5
1 Dɩ Mʋɩjɩ wer Ɩjɩrayɛl bɩsana fɛw a so war: «Ɩjɩrayɛl bɩsana, nɩ pɛ nũu Thãgbaa thɩmɩɩrsɔɔkɛ kheranɩ na ɔɔ jɔfʋsɔɔkɛ mɩ n ha nɩnɩ nĩ. Nɩ dɩrɛ gɩ, a na ɔ gar a na cʋɛ mɔ̃ gɩ sonɩ. 2 Thãgba Kɔ̃tɩn asɩ Thãgba ʋlfɛna sɛr nɔ bɩɛl ʋlfɛrɛ Orɛbɩ gɔ̃gʋɔnnɔ. 3 Ga do asɩ thɩ kɔ̃tɩ̃sɔ a ʋlfɛna nɔ bɩɛl ʋlfɛrɛɛlera ga, sɩ sɛrɛ fɛʋʋkɛ hanɩ kɩɛr nĩ na yire gɩ. 4 Thãgba Kɔ̃tɩn mɩɩna nɛr gbelẽ gbelẽ gɔ̃gʋɔnnɔ dɔ thɩ̃thɩɩn. 5 Dɩ ga bɔɔle, mɛr kɔɔ hãa Thãgba Kɔ̃tɩn na nɛrɛɛ thɩ̃thɩɩn, a mɩɩ nɩ Thãgba Kɔ̃tɩnɩ thɩmɩɩ, gɩdonɩ maar kɔɔ fʋ nɛr dɔɔra, dɩ na jʋʋn gɔ̃gʋɔnnɔa'. Kɔ̃tɩn sor: 6 «Mɛrɛ, mɛr dʋɔn Thãgba Kɔ̃tɩn, afɩ Thãgbaakɛ te fɩnɩ Ejipiti dɩɩra dee dʋʋra.7 Fa n hana gɩ̃ɩ thãgba a ɓã mara'.
8 Fa n hana thɩ̃ɛɛkɛ wɩ cʋʋnɩ dɩ do thɩl, agɩbo thɩ̃ kpɩɩkɛ wɩ cʋʋnɩ dɩ ho dɩkha thãgbara ƴũu, agɩbo dɩkha kɛ thɩɩra dɩ dɩkha gɩ ɲɔ bɩnɔ thɩɩraakɛ tɩɛra'. 9 Fa n gburõkhu gaa thɩ̃sɔɔraale a na fʋɔr ga; gɩdonɩ mɛr Thãgba Kɔ̃tɩn afɩ Thãgba, mɩ dor Thãgbaakɛ n gbugəni, dɩ̃ heen thɛɛkɛ n laarɛ mɩnɩ sor na awɩ bɩsãsɔ a jalna dana balãther na balanã məlle, 10 Sɩ dɩ̃ bɔna wɩrɛ n naan mɩnɩ dɩ wɩ nɩ ɩ̃ jɔfʋsɔ nũu dɩ̃ dana mǝlle gbɩlanɩ. 11 Fa n gba mɛr Thãgba Kɔ̃tɩn afɩ Thãgbaa i, a na mɩɩna baba ga ; gɩdonɩ ma faa ntɛɛkɛ na cʋɛnɩ thala'.
12 Jɛna hɩɩr wire a na cɔ gɩ mɔna mɛr Thãgba Kɔ̃tɩn afɩ Thãgba so farnɩ. 13 Wire maadõo bɩnɔ, dɔ thɔma, cʋɛ afɩ thɔ̃ fɛw. 14 Sɩ wire makoɲɔ wirera, hɩɩr wire gɩ. Mɛr Thãgba Kɔ̃tɩn afɩ Thãgbaa wi gɩ. Fɛrɛ na afɩ bikuun na afɩ bikhɛr na afɩ thɔ̃daar kuun na afɩ thɔ̃daar khɛr na afɩ na, na afɩ kũkǝ̃ na afɩ nʋ̃sɔ fɛw, na kpakpalɩkɛ hanɩ afɩ pa, na n cʋʋ thɔ̃ dɩkharakɛ ga wiila'; Gɩ do nɔɔ afɩ thɔ̃daar kuun na thɔ̃daar khɛr n hɩɩr afɩ kha. 15 Jɛna gɩ dɩ kpakpal fɩ kɔɔ do Ejipiti dɩɩra sɩ dɩ mɛr Thãgba Kɔ̃tɩn 'laa ɲɔ̃ɔ a ti fɩ na ɩ̃ fãga ɲɔ̃. Gɛr gɩ dɩ mɛr Thãgba Kɔ̃tɩn afɩ Thãgba ha fɩ jɔfʋ fa n cɔ hɩɩr wire.
16 Na cɔ afɩ thɩ na afɩ nɩ mɔ̃kɛ mɛr Thãgba Kɔ̃tɩn afɩ Thãgba so farnɩ, dɩ mɛ̃ fa hana yire na pʋɔr gɩ da far, thɩɩraakɛ mɛr Thãgba Kɔ̃tɩn afɩ Thãgba n ha fɩnɩ.
17 Fa n kʋ tibilǝ'.
18 Fa n ƴaal khɛ kpɩa'. Fa n ƴaal kuun kpɩa'.
19 Fa n yuǝ'.
20 Fa n sõso pɛ afɩ alãkha tibilǝ ga.
21 Fa n pɩɛr haar afɩ alãkha tibilii khɛra ga. Fa n pɩɛr haar afɩ alãkha tibili cɔra ga, dɩ ɔɔ lɛra gɩ, dɩ ɔɔ thɔ̃daar kona gɩ, dɩ ɔɔ thɔ̃daar khɛra gɩ, dɩ ɔɔ nara gɩ, dɩ ɔɔ kũkǝnǝ gɩ, dɩ dɩkhara gɩrakɛ dɔnɩ ɔɔda ga.»
22 Gɛr dɔ thɩmɩaakɛ Thãgba Kɔ̃tɩn mɩɩnɩ nɛr Ɩjɩrayɛl bɩsana fɛw na nɔ kheu gɔ̃gʋɔnna ƴũu, dɔɔ na ndɔlɔpana na thuthuure thɩ̃thɩɩn, aa dɛɛnɔ dɩkha kpɩa'. A khere ger boka thelna phɛlɛ yeɲɔra a ha mɩ.
Maar fʋrɛ Ɩjɩrayɛl bɩsana Thãgbara \ref Thɩ 20.18-22, Ebi 12.18-29; Jã 13.17
23 Ɔbɔɔkɛ nɩ nɩɛnɩ nʋɔ dabirǝǝ thɩ̃thɩɩn, gɔ̃gʋɔnnaakɛ dɔnɩ dɔ haar, nɩ kɔɔ tɔr dã mɩ, nɛrɛ na wɩrɛ fɛʋʋkɛ dɔnɩ kɔ̃tɩna anɩ casɔra, na anɩ ƴɛkʋʋldasɔ. 24 Dɩ nɩ so : «Thãgba Kɔ̃tɩn asɩ Thãgba cʋʋ sɛr dɩ sɩ yɩ ɔɔ i dʋbɩ na ɔɔ wabɩ, a nɩɛna ɔɔ wi dɔ thɩ̃thɩɩn. Sɩ yɩɛrɛ nɩ̃ dɩ Thãgba Kɔ̃tɩn punone mɩɩna tibil sɩ ntɛ na khǝ'. 25 Dɩ nɛnɛ̃ aɲeraakɛ sa yaalɔ khir? A sɩ bo 'lo na nɩ Thãgba Kɔ̃tɩn asɩ Thãgbaa wi, dɔ kɔ̃tɩ̃ caakɛ na hɩ̃ sɛr sa khiir. 26 Tibil ʋmɔnakɛ kɔɔ nɛ Thãgba yidaarɩ wi dɩ ga n mɩɩ dɔ thɩ̃thɩɩn asɩ kha sa hana yire? 27 Fɛr Mʋɩjɩ n tɔ dana a pɛ gɩrɛ fɛʋʋkɛ Thãgba Kɔ̃tɩn asɩ Thãgba n mɩɩnɩ nũu sɩ na sɔ sar, sa pɛr nũu sa n cʋʋ mɔna Thãgba Kɔ̃tɩn a sonɩ.»
28 Dɩ Thãgba Kɔ̃tɩn nɩɛrɛ anɩ thɩmɩɩra ɔbɔɔkɛ nɩ n so marnɩ. Dɩ a so marɛ: «Mɩ nɩɛrɛ thɩmɩakɛ tɩbɩlaakɛ so farnɩ, gɩrɛ fɛʋʋkɛ wɩ so farnɩ bɔrɛ. 29 Ɔɔ! Adora ɔɔ ha cara wa hana wa n cʋna mɩ, wa n hɩɩna ɩ̃ jɔfʋsɔ fɛw, wɛr na awɩ mǝlsɔ na 'lɛrɔrɛ bɔnanɛ bɔɔ khora? 30 Jala sɔ war wɩ kɛra birǝ awɩ kẽkẽ waʋsɔ. 31 Sɩ fɛrɛ jɩlɛ kɛ na mɛrɛ, ma mɩɩ fɛr jɔfʋsɔ fɛw na ɩ̃ thɩmɩɩrsɔɔkɛ kheranɩ na dɩɩrɛɛkɛ fa ha wɩnɩ gɩ do nɔɔ wɩ pɛ cʋʋrɛra dɩɩraakɛ ma ha wɩnɩ wɩ hɩ̃.» 32 Nɩ nɛ nũu a na cʋɛ gɩrɛra Thãgba Kɔ̃tɩn anɩ Thãgba so narnɩ. Na n khokhɩa gara. 33 Na n kpa bɔɔbɔɔ Thãgba Kɔ̃tɩn anɩ Thãgbaa hʋraakɛ a nɩ narnɩ, gɩ do nɔɔ nɩ hana yire, nɩ pʋɔr thɩɩra, nɩ hana daw dɩɩraakɛra na gbanɩ na hɩ̃.