Nũ nɩɩr Thãgbaa jɔfʋra. \ref Dǝt 4. 32-40; 6. 1-15 Joj 23.6-8; 16
4
1 Nɛnɛ̃ Ɩjɩrayɛl bɩsana, nɩ pɛ Thãgbaa thɩmɩɩrsɔɔkɛ kheranɩ na ɔɔ jɔfʋsɔɔkɛ mɩ n dɩɩr nɩnɩ nũu a na cʋɛ mɔ̃ gɩ sonɩ, gɩ do nɔɔ nɩ hana yire, nɩ gba dakha dɩɩkɛra Thãgba Kɔ̃tɩn anɩ thɩ kɔ̃tɩ̃sɔɔ Thãgba n ha nɩnɩ. 2 Na n dɛ̃ɛ dɩkha jɔfʋraakɛ mɩ n ha nɩna', dɩ na n hɛllɔ dɩkha ga, sɩ na n ɔ Thãgba Kɔ̃tɩn anɩ Thãgbaa jɔfʋra mɔna mɩ dɩɩr nɩnɩ.3 Anɩ yi yɩrɛ gɩrɛ Thãgba Kɔ̃tɩn cʋʋnɩ thãgbaakɛ wɩ n wenɩ Baal-Peɔɔr thɩmɩɩra. Thãgba Kɔ̃tɩn anɩ Thãgba kʋʋrɛ anɩ thɩ̃thɩɩn tɩbɩla fɛʋʋkɛ fʋɔrɛnɩ Baal-Peɔɔr; 4 Sɩ nɛrkɛ manɩ Thãgba Kɔ̃tɩn anɩ Thãgbara nɩ hananɛ yire gɩrɛ nĩ.
5 Nɩ hɩnɛ, mɩ dɩɩr nɛr Thãgba Kɔ̃tɩn ɩ̃ Thãgbaa thɩmɩɩrsɔɔkɛ kheranɩ na ɔɔ jɔfʋsɔ mɔna a so marnɩ. Na n hɩnɛ gɩ bɔɔbɔɔ a nɩ lõ dɩɩraakɛra na gbanɩ. 6 Na n ɔ gar a na cʋɛna mɔna gɩ sonɩ. Gɛr na hana nɩ kpɛsɛrɛ na jɩɩr ca kpɩɩsɔɔ yɛra dɩ mɔ̃ wa nɩɛnɛnɩ jɔfʋsɔɔkɛ na n sor: «Ca kɔ̃tɩ̃ caakɛ hananɛ kpɛsɛrɛ na jɩɩr dɛ!» 7 Ca kɔ̃tɩ̃ ʋmɔ̃ hãalerakɛ a hana thãgbasɔ dɩ wɩ wɔrɔ̃ɔ mɔ̃ Thãgba Kɔ̃tɩn asɩ Thãgba n wɔrɔ̃ sɩnɩ bɔɔ wo bɔɔkɛ sɩ wɩɩnɩ? 8 Dɩ ca kɔ̃tɩ̃ ʋmɔ̃ hãale a hana dɩɩrɛsɔ na jɔfʋsɔ dɩɩ sar a ho jɔfʋ ʋrɛ mɩ n ha nɩnɩ nĩ gɩrɛ?
9 Thɩ̃ bɩɛl dʋɔn: Na n jɩɛ dʋ bʋrɛ anɩ thɛthɛra wire fɛʋʋkɛ nɩ hananɩ yire gɩ do nɔɔ na diinǝ kpɩɩrakɛ thɩ̃ɛsɔɔkɛ anɩ yi yɩna', sɩ gɩ too nɩ haara. Nɩ mɩa gɩ anɩ bɩsãsɔ na anɩ bɩsãsɔɔ bɩsãsɔ. 10 Na n diinǝ wireekɛ nɩ jɩɩlnɩ Thãgba Kɔ̃tɩn anɩ Thãgbaa ƴɛra Orɛbɩ gɔ̃gʋɔnnɔa'. Thãgba Kɔ̃tɩn kɔɔ so marrɛ: Kpa tɩbɩla wɩ wɔrɔ̃ mɩ. Mɩ ƴaalɛ ɩ̃ cʋʋ wɩ, wɩ nɩ ɩ̃ thɩmɩɩsɔ gɩ cʋʋ wɩ wa n ma mɩ bɔɔ fɛʋʋkɛ wɩ hananɩ yire thɩɩra, wɩ gba gɩ dakha wɩ dɩɩr awɩ bɩsãsɔ. 11 Dɩ nɩ kɔɔ tɔr dã gɔ̃gɔ̃ horo a jɩɩl. Gɔ̃gʋɔn kɔɔ dor dɔ haar. Dɩ dɔ lɩnanɛ na n jʋʋn thãgbara ƴũu. Dabirǝ na ndɔlɔ̃pana na thuthuure kɔɔ hale. 12 Dɔɔlee thɩ̃thɩɩn Thãgba Kɔ̃tɩn kɔɔ ha sa mɩɩna nɩ. Nɩ nɩrɛ ɔɔ nɔ sɩ anɩ yi na yɩa', wirera dɩbara nɩ nɩɛ. 13 A cʋʋ nɛr dɩ nɩ jɩ ɔɔ nɔ bɩɛl ʋlfɛɛkɛ a so narnɩ na n cɔ kɛ dɔnɩ jɔfʋ yʋɔrɩkɛ a kherenɩ a pɛr boka thelna phɛlɛ yeɲɔra. 14 Ga bɔɔlera Thãgba Kɔ̃tɩn so mar ɩ̃ dɩɩrɛ nɩ ɔɔ thɩmɩɩrsɔɔkɛ kheranɩ na ɔɔ jɔfʋsɔɔkɛ na n hɩɩnɩ ɔbɔɔkɛ na lonɩ dɩɩraakɛ na teenɩ na hĩ.
15 Mɔna na yɩnɩ Thãgba Kɔ̃tɩnɩ ƴɛ bi dawiile a hanɩ dɔ thɩ̃thɩɩn Orɛbɩ gɔ̃gʋɔnnɔ sa mɩɩna na', Gɛr gɩ nɩ jɩɛ dʋ bʋrɛ anɩ thɛthɛra. 16 Na n lo puurera a cʋʋ thɩla wɩ ho kona agɩbo khɛra, 17 Na n cʋʋ wɩ wɩ ho dɩkhaa nʋ̃ ca thɩɩraakɛ dɩ 'lomĩ dɩkha gɩɩkɛ n ubǝni ƴũǝ', 18 agɩbo nʋ̃ dɩkhaakɛ n puulǝneni thɩɩra dɩ thʋ̃ dɩkha gɩɩkɛ hanɩ ɲʋɔnɔ thɩɩraakɛ tɩɛra'. 19 A nɩ ɓa ƴɩɛ thãgbara ƴũu a na hɩɩn wire na sɩpor, na ƴepǝlǝ̃be na thɩ̃ kpɩɩsɔɔkɛ hanɩ le na n do gɩ thɔɔ nɩ, nɩ gburõkhu war na n fʋɔr wa'. Ca kpɩɩsɔɔra thɩɩraakɛ Thãgba Kɔ̃tɩn anɩ Thãgba thɩɩn gaa cʋʋ pasɔɔle. 20 Sɩ ne wer Thãgba Kɔ̃tɩn te nɩ Ejipiti daphʋɛraakɛ hɔnɩ phu dɔɔ, nɩ do ɔɔ too mɔ̃ nɩ hanɩ gɩrɛ nĩ.
21 Thãgba Kɔ̃tɩn gbana mɛr nĩkhii dɩɩ do nɛr dɔ nɔɔ, ayɩ ma iir Jʋrdɛ̃ a na lõ dɩ ɓʋɔnaakɛra ɩnɛr Thãgba Kɔ̃tɩn anɩ Thãgba n ha nɩnɩ nɩ hɩna ga. 22 Me wer, ma khire dɩɩraakɛ, ma iir Jʋrdɛ̃a'. Sɩ nɛrɛ na iire a na gba dɩ ɓʋ̃ɔɔlera na hɩ̃. 23 Nɩ jɩɛ dʋ bʋrɛ anɩ thɛthɛra. Na n diinǝ nɔ bɩɛl ʋlfɛrɛɛkɛ Thãgba Kɔ̃tɩn anɩ Thãgba ʋlfɛna nɩnɩ sa cʋʋ thɩla gɩ hona dɩkhaa thɩ̃ gɩrɛraakɛ Thãgba Kɔ̃tɩn anɩ Thãgba pɩɛr nɩna'. 24 Gɩdonɩ Thãgba Kɔ̃tɩn anɩ Thãgba dor dɔɔkɛ n kʋɛanɩ thɩ̃ɛ, Thãgbaakɛ hananɩ gbugi gɩ. \ref Dǝt 29. 17-27; 30.1-10 , 15-18; Lev 26. 39-45; Luk 15. 16-24
25 Adorakɛ nɩ pʋɔr dɩɩraale na lonɩ mɔ̃, a kɔ̃ bɩsana dɩ wa n kɔ̃ awɩ bɩsãsɔ, a nɩ gba fɩl puu a cʋʋ thɩla dɩ wɩ hana dɩkhaa ƴɛ, a nɩ cʋʋ thɩ̃ɛɛkɛ puuroni Thãgba Kɔ̃tɩn anɩ Thãgbara dɩɩ kʋʋ nĩkhii, 26 thãgbaakɛ ƴũu na thɩɩ mɩ gba nĩ gɩrɛ dɩ wɩ do yi tordara na iire Jʋrdɛ̃ na pɩ, a na lõ na gba dɩɩra, sɩ khir na kʋʋr nɛr na gerra. Na pʋɔr la', na bũburone fɛw. 27 Thãgba Kɔ̃tɩn na jãjalã nɛr ca kpalaa thɩ̃thɩɩn nɩ pɩ, sɩ nɩ sɩ gbe dɩbara caarsɔraakɛ Thãgba Kɔ̃tɩn na jalna nɩnɩɩ thɩ̃thɩɩn. 28 Dɩ le na n fʋɔr thãgbasɔɔkɛ tibil ɲɛ̃ɛ cʋʋnɩ kɛ dɔnɩ: thɩrʋ na bokaar, kɛ na hananɩ punone dɩ wɩ yɩna agɩbo dɩ wɩ nɩna ga, wɩ kho thɩ̃ɛ agɩbo dɩ wɩ nɩ hʋna'. 29 Dɩ liirǝ na bir na ƴaal Thãgba Kɔ̃tɩn anɩ Thãgba dɩ na yɩɩrɛ ado nɩ ƴaalʋʋ na anɩ ha fɛw na anɩ bɩ̃ fɛw. 30 Pɩpɩɩ paar a gɩrɛ fɛʋʋkɛ mɩ sonɩ dã, dɩ nɩ ha ha kʋɛrɛra liir na bir na ƴaal Thãgba Kɔ̃tɩn anɩ Thãgba nɩ bir na n nɩɩ nũu; 31 gɩdonɩ Thãgba Kɔ̃tɩn anɩ Thãgba dor bɔ fʋdaar a na dʋna nɩ na faga', a na bũburõ na', a na diinǝ nɔ bɩɛl ʋlfɛrɛɛkɛ a ʋlfɛnanɩ anɩ thɩ kɔ̃tɩ̃sɔa'.
Thãgba Kɔ̃tɩn dɩbara 'lẽ'lẽ dʋɔn Thãgba \ref Dǝt 6.20-25; 7.7-11; 11. 1-9, 22-25
32 Nɩ bulene gɩrɛ kanɩ bɔɔkɛ wa kɔ̃ nɩnɩ pa. A fʋna wireekɛ Thãgba tini tibil thɩɩra, fɔnɩ ʋ̃ thɩ khu pa a ka thʋ ʋ̃ khu pa, thɩ̃ caar thakɛ thʋnɛ dã pɩ bɛ? Dɩ wɩ nɩrɛ thɩ̃ caar thakɛ dɩ wɩ mɩɩna bɛ? 33 Ca ʋkha hale nɩɛnɛnɩ Thãgbaa wi dɩɩ mɩɩnaa dɔ thɩ̃thɩɩn sa hana yire, mɔ̃ nɩ nɩɛnɩ sa hana yire bɛ? 34 Agɩbo thãgba ʋmɔ̃ kɔɔ dʋɔn bʋɔrakɛ a jal ca kpɩɩsɔ thɩ̃thɩɩn a taa ɔɔ too dɩɩ the nɔ kpaa thɩ̃ kɔ̃tɩnanaakɛ a cʋʋnɩ na jẽ thɩ̃ɛsɔ, na ma kʋ thɩ̃ɛsɔ na kɛ̃kɛrɛnɛsɔ, a thaaraa ɲɔ̃ khɩɩ, a pɩɛraa fãga a tii dɩɩ the ma kʋ thɩɛsɔɔraakɛ a cʋʋnɩ ? Kpei! Sɩ Thãgba Kɔ̃tɩn anɩ Thãgba cʋʋ gɛr anɩdara Ejipiti dɩɩra dɩ nɩ toro yire. 35 Gelela cʋʋrɛ gɩ hɩrɛ nar, gɩ do nɔɔ nɩ jɩ gɩ do dɩ Thãgba Kɔ̃tɩn dʋɔn Thãgba, dakpɩɩ na hale a hʋa'. 36 Thãgbara ƴũu a ha sa cʋʋ nɩ dɩ nɩ nɩ ɔɔ wi a dɩɩr nɩ. Kɛ thɩɩra, a cʋʋ nɛr dɩ nɩ yɩ ɔɔ dɔ kɔ̃tɩ̃, a nɩɛna ɔɔ thɩmɩɩsɔ dɔ thɩ̃thɩɩn. 37 Gɩdonɩ a nar anɩ thɩ kɔ̃tɩ̃sɔ gɛr gɩ dɩ phiir nɛr awɩ mǝlsɔ a ti nɩ Ejipiti dɩɩra na ɔɔ puno kɔ̃tɩ̃ dɩ nɩ the. 38 A weelele ca kɔ̃tɩna kɛ hananɩ fãga a jɔ nɩ, sɩ a cʋʋ nɩ, nɩ lõ awɩ dʋɔ, a ha nɩ, nɩ hɩ̃ mɔ̃ nɩ yɩɛnɩ nĩ gɩrɛ dɩɩ ha. 39 Nɩ jɛ nĩ, a pɛ gɩ kpɩɛrɛra, dɩ Thãgba Kɔ̃tɩn dʋɔn Thãgba thãgbara ƴũu na thɩɩraakɛ dakpɩɩ na hala'. 40 Na n nɛ nũu Thãgbaa thɩmɩɩrsɔɔraakɛ kheranɩ na ɔɔ jɔfʋsɔɔraakɛ mɩ n ha nɩnɩ nĩ gɩrɛ, gɩ do nɔɔ gɩ da nar nɛrɛɛ na anɩ bɩsãsɔɔkɛ na kpaanɛnɩ nɩ hana yire nɩ pʋɔr dɩɩraakɛra Thãgba Kɔ̃tɩn anɩ Thãgba n ha nɩnɩ gɩ do bɔɔ khorɩda.
Dɩɩ yẽtherɩɩkɛ dɔnɩ taa 'lɛ dɩɩsɔ \ref Dǝt 19. 1-10; Joj 20; Thɩ 21.13
41 Dɩ Mʋɩjɩ phiire dɩɩ yẽther Jʋrdɛ̃ iiro wi phã paar, 42 gɩ do nɔɔ a tibil kʋ tibil sɩɩ do aa jɩ sa cʋa', dɩ ga do wo a n kɔɔ laarʋʋrɛ, ntɛ n puno a ca a lõ ga dɩ bɩɛlla a puno a 'lɛr taarɛ. 43 Gɛr ha gɩrɛ: Ribɛ̃ɛ məlsɔɔ dʋɔ, Besɛɛr dɩɩ gɩ, kɛ hanɩ bǝ̃ kparara ɓɛlɛnɔ, Gadɩɩ məlsɔɔ dʋɔ, Ramɔtɩ dɩɩ gɩ, kɛ hanɩ Galaadɩ bǝǝnnǝ. Manasee məlsɔɔ dʋɔ, Golã dɩɩ gɩ, kɛ hanɩ Basã bəənnə.
MƲƖJƖƖ BALANYƆ THƖMƖƖSƆ
Mʋɩjɩ bire 'loro jɔfʋ yʋɔra balanyɔdaa \ref Thɩ20.1-17; 2Pɩɛr 1.12-15
44 Gɩrɛ dɔ jɔfʋʋkɛ Mʋɩjɩ hanɩ Ɩjɩrayɛl bɩsana. 45 Gɛr dɔ dɩɩrɛ na Thãgbaa so na ɔɔ jɔfʋsɔɔkɛ Mʋɩjɩ hanɩ Ɩjɩrayɛl bɩsana ɔbɔɔkɛ wɩ thenɩ Ejipiti dɩɩra. 46 Jʋrdɛ̃ iiro wi phã paar wɩ kɔɔ ha, ɓɛlɛnɔɔkɛ Bɛtɩ-Peɔɔr dɩɩ pɛnɩ ƴɩɛ, Amɔɔr məlsɔɔ jamana Sɩhɔ̃ɔ dʋɔ kɛ kɔɔ hanɩ Hɛsɩbɔ̃ dɩɩra, kɛ Mʋɩjɩ na Ɩjɩrayɛl bɩsana kɔɔ kʋnɩ ɔbɔɔkɛ wɩ thenɩ Ejipiti. 47 Wɩ teere ɔɔ dɩ, na Basã jamana Ɔgɩɩ dɩ. Amɔɔr məlsɔɔ jamana yeɲɔɔle, Jʋrdɛ̃ iiro wi phã paar wɩ kɔɔ ha. 48 Thale Ɩjɩrayɛl bɩsana tee dɩɩ a fʋ Aroyɛɛr dɩɩra, kɛ hanɩ Arnɔ̃ kɔlɔ̃ nʋɔra a jalna dana Hɛrmɔ̃ gɔ̃gʋ̃ɔɔkɛ wɩ n wenɩ dakha Sɩɔ̃, 49 a gbana Araba fɛw Jʋrdɛ̃ iiro wi phã paar, a jal thʋ laɲɔ̃ khire, kɛ hanɩ Pɩsɩga gɔ̃gɔ̃ nɛɛra.