝ'. Thãgba Kɔ̃tɩn so marɛ aa gɩ daan mɛ̃ ma n bir mɩɩna nɩ gaa thɩmɩɩr 'lo bã. 27 A so ɩ̃ jʋnɛ Pɩsɩga gɔ̃gɔ̃ yʋɔ a ɓa ƴɩɛ a hɩnɛ wi lõ paar, na wi phã paar, na ka wire na n jalnɩ dɩ pɛ ɲɔ̃bɔɔ na ka wire na n jalnɩ dɩ pɛ ɲɔ̃bɩlã. Ɩ̃ hɩnɛ na yi haa sɩ ma iir Jʋrdɛ̃ mɩɩrɩka'. 28 A sor ɩ̃ sɔ Jojuera gɩrɛ a na cʋʋnɩ, ɩ̃ hanaa 'lar a cʋgɛɛ a tɩ gɩdonɩ ɔr na kʋlɛna tɩbɩlaakɛ ƴɩɛ a cʋʋ wɩ wɩ gba dɩɩkɛra ma jʋʋnɩ na yɩ. 29 Ga bɔɔle, le sɩ too gɔ̃gɔ̃ ɓɛlɛnɔ, ka Bɛtɩ-Peɔɔr dɩɩ pɛnɩ ƴɩɛ.