Dɩrɛɛkɛ Ɩjɩrayɛl bɩsana 'lɛnɩ bǝ̃ kparara. \ref Dǝt 11.1-17; 32.7-26; Eja 63. 7-14
8
1 Mʋɩjɩ sor wo: Na n ɔ jɔfʋ fɛʋraakɛ mɩ n ha nɩnɩ nĩ a na cʋɛ mɔ̃ gɩ sonɩ, gɩ do nɔɔ nɩ hana yire, nɩ ler dɩɩraakɛra Thãgba Kɔ̃tɩn ʋlfɛnanɩ anɩ thɩ kɔ̃tɩ̃sɔ ɩnɩ n ha nɩ gɩ do anɩda. 2 Dɔ nɩ jɩna ɩɩr caakɛ Thãgba Kɔ̃tɩn anɩ Thãgba cʋʋ nɩnɩ dɩ nɩ ɩɩr bǝ̃ kparara yɛna kpalaɲɔɔ bɩnɔ, gɩ do nɔɔ a pɛ nar nɩwɛ, a bena nɩ bɩnɛ a jɩ gɩrɛ hanɩ anɩ bɩnɔ ado na hɩɩnɛ ɔɔ jɔfʋsɔ, agɩbo na hɩɩn ga. 3 A pɛ nɛr nɩwɛra, a cʋʋ nɩ kɔmɛr kʋ nɩ, sɩ dɩ haan nɩ na maan kɛ na kɔɔ jɩnɩ dɩ anɩ thɩ kɔ̃tɩ̃sɔ ga; gɩ do nɔɔ a dɩɩr nɩ nɩ jɩ dɩ ga do dikor dɩbara na hana tibil yirǝ', sɩ gɩrɛ fɛʋʋkɛ n thɛnɩ Thãgba Kɔ̃tɩnɩ nɔɔ gɩ. 4 Anɩ kẽkẽ na ɓǝǝr, dɩ nɛɛ gɩ a mʋɔr nɩ yɛna kpalaɲɔɔ bɩnɔɔla'. 5 Nɩ jɛ anɩ bɩnɔ dɩ Thãgba Kɔ̃tɩn anɩ Thãgba n dɩɩr nɛr mɔ̃ thɩrɛ n dɩɩrnɩ ɔɔ bɩsã. 6 Na n hɩnɛ Thãgba Kɔ̃tɩn anɩ Thãgbaa jɔfʋsɔ, na n ɩɩr ɔɔ hʋsɔɔra, na n maanɛɛ.7 Gɩdonɩ Thãgba Kɔ̃tɩn anɩ Thãgba na cʋʋ nɛr dɩ na lõ dɩ bʋɔra. Dɩɩ gɩɩkɛ hananɩ mɩɩrsɔ, na ɲɔ bu kana na ɲʋ̃ɔsɔɔkɛ phananɩ ɓɛlɛnɔ na gɔ̃gɔnana. 8 Dɩɩ gɩɩkɛ hananɩ bile na ɔɔjɩ na dɩvɛ̃ thɩra na fɩgɩ thɩra na girenadɩ thɩra na olɩvɩ niin na thʋʋr. 9 Dɩɩ gɩ ka na khonɩ dɩkɔ na thʋnɔ. Thɩ̃ɛ na ɓɔr na'. Dɩɩ gɩɩkɛ ɔɔ bokana hananɩ thɛ, dɩ ɔɔ gɔ̃gɔ̃sɔ hana ther sɩɛ.
10 Ɔbɔɔkɛ na khonɩ dɩkɔ a na hi, nɩ khɩa Thãgba Kɔ̃tɩn anɩ Thãgba gɩdonɩ a ha nɛr dɩ bʋɔ. 11 Nɩ dɔ bʋrɛ na n diinǝ Thãgba Kɔ̃tɩn anɩ Thãgba na hɩɩn ɔɔ jɔfʋsɔ na ɔɔ dɩɩrsɔ na ɔɔ sosɔɔkɛ mɩ n ha nɩnɩ nĩ gaa ga. 12 Ɔbɔɔkɛ na khonɩ na hi, ɔbɔɔkɛ na mɩnɩ cɔ ɓɔna na n cɔrɔ, 13 dɩ ɔbɔɔkɛ anɩ nʋ̃ yɩra na anɩ nʋ̃ kɔ̃tɩ̃sɔ na lernɩ, dɩ anɩ dɛ bulo na anɩ dɛ na jɔr, dɩ thɩ̃ɛ fɛʋʋkɛ nɩ hananɩ na ler, 14 Nɩ dɔ bʋrɛ, na n ti gune a diinə Thãgba Kɔ̃tɩn anɩ Thãgba ga. Ɔr te nɩ Ejipiti dɩɩra dee dʋʋra. 15 A cʋʋ nɛr dɩ nɩ ɩɩr bǝ̃ kpara kɔ̃tɩ̃ɩnaakɛ n kɔnɩ maar ka si puunə na lanasɔ hanɩ, ka ɲʋɔn na hana'. A cʋʋrɛ ɲʋɔn dɩɩ phã bokaaraakɛ khɩɩnɔnɩ dɩ ha nɩ. 16 A ha nɛr maanɩkɛ anɩ thɩ kɔ̃tɩ̃sɔ na jɩna', bǝ̃ kparaara dɩ nɩ kho. A pɛ nɛr nɩwɛra, a be nɩ bɩnɛ, agɩpɩ dɩ cʋʋ nɩ bɔɔ. 17 Nɩ dɔ bʋrɛ na n kpɩɛr anɩ hara waa dɩ anɩ fãga na anɩ puno dɔ nɔɔ dɩ nɩ hana lẽle thɩ̃ɛsɔɔla'. 18 Nɩ jɛna dɩ Thãgba Kɔ̃tɩn anɩ Thãgba hana nɩ fãga dɩ nɩ 'lɛna lẽle thɩ̃ɛsɔɔkɛ, gɩ do nɔɔ a jɩɩ nɩna ɔɔ nɔ bɩɛl ʋlfɛɛkɛ a ʋlfɛnanɩ anɩ thɩ kɔ̃tɩ̃sɔ mɔ̃ a cʋʋnɩ nĩ gɩrɛ. 19 Ado nɩ diinǝ Thãgba Kɔ̃tɩn anɩ Thãgba, Ado na fʋɔr thãgba kpɩɩsɔ, ado nɩ gburõkhu na fʋɔr wɩ, mɩ so narɛ nĩ casɩ dɩ na bũburone. 20 Na bũburone sobɔra mɔna Thãgba Kɔ̃tɩn na bũburonɩ ca wele anɩ ƴɛra, gɩdonɩ na pɛ Thãgba Kɔ̃tɩn anɩ Thãgba nũǝ'.