Na Thãgba Kɔ̃tɩn afɩ Thãgba \ref Dǝt 5.27-33; Mar 12.28-34; Khɩ 78.1-8
6
1 Yɛkɛ jɔfʋ na Thãgbaa thɩmɩɩrsɔɔkɛ kheranɩ na dɩɩrɛsɔɔkɛ Thãgba Kɔ̃tɩn anɩ Thãgba yɩnɩ ɩ̃ dɩrɛ nɩ, gɩ do nɔɔ na n kpa gar dɩɩraakɛra na lonɩ a na gba na hɩ̃, 2 gɩ do nɔɔ dakha nɩ ma Thãgba Kɔ̃tɩn anɩ Thãgba, na n ɔ ɔɔ dɩɩrsɔɔra na ɔɔ jɔfʋ fɛʋraakɛ mɩ ha nɩnɩ bɔɔ fɛʋʋkɛ na hananɩ yire nɛrɛ na anɩ bɩsãsɔ, na anɩ bɩsãsɔɔ bɩsãsɔ, gɩ cʋʋ nɩ hana yire nɩ pʋɔr thɩɩra. 3 Gɛr gɩ Ɩjɩrayɛl bɩsana nɩ pɛ gɩ nũu, a na ɔ gar a na cʋɛ gɩrɛ gɩ sonɩ gɩ do nɔɔ nɩ hana daw, nɩ ler dakha jɔɔ dɩɩraakɛra naƴɩlɛ̃ na thʋʋr n celnɩ mɔ̃kɛra Thãgba Kɔ̃tɩn anɩ thɩ kɔ̃tɩ̃sɔɔ Thãgba ʋlfɛna nɩnɩ. 4 «Pɛ nũu Ɩjɩrayɛl, Thãgba Kɔ̃tɩn asɩ Thãgba dɩbara 'lẽ'lẽ'le dʋɔn Thãgba Kɔ̃tɩn. 5 Na Thãgba Kɔ̃tɩn afɩ Thãgba na afɩ bɩ̃ fɛw, na afɩ ha fɛw, na afɩ fãga fɛw. 6 Dɩ dɔ thɩmɩaakɛ mɩ n ha fɩnɩ nĩ n too afɩ bɩnɔ. 7 Dɩrɛ gɩ afɩ bɩsãsɔ. Na mɩa gɩ ɔbɔɔkɛ fɩ hanɩ afɩ cɔ, na ɔbɔɔkɛ fɩ hanɩ kpaar paar na bɔɔkɛ fɩ phɩnɩ na bɔɔkɛ fɩ ɩɩrnɩ. 8 Le gɩ ɲɔɔna na kubiro gɩ do far jɩ̃ɩ fa n jɩna gɩ. 9 Khera gɩ afɩ lõfonɔ kpabɩrɛsɔɔra na afɩ dɩ lõfonɔsɔɔra.» \ref Dǝt 8. 6-20; 32.15-18; 1Tim 6.1710 Agɩpɩ Mʋɩjɩ bir so: Ɔbɔɔkɛ Thãgba Kɔ̃tɩn anɩ Thãgba na cʋʋ nɩnɩ dɩ na lõ dɩɩraakɛ a ʋlfɛnanɩ anɩ thɩ kɔ̃tɩ̃sɔ, kɛ dɔnɩ: Abɩraham na Ɩjakɩ na Jakɔbɩ, ɩnɩ n ha nɩ, kɛ dɔnɩ dɩ kɔ̃tɩ̃ ɓɔnaakɛ na mɩna', 11 na cɔnaakɛ henǝni lẽlẽ thɩ̃ caar dɩɩdɩɩkɛ na dɔnɩ nɛr pɩɛna, na ɲɔ tɛ korasɔkɛ na kɔɔ kpena', na dɩvɛ̃ thɩra na olɩvɩ thɩraakɛ na dɔnɩ nɛr kɔɔ thella ga, 12 dɩ ɔbɔɔkɛ na khonɩ na hi, nɩ dɔ bʋrɛ na n diinǝ Thãgba Kɔ̃tɩnɩkɛ cʋɛ nɩnɩ dɩ nɩ the dee dʋʋra Ejipiti dɩɩra ga. 13 Na n ma Thãgba Kɔ̃tɩn anɩ Thãgba. Ɔr dɩbara na n fʋɔr. Ɔɔ i na n ʋlfɛna. 14 Na n fʋɔr thãgba kpɩɩsɔɔkɛ dɔnɩ ca wɩrɛ diǝ narnɩɩ thãgbasɔa', 15 gɩdonɩ Thãgba Kɔ̃tɩn anɩ Thãgbaakɛ hanɩ anɩ thɩ̃thɩɩn dor Thãgbaakɛ hananɩ gbugi. A mɛ̃ gaa nĩkhii na fʋʋrɛ da bũburõ nɩ thɩɩra. 16 Na n fifilǝ Thãgba Kɔ̃tɩn anɩ Thãgba mɔ̃kɛ nɩ kɔɔ fifilǝǝni Masaa bǝǝnnǝ ga. 17 Sɩ na n jɩɛ hɩɩn Thãgba Kɔ̃tɩn anɩ Thãgbaa jɔfʋsɔ na ɔɔ thɩmɩɩsɔ na ɔɔ dɩɩrsɔɔkɛ a ha nɩnɩ. 18 Na n cʋɛ gɩrɛ saranɩ na gɩrɛ bʋɔnɔnɩ Thãgba Kɔ̃tɩnɩ ƴɛra, gɩ do nɔɔ nɩ hana daw, nɩ hɩ̃ dɩ ɓʋ̃ɔɔkɛra Thãgba Kɔ̃tɩn ʋlfɛnanɩ anɩ thɩ kɔ̃tɩ̃sɔ ɩnɩ n ha nɩ. 19 Thale na weele anɩ sodara fɛw anɩ ƴɛra mɔ̃kɛra Thãgba Kɔ̃tɩn sonɩ.
20 Dɩkhõo ado anɩ bɩsãsɔ bule nɩ aɲe dɔ kɩrʋ dɩ Thãgba Kɔ̃tɩn asɩ Thãgba ha nɩ jɔfʋsɔ, na thɩmɩasɔ na dɩɩrɛsɔɔkɛra ya? 21 Nɩ birsene wɩ ayɛ : «Dea sɩ kɔɔ do Ejipiti jamanana, kɛ wɩ n wenɩ Faarɔ̃, sɩ Thãgba Kɔ̃tɩn ti sɩ na ɔɔ fãga. 22 Thãgba Kɔ̃tɩn cʋʋrɛ Ejipitira na Faarɔna na ɔɔ cɔdarara fɛw, jẽ thɩ̃ɛsɔ na ma kʋ thɩ̃ɛsɔɔkɛ kpalanɩ ka, 23 sa ti sɩ le, ɩnɩ n jalna sɩ dɩɩraakɛ a kɔɔ ʋlfɛnanɩ asɩ thɩ kɔ̃tɩ̃sɔ ɩnɩ n ha sɩ. 24 Dɩ Thãgba Kɔ̃tɩn so sarɛ sa n pɛ ɩnɩɩ thɩmɩɩsɔ fɛw cʋʋrɛra a na ma ɩnɛr Thãgba Kɔ̃tɩn asɩ Thãgba gɩ do nɔɔ sɩ hana daw bɔɔ fɛw, ɩnɩ n faa sɩ dakha na yire mɔna gɩ hanɩ nĩ gɩrɛ. 25 Ado sɩ n nɩrɛ nũu a na cʋʋ Thãgba Kɔ̃tɩnɩ ƴɛra gɩrɛ fɛʋʋkɛ ɔɔ jɔfʋsɔ sonɩ sa dor tɩɩ sara.