Ɩjɩrayɛl bɩsana kɔɔ ɩɩrnanɛ lãʋ \ref Khɩ 44.2-4; Lev.18. 25-26; Khɩ 78.1-55; Eje 20.5-22, thɩ 32
9
1 Ɩjɩrayɛl bɩsana, nɩ pɛ nũu. Na iire Jʋrdɛ̃ kɛ na gbe, sɩ na tee dɩɩ caarsɔraakɛ kɔ̃tɩnanɩ a hana punone a jɔ nɩ. Dɩ kɔ̃tɩnasɔ gɩɩkɛ hananɩ dɩ bɛr gʋʋsɔ dɩɩ thʋ thãgbara ƴũu. 2 Caar gɩɩkɛ jʋɔnɔnɩ a hana tɩɩ gbanaakɛ dɔnɩ Anakɩɩ mǝlsɔɔkɛ nɩ jɩnɩ. Nɩ nɩɛrɛ wɩ n sonɩ aa : «Amɛ na 'la na pɩɛr Anakɩɩ mǝlsɔ ? » 3 Nɩ jɛ dɩ kɛ na gbe Thãgba Kɔ̃tɩn anɩ Thãgbaa thɛthɛ na gbana nɩ ƴɩɛ mɔ̃ thɩ̃ kʋɛ dɔ hanɩ. Ɔr na thiǝ wɩ, a wur wɩ anɩ ƴɛra, nɩ weele wɩ, nɩ bũburõ wɩ dapaara mɔna Thãgba Kɔ̃tɩn so narnɩ.4 Dɩ ɔbɔɔkɛ Thãgba Kɔ̃tɩn anɩ Thãgba na weele wɩnɩ anɩ ƴɛra, na n so anɩ hara aa nɩ sarɛ gɛr dɔ nɔɔ dɩ Thãgba Kɔ̃tɩn cʋʋ nɩ dɩ nɩ gba dɩɩle a hɩ̃a'. Sɩ awɩ puu cʋʋ dɔ kɩrʋ dɩ Thãgba Kɔ̃tɩn weele wɩ anɩ ƴɛra. 5 Kpei, ga do anɩ fɩl sar anɩ telẽ dɔ nɔa', sɩ caarsɔɔle puu cʋʋ dɔ nɔɔ dɩ Thãgba Kɔ̃tɩn anɩ Thãgba na n weele wɩ anɩ ƴɛra; gɩ do nɔɔ dakha Thãgba Kɔ̃tɩn n jɩɩ nɩna ɔɔ ʋlfɛɛkɛ a ʋlfɛnanɩ anɩ thɩ kɔ̃tɩ̃sɔ Abɩraham na Ɩjakɩ na Jakɔbɩ. 6 Gɛr gɩ nɩ jɛ dɩ ga do anɩ fɩl sar dɔ nɔɔ dɩ Thãgba Kɔ̃tɩn anɩ Thãgba na n ha nɩ dɩ bɔbʋɔɔla', gɩdonɩ nɩ dor caarɩkɛ nʋrɛnɩ nũu ga do kpãkpalã ga.
7 Nɩ jɛna gɩ, na n diinǝ nĩkhii caakɛ nɩ kʋnɩ Thãgba Kɔ̃tɩn anɩ Thãgba bǝ̃ kparara ga. A fʋna wireekɛ nɩ thenɩ Ejipiti a ɩna dana kɩɛr, laʋna nɩ n ɩɩrna Thãgba Kɔ̃tɩnna. 8 Orɛbɩ gɔ̃gʋɔnnɔ, nɩ kʋrɛ Thãgba Kɔ̃tɩn nĩkhii ka, dɩ ƴaal a bũburõ nɩ. 9 Ɔbɔɔkɛ mɩ jʋʋnɩ gɔ̃gʋɔnnɔ ɩ̃ gba boka thelna phɛlɛsɔɔkɛ hananɩ Thãgba Kɔ̃tɩnɩ nɔ bɩɛl ʋlfɛ thɩmɩɩrɩɩkɛ a ʋlfɛna nɩnɩ, mɩ cɔ le wire kpalaɲɔ na dɩtɩnɛ kpalaɲɔ sɩ ma kho dikor dɩ ɲʋɔn gɩ dɩ̃ ɲɔa'. 10 Dɩ Thãgba Kɔ̃tɩn ha mɛr boka thelna phɛlɛ yeɲɔ, ka ɔr Thãgbaa thɛthɛɛ ɲẽbi kherenɩ dɩɩ ha mɔna thɩmɩa fɛʋʋkɛ a mɩɩ nɩnɩ gɔ̃gʋɔnɔ dɔ thɩ̃thɩɩn kpa jɛ wire. 11 Dɩ wɩllʋʋ kpalaɲɔ na dɩtɩnɛ kpalaɲɔɔ pɩpɩɩ paale, Thãgba Kɔ̃tɩn ha mɛr boka thelna phɛlɛ yeɲɔɔle hananɩ Thãgba Kɔ̃tɩnɩ nɔ bɩɛl ʋlfɛ thɩmɩɩr.
12 Dɩ Thãgba Kɔ̃tɩn so mar: «Ɩrɛ kɩɛr a gbuno pʋpʋr gɩdonɩ afɩ tookɛ fɩ tini Ejipiti cʋʋrɛ sopuu kokʋʋ ka. Wɩ lɩ̃ɛ dapaara sa faa hʋɛkɛ mɩ nɩ warnɩ. Wɩ hɩlɛ ther a cʋʋ thɩl.» 13 Dɩ Thãgba Kɔ̃tɩn bir so mar: «Mɩ yɩrɛ tɩbɩlaakɛ, tɩbɩla wɛɛkɛ nʋrɛnɩ nũu ka. 14 Sɛ mar ɩ̃ bũburõ wɩ, ɩ̃ pɩɩn awɩ i thɩɩra sɩ̃ ha fɩ caarɩkɛ hananɩ punone a jɔrna a jɔ wɩrɛ.» 15 Dɩ mɩ kɛrɛ gɔ̃gʋɔnnaakɛ dɔnɩ do dɔ haar a gbũ na boka thelna phɛlɛ yeɲɔɔlera ɲɔ̃kɔɔ, kɛ hananɩ nɔ bɩɛl ʋlfɛ thɩmɩɩr. 16 Mɩ yɩɛrɛ sobɔr dɩɩ do sopuu kʋkʋʋ nɩ cʋʋ Thãgba Kɔ̃tɩn anɩ Thãgbara. Nɩ hɩlɛ ther a cʋʋ na ɓollʋ. Nɩ lɩ̃ɛ dapaara sa faa hʋɛɛkɛ Thãgba Kɔ̃tɩn nɩ narnɩ. 17 Dɩ mɩ fʋrɛ boka thelna phɛlɛ yeɲɔɔlera ɲɛ̃ɛ yeɲɔ sa kpɛɛ anɩ ƴɛra a cʋɔr.
18 Dɩ mɩ gburõkhure Thãgba Kɔ̃tɩnɩ ƴɛra. Mɩ toore le mɔna mɩ kɔɔ cʋʋnɩ dɩwɩllʋ kpalaɲɔ na dɩtɩnɛ kpalaɲɔ sɩ ma kho dikor dɩ ɲʋɔn gɩ dɩ̃ ɲɔa', dɩɩ do anɩ sopuusɔ fɛw dɔ kɩrʋ, gɩdonɩ nɩ cʋʋrɛ thɩ̃ɛɛkɛ kpalanɩ Thãgba Kɔ̃tɩnna dɩɩ kʋʋ nĩkhii. 19 Maar kɔɔ fʋ mɛr, mɔ̃ mɩ yɩnɩ nĩkhi khɩɩkɛ Thãgba Kɔ̃tɩn gbana nɩnɩ a ƴaal a thii nɩ. Sɩ Thãgba Kɔ̃tɩn bire tu ɩ̃ ƴɛɛ wo. 20 Nĩkhii kɔɔ fʋrɛ Thãgba Kɔ̃tɩn Aarɔna dakha dɩɩ kar dɩ ƴaal a bũburõo. Sɩ mɩ kɔɔ bɩɛlɛ Thãgba Kɔ̃tɩn dakha a pɩɛraa ga bɔɔlera. 21 Dɩ mɩ gbaar na ɓollʋʋlera nɩ cʋʋnɩ, kɛ dɔnɩ anɩ sopuu thɩna a thii dɔɔra. Agɩpɩ mɩ gbaar nã dɩɩ phu kololo, dɩ̃ gba a deere ɲʋɔnnaakɛ n celanɩ gɔ̃gʋɔnnɔ dɩ ga n gbũ.
22 Nɩ kɔɔ kʋrɛ Thãgba Kɔ̃tɩnɩ nĩkhii dakha Tabeera na Masa na Kɩbʋrɔtɩ-Hataava bǝǝnnǝ. 23 Nɩ kɔɔ ɩɩrnanɛ lãʋ Thãgba Kɔ̃tɩn anɩ Thãgbara Kadɛsɩ-Baarnea bǝǝnnǝ ɔbɔɔkɛ Thãgba Kɔ̃tɩn kɔɔ thɔ̃ nɩnɩ aa nɩ jʋnɛ tea dɩɩkɛra ɩnɩ n ha nɩnɩ. Na kɔɔ pɩɛ haara', na nɩ ɔɔ thɩmɩɩra nũu dakha ga. 24 A fʋna bɔɔkɛ mɩ jɩ nɩnɩ, nũ nʋʋrɛ Thãgba Kɔ̃tɩnna dɔ anɩda.
25 Dɩ mɩ gburõkhure Thãgba Kɔ̃tɩnɩ ƴɛra. Mɩ toore le dɩwɩllʋʋ kpalaɲɔ na dɩtɩnɛ kpalaɲɔ gɩdonɩ Thãgba Kɔ̃tɩn kɔɔ sor ɩna bũburõ ner. 26 Dɩ mɩ bɩɛlɛ Thãgba Kɔ̃tɩn a so wɔɔ: «Thãgba Kɔ̃tɩn, fa n bũburõ tɩbɩlaakɛ dɔnɩ afɩ tookɛ fɩ hɩnɩ, kɛ fɩ taanɩ dɩɩ the afɩ wabɩra, a ti wɩ Ejipiti na afɩ fãga ga. 27 Jɛna afɩ thɔ̃daraakɛ dɔnɩ Abɩraham na Ɩjakɩ na Jakɔbɩ. Fa n therna tɩbɩlaakɛ nũ nʋʋr na awɩ kpal na awɩ sopuə'; 28 A mɛ̃ ga dɩdara, dɩɩraakɛ fɩ ti sɩnɩ na so wɩ yɩ: «Fɛr Thãgba Kɔ̃tɩn fa kɔɔ hana punone a na cʋʋ wɩ wɩ lõ dɩɩraakɛ fɩ yɩnɩ fa ha wɛra', dɩ wo fɩ n laar wɛr gɛr gɩ dɩ fɩ ti wɩ a thena fɩ kʋʋr bǝǝnnǝ.» 29 Sɩrakɛ afɩ tookɛ fɩ hɩnɩ kpefɩ wɩ do, kɛ fɩ tini thena na afɩ puno na afɩ fãgaakɛ na hanɩ mɩɛrɛra ga.