Gɩrɛ Thãgba kɔɔ cʋʋnɩ ɔɔ toora \ref Dǝt 8; 28. 1-24
11
1 Dɔ nɩ na Thãgba Kɔ̃tɩn anɩ Thãgba na n hɩɩna bɔɔ fɛw ɔɔ so na ɔɔ dɩɩrsɔ na ɔɔ hʋsɔ na ɔɔ jɔfʋsɔ. 2 Nɩ jɛ nĩ dɩ ga do anɩ bɩsãsɔɔkɛ na jɛnɩ gɩrɛ Thãgba Kɔ̃tɩn anɩ Thãgba cʋʋnɩ a yɩna gɩ, mɩ n mɩɩna ga. Sɩ nɛrɛɛ thɛthɛ mɩ n mɩɩna nɛrkɛ yɛnɩ ɔɔ wabɩ na ɔɔ punookɛ na hanɩ mɩɩrɛra ga. 3 Nɩ yɩrɛ ɔɔ jẽsɔ na ɔɔ thɔ̃sɔɔkɛ a cʋʋnɩ Ejipitii dɩɩra Faarɔnaakɛ dɔnɩ jamana na ɔɔ dɩra fɛw. 4 Dɩ nɩ yɩrɛ gɩrɛ a cʋʋnɩ Ejipiti sɔrasɛ na awɩ gãgosɔɔra na awɩ koke hotorosɔ, mɔ̃ a khanɩ laɲɔ sɩɛ a thi war ɔbɔɔkɛ wɩ n kɔɔ wee nɩnɩ, Thãgba Kɔ̃tɩn cʋʋ wɛr dɩ wɩ bũburõ khorr. 5 Nɩ yɩrɛ gɩrɛ a cʋʋ narnɩ bǝ̃ kparara dɩ gɩ do nɔɔ nɩ dã kɩɛr, 6 na gɩrɛ a cʋʋnɩ Datã na Abɩramɩɩkɛ dɔnɩ Elɩabɩ bikuun, kɛ thɛnɩ Ribɛ̃ɛ cara. Thɩɩ lɩɛrɛ a dɩɩ wɩ Ɩjɩrayɛl bɩsana fɛʋʋ ƴɛra wɛr na awɩ cɔdara na awɩ kẽkẽ wasɔ na wɩrɛ fɛʋʋkɛ tuonɩ awɩda. 7 Anɩ yi yɩrɛ thɩ̃ kɔ̃tɩnaale fɛw Thãgba Kɔ̃tɩn cʋʋnɩ.8 Dɩ gɛr gɩ na n hɩnɛ ɔɔ jɔfʋsɔɔkɛ mɩ n ha nɩnɩ nĩ gɩ cʋʋ nɩ nɩ hana fãga nɩ jal nɩ tee dɩɩkɛ na gbanɩ na hɩ̃. 9 Ga dor nɔɔ dakha nɩ hana yire nɩ pʋɔr dɩɩraakɛra Thãgba Kɔ̃tɩn ʋlfɛnɩ ɩnɩ n ha anɩ thɩ kɔ̃tɩ̃sɔ na awɩ mǝlsɔ. Dɩɩ gɩɩkɛ naƴɩlɛ̃ na thʋʋr n celonɩ.
10 Dɩɩkɛ na teenɩ na hɩ̃ na ho Ejipiti dɩɩkɛ nɩ theronɩ ka nɩ n kɔɔ diirni a ɓɛl ɲʋɔn na nɔɔ a pɔna na sɛna nãkʋɔr khaa ga. 11 Dɩɩkɛ na teenɩ na hɩ̃, dɩɩ gɩɩkɛ hananɩ gɔ̃gɔna na ɓɛlɛ̃sɔɔkɛ thãgba ɲʋɔn n sɛnɩ. 12 Dɩɩ gɩɩkɛ Thãgba Kɔ̃tɩn anɩ Thãgba n hɩɩnɩ bɔɔbɔɔ, a n hɩɩnʋʋnɛ yɩɛrɩ fʋ pa dɩ dana yɩɛrɩ pɩpa.
Bɔnanɛ agɩbo sʋ̃ɔ \ref Dǝt 6.4-9; 27.11-26; 30. 15-20; Mt 7. 24-27
13 Ado na nɩ nũu jɔfʋsɔɔraakɛ mɩ n ha nɩnɩ nĩ a na Thãgba Kɔ̃tɩn anɩ Thãgba, a na fʋɔrʋʋ na anɩ ha fɛw na anɩ bɩ̃ fɛw, 14 a na 'laarɛ thãgba ɲʋɔn bɔ bʋɔra anɩ dʋɔ, yʋʋro na lamɩnɔ, gɩ do nɔɔ nɩ 'lɛ bile na dɩvɛ̃ phaa na niin, 15 Ma cʋʋrɛ dakha hʋɔn n phu anɩ dʋɔ nʋma na n kho. Na khor dɩkɔ na n hi. 16 Nɩ jɩɛ dʋ bʋrɛ anɩ ha na n fɩɩl nɩ, nɩ lɛ̃ hʋɛra, nɩ gburõkhu thãgba kpɩɩsɔɔra na n fʋɔr wa'. 17 A mɛ̃ ga Thãgba Kɔ̃tɩn na gbana nɛr nĩkhii a khaan ƴũu thãgba ɲʋɔn na ɩ̃a', thɩɩ na 'laa thɩ̃a', nɩ khiir dapaara dɩ bɔbʋɔraakɛra Thãgba Kɔ̃tɩn na ha nɩnɩ.
18 Nɩ pɛ anɩ hara na anɩ kpɩɛra thɩmɩasɔɔkɛ mɩ n dɩɩr nɩnɩ. Nɩ le gɩ ɲɔɔna na kubiro gɩ do nar jɩɩn. 19 Na n dɩrɛ gɩ anɩ bɩsãsɔ. Na n mɩa wɩ ɔbɔɔkɛ nɩ hanɩ cʋɔrɔ na ɔbɔɔkɛ nɩ hanɩ kpaar paar na ɔbɔɔkɛ nɩ n phɩnɩ na ɔbɔɔkɛ nɩ n ɩɩrnɩ. 20 Nɩ Khera gɩ anɩ lõfonɔ gɛlala, na anɩ dɩ lõfonɔsɔɔra. 21 Ga dor nɔɔ nɛrɛ na anɩ bisɔɔ yi n pʋɔr dɩɩraakɛra Thãgba Kɔ̃tɩn ʋlfɛnɩ ɩnɩ n ha anɩ thɩ kɔ̃tɩ̃sɔ mɔ̃kɛ thãgbara ƴũu na thɩɩ n pʋɔrnɩ.
22 Ado na nɩ nũu bɔɔbɔɔ ɔɔ jɔfʋsɔɔrakɛ mɩ n ha nɩnɩ, a pɛ gɩ cʋʋrɛra, a na na Thãgba Kɔ̃tɩn anɩ Thãgba, a na ɩɩr ɔɔ hʋsɔɔra fɛw a too ɔrra, 23 Thãgba Kɔ̃tɩn na weelele anɩ ƴɛra ca jɔɔle hananɩ punone a jɔ nɩ, sɩ dɩ na gba awɩ dɩ. 24 Paar wo paarɩkɛ anɩ nɛ na sanɩ, anɩda ga do. Anɩ pɛl na ther bǝ̃ kparara, ka wire phanɩ dɩ pɛ ɲɔ̃bɩlã, gɩ jal gɩ thʋ Lɩbã gɔ̃gɔnana ka wire phanɩ dɩ pɛ ɲɔ̃bɔɔra, gɩ gba Efɩratɩ mɩɩr kɛ hanɩ wi phã paar na Mediterane laɲʋɔn kɛ hanɩ wi lõ paar. 25 Tɩɩ bɩɛllakɛ na 'la na jɩɩl a na pɩɛr na'. Thãgba Kɔ̃tɩn anɩ Thãgba na pɛr tɩbɩlala maar, wa n ma nɩ paar wo paaraakɛ na kanɩ mɔna a sonɩ.
26 Nɩ hɩnɛ, mɩ n thɩɩnɛ nĩ bɔnanɛ na sʋɔn anɩ ƴɛra. 27 Na 'lɛr bɔnanɛ ado na nɩ nũu Thãgba Kɔ̃tɩn anɩ Thãgbaa jɔfʋsɔɔraakɛ mɩ n ha nɩnɩ nĩ. 28 Sɩ na 'lɛr sʋɔn ado nɩ nʋʋr nũu Thãgba Kɔ̃tɩn anɩ Thãgbaa jɔfʋsɔɔra a lɛ̃ sa faa hʋɛɛkɛ mɩ nɩ narnɩ nĩ, sa ma thãgba kpɩɩsɔɔkɛ na jɩna'.
29 Ɔbɔɔkɛ Thãgba Kɔ̃tɩn anɩ Thãgba na cʋʋ nɩnɩ dɩ na lõ dɩɩraakɛ na gbanɩ na hɩ̃, nɩ jʋnɛ Garɩjɩm gɔ̃gʋɔnna a hulene a sɔ thɩmɩɩr besɔɔkɛ 'laanɛnɩ bɔnanɛ a jʋnɛ Ebal gɔ̃gʋɔnna a hulene a sɔ thɩmɩɩr besɔɔkɛ 'laanɛnɩ sʋ̃ɔ. 30 Gɔ̃gɔnasɔɔle hale Jʋrdɛ̃ iiro, ʋ̃ʋ bilo, hʋɛraakɛ n jalanɩ wi lõ paar, Kanãadaraa dʋɔ kɛ hanɩ Jʋrdɛ̃ ɓɛlɛnɔ, ka Gɩlgal dɩɩ pɛrnɩ ƴɩɛ a khunǝ Moree Sɛn thɩrasɔ kɩrɔ. 31 Na iire Jʋrdɛ̃ kɛ na gbe sɩ na lõ na tee dɩɩkɛra Thãgba Kɔ̃tɩn anɩ Thãgba n ha nɩnɩ na tooro. 32 Nɩ dɔ bʋrɛ a na nɛ nũu jɔfʋsɔ na dɩɩrɛsɔɔraakɛ mɩ n ha nɩnɩ nĩ a na cʋɛna gɩ.