Ɩjɩrayɛl bɩsana teenanɛ wɩ faa awɩbara koo Thãgbara \ref 1 Jã 5.21; Th t t 2.14; Dǝt 9.4-6; Joj 23.14-16
7
1 Mʋɩjɩ sor wo : Thãgba Kɔ̃tɩn anɩ Thãgba na cʋʋ nɛr dɩ na lõ dɩɩraakɛ na gbanɩ da do anɩda. A na weelele anɩ ƴɛra caarsɔɔkɛ jʋɔnɔnɩ, kɛ dɔnɩ Hɛtɩɩ mǝlsɔ na Gɩrgasɩdara na Amɔɔr məlsɔ na Kanãadara na Perejɩdara na Hɩvɩtɩsɔ na Jebusɩdara; caar makoɲɔ gɩɩkɛ jʋɔnɔnɩ a hana punone a jɔ nɩ. 2 Thãgba Kɔ̃tɩn anɩ Thãgba na gba wɛr na dʋ nɩ ɲɔ̃kɔɔ dɩ na puno wɩ. Nɩ kʋrɛ wɩ fɛw. Na n ʋlfɛna wɩ nɔ bɩɛl ʋlfɛra'. Na n jɩ wɩ bʋɔra ga. 3 Na n he kha na wa casɔɔla'. Na n gba anɩ bikhɛrsɔ a ha awɩ bikũusɔa', dɩ na n gba dakha awɩ bikhɛrsɔ a ha anɩ bikũusɔa'. 4 A mɛ̃ ga, wa cʋʋrɛ anɩ bikũusɔ n faa Thãgba Kɔ̃tɩn sɩ wa n fʋɔr thãgba kpɩɩsɔ, wɩ cʋʋ nĩkhii fʋ Thãgba Kɔ̃tɩn a bũburõ wɩ dapaara. 5 Nɩ yɛkɛ mɔ̃ na kanɩ na cʋʋ wɩ: Nɩ wɩɛrɛ awɩ bonɩ ji pasɔ, a cʋɔrɛ awɩ bokasɔɔkɛ wɩ gbuuni, a kuure awɩ Aseraa thɩl gãsɔ a thiǝ awɩ thɩl biisɔ. 6 Gɩdonɩ tɩɩ phuusɔ nɩ do Thãgba Kɔ̃tɩn anɩ Thãgbara. Nɛr Thãgba Kɔ̃tɩn anɩ Thãgba phiir a ti caar fɛʋraakɛ hanɩ thɩɩra, dɩ na do ɔɔ tookɛ a hɩnɩ kpefɩ. 7 Ga do nɛr jɔ caar fɛw gɛr Thãgba Kɔ̃tɩn na nar a phiir nǝ'. Nɛr ka 'lũ a jɔ caar fɛw. 8 Sɩ gɩdonɩ Thãgba Kɔ̃tɩn na nɛr, a ƴaal a cʋʋ gɩrɛɛkɛra a kɔɔ ʋlfɛnanɩ anɩ thɩ kɔ̃tɩ̃sɔɔ gɩ ha oti, gɛr gɩ dɩ ti nɩ na ɔɔ fãga a taa nɩ dee dʋʋra Ejipiti jamana Faarɔ̃ɔ ɲɔ̃kɔɔ. 9 Dɩ gɛr gɩ, nɩ jɛ gɩ do Thãgba Kɔ̃tɩn anɩ Thãgba dʋɔn Thãgba. Ɔr dʋɔn Thãgba bʋɔ. A n fʋrɛ ɔɔ nɔ bɩɛl ʋlfɛ dɩ hanana bɔ cʋʋrɛ wɩrɛraakɛ naanɛɛnɩ dɩ wɩ fʋrɔ ɔɔ jɔfʋsɔ dɩ dana məlle gbɩlanɩna. 10 Sɩ dɩ birse laarɛ dɩ ha wɩrɛ n laarɛɛnɩ dɩ cʋʋ wɩ dɩ wɩ khiir. A n sɩrɔ dɩɩ pʋɔra. Ʋrɛ n laarɛɛnɩ dapaara a n lɩmʋʋ gɩrɛ a teenanɩ. 11 Gɛr gɩ na n ɔ jɔfʋsɔɔra na dɩɩrɛsɔɔra na ɔɔ sosɔraakɛ mɩ n ha nɩnɩ nĩ a na cʋɛ gɩ. \ref Dǝt 28.1-14; Thɩ 23.22-3312 Ado na nɩ jɔfʋsɔɔraakɛ nũu a fʋrɔ gɩ a na cʋʋ, Thãgba Kɔ̃tɩn anɩ Thãgba na fʋrɔrɛ ɔɔ nɔ bɩɛl ʋlfɛ na ɔɔ bɔ cʋʋkɛra a kɔɔ ʋlfɛnanɩ anɩ thɩ kɔ̃tɩ̃sɔ. 13 A na na nɛr, a na bɔna nɩ, a na cʋʋ nɩ nɩ ler, a ha nɩ bɩsana jɔɔ a bɔna anɩ lɛ thɩ̃sɔɔkɛ dɔnɩ bile, na dɩvɛ̃ phaa na niin, a bɔna anɩ nasɔ na anɩ nʋ̃ yɩrasɔ wɩ ler dɩɩraakɛra a ʋlfɛnanɩ anɩ thɩ kɔ̃tɩ̃sɔ ɩnɩ n ha nɩ. 14 Na 'lɛr bɔnanɛ na jɔ caar fɛw. Kuun kõbuu na khɛr kõbuu na hale anɩ pa ga, dɩ nʋ̃ kõbuu gɩrakɛ anɩ nʋ̃sɔɔra ga. 15 Thãgba Kɔ̃tɩn na hʋnɔna nɛr kho caar fɛw. A na pɛ nar kho mananɛsɔɔkɛ a kɔɔ pɛnɩ Ejipitidara, kɛ nɩ jɩnɩ bɩɛllaka', sɩ wɩrɛ fɛʋraakɛ n 'laarɛ nɩnɩ a na thɔna gɩ. 16 Nɩ bũburone caar fɛʋʋkɛ Thãgba Kɔ̃tɩn na gbanɩ na dʋ nɩ ɲɔ̃kɔɔ, wa n kʋ nɩ bʋɔ yuurəka'. Dɩ na n fʋɔr awɩ thãgbasɔa', gɩdonɩ pheru ga do nar.
17 Agaboa' na sor anɩ hara aa caarsɔɔkɛ jɔrɛ a jɔ nɩ, mɔ̃ na puno wɩ na weele ya? 18 Na n ma wa'. Nɩ jɛna gɩrɛ Thãgba Kɔ̃tɩn anɩ Thãgba kɔɔ cʋʋnɩ Faarɔna na Ejipitidarara fɛw, 19 Thãgba Kɔ̃tɩn pɛ warɛ bɔgaar kɔ̃tɩ̃ɩkɛ anɩ yi yɩnɩ, na jɩ̃ɩsɔ, na ma kʋ thɩ̃ɛsɔ na ɔɔ fãga ɲɔ̃ɔkɛ a 'laanɩ ɔbɔɔkɛ a ti nɩnɩ thena. Thale a na cʋʋ caar fɛʋʋkɛra n kɔ nɩnɩ maar. 20 Thãgba Kɔ̃tɩn anɩ Thãgba na thɔna warɛrakɛ vɩvɩrkpora, gɩ cʋʋ wɩrɛ sɛnɩ na yire, kɛ na wʋɔnɛnɩ wɩ bũburõ. 21 Na n do wɩ kʋ nɩ maara', gɩdonɩ Thãgba Kɔ̃tɩn anɩ Thãgba har kha na nɛrɛ, Thãgba gɩɩkɛ kɔ̃tɩnanɩ da n kʋ maar. 22 Thãgba Kɔ̃tɩn anɩ Thãgba na weele wer gbe gbe gbe wɩ hʋnɔna nɩ. Na mar na weele wɩ babɩɛla', a mɛ̃ ga hɔ̃ nʋma na lerre a na bir na tɛna nɩ. 23 Thãgba Kɔ̃tɩn anɩ Thãgba na gba wɛr a na dʋ nɩ ɲɔ̃kɔɔ, a pɛ war maar phaphapha wɩ bũburona. 24 A na gbaar awɩ jamanasɔ a na dʋ nɩ ɲɔ̃kɔɔ, nɩ bũburõ awɩ isɔ thɩɩraakɛ. Bɩɛllakɛ na mar na jɩɩl anɩ ƴɛra gɩ dana bɔɔkɛ na bũburõ wɩna'. 25 Thɩ̃ɛsɔɔkɛ wɩ cʋʋnɩ dɩɩ do awɩ thãgbasɔ, nɩ thiǝ gɩ dɔɔra. Dɛ bulo agɩbo dɛɛkɛ wɩ cal gɩnɩsɔ, na n pɩɛr gar haar a gba gɩ gɩ dɔ anɩda, gɩ do nar pherʋa', gɩdonɩ kpɔ̃kpɔrɔ̃ thɩ̃ɛ gɩ Thãgba Kɔ̃tɩn anɩ Thãgbara. 26 Na n to kpɔ̃kpɔrɔ̃ thɩ̃ɛ anɩ cɔ, gɩ do wa gbɛbɩnɛ kha a na bũburõə'. Nɩ gba gɩ gɩ do nar ƴɔ̃ƴɔ̃ɔ thɩ̃ɛ na thɩ̃ kpalʋʋkɛ teenanɩ bũburone.