Thãgba Kɔ̃tɩn faarɛ ɔɔ too dɩpa a ha wɩ \ref Thɩ 34; Ther 3 na 18
10
1 Dɩ Thãgba Kɔ̃tɩn so mar ga bɔɔlera: «Thela boka phɛlɛ yeɲɔ cacadaa khaalera a jʋnɛna mar kɛ gɔ̃gʋɔnnɔ. Cʋɛ dakha khɛsʋʋ na thɩrʋ. 2 Ma kherene boka phɛlɛ yeɲɔɔraale jɔfʋ yʋɔrɩkɛ kɔɔ hanɩ cacadaaraale fɩ cʋɔrnɩ, fɩ gba fɩ pɛ khɛsʋʋra.» 3 Dɩ mɩ cʋʋrɛ khɛsʋʋra na Akasɩa thɩrʋ, a thelna boka phɛlɛ yeɲɔ cacadaa khaalera a fʋrɔ ɲɔ̃kɔɔ a jʋʋna gɔ̃gʋɔnnɔ. 4 Dɩ Thãgba Kɔ̃tɩn khererore jɔfʋ yʋɔrɩkɛra a kɔɔ kherenɩ cacadaara a ha mɩ, kɛ dɔnɩ jɔfʋ yʋɔrɩkɛra a kɔɔ mɩɩ nɩnɩ gɔ̃gʋɔnnɔ dɔ thɩ̃thɩɩn kpa jɛ wire. 5 Dɩ mɩ ther gɔ̃gʋɔnnɔ a gbunə bokanaalera a pɛ khɛɛsʋʋraakɛra mɩ cʋʋnɩ dɩɩ too le mɔna Thãgba Kɔ̃tɩn kɔɔ kpãkpaan marnɩ. 6 Dɩ Ɩjɩrayɛl bɩsana ther Beerɔtɩ-Bene-Yakãa bənnəə a jal Mosera. Le Aarɔ̃ khi dɩ wɩ dʋʋ sɩ ɔɔ bikuun Eleajaar gba ɔɔ too pa bonɩ ji thɔmana. 7 Dɩ wɩ ther liir a jal Gudɩgoda a the Gudɩgoda a jal Yotɩbata dɩɩraakɛ mɩɩrsɔ hanɩ jɔɔ. 8 Ga bɔɔraalera Thãgba Kɔ̃tɩn phiir Levɩɩ ca a na n gba Thãgba Kɔ̃tɩnɩ ʋlfɛ khɛɛsʋ bɔɔ fɛw, a na dɔ Thãgba Kɔ̃tɩnɩ thɔ̃, a gba ɔɔ i a na bɔnana tɩbɩla. Dɩ gɛrra wɩ n cʋʋ a dana nĩ. 9 Gɛr dɔ nɔɔ Levɩɩ ca na 'lɛnɩ thɩɩ na thɩ̃ɛsɔɔkɛ wɩ n tɩnɛnɩ ɔɔ omɩsɔɔ thɩ̃thɩɩna'. Thãgba Kɔ̃tɩnɩ thɩ̃sɔ dɔ ɔɔda, mɔna Thãgba Kɔ̃tɩn anɩ Thãgba sʋʋraanɩ.10 Dɩ mɩ toore gɔ̃gʋɔnnɔ caca khaara dɩwɩllʋʋ na dɩtɩnɛ kpalaɲɔ. Dɩ Thãgba Kɔ̃tɩn ture ɩ̃ ƴɛɛ wo a sɩrɔ aa bũburõ na'. 11 Agɩpɩ Thãgba Kɔ̃tɩn so marɛ ɩ̃ ɩrɛ a gbana tɩbɩla ƴɩɛ wɩ lõ dɩɩraakɛra ɩnɩ ʋlfɛnanɩ awɩ thɩ kɔ̃tɩ̃sɔ ɩnɩ n ha wɩ.
Thãgba sor ɔɔ too n hanana nũ nɩɩr na naʋ \ref Dǝt 7. 6-11; 6. 20-25; Rɔm 12 1-2
12 Nɛnɛ̃ Ɩjɩrayɛl bɩsana, aɲe Thãgba Kɔ̃tɩn anɩ Thãgba n ƴaal nar saagado nɩ hanana maar ɔrra, a na ɩrɛ ɔɔ hʋsɔɔra fɛw, a naanɛɛ a na dɔnanaa thɔma na anɩ ha fɛw na anɩ bɩ̃ fɛw ga? 13 Dɩ aɲe Thãgba Kɔ̃tɩn n ƴaal nar saagado nɩ hanana nũ nɩɩr ɔɔ jɔfʋsɔɔra na ɔɔ dɩɩrsɔɔraakɛ mɩ ha nɩnɩ nĩ, gɩ do nɔɔ nɩ hana daw ga? 14 Hɩnɛ, Thãgba Kɔ̃tɩn anɩ Thãgba hɩna thãgbara ƴũu fɛw na thɩɩ na thɩ̃ɛ fɛʋʋkɛ hanɩ ɔɔ bɩnɔ. 15 Dɩ anɩ thɩ kɔ̃tɩ̃sɔ dɩbara Thãgba Kɔ̃tɩn ti a na wɩ. Dɩ a wɩ karɔ, nɛr awɩ mǝlsɔ wɛ. Nɛr dɔ wɩrɛ a phiirni caar fɛʋʋ thɩ̃thɩɩn mɔ̃ nɩ yɩɛnɩ gɩrɛ nĩ dɩ gɩ ha. 16 Nɩ hana Thãgba Kɔ̃tɩn anɩ ha fɛw na n bir laanaa bã, 17 gɩdonɩ Thãgba Kɔ̃tɩn anɩ Thãgba dʋɔn Thãgba a jɔ thãgbasɔɔra, ɔr dʋɔn Kɔ̃tɩn kɔ̃tɩnasɔɔra. Thãgba gɩɩkɛ kɔ̃tɩnanɩ a hana fãga da n kʋ maar; a n hɩɩn dɩɩdɩa', a n tu khaardaa sɩ a gõgolõa'. 18 A n teere dɩ pɛ khilǝ̃buurə na khikhɛrʋra. A nar kpakpal dɩ haa dɩkɔ na kẽkena. 19 Na n na kpakpala gɩdonɩ nɛrɛ dakha nɩ kɔɔ dor kpakpala Ejipiti dɩɩra a yɩɛ.
20 Na n cɔ Thãgba Kɔ̃tɩn anɩ Thãgba, ɔr na n fʋɔr, nɩ tɔɔ ɔra. Ɔɔ i na n ʋlfɛna. 21 Ɔr teana na n kpãganɛ. Ɔr bɩɛl dɩbara dʋɔn anɩ Thãgba. Ɔr cʋɛ anɩ thɩ̃thɩɩn thɩ̃ɛsɔɔkɛ kɔ̃tɩnanɩ dɩ ga n kʋ maar dɩ anɩ yi yɩɛ. 22 Anɩ thɩ kɔ̃tɩ̃sɔ na jalnɩ Ejipiti tɩbɩla kpalãther yʋɔr wɩ ha, sɩ nɛnɛ̃ Thãgba Kɔ̃tɩn anɩ Thãgba cʋʋ nɛr dɩ nɩ ler a hona ƴepǝlǝ̃be thãgbara ƴũu.